Monday, July 25, 2011

സ്വയം നാടുകടത്തപ്പെട്ട ഒരാളുടെ ജീവിതം


താനൂരിലെ ദേവധാര്‍ സ്‌കൂളിലും തിരൂരിലെ ബോര്‍ഡ് സ്‌കൂളിലും മദിരാശിയിലെ മുഹമ്മദന്‍സ് കോളെജിലും പഠനം നടത്തിയ, മീശ മുളക്കാത്ത ഒരു പയ്യന്‍ പാക്കിസ്താനിലേക്ക് തീവണ്ടി കയറി. എന്തിനായിരുന്നു അന്ന് അങ്ങനെയൊരു യാത്ര നടത്തിയത്? നീണ്ട ആറുപതിറ്റാണ്ടുകള്‍ക്ക് ശേഷം തിരൂരിനും താനൂരിനുമിടയില്‍ വൈലത്തൂരിലെ വീട്ടിലിരുന്ന് ആലോചിക്കുമ്പോഴും ബി എം കുട്ടി എന്ന ബീയാത്തില്‍ മൊയ്തീന്‍ കുട്ടിയെന്ന മുഹ്‌യുദ്ദീന്‍കുട്ടിക്ക് പറയാന്‍ ഉത്തരമില്ല. അന്നങ്ങനെ തോന്നി... അന്നങ്ങനെ യാത്ര നടത്തി... അതുകൊണ്ട് ഇന്ത്യയില്‍ നിന്നും അതിര്‍ത്തി കടന്ന് പാക്കിസ്താനിലെത്തി... പാക്കിസ്താന്‍ പൗരനായി... ഇന്ത്യന്‍ മാതാപിതാക്കളുടെ പാക്കിസ്താനി മകന്‍ കേരളത്തിന്റെ നനുത്ത ഓര്‍മകളുമായി ഇടക്കിടെ നാട്ടിലെത്തി മാതാവിനേയും സഹോദരങ്ങളേയും കാണുന്നയാളായി.

ബി എം കുട്ടിയുടെ ജീവിതം എളുപ്പത്തില്‍ ഇങ്ങനെ വായിച്ചെടുക്കാം
1929 ജൂലായ് 15ന് ബീയാത്തില്‍ കുഞ്ഞലവി ഹാജിയുടേയും ബിരിയ ഉമ്മയുടേയും മൂത്തപുത്രനായി ജനനം. രേഖകളില്‍ ജന്മവര്‍ഷം 1931 ആണുള്ളത്. താനൂര്‍ ദേവധാര്‍ മലബാര്‍ റികണ്‍സ്ട്രക്ഷന്‍ ട്രസ്റ്റ് സ്‌കൂളിലും തിരൂര്‍ ഡിസ്‌ക്ട്രിക്ട് ബോര്‍ഡ് സ്‌കൂളിലും പഠനം. ചരിത്രത്തിലും ഭൂമിശാസ്ത്രത്തിലുമൊക്കെയായിരുന്നു താത്പര്യമെങ്കിലും മദിരാശി മുഹമ്മദന്‍സ് കോളെജില്‍ രസതന്ത്രവും ഭൗതികശാസ്ത്രവുമായിരുന്നു ഉന്നതപഠനത്തിന് തെരഞ്ഞെടുത്തത്. 1949 ജൂണില്‍ പഠനം കഴിഞ്ഞ് കോളെജ് പൂട്ടിയപ്പോള്‍ സുഹൃത്ത് ബാലന്‍ നായരോടൊന്നിച്ച് ബോംബെ കാണാന്‍ പോയി. അവിടെ ബ്രിട്ടീഷ് കമ്പനിയില്‍ സൂപ്പര്‍വൈസറായിരുന്ന നാട്ടിലെ അയല്‍വാസി തടത്തില്‍ കുഞ്ഞിമൊയ്തീനോടൊപ്പം കുറച്ചുനാള്‍ കഴിഞ്ഞു. ബോംബെയില്‍ നിന്നും പരിചയപ്പെട്ട പി സി മുഹമ്മദ് ടി ഹംസ, കെ പി കോയ എന്നീ സുഹൃത്തുക്കളോടൊപ്പം 1949ല്‍ ആഗസ്തില്‍ കറാച്ചിയിലേക്ക് പുറപ്പെട്ടു. ബോംബെ സെന്‍ട്രല്‍ റയില്‍വേ സ്റ്റേഷനില്‍ നിന്നും ജോധ്പൂരിലേക്കും അവിടെ നിന്ന് കൊക്രപാറിലേക്കും പോയി. അവിടെ പാകിസ്താനിലേക്കുള്ള നിരവധി മുഹാജിറുകള്‍ ഉണ്ടായിരുന്നു. വര്‍ഗ്ഗീയകലാപത്തിന്റെ ഇരകളായി പാകിസ്താനിലേക്ക് പോകാനൊരുങ്ങിയ അവരുടെ കൂടെ കൂടിയെങ്കിലും, കലാപമില്ലാത്ത മലബാറില്‍ നിന്ന് എന്തിന് പുറപ്പെട്ടുപോകുന്നുവെന്ന ചോദ്യമുണ്ടായിരുന്നു. കൊക്രാപാറില്‍ നിന്നും ട്രയിന്‍ മാര്‍ഗ്ഗം കറാച്ചിയിലേക്ക്. ട്രയിനിലെ ഗാര്‍ഡിനൊപ്പമായിരുന്നു ബി എം കുട്ടിയും സുഹൃത്തുക്കളും യാത്ര ചെയ്തിരുന്നത്.
