നിസ്സഹായതയല്ല നിലപാടുകളാണ് അറിയിപ്പ് (അറിയിപ്പ് / Declaration)
Movie: Ariyippu/ Declaration
Language: Malayalam
Genre: Drama
Cast: Kunchacko Boban, Divyaprabha, Kiran Peethambaran, Rohith Gupta, Anju Thakur, Athulya Ashadam, Kartikey Saksena, Saifudheen
Director: Mahesh Narayanan
Writer: Mahesh Narayanan
Duration: 107 Minutes
Rating: 3.5 Star
നിസ്സഹായരായി പോകുന്ന മനുഷ്യര്ക്ക് ചിലപ്പോള് ഉറക്കെ നിലവിളിക്കാന് കഴിഞ്ഞില്ലെന്നു വരാം. പക്ഷേ, തങ്ങളുടെ നിലപാടുകള്കൊണ്ട് അടയാളപ്പെടുത്താനായേക്കും. അതാണ് മഹേഷ് നാരായണന് രചനയും സംവിധാനവും നിര്വഹിച്ച കുഞ്ചാക്കോ ബോബന്- ദിവ്യപ്രഭ ചിത്രം അറിയിപ്പ്.
എല്ലാറ്റില് നിന്നും മോചനം നേടാന് സന്ധി ചെയ്ത് സൗഭാഗ്യങ്ങളിലേക്ക് ഒപ്പുവെക്കുന്ന ഒരാള്ക്ക് മോചനവും സമാധാനവും ഹരീഷിനെ പോലെ എല്ലായ്പോഴും അകലെയായിരിക്കും. എന്നാല് രശ്മിയെ പോലെ സ്വന്തം ജീവിതത്തെ അടയാളപ്പെടുത്തേണ്ടത് തന്റെ കാഴ്ചകളിലൂടെയാണെന്ന് തീരുമാനമെടുക്കുന്നവള്ക്ക് വിരലില് കുടുങ്ങിപ്പോയ മോതിരത്തില് നിന്നുള്പ്പെടെ പുറത്തേക്ക് കടക്കാനാവും. ജോലിക്ക് ബുദ്ധിമുട്ടായിട്ടു പോലും ഊരിയെടുക്കാന് സാധിക്കാതിരുന്ന ആ മോതിരം എത്ര പെട്ടെന്നാണ് രശ്മിക്ക് മുറിച്ചു മാറ്റാനായത്. നിലപാടുകളാണ് അടയാളപ്പെടുത്തലുകളെന്ന് അറിയിപ്പ് ഓര്മിപ്പിക്കുന്നു.
ഉത്തര്പ്രദേശിലെ നോയിഡയില് ഒരു മെഡിക്കല് ഗ്ലൗസ് നിര്മാണ ഫാക്ടറിയില് ജോലി ചെയ്യുന്ന ദമ്പതികളും അവരുടെ ചെറിയ ജീവിതത്തിലേക്ക് കടന്നുവരുന്ന അപ്രതീക്ഷിത സംഭവങ്ങളുമാണ് ഒന്നേമുക്കാല് മണിക്കൂര് കൊണ്ട് മഹേഷ് നാരായണനും സംഘവും പറഞ്ഞു തീര്ക്കുന്നത്. വിദേശ ജോലിക്കു ശ്രമിക്കാന് ഡല്ഹിയുടെ പ്രാന്തപ്രദേശങ്ങളിലെത്തിയ ദമ്പതികള്ക്ക് കോവിഡും അനുബന്ധ സംഗതികളും യാത്ര മുടക്കിയായപ്പോള് അവര് ഒരു കമ്പനിയില് ജോലി ചെയ്യുകയും ഒരു മുറിയുടെ അകത്തളങ്ങളിലേക്ക് ഒതുങ്ങുകയും ചെയ്യുന്നു. നാട്ടിലേക്കു പോലും പോകാതെ പകല് ജോലി ചെയ്യുന്ന ഭാര്യയും രാത്രി ഷിഫ്റ്റില് പ്രവര്ത്തിക്കുന്ന ഭര്ത്താവും ചേര്ന്ന് നടത്തുന്ന പിടിച്ചു നില്ക്കല് പോരാട്ടങ്ങളെയാണ് പെട്ടെന്നൊരു സംഭവം തകര്ത്തെറിയുന്നത്. വിദേശ യാത്രയുടെ സ്വപ്നങ്ങള്ക്ക് പോലും മങ്ങലേല്ക്കുന്ന കാലത്താണ് ജീവിതത്തിലേക്ക് സംഭവങ്ങള് കടന്നെത്തുന്നത്.
