കാപ്പ; പ്രതീക്ഷിത വഴിയിലെ അപ്രതീക്ഷിത കാഴ്ചകള്‍ (കാപ്പ)
ഫെഫ്ക റൈറ്റേഴ്‌സ് യൂണിയനിലെ നിരാലംബരായ അംഗങ്ങളെ സഹായിക്കാന്‍ കൂടി ലക്ഷ്യമിട്ട് ഫെഫ്ക റൈറ്റേഴ്‌സ് യൂണിയനുവേണ്ടി തിയേറ്റര്‍ ഓഫ് ഡ്രീംസ് നിര്‍മിച്ച സിനിമയാണ് കാപ്പ. അതുകൊണ്ടുതന്നെ ചലച്ചിത്രത്തിന് നല്ല ഉദ്ദേശ്യമുണ്ട്. തിരുവനന്തപുരത്തെ ഗുണ്ടാ സംഘങ്ങളുടെ കുടിപ്പകയാണ് പ്രമേയമെങ്കിലും ഏതുതരം പ്രേക്ഷകനേയും ആകര്‍ഷിക്കുന്ന വിധത്തിലാണ് ചലച്ചിത്രം ചെയ്തിരിക്കുന്നത്.
കാപ്പ
Movie: Kaappa
Language: Malayalam
Genre: Action, Crime, Thriller
Cast: Prithviraj Sukumaran, Asif Ali, Aparna Balamurali, Anna Ben, Jagadeesh, Dileesh Pothan, Nandu
Director: Shai Kailas
Writer: G Indugopan
Duration: 136 Minutes
Rating: 3.5 Star
അവസാനത്തെ പത്തു മിനുട്ടുണ്ടല്ലോ, അവിടെയാണ് കാപ്പയിലെ ഏറ്റവും മനോഹരമായ നിമിഷങ്ങള്‍ വന്നു നിറയുന്നത്. പ്രേക്ഷകന് തീരെ പ്രതീക്ഷിക്കാത്തൊരു ട്വിസ്റ്റില്‍ കൊണ്ടെത്തിച്ച് സിനിമ അവസാനിപ്പിക്കുമ്പോള്‍ തങ്ങള്‍ ഇത്രയും നേരം കണ്ടത് കാപ്പയല്ല, എഴുത്തുകാരനും സംവിധായകനും ചേര്‍ന്ന് നടത്തിയ കണ്‍കെട്ടു വിദ്യയാണെന്ന് പ്രേക്ഷകന് തിരിച്ചറിയും.
ഗുണ്ടാ ആക്ടായ കേരള ആന്റി സോഷ്യല്‍ ആക്ടിവിറ്റീസ് പ്രിവന്‍ഷ്യന്‍ ആക്ട് അഥവാ കാപ്പ കൊണ്ടൊരു സിനിമയുണ്ടാക്കുമ്പോള്‍ അത് ഗുണ്ടകള്‍ക്കിടയില്‍ നിന്ന് പല ജില്ലകളേയും മോചിപ്പിക്കുന്നതിന് വഹിച്ച പങ്ക് മാത്രമല്ല അതിനെ മറികടക്കാനാവുന്ന രീതികളും കൂടി പ്രതിപാദിക്കേണ്ടി വരുമെന്നത് തീര്‍ച്ചയാണ്. അതുതന്നെയാണ് ഒറ്റ വാക്കില്‍ പറഞ്ഞാല്‍ കാപ്പ. ഇതുവരെ കണ്ടതല്ല ഗുണ്ടകള്‍, കാണാനിനിരിക്കുന്നതാണ് അവരെന്ന് തിരിച്ചറിയുമ്പോള്‍ ഇത്രയും ശക്തമായിരുന്നോ ഇത്രയും നേരം കണ്ട ഈ കഥാപാത്രങ്ങളെന്നും പ്രേക്ഷകന് അതിശയിക്കും.