1949 ആഗസ്ത് 14ന് വൈകിട്ട് കറാച്ചി റയില്‍വേ സ്റ്റേഷനില്‍ എത്തുമ്പോള്‍, അന്ന് പാകിസ്താന്റെ രണ്ടാം സ്വാതന്ത്ര്യവര്‍ഷമായിരുന്നു. അക്കാലത്ത് കറാച്ചിയില്‍ നിരവധി മലയാളികളുണ്ടായിരുന്നു. ചായക്കടകളും പാന്‍, വെറ്റില കടകളും നടത്തിയിരുന്ന നിരവധി മലയാളികള്‍ കറാച്ചി കേന്ദ്രമാക്കി പ്രവര്‍ത്തിച്ചിരുന്നു. 1921ലെ മലബാര്‍ വിപ്ലവകാലത്ത് നാടുവിട്ടവരായിരുന്നു അവരില്‍ ഭൂരിപക്ഷവും. ആ കാലത്ത് കറാച്ചിയിലുണ്ടായിരുന്ന മലബാരികളെ അവിടുത്തുകാര്‍ക്ക് ഏറെ വിശ്വസമായിരുന്നു.
വോള്‍ക്കാട്ട് ബ്രദേഴ്‌സില്‍ ജോലിയില്‍ പ്രവേശിച്ച ബി എം കുട്ടിയുടെ പാക്കിസ്താന്‍ ജീവിതത്തിന് തുടക്കമായി. ഇതേ കമ്പനിയിലെ ചീഫ് അക്കൗണ്ടിന്റെ മരുമകള്‍ ബിര്‍ജിസ് സിദ്ദീഖിയെ 1951ല്‍ വിവാഹം ചെയ്തു. ഉത്തര്‍പ്രദേശ് സ്വദേശിയായ ബിര്‍ജിസ് അമ്മാവനോടൊപ്പമാണ് പാകിസ്താനിലെത്തിയത്. ബി എം കുട്ടിയെ പോലെ ബിര്‍ജിസിന്റെ മാതാപിതാക്കള്‍ ഇന്ത്യയില്‍ തന്നെയായിരുന്നു കഴിഞ്ഞിരുന്നത്.
1953ല്‍ മിയാന്‍ ഇഫ്തിഖറുദ്ദീന്‍ സ്ഥാപിച്ച ആസാദ് പാകിസ്താന്‍ പാര്‍ട്ടിയുമായി ബന്ധപ്പെട്ട് പ്രവര്‍ത്തനം തുടങ്ങിയപ്പോഴാണ് ബി എം കുട്ടി പാകിസ്താന്‍ രാഷ്ട്രീയത്തിലെ ശക്തനായ കണ്ണിയായി മാറിത്തുടങ്ങിയത്. അമേരിക്കന്‍ സമ്മര്‍ദ്ദത്തെ തുടര്‍ന്ന് കമ്യൂണിസ്റ്റ് പാര്‍ട്ടികള്‍ നിരോധിക്കപ്പെട്ടപ്പോള്‍ നിരവധി നേതാക്കള്‍ ജയിലിലായി. കമ്യൂണിസ്റ്റ് ബന്ധത്തിന്റെ പേരില്‍ വോള്‍ക്കാട്ട് ബ്രദേഴ്‌സിലെ ജോലി നഷ്ടപ്പെട്ടെങ്കിലും മറ്റൊരു സ്ഥാപനത്തില്‍ ജോലികിട്ടാന്‍ ഏറെ പ്രയാസപ്പെടേണ്ടിവന്നില്ല. ബുര്‍ഹാന്‍ എന്‍ജിനിയറിംഗ് കമ്പനിയില്‍ മാനേജരായി പ്രവര്‍ത്തനം തുടങ്ങിയ അദ്ദേഹം അക്കാലത്തുതന്നെയാണ് മുബാറക്ക് സഗാര്‍ നയിച്ച സോഷ്യലിസ്റ്റ് പാര്‍ട്ടിയുമായി ചേര്‍ന്ന് പ്രവര്‍ത്തിക്കാന്‍ തുടങ്ങിയത്.
