സാധാരണ ജീവിത്തില്‍ നിന്നൊരു സിനിമ- ജാനകി ജാനേ
തീര്‍ത്തും സാധാരണമായൊരു ജീവിതത്തില്‍ അപ്രതീക്ഷിതമായി സംഭവിക്കുന്ന ചില കാര്യങ്ങള്‍ അവരെ എങ്ങനെ ബാധിക്കുന്നുവെന്നും പ്രതിസന്ധികളെ സാവകാശത്തിലെങ്കിലും എങ്ങനെ മറികടക്കാമെന്നും ഒച്ചയും ബഹളവുമൊന്നുമില്ലാതെ അവതരിപ്പിക്കുന്നു ജാനകി ജാനേ. കുടുംബ പ്രേക്ഷകര്‍ക്ക് ധൈര്യമായി കാണാനാവുമെന്നതു തന്നെയാണ് ഈ ചിത്രത്തിന്റെ പ്രധാന പ്രത്യേകത.
ജാനകി ജാനേ
Movie: Janaki Jaane
Language: Malayalam
Genre: Comedy, Drama, Family
Cast: Saiju Kururp, Navya Nair, Johny Antoney, Sharafudheen, Anarkkali Marakkar, Kottayam Nazeer, Sminu Sijo, Pramod Velliyanad, George Kora, Anwar Shareef, Jordi Poonjar, Vidhya Vijaykumar, Sathi Premji, Dhyaan Sreenivasan
Director: Aneesh Upasana
Writer: Aneesh Upasana, Anil Narayanan, Rohan Raj
Duration: 2 Hours 4 Minutes
Rating: 3.5 Star
സാധാരണ ജീവിത്തില്‍ നിന്നൊരു സിനിമ- ജാനകി ജാനേ
സാധാരണക്കാരുടെ ജീവിതത്തില്‍ നിന്നും ഒരു കഷണം കണ്ടെടുത്താല്‍ അതിലൊരു ഭാഗം ജാനകി ജാനെയിലുണ്ടാകും. തീര്‍ത്തും സാധാരണക്കാരിയായ ഒരു യുവതിയും യുവാവും അവരുടെ കുടുംബവും ചേര്‍ന്ന് ഒട്ടും പരിചിതമല്ലാത്ത ഒരു സംഭവത്തിന് ഇരയാകേണ്ടി വരുമ്പോഴുണ്ടാകുന്ന പകപ്പും പതര്‍ച്ചയും ഒട്ടും വൈകാരികമോ നാടകീയമോ ആകാതെ വെള്ളിത്തിരയിലെത്തിക്കാന്‍ സാധിച്ചിട്ടുണ്ട് അനീഷ് ഉപാസനയ്ക്ക്.
ഏട്ടന്‍ ഭാഗം വെക്കാന്‍ നിര്‍ബന്ധിക്കുന്നൊരു തറവാട്ടു വീട്ടിലെ അമ്മയും മകളും അവളെ കെട്ടാനെത്തിയ യുവാവും ചേര്‍ന്നൊരു സിനിമയാണ് ഒറ്റവാക്കില്‍ ജാനകി ജാനേ. ഇരയാക്കപ്പെടുന്ന ജീവിതങ്ങള്‍ തങ്ങള്‍ സ്വയവും മറ്റുള്ളവരുടെ സ്വാധീനത്താലും മനസ്സ് അടിയറവെക്കാന്‍ നിര്‍ബന്ധിക്കപ്പെടും. എന്നിട്ടും താങ്ങായി നിന്ന് ഉയര്‍ത്തിക്കൊണ്ടുവരാനും പ്രചോദനം നല്‍കുന്ന കാര്യങ്ങളിലൂടെ മാറ്റിയെടുക്കാനും ആരെങ്കിലുമുണ്ടാകുമ്പോള്‍ അതേ ആളിലുണ്ടാകുന്ന മാറ്റവും വരച്ചു കാട്ടുന്നു ഈ ചിത്രം. നവ്യാ നായരുടെ മുന്‍ ചിത്രമായ ഒരുത്തീയുടെ അത്രയില്ലെങ്കിലും പെണ്‍കുട്ടികള്‍ക്ക് വലിയ പ്രചോദനമാകാന്‍ ഈ സിനിമ സഹായിക്കും.