തിരുവനന്തപുരം ജില്ലയില്‍ കുടിപ്പകയുമായി പരസ്പരം വെട്ടിയും കുത്തിയും കൊന്നും കാലം കഴിക്കുന്ന ഗുണ്ടാ സംഘങ്ങള്‍ക്കിടയിലേക്ക് സാധാരണക്കാരായ ഏതാനും മനുഷ്യര്‍ വന്നുപെടുന്നു. അവര്‍ക്കാവട്ടെ ഈ ഗുണ്ടാ സംഘങ്ങളുടെ കാര്യങ്ങളെ കുറിച്ചൊന്നും വലിയ പിടിപാടുമില്ല. അവരും ഗുണ്ടകളുമെല്ലാം ചേര്‍ന്നൊരു മാസ് എന്റര്‍ടൈനറാണ് ഷാജി കൈലാസ് ഒരുക്കിയിരിക്കുന്നത്.
ഷാജി കൈലാസിന്റെ മുന്‍കാല മാസ് ചിത്രങ്ങളുടെ വരി പിടിച്ചു തന്നെയാണ് കാപ്പയും പോകുന്നത്. മാസ് സംഭാഷണങ്ങളും പൃഥ്വിരാജ് ആരാധകരെ തൃപ്തിപ്പെടുത്തുന്ന സംഘട്ടന രംഗങ്ങളും സിനിമയിലേക്ക് കാഴ്ചക്കാരെ പിടിച്ചിരുത്തുന്ന സംഗതികളാണ്. നായകന്‍ ഒറ്റയ്ക്ക് അഞ്ചോ പത്തോ എതിരാളികളെ മലര്‍ത്തിയടിക്കുന്ന കാലമൊക്കെ കഴിഞ്ഞെങ്കിലും കാപ്പയില്‍ അതൊക്കെ രസകരമായി കണ്ടിരിക്കാന്‍ സാധിക്കും. ആക്ഷന്‍ രംഗങ്ങള്‍ വളരെ മികച്ച രീതിയില്‍ ചിത്രീകരിച്ചിട്ടുണ്ട്.
അടുത്ത കാലത്തിറങ്ങിയ മലയാള സിനിമയിലെ പുതിയകാല നായകന്‍മാര്‍ പലരും തങ്ങളുടെ തലമുറയിലെ മറ്റു നായകന്മാര്‍ക്കോ നായികമാര്‍ക്കോ തങ്ങള്‍ക്ക് തുല്യമായ വേഷം കൂടെ ചെയ്യുന്നതില്‍ വലിയ മുഷിപ്പൊന്നും പ്രകടിപ്പിച്ചു കാണുന്നില്ല. അറിയിപ്പില്‍ കുഞ്ചാക്കോ ബോബനേക്കാള്‍ പ്രാധാന്യം ദിവ്യപ്രഭയ്ക്കും ജയജയജയഹേയില്‍ ബേസില്‍ ജോസഫിനേക്കാള്‍ ദര്‍ശന രാജേന്ദ്രനും ടീച്ചറില്‍ അമലാ പോളിനും കിട്ടിയത്രയുമില്ലെങ്കിലും കാപ്പയില്‍ അപര്‍ണ ബാലമുരളിയും അന്നബെന്നും തിളങ്ങി നില്‍ക്കുന്നുണ്ട്. രംഗത്തുവരുന്ന സമയവും അഭിനയിച്ച രംഗങ്ങളുടെ എണ്ണത്തിനുമപ്പുറം കരുത്തുറ്റ കഥാപാത്രങ്ങളെയാണ് ഇരുവരും അവതരിപ്പിക്കുന്നത്. പൃഥ്വിരാജിനോളം പോന്ന വേഷം ആസിഫ് അലിക്കുമുണ്ട് സിനിമയില്‍.