മലയാളികളായ ബീഡി തൊഴിലാളികളെയും മറ്റും ഉള്‍പ്പെടുത്തി 1955ല്‍ കേരള അവാമി ലീഗ് സ്ഥാപിക്കാനും ബി എം കുട്ടി ധൈര്യം കാണിച്ചു. 1956ല്‍ നിരവധി ചെറുപാര്‍ട്ടികള്‍ ചേര്‍ന്ന് പാകിസ്താന്‍ നാഷണല്‍ പാര്‍ട്ടി രൂപീകൃതമായി. മിയാ ഇഫ്തിഖറുദ്ദീന്‍, ഖാന്‍ അബ്ദുല്‍ ഗഫാര്‍ ഖാന്‍ തുടങ്ങിയവരുടെ പാര്‍ട്ടികളൊക്കെ ചേര്‍ന്ന് രൂപീകരിച്ച പാകിസ്താന്‍ നാഷണല്‍ പാര്‍ട്ടി 1957ല്‍ നാഷണല്‍ അവാമി പാര്‍ട്ടിയായി മാറി. ബി എം കുട്ടിയും അദ്ദേഹത്തിന്റെ കേരള അവാമി ലീഗിലെ സഖാക്കളും നാഷണല്‍ അവാമി പാര്‍ട്ടിയില്‍ ലയിച്ചു.
പിന്നീടുള്ള ഒന്നര വര്‍ഷക്കാലം ഏറിയ തിരക്കുകളുടേതായിരുന്നു. കറാച്ചിയില്‍ നിന്നും ലാഹോറിലേക്ക് സ്ഥലം മാറിയെത്തിയ ബി എം കുട്ടി നാടുമുഴുവന്‍ പാര്‍ട്ടി പ്രവര്‍ത്തനവുമായി ഓടിനടന്നു. 1958 ഒക്‌ടോബറില്‍ പാകിസ്താനില്‍ അടിയന്തരാവസ്ഥ പ്രഖ്യാപിക്കപ്പെട്ടപ്പോള്‍ ബി എം കുട്ടിയും രേഖകളില്‍ ഇടത് വിപ്ലവകാരിയായി രേഖപ്പെടുത്തപ്പെട്ടിരുന്നു. അറസ്റ്റിലാവുന്നതിന് തൊട്ടുമുമ്പ് അദ്ദേഹം ഭാര്യയേയും രണ്ടുമക്കളേയും കൂട്ടി കേരളത്തിലെ വീട്ടിലേക്ക് തിരിച്ചു. മൂന്ന് മാസക്കാലമാണ് അദ്ദേഹം കുടുംബ സമേതം കേരളത്തില്‍ താമസിച്ചത്.
ഇ എം എസ് സര്‍ക്കാരായിരുന്നു അക്കാലത്ത് കേരളത്തില്‍ അധികാരത്തിലുണ്ടായിരുന്നത്. കേരളത്തിലെ കമ്യൂണിസ്റ്റ് ഭരണത്തെകുറിച്ച് പാകിസ്താനിലേക്ക് ബി എം കുട്ടി നിരന്തരം കത്തുകള്‍ എഴുതി. എന്നാല്‍ അവയെല്ലാം അധികൃതര്‍ പിടിച്ചെടുക്കുകയായിരുന്നു. മാസങ്ങള്‍ക്ക് ശേഷം പാകിസ്താനിലേക്ക് മടങ്ങിയ അദ്ദേഹത്തെ 1959 ഫെബ്രുവരിയില്‍ അറസ്റ്റ് ചെയ്തു. പിന്നീട് രണ്ട് വര്‍ഷവും 11 മാസവും കറാച്ചി, ലാഹോര്‍ ജയിലുകളിലായിരുന്നു വാസം. അക്കാലത്ത് തയ്യല്‍ ജോലി ചെയ്താണ് ഭാര്യ കുടുംബം പുലര്‍ത്തിയിരുന്നതെന്ന് ബി എം കുട്ടി ഓര്‍ക്കുന്നു.
രാഷ്ട്രീയ പ്രവര്‍ത്തനമാണ് തന്റെ വഴിയെന്ന് തിരിച്ചറിഞ്ഞതോടെ ജയിലുകളും തിക്ത ജീവിതവും ബി എം കുട്ടിയുടെ ജീവിതത്തിന്റെ ഭാഗമായി. ആദ്യ ജയിലിനു ശേഷം നിരവധി കമ്പനികളില്‍ മാറിമാറി തൊഴില്‍ ചെയ്യേണ്ട അവസ്ഥയാണ് ബി എം കുട്ടിക്കുണ്ടായിരുന്നത്. ജോലി ചെയ്ത കമ്പനികളിലെല്ലാം തൊഴിലാളികളുമായി ചേര്‍ന്ന് അദ്ദേഹം പ്രവര്‍ത്തനങ്ങള്‍ നടത്തി.