എല്ലാറ്റിനേയും പേടിയുള്ള ജാനകി വിശ്വനാഥന്‍ എന്ന പെണ്‍കുട്ടി അമ്മയോടൊപ്പമാണ് താമസിക്കുന്നത്. പേടിക്കാരിയാണെങ്കിലും വീട്ടിലെ എല്ലാ കാര്യങ്ങളും നോക്കി നടത്തുന്നത് അവളാണ്. പ്രസ്സില്‍ ജോലിയുള്ള അവള്‍ക്ക് ഒച്ചയേയും കറുപ്പിനേയും ഇരുട്ടിനേയും മാത്രമല്ല, ഉറക്കെയൊന്ന് സംസാരിക്കാനും ഉച്ചത്തിലാരെങ്കിലും സംസാരിക്കുന്നത് കേള്‍ക്കുന്നതുപോലും വലിയ പേടിയാണ്. എന്തിനധികം ടിക്കറ്റിന്റെ ബാക്കി പൈസ കണ്ടക്ടറോട് ചോദിക്കാന്‍ പോലും പേടിയുള്ളൊരു വല്ലാത്ത ജന്മം. അര്‍ജ്ജുനന്റെ പര്യായങ്ങള്‍ എത്ര തവണ ചൊല്ലിയാലും പേടി മാറാത്ത ജാനകി. നവ്യാ നായരാണ് പ്രധാന കഥാപാത്രമായ ജാനകി. ഒരുത്തീയിലെ പോലെ തന്നെയേല്‍പ്പിച്ച കഥാപാത്രത്തെ ഭംഗിയായി പ്രേക്ഷകരിലേക്കെത്തിക്കാന്‍ നവ്യയ്ക്ക് സാധിച്ചിട്ടുണ്ട്. ജാനകിയുടെ പേടി തന്റെ പേടിയാക്കി കാഴ്ചക്കാരിലെത്തിച്ചിട്ടുണ്ട് നവ്യ.
ഉണ്ണി മുകുന്ദന്‍ എന്ന സബ് കോണ്‍ട്രാക്ടറെ സിനിമയുടെ നട്ടെല്ലായി കൊണ്ടുവരുന്നതിനും പ്രേക്ഷകരെ രസിപ്പിക്കാനും ചിരിപ്പിക്കാനും സൈജു കുറുപ്പിന് സാധിച്ചിട്ടുണ്ട്. ഏത് വേഷവും തന്നെ വിശ്വസിച്ച് ഏല്‍പ്പിക്കാമെന്ന് സൈജു ഒരിക്കല്‍ കൂടി ഈ സിനിമയില്‍ തെളിയിച്ചു. നായകനായും സഹനടനായും വില്ലനായുമെല്ലാം സൈജു പല ചിത്രങ്ങളില്‍ ഇതിനകം തന്റെ കഴിവ് തെളിയിച്ചിട്ടുണ്ട്. ഒരുപക്ഷേ, കൂട്ടത്തിലൊരാള്‍ എന്നൊരു തോന്നല്‍ സൈജുവിന്റെ ആകാരത്തിനും ഭാവങ്ങള്‍ക്കും വരുന്നതുകൊണ്ടാകാം പ്രേക്ഷകര്‍ക്ക് ഇയാളെ ഏത് വേഷത്തിലും സ്വീകരിക്കാനാവുന്നത്. പിന്നേയും പിന്നേയും ഒരുത്തീ സിനിമ പ്രേക്ഷകരെ ഓര്‍മിപ്പിക്കുന്നുണ്ടെങ്കില്‍ അതിനു കാരണം സൈജുവും നവ്യയും വീണ്ടും ജോഡികളായി എത്തിയതുതന്നെയാണ്.