മലയാള സിനിമാ പ്രേക്ഷകര്ക്ക് തീരെ പരിചിതമല്ലാത്ത അന്തരീക്ഷത്തിലൂടെയാണ് അറിയിപ്പ് കടന്നു പോകുന്നത്. നോയിഡയും ഗാസിയാബാദും ഉത്തര്പ്രദേശ് പൊലീസുമെല്ലാം ചേരുന്ന സിനിമയില് മലയാളം പോലെ ആശയവിനിമയത്തിന് ഹിന്ദിയും ഇടക്കെപ്പോഴെങ്കിലും തമിഴും കടന്നുവരുന്നുണ്ട്. സാധാരണ പ്രേക്ഷകര്ക്ക് ഒരേ സമയം ഒന്നിലേറെ ഭാഷകള് കടന്നുവരുന്നത് ചെറിയ ബുദ്ധിമുട്ടുകള് സൃഷ്ടിക്കുമെങ്കിലും കഥാപശ്ചാതലം അതാവശ്യപ്പെടുന്നുണ്ട്.
അടുത്ത കാലത്ത് മലയാള സിനിമയില് താരമൂല്യങ്ങളേക്കാള് ശക്തമായ പ്രമേയങ്ങള് അവതരിപ്പിക്കാന് ധൈര്യം കാണിക്കുന്നവരുടെ എണ്ണം വര്ധിച്ചിട്ടുണ്ട്. അതിലുള്പ്പെടുന്നുണ്ട് അറിയിപ്പും. തന്റെ 'ചോക്ലേറ്റ്' പദവിയില് നിന്നും തെറിച്ചിറങ്ങി 'പട' പോലൊരു സിനിമയില് അഭിനയിക്കാന് കുഞ്ചാക്കോ ബോബന് നടത്തിയ നീക്കത്തിനും ഒരു പടി മുകളിലാണ് അറിയിപ്പിലെ ഹരീഷ്. നായിക ദിവ്യപ്രഭയുടെ രശ്മിക്കാണ് തന്നേക്കാള് പ്രാധാന്യമെന്ന് നിര്മാതാക്കളിലൊരാള് കൂടിയായ കുഞ്ചാക്കോ ബോബന് അറിയാഞ്ഞിട്ടല്ല. ഒരുപക്ഷേ, ഹൗ ഓള്ഡ് ആര് യുവില് മഞ്ജുവാര്യര്ക്ക് താഴെ നില്ക്കുന്ന കഥാപാത്രം ഏറ്റെടുക്കുമ്പോള് മലയാളത്തിലെ അതിശക്തയായ അഭിനേത്രിയാണവരെന്ന ന്യായമെങ്കിലും പറയാനുണ്ടായിരുന്നു. നടനിലും വികൃതിയിലും വേഷമിട്ട ദിവ്യപ്രഭയ്ക്ക് അതിശക്തമായ കഥാപാത്രം നല്കി കൂടെ നില്ക്കുന്ന മികവിന് കുഞ്ചാക്കോ ബോബന് അഭിനന്ദനങ്ങള് അര്ഹിക്കുന്നു. തനിക്കല്ല, സിനിമയ്ക്കാണ് പ്രാധാന്യമെന്ന് അദ്ദേഹം തിരിച്ചറിയുന്നുണ്ട്.