ആയിരത്തിതൊള്ളായിരത്തി അറുപതുകളുടെ മധ്യത്തിലാണ് മിര്‍ ഗൗസ് ബക്ഷ് ബസെന്‍ജോയുമായി ചേര്‍ന്ന് ബി എം കുട്ടി പ്രവര്‍ത്തനം തുടങ്ങിയത്. 1970കളിലെ തെരഞ്ഞെടുപ്പില്‍ ബലൂചിസ്ഥാനിലും വടക്കു പടിഞ്ഞാറന്‍ പ്രവിശ്യകളിലും നാഷണല്‍ അവാമി പാര്‍ട്ടി അധികാരത്തിലെത്തി. ബലൂചിസ്ഥാന്‍ ഗവര്‍ണറായ ബസെന്‍ജോയുടെ പൊളിറ്റിക്കല്‍ സെക്രട്ടറിയായി ബി എം കുട്ടി നിയമിതനായി. 1973ല്‍ സുല്‍ഫിക്കര്‍ അലി ഭൂട്ടോ അധികാരത്തിലെത്തിയതോടെ ബലൂചിസ്ഥാന്‍ ഗവര്‍ണറെ പിരിച്ചുവിട്ടു. ബി എം കുട്ടി ജയിലിലായി. ''റഷ്യന്‍ ആയുധങ്ങള്‍ സിന്ധിലേക്ക് കടത്താന്‍ ശ്രമിച്ചു'' എന്ന കുറ്റത്തിനായിരുന്നു അറസ്റ്റ്. ഏഴ് മാസക്കാലം ഹൈദരബാദ് ജയിലിലായിരുന്നു അദ്ദേഹത്തിന്റെ വാസം. 1981, 1983, 1986 വര്‍ഷങ്ങളിലും വിവിധ കാരണങ്ങള്‍ പറഞ്ഞ് ജയില്‍ ശിക്ഷ അനുഭവിക്കാനുള്ള 'ഭാഗ്യം' ബി എം കുട്ടിക്കുണ്ടായി.
മൂവ്‌മെന്റ് ഫോര്‍ റെസ്റ്റൊറേഷന്‍ ഫോര്‍ ഡമോക്രസി (എം ആര്‍ ഡി) എന്നപേരില്‍ 1981ല്‍ സംഘടന രൂപീകരിക്കപ്പെട്ടപ്പോള്‍ ബി എം കുട്ടിയായിരുന്നു ജോയിന്റ് സെക്രട്ടറി ജനറല്‍. ഇന്ത്യാ- പാകിസ്താന്‍ സൗഹൃദത്തിന് വേണ്ടി നിരന്തരം പ്രവര്‍ത്തനങ്ങള്‍ നടത്തിയ ബി എം കുട്ടി പാകിസ്താന്‍- ഇന്ത്യാ പീപ്പിള്‍സ് ഫോറം ഫോര്‍ പീസ് ആന്റ് ഡെമോക്രസി എന്ന പേരിലും പ്രവര്‍ത്തനങ്ങള്‍ നടത്തി. ഫാക്ടറികളും കമ്പനികളും തൊഴില്‍ സ്ഥാപനങ്ങളുമായി നേരിട്ട് ബന്ധപ്പെട്ട് പ്രവര്‍ത്തിക്കുന്ന തൊഴിലാളി നേതാക്കള്‍ക്ക് രാഷ്ട്രീയത്തിലും തൊഴില്‍ നിയമങ്ങളിലും അവഗാഹം നല്‍കാനായി പാകിസ്താന്‍ ഇന്‍സ്റ്റിറ്റിയൂട്ട് ഓഫ് ലേബര്‍ എഡുക്കേഷന്‍ ആന്റ് റിസര്‍ച്ച് എന്ന പേരില്‍ സ്ഥാപനം ആരംഭിക്കുകയും നിരവധി വര്‍ഷങ്ങളായി പ്രവര്‍ത്തിക്കുകയും ചെയ്യുന്നു. ഇത്തരത്തില്‍ ഇന്ത്യാ- പാകിസ്താന്‍ മേഖലയിലെ ആദ്യത്തേതും ഏറ്റവും വലുതുമാണ് ഈ സ്ഥാപനം. തൊഴിലാളി നേതാക്കള്‍ക്ക് മൂന്നുമാസത്തെ സൗജന്യ കോഴ്‌സാണ് സ്ഥാപനം നല്കുന്നത്.

ഖേദങ്ങളില്ലാത്ത സ്വയം നാടുകടത്തല്‍
നീണ്ട അറുപത് വര്‍ഷക്കാലത്തെ സംഭവബഹുലമായ പാകിസ്താന്‍ ജീവിതത്തെ അധികരിച്ച് ബി എം കുട്ടി ഈയ്യിടെ രാഷ്ട്രീയ ആത്മകഥ പൂര്‍ത്തിയാക്കി. 'അറുപത് വര്‍ഷത്തെ സ്വയം നാടുകടത്തല്‍; ഖേദങ്ങളില്ലാതെ' (Sixty Years in Self Exile; No Regrets) എന്ന ആത്മകഥ കേരളത്തില്‍ തുടങ്ങി തന്റെ ജീവിതത്തിലെ എട്ട് പതിറ്റാണ്ടോളം കാലത്തെ സംഭവ ബഹുലമായ കാര്യങ്ങളാണ് പറഞ്ഞുതീര്‍ക്കുന്നത്.