കൊട്ടമധുവെന്ന ഗുണ്ടയും അയാളെ പിന്തുണക്കുന്ന സര്‍ക്കാര്‍ ജീവനക്കാരിയായ ഭാര്യയും ഒരു ഭാഗത്തും ഐ ടി എന്‍ജിനിയറും അയാളുടെ ഭാര്യ ബിനു ത്രിവിക്രമനുമാണ് കഥയില്‍ പ്രത്യക്ഷത്തിലും പരോക്ഷത്തിലുമായി എത്തുന്നത്. കൊട്ട മധു പ്രത്യക്ഷമായും പരോക്ഷമായും ഗുണ്ടയാണ്. അയാള്‍ ഉറങ്ങുന്നതും ഭക്ഷണം കഴിക്കുന്നതും യാത്ര ചെയ്യുന്നതും സംസാരിക്കുന്നതുമെല്ലാം ഗുണ്ടയായിട്ടു തന്നെയാണ്. പക്ഷേ, മറ്റു ചിലരുണ്ട്, അവര്‍ ഗുണ്ടയാണെന്ന ഒരു തിരിച്ചറിവും കിട്ടില്ലെന്ന് മാത്രമല്ല രംഗത്തൊരിടത്തും ഗുണ്ടയായി പ്രത്യക്ഷപ്പെടുന്നുമില്ല.
ബംഗളൂരുവില്‍ ഐ ടി എന്‍ജിനിയറായിരിക്കെയാണ് യുവദമ്പതികള്‍ തിരുവനന്തപുരത്തേക്ക് സ്ഥലം മാറിയെത്തുന്നത്. പുതിയ ഫ്‌ളാറ്റില്‍ താമസം തുടങ്ങിയതിന് പിന്നാലെ സ്‌പെഷ്യല്‍ ബ്രാഞ്ചില്‍ നിന്ന് പതിവ് അന്വേഷണവുമായി പൊലീസുകാരനെത്തുന്നു. അതോടെ ആ യുവാവിന്റെ അവസ്ഥകളില്‍ വലിയ മാറ്റം വരുന്നു. അധോലോകത്തിന്റെ ഒരു കളിയുമറിയാത്ത അവന്‍ അതിലെല്ലാം ചെന്നു പെടുകയും അവരുടെ ഇടനിലക്കാരനായി മാറേണ്ടി വരികയും ചെയ്യുന്നു. വഞ്ചിക്കപ്പെടുന്നൊരു യുവാവ് മാത്രമാണ് അവന്‍. ബാക്കിയെല്ലാവരും കളിയറിഞ്ഞ് കളിച്ചവരായിരുന്നു. അവനാകട്ടെ ഒരു കളിയും അറിഞ്ഞില്ല, തുടക്കത്തിലും ഒടുക്കത്തിലും. കംപ്യൂട്ടറിന് മുമ്പിലെ വെറുമൊരു ജീവി മാത്രമായിരുന്നു.
റൊഷാക്കിലേയും ഗോള്‍ഡിലേയും പോലെ വളരെ വ്യത്യസ്തമായൊരു വേഷമാണ് ജഗദീഷിന് കാപ്പയില്‍ ലഭിച്ചിരിക്കുന്നത്. പതിവ് തമാശകളില്‍ നിന്ന്് വ്യത്യസ്തമായി വളരെ ഗൗരവമുള്ള കഥാപാത്രങ്ങളായിരുന്നു ഈ സിനിമകളിലെല്ലാം ജഗദീഷ് അവതരിപ്പിച്ചത്. റൊഷാക്കിലും ഗോള്‍ഡിലും പൊലീസ് ഉദ്യോഗസ്ഥരാണെങ്കില്‍ കാപ്പയില്‍ ഗുണ്ടയും ഗുണ്ടയുടെ സഹായിയുമാണ്. മാത്രമല്ല നായകന്റെ ഗുരുതുല്യമായ കഥാപാത്രം കൂടിയാണത്. സിനിമയിലുടനീളം നായകന്‍ പൃഥ്വിരാജിനോടൊപ്പവും പൃഥ്വിരാജിന് ശേഷവും ജഗദീഷിന്റെ ജബ്ബാര്‍ക്ക നിറഞ്ഞു നില്‍ക്കുന്നുണ്ട്.
