ചെകുത്താനും ദൈവത്തിനുമിടയില് ക്രിസ്റ്റഫര് (ക്രിസ്റ്റഫര്)
നീതിയും നിയമവും നടപ്പാകാതെ പോകുന്ന സമൂഹത്തില് നേരിന്റെ പക്ഷത്തിനായി നീതി നടപ്പാക്കാന് ശ്രമിക്കുന്ന പൊലീസ് ഉദ്യോഗസ്ഥനും അയാള്ക്കു ചുറ്റുമുള്ള സമൂഹത്തിലെ സംഭവങ്ങളുമാണ് ഈ ചിത്രം.
ക്രിസ്റ്റഫര്
Movie: Christopher
Language: Malayalam
Genre: Action, Drama, Thriller
Cast: Mammootty, Vinay Rai, Amala Paul, Aishwarya Lekshmi, Shine Tom Chacko, Dileesh Pothan, R Sarath Kumar, Sneha, Thanseel, Aditi Ravi, Siddique, Deepak Parambol, Shaheen Siddique, Jinu Joseph, Abu Valayamkulam
Director: B Unnikrishnan
Writer: Udayakrishna
Duration: 2 Hours 31 Minutes
Rating: 3.5 Star
ലൂസിഫര് ചെകുത്താനാണെങ്കില് ക്രിസ്റ്റഫര് ദൈവമോ ക്രിസ്തുവിന് ശക്തിയോ ബലമോ കൊടുത്ത ശക്തിയോ ആണ്. ഇതുരണ്ടിനുമിടയില് പെടുന്നതോ ഇവ ചേരുന്നതോ ആയ സൃഷ്ടിയുടെ പേരാണ് മനുഷ്യന്- അയാളാണിവിടുത്തെ ക്രിസ്റ്റഫര്.
സാധാരണ മനുഷ്യജീവിതമല്ലാതെ അതിക്രമങ്ങളും നിരവധി പ്രതിസന്ധികളും നേരിട്ട ജീവിതങ്ങള് ഒന്നിച്ച് ഒരേ വെള്ളിത്തിരയില് പ്രത്യക്ഷപ്പെടുന്ന സിനിമയാണ് ക്രിസ്റ്റഫര്. മമ്മൂട്ടിയും ബി ഉണ്ണികൃഷ്ണനും ഉദയകൃഷ്ണയും ചേര്ന്ന് ആരാധര്ക്കായി ഒരുക്കുന്ന വിരുന്ന്.
യവനികയില് തുടങ്ങി ആവനാഴിയിലേയും ഇന്സ്പെക്ടര് ബല്റാമിലേയും ഇന്സ്പെക്ടര് ബല്റാമെന്ന തന്റെ പൊലീസ് വേഷത്തിന്റെ മൂര്ധന്യത്തിലെത്തിയ മമ്മൂട്ടിയെ അധികനേരമൊന്നും യൂണിഫോമില് കാണാത്ത ചിത്രം കൂടിയാണ് ക്രിസ്റ്റഫര്. തനിക്കു ചുറ്റുമുള്ള ഇരജീവിതങ്ങള്ക്കായി വ്യത്യസ്ത വഴികളിലൂടെ സഞ്ചരിക്കുന്ന പൊലീസ് ഓഫിസറാണ് ക്രിസ്റ്റഫര്. ഡി പി സി എ ഡബ്ല്യു അഥവാ വനിതകള്ക്കെതിരെയുള്ള കുറ്റകൃത്യങ്ങള് അന്വേഷിക്കുന്ന സംഘത്തിന്റെ തലവനാണദ്ദേഹം.
ഏറ്റുമുട്ടല് കൊലപാതകങ്ങളെ മഹത്വവത്ക്കരിക്കുകയും കുറ്റകൃത്യ രംഗങ്ങള് പലപ്പോഴായി വന്നു പോവുകയും ചെയ്യുന്നുണ്ടെങ്കിലും അവയെല്ലാം കഥയുടെ സ്വാഭാവിക മുമ്പോട്ടു പോക്കിനുള്ള സഹായങ്ങളായാണ് എഴുത്തുകാരനും സംവിധായകനും ഉപയോഗപ്പെടുത്തിയിരിക്കുന്നത്. ക്രിസ്റ്റഫറിന്റെ അന്വേഷണ മേഖലയും അതായതുകൊണ്ടായിരിക്കണം സഭ്യത്തിന്റെ അംശങ്ങള് കടക്കാതെയാണെങ്കിലും അടുത്ത കാലത്തൊന്നും മലയാള സിനിമയില് കണ്ടിട്ടില്ലാത്തത്രയും ബലാത്സംഗ രംഗങ്ങള് ഈ സിനിമയിലുണ്ട്. കുറഞ്ഞത് നാല് ബലാത്സംഗങ്ങളെങ്കിലും നടക്കുന്നതായി സിനിമ അറിയാത്ത മട്ടില് ചിത്രീകരിച്ചിട്ടുണ്ട്.