ആത്മകഥ സമര്‍പ്പിച്ച വനിതകള്‍
നാലു വനിതകള്‍ക്കാണ് ബി എം കുട്ടി തന്റെ ആത്മകഥ സമര്‍പ്പിച്ചിരിക്കുന്നത്. ആത്മകഥയുടെ പേജില്‍ അവരെ ഇങ്ങെ വായിക്കാം:
എന്റെ മാതാവ് ബിരിയ ഉമ്മ- എനിക്ക് ജന്മം നല്കിയ, എന്നെ വളര്‍ത്തുകയും ഈ 80 വര്‍ഷക്കാലം എന്നെ ഞാനാനാക്കുകയും ചെയ്ത മാതാവിന്.
ദീദി നിര്‍മല ദേശ്പാണ്ഡെ- എനിക്ക് പ്രവര്‍ത്തനങ്ങളില്‍ പ്രചോദനം നല്കുകയും തെക്കനേഷ്യയില്‍ സമാധാനത്തിന് വേണ്ടി മറ്റുപലരേയും പോലെ കഠിനമായി പ്രവര്‍ത്തിക്കുകയും ചെയ്ത മൂത്ത സഹോദരിയെ പോലുള്ള നിര്‍മല ദേശ്പാണ്ഡെയ്ക്ക്.
ബേനസീര്‍ ഭൂട്ടോ- മുസ്‌ലിം രാജ്യത്തെ ആദ്യത്തെ വനിതാ ഭരണാധികാരിയും അതിന് പകരമായി വെടിയുണ്ടകളും ബോംബുകളും ഏറ്റുവാങ്ങുകയും ചെയ്ത ബേനസീര്‍ ഭൂട്ടോവിന്.
എന്റെ ഭാര്യ ബിര്‍ജിസ്- ചെറുതും വലുതുമായ എല്ലാ കാര്യങ്ങളിലും അറുപത് വര്‍ഷക്കാലം എന്നോടൊപ്പം നില്‍ക്കുയും തലയുയര്‍ത്തി നില്‍ക്കാനും ഈ പുസ്തകം എഴുതാനും എന്നെ പ്രേരിപ്പിക്കുകയും ചെയ്ത എന്റെ ഭാര്യ ബിര്‍ജിസിന്.
മരണക്കിടക്കയില്‍ നിന്നുള്ള ബിര്‍ജിസിന്റെ ചോദ്യത്തോടെയാണ് ബി എം കുട്ടി തന്റെ ആത്മകഥ അവസാനിപ്പിക്കുന്നത്: ''തുമാരി കിതാബ് മുഖമ്മല്‍ ഹോഗയി?'' (നിങ്ങളുടെ പുസ്തകം മുഴുമിപ്പിച്ചോ?). തന്റെ ആത്മകഥ എഴുതിപ്പൂര്‍ത്തിയാക്കി അടച്ചുവെക്കുമ്പോള്‍ ആ വാക്കുകളാണ് കാതില്‍ മുഴങ്ങുന്നത് എന്ന് ബി എം കുട്ടി പറയുന്നു.

നെല്‍സണ്‍ മണ്ഡേലയുടെ ആത്മകഥയില്‍ പറയുന്നതുപോലെയാണ് തന്റെ പിതാവെന്നും ബി എം കുട്ടി പറയുന്നുണ്ട്. വിദ്യാഭ്യാസമില്ലെങ്കിലും തന്റെ പിതാവിന് വിദ്യാഭ്യാസത്തിന്റെ പ്രാധാന്യം അറിയാമായിരുന്നു. മാത്രമല്ല അക്കാലത്ത് അദ്ദേഹം സ്‌കൂളില്‍ പോയില്ലെങ്കിലും മലയാളം എഴുതാനും വായിക്കാനും അറിയാമായിരുന്നു.
എന്‍ജിനിയറായ ജാവേദ്, ഡോക്ടറായ ജാസ്മിന്‍, അധ്യാപികയായ ഷാസിയ എന്നിവരാണ് ബി എം കുട്ടിയുടെ മക്കള്‍. ജാവേദിന്റെ ഭാര്യ മൈമൂനയുടെ കുടുംബവും മലയാളികളാണ്. തിരൂരും മാഹിയിലും വേരുകളുള്ള കുടുംബമാണ് മൈമൂനയുടേത്. കദിയക്കുട്ടി, കുഞ്ഞീന്‍ ഹാജി, മുഹമ്മദ്, ബീരാന്‍, മമ്മദിയ, മുഹമ്മദ്കുട്ടി, പാത്തുമ്മു, പരേതരായ അഹമ്മദ്കുട്ടി, മൂസ എന്നിവരാണ് ബി എം കുട്ടിയുടെ സഹോദരങ്ങള്‍.