അറിയിപ്പിലെ ഏറ്റവും എടുത്തു പറയേണ്ട അഭിനയവും കഥാപാത്രവും ദിവ്യപ്രഭയുടേത് തന്നെയാണ്. മുഖത്ത് മാസ്കും കടുത്ത തണുപ്പിനെ നേരിടാനുള്ള വസ്ത്രങ്ങളുമണിഞ്ഞ് രശ്മിയെന്ന കഥാപാത്രത്തെ അവതരിപ്പിക്കുന്ന ദിവ്യപ്രഭ കഥാപാത്രമായി ജീവിക്കുകയായിരുന്നു. ഒരിക്കല് പോലും അവര് നടിയാണെന്ന് പ്രേക്ഷകര്ക്ക് തോന്നുകയേയില്ല.
വിദേശ ജോലിക്കുള്ള തൊഴില് പരിചയ വീഡിയോയായി ഭര്ത്താവ് ഹരീഷ് ചിത്രീകരിച്ച രശ്മിയുടെ ഫാക്ടറിയില് ജോലി ചെയ്യുന്ന ദൃശ്യങ്ങളോടൊപ്പം അതേ ഫാക്ടറിയില് ചിത്രീകരിച്ച ഒരു അശ്ലീല വീഡിയോ കൂടി എഡിറ്റ് ചെയ്ത് ചേര്ത്ത് കമ്പനി വാട്സ് ആപ് ഗ്രൂപ്പുകളില് പ്രചരിക്കുന്നതോടെയാണ് ഇവരുടെ ജീവിതം മാറിമറിയുന്നത്. എഡിറ്റ് ചെയ്ത വീഡിയോ തന്റേതല്ലെന്ന് തെളിയിക്കാന് രശ്മി നടത്തുന്ന പെടാപാടുകള്ക്ക് ആദ്യം ഭര്ത്താവ് കൂട്ടിനുണ്ടെങ്കിലും പിന്നെ അയാളും കൈവിടുന്നതോടെ തന്റെ നിരപരാധിത്വം സ്ഥാപിക്കേണ്ടത് അവളുടെ മാത്രം ആവശ്യമായി തീരുന്നു. അതിനുവേണ്ടി കടുത്ത പോരാട്ടങ്ങള് നടത്തുന്ന അവള് ഒടുവില് അതില് വിജയം വരിക്കുന്നുമുണ്ട്. അതിനിടയിലുണ്ടാകുന്ന നഷ്ടങ്ങളൊന്നും തീരാ നഷ്ടങ്ങളായി പരിഗണിക്കാതിരിക്കാന് ജീവിതം അപ്പോഴേക്കും അവളെ പഠിപ്പിച്ചിരുന്നു.
രശ്മി നേരിട്ട പ്രതിസന്ധികള്ക്ക് ഹരീഷിന് ഒടുവില് നേട്ടമുണ്ടായെന്ന് കരുതുമ്പോഴും ഹരീഷല്ല, രശ്മിയാണ് മനസ്സമാധാനത്തിന്റെ ലോകത്തെത്തിയതെന്നും ഹരീഷ് സഞ്ചരിച്ച ദൂരങ്ങളില് അയാളുടെ ദുഃസ്വപ്നങ്ങളും കൂടെയുണ്ടായിരുന്നുവെന്ന് ചലച്ചിത്രം അവസാനിക്കുമ്പോള് തിരിച്ചറിയും.
പ്രതിസന്ധികളിലകപ്പെടുന്ന പെണ്കുട്ടികളോട് നിസ്സഹായമായി പിന്മാറാന് ആവശ്യപ്പെടുന്ന ബഹുഭൂരിപക്ഷത്തോടു മല്ലടിച്ച് താന് ശരിയായിരുന്നുവെന്ന് തെളിയിക്കുന്ന രശ്മി തന്നെയാവണം പുതിയ കാലത്തിന്റെ പ്രതീകം. അടുത്തിടെ പുറത്തിറങ്ങിയ അമലാ പോള് ചിത്രം ടീച്ചര് പോലെ പെണ്കുട്ടികള്ക്ക് പ്രചോദനവും സമൂഹത്തിന് ബോധ്യപ്പെടുത്തലുകളും നല്കുന്നുണ്ട് അടയാളം.