വടക്കന് കേരളത്തിലെ ഒരു ഗ്രാമത്തില് പൊട്ടിപ്പുറപ്പെട്ട വര്ഗ്ഗീയ കലാപത്തിന്റെ മറവില് അതില് ഇരയോ കുറ്റവാളിയോ അല്ലാത്ത ഒരു കുടുംബത്തിലെ പെണ്കുട്ടിയെ കലാപകാരികളല്ലാത്ത രണ്ടുപേര് ചേര്ന്ന് അവളുടെ അമ്മയുടെ മുമ്പില് വെച്ച് ബലാത്ക്കാരം ചെയ്യുകയും അമ്മയെ ആക്രമിക്കുകയുമാണ്. തൊട്ടുപിന്നാലെയെത്തിയ അച്ഛനെ അടിച്ചിട്ട് വലിച്ചിഴച്ച് വീട്ടിനകത്താക്കി തീയിട്ട് കടന്നുപോവുകയും ചെയ്യുന്നു. അക്രമകാരികള് രണ്ടുപേരും കലാപ ഇരകളോടൊപ്പം അഭയാര്ഥി ക്യാംപിലേക്ക് പോകാന് ശ്രമിക്കവെ നീതിയുടെ പക്ഷം ചേര്ന്ന് ആക്രമികളെ യാതൊരു ദയയുമില്ലാതെ വധിക്കുന്ന പൊലീസ് ഉദ്യോഗസ്ഥന് തന്നെയാണ് പതിനാലുകാരന് ക്രിസ്റ്റിയുടെ ഹീറോയും വളര്ത്തച്ഛനും. ക്രിസ്റ്റി എന്ന ക്രിസ്റ്റഫര് ഐ പി എസ് നേടിയപ്പോഴും ഈ രീതി പിന്തുടര്ന്നതില് അതിശയമൊന്നുമില്ല.
പല ഘട്ടങ്ങളിലായി ക്രിസ്റ്റഫര് നടത്തുന്ന ഏറ്റുമുട്ടല് കൊലപാതകങ്ങളില് അയാള്ക്ക് ഇസ്മാഈല് എന്നൊരു പൊലീസ് ഓഫിസര് മാത്രമാണ് സഹായിയായുള്ളത്. പക്ഷേ, ഒരു ഏറ്റുമുട്ടലില് ഇസ്മാഈലും കൊല്ലപ്പെടുന്നതോടെ ക്രിസ്റ്റഫര് മാത്രമല്ല, ഇസ്മാഈലിന്റെ മകള് ആമിനയും ഒറ്റക്കായിപ്പോകുന്നു. പിന്നെ ക്രിസ്റ്റഫര് ആമിനയേയും ആമിന ക്രിസ്റ്റഫറിനേയും ചേര്ത്തു നിര്ത്തിയാണ് കാലത്തോടൊപ്പം സഞ്ചരിക്കുന്നത്.
മമ്മൂട്ടി ആരാധകരെ നിരാശരാക്കാത്ത ചിത്രമാണ് ക്രിസ്റ്റഫര്. കുറേ നാളുകള്ക്ക് ശേഷം മമ്മൂട്ടിയുടെ ഒരു അതിമാനുഷ കഥാപാത്രത്തെ ഈ സിനിമയില് കാണാന് കഴിയും. ഭീഷ്മപര്വ്വത്തിലെ പവര് പാക്കിന് ശേഷം വ്യത്യസ്ത ഴോണറുകള് സ്വീകരിച്ച മമ്മൂട്ടിയുടെ പവറിലേക്കുള്ള തിരിച്ചു വരവു കൂടിയാണ് ക്രിസ്റ്റഫര്.
സിനിമയുടെ ടാഗ്ലൈനില് പറയുന്ന വിജിലാന്റി കാപ് അഥവാ ജാഗ്രത്തായ ഉദ്യോഗസ്ഥന് തന്നെയാണ് ക്രിസ്റ്റഫര്. അയാളുടെ ജാഗ്രതയെ സാധൂകരിക്കുന്ന ജീവിതങ്ങളിലൂടെ തന്നെയാണ് ക്രിസ്റ്റഫര് സഞ്ചരിക്കുന്നതും. ക്രിമിനല് പശ്ചാതലങ്ങളും ക്രിമിനല് പശ്ചാതലങ്ങളുടെ ഇരകളുമായവരിലൂടെ മാത്രമാണ് ഈ ഉദ്യോഗസ്ഥന് പോകേണ്ടി വരുന്നത്.
