തൊണ്ണൂറുകളിലെ ക്യാമ്പസ് കാലത്തേക്കൊന്ന് തിരികെപ്പോകാം (ലവ്ഫുള്ളി യുവേഴ്സ് വേദ)
കേരളത്തിലെ കലാലയങ്ങള് അരാഷ്ട്രീയവത്ക്കരിക്കപ്പെടുന്നതിന് മുമ്പ് തൊണ്ണൂറുകളുടെ ഒടുവില് രാഷ്ട്രീയവും പ്രണയവും കഥയും കവിതയും നിറഞ്ഞ ഒരു ക്യാമ്പസ് സിനിമ
ലവ്ഫുള്ളി യുവേഴ്സ് വേദ
Movie: Lovefully Yours Veda
Language: Malayalam
Genre: Drama, Romantic
Cast: Rajisha Vijayan, Venkitesh V P, Sreenath Bhasi, Anikha Surendran, Gautham Menon, Thasni Khan, Appani Sarath, Renjith Sekhar, Shaju Sreedhar, Nilja K Baby, Sruthi Jayan, Vijayakumar, Chandunath
Director: Pragesh Sukumaran
Writer: Babu Vailathoor
Duration: 2 Hours 14 Minutes
Rating: 3 Star
തൊണ്ണൂറുകളുടെ രണ്ടാം പകുതിയില് തൃശൂരിലെ ഒരു ക്യാമ്പസിലാണ് ലവ്ഫുള്ളി യുവേഴ്സ് വേദ നടക്കുന്നത്. ഒരുപക്ഷേ, കേരളത്തിലെ കലാലയങ്ങള് അരാഷ്ട്രീയവത്ക്കരിക്കപ്പെടുന്നതിന് തൊട്ടുമുമ്പായിരിക്കണം ഈ കഥ അരങ്ങേറുന്നത്. തൃശൂരിലെ ശ്രീ വര്മ കോളജില് മാത്രമല്ല കാസര്ക്കോട് മുതല് തിരുവനന്തപുരം വരെ ഏത് ക്യാമ്പസിലും നടന്നേക്കാവുന്ന ഒരു കഥയെന്നാണ് ഈ ചിത്രത്തെ പറയാനാവുക.
ക്യാമ്പസായതിനാല് തന്നെ പ്രണയവും വിപ്ലവവും പഠനവും മാത്രമല്ല കഥയും കവിതയും കോളജ് രാഷ്ട്രീയവും കലോത്സവങ്ങളും അടിയും ഇടിയുമെല്ലാം ചേര്ന്നാണ് കാഴ്ചക്കാരനെ ലവ്ഫുള്ളി യുവേഴ്സ് വേദ രണ്ടേകാല് മണിക്കൂര് പിടിച്ചിരുന്നത്. പുതിയ തലമുറയേക്കാള് മുപ്പത്തിയഞ്ചിന് മുകളില് പ്രായമുള്ളവര്ക്കായിരിക്കും ഈ സിനിമയും അതിലെ രംഗങ്ങളും പെട്ടെന്ന് തിരിച്ചറിയാനാവുക. തങ്ങളുടെ ക്യാമ്പസ് കാലത്തേക്കൊന്നു മടങ്ങാനും ഓര്മകളിലേക്കിറങ്ങി കുറച്ചു സമയം ആ പഴയ തണല് മരങ്ങള്ക്കു ചുവടെ ഇരിക്കാനും നീണ്ട വരാന്തകളിലൂടെ വെറുതെയൊന്ന് നടക്കാനും പ്രേരിപ്പിച്ചേക്കും ലവ്ഫുള്ളി യുവേഴ്സ് വേദ.
ആശ്രമത്തില് വളര്ന്ന ശ്രീവേദയെന്ന കവയത്രിയുടെ ഓര്മകളിലൂടെയാണ് സിനിമ പിറകോട്ടേക്ക് സഞ്ചരിക്കുന്നത്. പതിവ് ക്യാമ്പസ് സിനിമകളുടെ എല്ലാ ചേരുവകളുമുള്ളതിനാല് തന്നെ ഇതിനകം മലയാളത്തില് കണ്ട കലാലയ ചിത്രങ്ങളില് നിന്നും കാര്യമായ മാറ്റമോ രംഗങ്ങളോ ഒന്നും ഈ സിനിമ നല്കുന്നില്ല. എങ്കിലും കണ്ടിരിക്കാന് പ്രേരിപ്പിക്കും.