മൈമൂനയ്‌ക്കൊഴികെ മറ്റാര്‍ക്കും മലയാളം അറിയില്ലെങ്കിലും ബി എം കുട്ടിയുടെ പാകിസ്താനിലെ വീട്ടില്‍ മലയാളം പത്രങ്ങളുടെ കലണ്ടറുകളും വൈക്കം മുഹമ്മദ് ബഷീറിന്റെ മുഴുവന്‍ കൃതികളുമടങ്ങുന്ന സമാഹാരത്തിന്റെ രണ്ട് വോള്യങ്ങളും ഇ എം എസ് നമ്പൂതിരിപ്പാടിന്റെ ആത്മകഥയും ഇംഗ്ലീഷ്- മലയാളം ഡിക്ഷണറിയും മലയാളത്തിലെ ചെറുകഥകളുമൊക്കെയുണ്ട്.

ഇന്ത്യക്കാരന്റെ പാകിസ്താന്‍/ പാകിസ്താനിയുടെ ഇന്ത്യ
ഇന്ത്യ ജനിച്ച മണ്ണും പാകിസ്താന്‍ വളര്‍ന്ന മണ്ണുമാണെന്ന് സ്‌നേഹത്തോടെ പറയുന്ന ബി എം കുട്ടി മലയാളിയായതില്‍ അഭിമാനിക്കുന്നു. പാകിസ്താനില്‍ ചെന്നുനോക്കിയാല്‍ മാത്രമേ അവിടെയുള്ളവര്‍ എത്ര സ്‌നേഹത്തോടെ പെരുമാറാന്‍ കഴിയുന്നവരാണെന്ന് തിരിച്ചറിയാന്‍ കഴിയുകയുള്ളുവെന്നും അദ്ദേഹം പറയുന്നു. 'നിങ്ങള്‍ പെഷവാറില്‍ പോയി നോക്കൂ. മതേതര സര്‍ക്കാറുള്ള അവിടുത്തെ 95 ശതമാനം മുസ്‌ലിംകളും തീവ്രവാദത്തെ വെറുക്കുന്നവരാണ്. ഏതെങ്കിലും ചിലര്‍ ഉണ്ടാക്കുന്ന പ്രശ്‌നങ്ങളാണ് ഒരു സമൂഹത്തെ മുഴുവന്‍ പ്രതിസ്ഥാനത്ത് നിര്‍ത്തുന്നത്'.
മലയാളവും ഉര്‍ദുവും ഇംഗ്ലീഷും പഞ്ചാബിയും അറിയാവുന്ന ബി എം കുട്ടി മുഹമ്മദന്‍സ് കോളെജില്‍ നിന്നും എഴുതിയ ബി എസ് സി പരീക്ഷയുടെ സര്‍ട്ടിഫിക്കറ്റ് ഇതുവരേയും കൈപ്പറ്റിയിട്ടില്ല. പ്രായോഗിക ജീവതമാണ് ഏറ്റവും വലിയ സര്‍വ്വകലാശാല എന്നാണ് അദ്ദേഹത്തിന്റെ അഭിപ്രായം.

പാകിസ്താനിലെ തിരക്കുകള്‍ക്കും പ്രവര്‍ത്തനങ്ങള്‍ക്കുമിടയില്‍ ഇന്ത്യയിലെത്തിയതായിരുന്നു ബി എം കുട്ടി. തന്റെ ആത്മകഥയുടെ ഇന്ത്യയിലെ പ്രകാശനം ഹൈദരബാദില്‍ നടത്തി. ജൂലായ് 28ന് ബങ്കളൂരുവിലും അദ്ദേഹത്തിന് ആത്മകഥയുമായി ബന്ധപ്പെട്ട പരിപാടികളുണ്ട്.

വര്‍ത്തമാനം ആഴ്ചപ്പതിപ്പ്
2011 ജൂലായ് 24 ഞായര്‍

Monday, July 18, 2011

ശരിക്കും മാണിക്യക്കല്ല്


പഴയൊരു കഥയാണ്, രണ്ട് നൂറ്റാണ്ടുകള്‍ പഴക്കമുള്ളൊരു കഥ
തലശ്ശേരി നഗരത്തിലൂടേയും കടല്‍ത്തീരത്തു കൂടെയും കുതിരവണ്ടിയില്‍ സഞ്ചരിച്ച ഒരു മനുഷ്യനുണ്ടയിരുന്നു. എഡ്വേര്‍ഡ് ബ്രണ്ണന്‍ എന്നായിരുന്നു അദ്ദേഹത്തിന്റെ പേര്. നാട്ടുകാര്‍ സ്‌നേഹത്തോടെ അദ്ദേഹത്തെ ബ്രണ്ണന്‍ സായ്പ് എന്നുവിളിച്ചു.