കഥാപാത്രങ്ങള്‍ക്കനുസരിച്ച അഭിനേതാക്കളെ തെരഞ്ഞെടുത്തുവെന്നത് എടുത്തു പറയേണ്ട സംഗതികളിലൊന്നാണ്. പ്രത്യേകിച്ച് തിരുവനന്തപുരം ഭാഷ കൂടുതല്‍ സംസാരിക്കേണ്ടുന്ന കഥാപാത്രങ്ങളെല്ലാം തിരുവനന്തപുരത്തുകാരായിരുന്നു. അവരാകട്ടെ ആ ഭാഷയില്‍ കയറി മേയുകയും ചെയ്തു. നന്ദുവിന്റെ സ്‌പെഷ്യല്‍ ബ്രാഞ്ച് പൊലീസ് ഓഫിസര്‍, പൃഥ്വിരാജന്റെ കൊട്ട മധു, ജഗദീഷിന്റെ ജബ്ബാര്‍ക്ക തുടങ്ങിയവരെല്ലാം തിരുവനന്തപുരത്തെ അസ്സല്‍ പ്രാദേശിക ഭാഷയില്‍ തന്നെയാണ് സംസാരിച്ചത്. മാത്രമല്ല തിരുവനന്തപുരത്തു മാത്രം ഉപയോഗിക്കുന്ന ഏതാനും പ്രയോഗങ്ങളും സിനിമയില്‍ വളരെ കൃത്യമായി ഉപയോഗിച്ചിട്ടുണ്ട്.
ഇടവേളക്കു മുമ്പ് രണ്ടോ മൂന്നോ രംഗങ്ങളില്‍ മാത്രം പ്രത്യക്ഷപ്പെടുകയും ഒരു വാക്കുപോലും ഉരിയാടാതിരിക്കുകയും ചെയ്യുന്ന ദിലീഷ് പോത്തന്റെ ലത്തീഫ് അങ്കിളെന്ന പത്രപ്രവര്‍ത്തകന്‍ ഇടവേളക്കു ശേഷം കൊട്ട മധുവിനെതിരെ നിന്ന് നിറഞ്ഞാടുന്ന കാഴ്ചയാണ് കാണാനാവുന്നത്. ആസിഫലിയുടെ നിഷ്‌കളങ്കപ്പയ്യന്‍ ഭാവം ഈ സിനിമയിലെ അദ്ദേഹത്തിന്റെ കഥാപാത്രത്തിന് ഏറെ ഗുണം ചെയ്തിട്ടുണ്ട്.
ചിത്രത്തിനൊടുവില്‍ പഴയ രഞ്ജിപണിക്കര്‍- ഷാജി കൈലാസ് കൂട്ടുകെട്ടിനെ ഓര്‍മിപ്പിക്കുന്ന വിധത്തില്‍ വിവരണവുമായി രഞ്ജിപണിക്കറിന്റെ ശബ്ദമെത്തുന്നുണ്ട്. കടുവയ്ക്ക് ശേഷം ഷാജി കൈലാസ്- പൃഥ്വിരാജ് കൂട്ടുകെട്ടിലുള്ള സിനിമ ഫെഫ് റൈറ്റേഴ്‌സ് യൂണിയനു വേണ്ടി ജിനു വി എബ്രഹാം, ഡോള്‍വിന്‍ കുര്യാക്കോസ്, ദിലീഷ് നായര്‍ എന്നിവരുടെ പങ്കാളിത്തത്തില്‍ തിയേറ്റര്‍ ഓഫ് ഡ്രീംസാണ് നിര്‍മിച്ചിരിക്കുന്നത്. ഫെഫ്ക റൈറ്റോഴ്‌സ് യൂണിയനിലെ അശരണരായ അംഗങ്ങളെ സഹായിക്കാനാണ് ഈ സിനിമയുടെ തുക ഉപയോഗപ്പെടുത്തുന്നത് എന്ന നല്ല ഉദ്ദേശ്യവും സിനിമയ്ക്ക് പിന്നിലുണ്ട്.
(THE TIMES OF INDIA സമയം മലയാളം 2022 ഡിസംബര്‍ 22)
അഭിപ്രായങ്ങള്‍
ഒരു അഭിപ്രായം പോസ്റ്റ് ചെയ്യൂ