സിനിമ തുടങ്ങുന്നത് പുതിയ ക്യാമ്പസ് തലമുറയിലും അവരുടെ ഝടുതിയിലുള്ള പാട്ടുംകൂത്തുമൊക്കെയായിട്ടാണ്. എന്നാല് കഥാഗതി ഫ്ളാഷ്ബാക്കിലേക്കെത്തുന്നതോടെ പഴയകാല മലയാള സിനിമകളുടെ മട്ടില് സാവകാശത്തില് കഥ പറയാനും തുടര്ച്ചയായി കൊണ്ടുപോകുന്ന തരത്തിലേക്കും കഥാകൃത്തും സംവിധായകനും എത്തിക്കുന്നു.
സ്ഥിരമായി കാണുന്ന ക്യാമ്പസ് സിനിമകളില് നിന്നും ലവ്ഫുള്ളി യുവേഴ്സ് വേദയില് കണ്ട പ്രധാന വ്യത്യാസം ശ്രീ വര്മ കോളജിലെ രാഷ്ട്രീയ പാര്ട്ടികളായ എ എസ് യുവും എസ് എഫ് വൈയും എതിര്ചേരികളിലല്ല എന്നതാണ്. ഇരു സംഘടനകളും പരസ്പരം ഒത്തൊരുമയോടെയാണ് കാര്യങ്ങള് കൊണ്ടുപോകുന്നത്. പതിവ് കേരള ക്യാമ്പസ് പോലെ എസ് വൈ എഫിനാണ് ശ്രീ വര്മയിലും കൂടുതല് സ്വാധീനമെങ്കിലും ഖദര് ധാരികളായ എ എസ് യുവിനെ തങ്ങളോടൊപ്പം കൂട്ടാനും അഭിപ്രായങ്ങളും നിര്ദ്ദേശങ്ങളും സ്വീകരിക്കാനും പ്രവര്ത്തനങ്ങള് നടത്താനും ജനാധിപത്യ മര്യാദയില് അനുവദിക്കുന്നുണ്ട്. മാത്രമല്ല ഒരുഘട്ടത്തില് കോളജിന്റെ പൊതുകാര്യത്തിന് എസ് വൈ എഫിനോടൊപ്പം ചേര്ന്ന് ഇന്ക്വിലാബ് സിന്ദാബാദ് വിളിക്കാനും എ എസ് യു തയ്യാറാകുന്നുണ്ട്.
എസ് വൈ എഫും എ എസ് യുവും മാത്രമുള്ള ക്യാമ്പസില് രാഷ്ട്രീയത്തിനപ്പുറത്ത് വില്ലത്തരം കാണിക്കാന് ഒരു ഗ്യാംഗ് പ്രവര്ത്തിക്കുന്നുണ്ട്- ഗസ്റ്റപ്പോ. അഡോള്ഫ് ഹിറ്റ്ലറുടെ ഭരണാകലത്ത് നിലവിലുണ്ടായിരുന്ന ഭരണകൂടത്തിന് വിരുദ്ധമായതെന്നും അടിച്ചമര്ത്തുന്ന പൊലീസ് സേനയുടെ പേരാണ് അഞ്ചംഗ സംഘത്തിന് കൊടുത്തിരിക്കുന്നതെങ്കിലും അവര് കോളജ് ക്യാമ്പസില് കാര്യമായ സ്വാധീനമൊന്നും ചെലുത്തുന്നില്ല. ഹിറ്റ്ലറുടെ സ്വസ്തി ചിഹ്നം തന്നെയാണ് അവര് തങ്ങളുടെ അടയാളമായി സ്വീകരിച്ചിരിക്കുന്നത്. കോളജില് വലിയ റോളൊന്നുമില്ലെങ്കിലും കോളജിന് പുറത്ത് വിദ്യാര്ഥികള്ക്കെതിരെ നടക്കുന്ന നീക്കങ്ങള് ഇവര് മണത്തറിഞ്ഞ് ആവശ്യമായ മുന്നൊരുക്കങ്ങള് നടത്തുന്നതുകൊണ്ടായിരിക്കണം ശ്രീനാഥ് ഭാസിയുടെ രഞ്ജന് അബ്രഹാമിനും സംഘത്തിനും അണിയറ പ്രവര്ത്തകര് ഈ പേര് കൊടുത്തിരിക്കുന്നത്.