ഈ സിനിമയില്‍ പ്രധാനമായി തോന്നിയ ഒരു സംശയം സൈജുവിന്റെ ഉണ്ണി മുകുന്ദന്‍ എന്ന പേരാണ്. ഉണ്ണി മുകുന്ദന്‍ എന്ന പേര് കഥാപാത്രത്തിന് തെരഞ്ഞെടുക്കാന്‍ എന്തായിരിക്കും കാരണം? ഇതേ പേരില്‍ ഒരു നടനുണ്ടെന്നത് മാത്രമല്ല മുകുന്ദന്‍ ഉണ്ണി അസോസിയേറ്റ്‌സ് എന്നൊരു സിനിമയും അതിലെ പ്രധാന കഥാപാത്രവും ഇതേപേരില്‍ അടുത്തിടെ വന്നിരുന്നല്ലോ.
നവ്യയുടേയും സൈജുവിന്റേയും അഭിനയത്തോളമോ അതിനു മുകളിലോ നില്‍ക്കുന്നുണ്ട് അധികം രംഗങ്ങളിലൊന്നും വരുന്നില്ലെങ്കിലും സ്മിനു സിജോയുടെ സത്യഭാമ. 'പാവം പിടിച്ച അമ്മയില്‍ നിന്നും സഹോദരിയില്‍ നിന്നും' 'കുശുമ്പത്തി അമ്മായി'യിലേക്കുള്ള സ്മിനുവിന്റെ കൂടുമാറ്റം മികവുറ്റതാക്കാന്‍ അവര്‍ക്ക് സാധിച്ചിട്ടുണ്ട്.
കഥയുടെ ഒരു പ്രത്യേക ഘട്ടത്തില്‍ കാര്യങ്ങളെ മറിച്ചു ചിന്തിപ്പിക്കാന്‍ വേണ്ടിയാണ് ഷറഫുദ്ദീന്റെ മനു ഭാസ്‌ക്കറും അനാര്‍ക്കലി മരക്കാറുടെ മരിയയും വരുന്നതെങ്കിലും അവരും തങ്ങളുടെ പ്രകടനത്തില്‍ പ്രേക്ഷകരുടെ ഇഷ്ടം പിടിച്ചുപറ്റും. ജോണി ആന്റണിയാകട്ടെ ഏത് നാട്ടിലും കാണുന്ന 'സുകു'വായിട്ടുണ്ട്.
വലിയ തത്വചിന്തകളോ ആദര്‍ശങ്ങളോ ഒന്നും പറയാതെ സാധാരണമായൊരു കുടംബത്തിന് ആസ്വദിക്കാനാവുന്ന വിധത്തില്‍ ജാനകി ജാനേയെ ഒരുക്കിയെടുത്തിട്ടുണ്ട് അണിയറ പ്രവര്‍ത്തകര്‍. കഥയില്‍ ഇരിങ്ങാലക്കുട നിയമസഭാ തെരഞ്ഞെടുപ്പാണ് നടക്കുന്നതെങ്കിലും ഒരു വാര്‍ഡ് തെരഞ്ഞെടുപ്പിന്റെ പ്രചരണ പ്രതീതി മാത്രമാണ് പ്രേക്ഷകര്‍ക്ക് തോന്നിക്കുന്നതെന്നത് എടുത്തു പറയേണ്ടുന്ന ന്യൂനതയാണ്. ഒരല്‍പ്പം കൂടി കൊഴുപ്പിക്കേണ്ടിയിരുന്നു തെരഞ്ഞെടുപ്പ് പ്രചാരണം.
കണ്ണിനു കുളിരേകുന്ന പശ്ചാതലം, മലയാളി മറന്നു തുടങ്ങിയ പഴയ ഗ്രാമീണ വഴികള്‍, മനസ്സിനെ തൊടുന്ന ഗാനങ്ങള്‍ എന്നിവ ജാനകി ജാനെയുടെ എടുത്തു പറയേണ്ടുന്ന സവിശേഷതകളാണ്. ഗൃഹലക്ഷ്മി പ്രൊഡക്ഷന്‍സിന്റെ ബാനറില്‍ ഷേണുഗ ജയ്തിലക്, ഷെര്‍ഗ സന്ദീപ്, ഷെഗ്ന ഗംഗാധരന്‍ എന്നിവരാണ് ജാനകി ജാനെ നിര്‍മിച്ചിരിക്കുന്നത്. കുടുംബ പ്രേക്ഷകര്‍ക്ക് ധൈര്യമായി തിയേറ്ററില്‍ ചെന്ന് കാണാം ഈ സിനിമ.
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