നീതി നടപ്പാകാതെ പോകുമ്പോള് ഏറ്റുമുട്ടല് കൊലപാതകങ്ങളാണ് നീതിയെന്ന് കരുതുന്ന ഒരു സമൂഹം ക്രിസ്റ്റഫറിനെ മാധ്യമങ്ങളിലും സാമൂഹ്യ മാധ്യമങ്ങളിലും ആരാധിക്കുകയും പിന്തുടരുകയും പിന്തുണക്കുകയും ചെയ്യുന്നുണ്ട്. എന്നാല് കേരളത്തിലെ 172 ഐ പി എസ് ഉദ്യോഗസ്ഥരില് ഒരാളെന്ന നിലയിലും പൊലീസ് സേനയുടെ ഭാഗമെന്ന നിലയിലും തന്റെ ചെയ്തികളെ അംഗീകരിക്കുന്ന ജനത്തെയോര്ത്ത് അയാള്ക്ക് ലജ്ജയുണ്ട്. പൊലീസ് സേന കൃത്യമായി പ്രവര്ത്തിച്ചിരുന്നെങ്കില് 172 ഐ പി എസ് ഓഫിസര്മാരേയും ജനങ്ങള് ഓര്ക്കുമായിരുന്നുവെന്നും ക്രിസ്റ്റഫര് പറയുന്നുണ്ട്.
പുഴുവും റോഷാക്കും നന്പകല് നേരത്ത് മയക്കവും കണ്ട പ്രേക്ഷകര്ക്ക് ക്രിസ്റ്റഫറില് മമ്മൂട്ടിയില് നിന്ന് കൂടുതലൊന്നും കാണാനില്ല. എന്നാല് സൂപ്പര് ഹീറോയാകുന്ന മെഗാസ്റ്റാറിന്റെ 'മമ്മൂട്ടിയിസങ്ങള്' നിരവധി ആസ്വദിക്കാനുണ്ട് താനും.
വില്ലനായ സീതാറാം ത്രിമൂര്ത്തി അയ്യരായെത്തുന്ന തമിഴ് താരം വിനയ് റായും മമ്മൂട്ടിയും തമ്മില് ഏറെ നേരം നേര്ക്കുനേരില്ലെങ്കിലും ഉള്ള സമയങ്ങളില് തീ പാറിക്കാന് ഇരുവര്ക്കും സാധിച്ചിട്ടുണ്ട്. പക്കാ വില്ലനായി പ്രേക്ഷകരുടെ സ്വീകാര്യത നേടാനും വിനയ് റായിക്ക് സാധിച്ചു. ആന്റണിയെന്ന ഐ പി എസ് ഓഫിസറായി തമിഴ്താരം ആര് ശരത് കുമാറും സിനിമയില് വന്നുപോകുന്നുണ്ട്.
അമലാപോളും ഐശ്വര്യ റായിയും മമ്മൂട്ടിക്കൊപ്പം ആദ്യമായി ഒന്നിച്ചഭിനയിക്കുന്ന ചിത്രം കൂടിയാണ് ക്രിസ്റ്റഫര്. ഇരുവരും തങ്ങളുടെ ഭാഗങ്ങള് മനോഹരമാക്കിയിട്ടുണ്ട്. മമ്മൂട്ടിയെന്ന താരത്തിന്റെ നിഴലാകാതെ തെന്നിന്ത്യന് നായികമാരുടെ സ്വത്വം കാത്തുസൂക്ഷിക്കുന്ന വിധത്തില് തന്നെയാണ് അമല പോളിന്റെ എ സി പി സുലേഖയേയും ഐശ്വര്യ ലക്ഷ്മിയുടെ അഡ്വ. ആമിനയേയും തിരക്കഥാകൃത്ത് പകര്ത്തിവെച്ചിരിക്കുന്നത്. ബീന മറിയം ചാക്കോയായി സ്നേഹയുമെത്തുന്നു.
കറുപ്പോ വെളുപ്പോ എന്നു തിരിച്ചറിയാന് പ്രയാസപ്പെടുന്ന ക്രിസ്റ്റഫറിനെ രേഖപ്പെടുത്താന് അത്ര തെളിച്ചമില്ലെങ്കിലും വെളിച്ചക്കുറവ് അനുഭവപ്പെടാത്ത കളറിംഗ് പാറ്റേണാണ് സിനിമ സ്വീകരിച്ചിരിക്കുന്നത്. ഫായിസ് സിദ്ദീഖിന്റെ ക്യാമറയില് ക്രിസ്റ്റഫറിന്റെ അതികായത്വത്തേയും മനുഷ്യത്വത്തേയും ഒരേപോലെ സ്വീകരിക്കാനാവുന്ന കാഴ്ചാ രീതികളും പിന്തുടരുന്നുണ്ട്. ജസ്റ്റിന് വര്ഗ്ഗീസൊരുക്കിയ സംഗീതവും സിനിമയുടെ ട്രാക്കിനോടു ചേര്ന്നാണ് പോകുന്നത്.
2022 ഫെബ്രുവരിയില് റിലീസ് ചെയ്ത മോഹന്ലാല് ചിത്രമായ ആറാട്ടിന് ശേഷം ബി ഉണ്ണികൃഷ്ണനും ഉദയകൃഷ്ണയും ഒരുമിക്കുന്ന സിനിമ കൂടിയാണ് ക്രിസ്റ്റഫര്.
(THE TIMES OF INDIA സമയം മലയാളം 2023 ഫെബ്രുവരി 09)
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