എല്ലാ നന്മകളും ഒത്തിണങ്ങിയ നായകനും നിഷ്കളങ്കയായ നായികയും ശകുന്തളയ്ക്ക് പ്രിയംവദയേയും അനസൂയയേയും പോലുള്ള തോഴിമാരും നായകന്റെ സൗഹൃദങ്ങളും ചേരുന്ന കഥയില് വില്ലത്തരവുമായി വരുന്നത് കോളജ് മാനേജ്മെന്റാണ്. കോളജ് ട്രസ്റ്റി ശ്രീകുമാര് കര്ത്തയായി തമിഴ് സംവിധായകനും എഴുത്തുകാരനുമായ ഗൗതം വാസുദേവ മേനോന് ഈ ഭാഗം ഗംഭീരമാക്കുന്നുമുണ്ട്.
സിനിമയിലെ പ്രധാന കഥാപാത്രമായ കവയത്രിക്ക് അനുയോജ്യമായ തരത്തില് കവിതയോടടുത്തുള്ള വരികളാണ് പാട്ടുകള്ക്കുള്ളതെന്ന പ്രത്യേകത വേദയ്ക്കുണ്ട്. റഫീക്ക് അഹമ്മദും രതി ശിവരാമനും ധന്യ സുരേഷുമാണ് ഗാനങ്ങള് എഴുതിയിരിക്കുന്നത്.
ശ്രീവര്മ കോളജിലെ ചുമരില് കണ്ട ഒരു കവിതയില് ചെറിയ മാറ്റങ്ങള് വരുത്തി ബഞ്ചാര മ്യൂസിക്കല് ബാന്റ് വേദിയില് അവതരിപ്പിച്ച് വന് ഹിറ്റാക്കുകയാണ്. അതോടെ ആ ഗാനം തന്റെ അനുവാദമില്ലാതെ ഉപയോഗിച്ചതാണെന്ന് അവകാശപ്പെട്ട് ഒരു എഴുത്തുകാരന് രംഗത്തെത്തുന്നു. അങ്ങനെയാണ് ശ്രീവര്മ കോളജിലെ ചുമരില് കുറിച്ച വരികള് ആരുടേതാണെന്ന അന്വേഷണത്തിന് തുടക്കമാകുന്നത്.
സഖാവ് ജീവന്ലാലായി വെങ്കിടേഷ് വി പിയും ശ്രീവേദയായി രജിഷ വിജയനും വേഷമിട്ട ലവ്ഫുള്ളി യുവേഴ്സ് വേദയില് അവരെ ചുറ്റിപ്പറ്റിയാണ് കഥ പുരോഗമിക്കുന്നത്. രജിഷ പതിവുപോലെ വളരെ തന്മയത്വത്തോടെ തന്റെ വേഷം കൈകാര്യം ചെയ്തിട്ടുണ്ട്. ശ്രീനാഥ് ഭാസിക്ക് അധികമൊന്നും ചെയ്യാനില്ലാത്ത സിനിമയില് വെങ്കിടേഷ് നിറഞ്ഞു നില്ക്കുന്നുണ്ട്. കവയത്രിയെ തേടുന്ന മാളുവായി അനിഖ സുരേന്ദ്രനാണ് രംഗത്തുള്ളത്. മനോഹരമായ ഭൂപ്രകൃതി വെള്ളിത്തിരയില് പല തവണ കടന്നുവരുന്നതുകൊണ്ടു തന്നെ കണ്ണിന് കുളിര്മയേകുന്ന ദൃശ്യങ്ങള്ക്ക് ഈ സിനിമയില് പഞ്ഞമില്ല. ക്യാമ്പസിന്റെ കഥ പറയുന്നതിനോടൊപ്പം പരിസ്ഥിതി സൗഹൃദത്തിന്റെ സന്ദേശങ്ങള് കൂടി കൂട്ടിച്ചേര്ക്കാന് അണിയറ പ്രവര്ത്തകര് ശ്രമിച്ചിട്ടുണ്ട്.
രാഹുല് രാജിന്റെ സംഗീതവും ടോബിന് തോമസിന്റെ ക്യാമറയും ചിത്രത്തിന് അനുയോജ്യമായ തരത്തില് പ്രേക്ഷകര്ക്ക് ഫലം കൊടുത്തിട്ടുണ്ട്.
ആര് ടു എന്റര്ടെയ്ന്മെന്റ്സിന്റെ ബാനറില് രാധാകൃഷ്ണന് കളത്തിലും റുവിന് വിശ്വവും നിര്മിച്ച ലവ്ഫുള്ളി യുവേഴ്സ് വേദ പ്രഗേഷ് സുകുമാരന്റെ ആദ്യ സംവിധാന സംരംഭമാണ്.
(THE TIMES OF INDIA സമയം മലയാളം 2023 മാര്ച്ച് 03)
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