കുതിര വണ്ടിയില്‍ യാത്ര ചെയ്യുമ്പോള്‍ ദരിദ്ര കുടുംബത്തിലെ കുട്ടികള്‍ക്ക് മധുര മിഠായികളും പണവും അദ്ദേഹം നല്കി. തലശ്ശേരിയിലെ പാവങ്ങള്‍ക്ക് അദ്ദേഹത്തെ ജീവനായിരുന്നു; അദ്ദേഹത്തിന് തിരിച്ചും.
ഈ കഥയുടെ തുടക്കം ഇവിടെയൊന്നുമല്ല. അങ്ങ് ലണ്ടനിലാണ്. 1784ലാണ് എഡ്വേര്‍ഡ് ബ്രണ്ണന്‍ ലണ്ടനില്‍ ജനിച്ചത്. 1810ല്‍ ഈസ്റ്റ് ഇന്ത്യാ കമ്പനിയില്‍ ചേര്‍ന്ന അദ്ദേഹം അവരുടെ സഹകമ്പനിയായ ബോംബെ മറൈന്‍ സര്‍വീസസിലേക്ക് മാറ്റം കിട്ടി കപ്പലില്‍ കേബിന്‍ ബോയ് ആയി. അക്കാലത്താണ് ബ്രണ്ണന്‍ ജോലി ചെയ്തിരുന്ന കപ്പല്‍ തലശ്ശേരിക്ക് സമീപം അറബിക്കടലില്‍ അപകടത്തില്‍പ്പെട്ടത്. തലശ്ശേരി തീരത്തെ മീന്‍പിടുത്തക്കാരാണ് ബ്രണ്ണനെ രക്ഷപ്പെടുത്തി കരയിലെത്തിച്ചത്.
തലശ്ശേരിയിലെത്തിയതോടെ ബ്രണ്ണന്റെ ജീവിതവും തലശ്ശേരിയുടെ ചരിത്രവും മാറിമറിഞ്ഞു. തലശ്ശേരിയുടെ വിദ്യാഭ്യാസ ചരിത്രത്തില്‍ വലിയ മാറ്റം കുറിച്ച പേരായി മാറി എഡ്വേര്‍ഡ് ബ്രണ്ണന്റേത്.
ജീവന്‍ തിരിച്ചു കിട്ടിയ തീരത്തിന് അദ്ദേഹം നല്‍കിയത് എക്കാലത്തും ഓര്‍മ്മിക്കപ്പെടുന്ന ഒരു സമ്മാനമായിരുന്നു. നാട്ടുകാരുടെ മക്കള്‍ക്ക് സൗജന്യമായി ഇംഗ്ലീഷ് പഠിക്കാനുള്ള വിദ്യാലയം. പിന്നീടത് വളര്‍ന്ന് ഹൈസ്‌കൂളും ഹയര്‍ സെക്കന്‍ഡറി സ്‌കൂളും കോളെജുമൊക്കെ മാറിയത് ചരിത്രം. ബ്രണ്ണന്റെ നാമധേയത്തില്‍ സ്‌കൂളായി തലശ്ശേരി നഗരമധ്യത്തിലും കോളെജായി ധര്‍മടത്തും അത് തലയുയര്‍ത്തി നില്‍ക്കുന്നുണ്ട്.
രണ്ടാം ജീവിതം കിട്ടിയ തീരത്തു നിന്നും പിന്നീടൊരിക്കലും അദ്ദേഹം മടങ്ങിപ്പോയില്ല. മരണം എഡ്വേര്‍ഡ് ബ്രണ്ണനെ എക്കാലത്തേക്കും തലശ്ശേരിക്കാരനാക്കി. തലശ്ശേരി കടലിന് വിളിപ്പാടകലെ പഴയ ഇംഗ്ലീഷ് ചര്‍ച്ചിലെ സെമിത്തേരിയിലാണ് ബ്രണ്ണന്റെ ശവകുടീരമുള്ളത്. സ്‌കൂളിനും സാമൂഹ്യസേവനത്തിനും നീക്കിവെച്ചതില്‍ ബാക്കിയുള്ള പണം കൊണ്ട് ബ്രണ്ണന്‍ തന്നെ പണിതതാണ് ഈ ചര്‍ച്ചും.

കഥയില്‍ വഴിത്തിരിവുണ്ടാക്കിയ കപ്പലപകടം
തലശ്ശേരിയിലെത്തിയ ബ്രണ്ണന് മദിരാശി ഗവണ്‍മെന്റ് സ്റ്റൈപ്പന്റായി മാസത്തില്‍ 100 രൂപ അനുവദിച്ചു. 1824ല്‍ തലശ്ശേരി പോര്‍ട്ട് ഓഫിസില്‍ മാസ്റ്റര്‍ അറ്റന്‍ഡറായി നിയമിക്കപ്പെട്ട ബ്രണ്ണന്‍ നീണ്ട 35 വര്‍ഷക്കാലം ഈ ജോലിയില്‍ തുടര്‍ന്നു.