സംവിധായകന് മഹേഷ് നാരായണന് തന്നെയാണ് സിനിമയുടെ രചനയും നിര്വഹിച്ചിരിക്കുന്നത്. ടേക്ക് ഓഫ്, മാലിക്, സീ യൂ സൂണ് എന്നിവയ്ക്ക് ശേഷം വളരെ വ്യത്യസ്തമായ ഒരു പ്രമേയം തന്നെയാണ് മഹേഷ് നാരായണന് പ്രേക്ഷകര്ക്കായി ഒരുക്കിവെച്ചിരിക്കുന്നത്. രാഹുല് രാധാകൃഷ്ണനോടൊപ്പം എഡിറ്റിംഗും നിര്വഹിച്ചിട്ടുണ്ട് സംവിധായകന്.
നിസ്സഹായമായ ജീവിതങ്ങളെ അടയാളപ്പെടുത്തുന്ന തരത്തില് സുഷിന് ശ്യാം രേഖപ്പെടുത്തിവെച്ച സംഗീതവും സാനു ജോണ് വറുഗീസിന്റെ ക്യാമറയും എടുത്തുപറയേണ്ട സവിശേഷതകളാണ്. ഉത്തര്പ്രദേശിന്റെ വ്യവസായ ഭൂമിയിലൂടെ മാത്രമല്ല ചെറിയൊരു സമയത്ത് ഗ്രാമീണതയുടെ വരണ്ട കാഴ്ചകളും ക്യാമറ ഒപ്പിയിട്ടുണ്ട്. ആ ഗ്രാമത്തില്, ഫാക്ടറി ജോലിക്കാരിയായിരിക്കെ ആത്മഹത്യ ചെയ്ത പെണ്കുട്ടിയുടെ അമ്മയുടെ കണ്ണുകളിലല്ലാതെ മറ്റെവിടേയും നനവുണ്ടായിരുന്നില്ല.
ഒടുവില് കമ്പനിയുടെ ബോര്ഡില് രശ്മിക്കനുകൂലമായ അറിയിപ്പ് പ്രത്യക്ഷപ്പെടുമ്പോള് അവള് നീല ഗ്ലൗസുകള് കുറ്റമറ്റതെന്ന് പരിശോധിച്ചുറപ്പിക്കുന്നുണ്ടായിരുന്നു. അയാളാകട്ടെ കൈതൊട്ടുറപ്പിക്കേണ്ടതില്ലാത്ത വെളുത്ത ഗ്ലൗസുകള് നിര്മിക്കുന്ന വിദേശ ഫാക്ടറിയില് ജോലിക്കാരനും.
മഹേഷ് നാരായണന്റെ മൂവിംഗ് നറേറ്റീവ്സുമായി ചേര്ന്ന് കുഞ്ചാക്കോ ബോബന് പ്രൊഡക്ഷന്സിന്റെ ബാനറില് കുഞ്ചാക്കോ ബോബനും ഷെബിന് ബക്കര് പ്രൊഡക്ഷന്സിന്റെ ബാനറില് ഷബിന് ബക്കറുമാണ് അറിയിപ്പ് നിര്മിച്ചത്. ഒ ടി ടി പ്ലാറ്റ്ഫോമായ നെറ്റ്ഫ്ളിക്സില് റിലീസ് ചെയ്ത അറിയിപ്പ് സ്വിറ്റ്സര്ലാന്റിലെ ലൊക്കാര്ണോ ഫിലിം ഫെസ്റ്റിവല്, ബി എഫ് ഐ ലണ്ടന് ഫിലിം ഫെസ്റ്റിവല്, ബുസാന് ഇന്റര്നാഷണല് ഫിലിം ഫെസ്റ്റിവല്, സാന് ഡിയാഗോ ഏഷ്യന് ഫിലിം ഫെസ്റ്റിവല്, ഐ എഫ് എഫ് കെ, ഇന്ത്യന് പനോരമ, ഹോങ്കോങ് ഏഷ്യന് ഫിലിം ഫെസ്റ്റിവല് തുടങ്ങി നിരവധി ചലച്ചിത്ര മേളകളിലേക്ക് തെരഞ്ഞെടുക്കപ്പെട്ടത് വെറുതെയല്ല.
(THE TIMES OF INDIA സമയം മലയാളം 2022 ഡിസംബര് 16)
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