തന്റെ കര്‍മമണ്ഡലം തലശ്ശേരിയാണെന്ന് തിരിച്ചറിഞ്ഞ ബ്രണ്ണന്‍ സായ്പ് ജോലി ചെയ്ത് ബാക്കി സമയം വെറുതെ കളയാന്‍ മെനക്കെട്ടില്ല. പകരം 1846ല്‍ ടെലിച്ചറി സാധുജന ഫണ്ട് എന്ന പേരില്‍ 3000 രൂപയുമായി സാമൂഹ്യ സേവനം ആരംഭിച്ചു. പിന്നീട് 27000 രൂപയും കൂടി അതോടൊപ്പം കൂട്ടിച്ചേര്‍ത്ത് ബ്രണ്ണന്‍ എന്‍ഡോവ്‌മെന്റാക്കി മാറ്റി. തലശ്ശേരിയിലെ സാധു ജനങ്ങള്‍ക്ക് വേണ്ടിയാണ് അദ്ദേഹം ഈ തുക ഉപയോഗപ്പെടുത്തിയത്. തന്റെ അവസാന കാലത്ത് ജീവിത സമ്പാദ്യമായിരുന്ന ഒന്നര ലക്ഷം രൂപ തലശ്ശേരി കുട്ടികള്‍ക്ക് വര്‍ണഭേദങ്ങള്‍ക്കതീതമായി ആധുനിക രീതിയില്‍ സൗജന്യ വിദ്യാഭ്യാസം നല്‍കാനും ഒരു ആശുപത്രി സ്ഥാപിക്കാനുമായി നീക്കിവെച്ചു. എഡ്വേര്‍ഡ് ബ്രണ്ണന്‍ തന്റെ വില്‍പത്രത്തില്‍ ഇത് രേഖപ്പെടുത്തുകയും ചെയ്തു.
1859ല്‍ ബ്രണ്ണന്‍ സായ്പ് മരണപ്പെട്ടു. 1861ലാണ് അദ്ദേഹത്തിന്റെ ആഗ്രഹപ്രകാരമുള്ള സൗജന്യ വിദ്യാഭ്യാസത്തിനുള്ള സ്‌കൂള്‍ സ്ഥാപിച്ചത്. 1866ല്‍ ബാസല്‍ ജര്‍മന്‍ മിഷന്‍ സ്‌കൂളുമായി സംയോജിപ്പിച്ച ഈ വിദ്യാലയം 1868ല്‍ ഹൈസ്‌കൂളായി ഉയര്‍ത്തി. 1871ല്‍ ബാസല്‍ മിഷന്‍ സ്‌കൂളിന്റെ നടത്തിപ്പ് കയ്യൊഴിഞ്ഞു. 1883ല്‍ ജില്ലാ ഗവണ്‍മെന്റ് സ്‌കൂളായി മാറിയ ഈ വിദ്യാലയം 1884ല്‍ തലശ്ശേരി നഗരസഭ ഏറ്റെടുത്തു. പത്ത് വര്‍ഷത്തിനു ശേഷം ബ്രണ്ണന്‍ കോളെജ് ആയി വളര്‍ന്ന വിദ്യാലയം കോഴിക്കോടിനും മംഗലാപുരത്തിനും ഇടയിലുള്ള ആദ്യത്തെ കോളെജായിരുന്നു. 1949ല്‍ കോളെജില്‍ നിന്നും വേര്‍പെടുത്തിയ സ്‌കൂളിനെ ചിറക്കരയിലേക്ക് മാറ്റിയെങ്കിലും 1958ല്‍ കോളെജ് ധര്‍മടത്തേക്ക് പോയതോടെ പഴയ കെട്ടിടത്തിലേക്ക് തിരിച്ചെത്തി.

ചരിത്രം വഴി മാറുന്നു
സ്‌കൂളിന്റെ ചരിത്രം തലശ്ശേരിയുടെ വിദ്യാഭ്യാസ ചരിത്രം കൂടിയായിരുന്നു. പക്ഷേ, കാലം മാറിയപ്പോള്‍ ബ്രണ്ണന്‍ 'പഠിക്കാത്തവരുടെ' മാത്രം വിദ്യാലയമായി. അടുത്തുള്ള മറ്റു സ്‌കൂളുകളില്‍ അഞ്ചാം ക്ലാസിലേക്കും എട്ടാം ക്ലാസിലേക്കും പ്രവേശ പരീക്ഷ നടത്തി കുട്ടികളെ തെരഞ്ഞെടുത്ത് എസ് എസ് എല്‍ സിക്ക് മികച്ച വിജയം കരസ്ഥമാക്കിയപ്പോള്‍ 'ആര്‍ക്കും വേണ്ടാത്ത' കുറേ കുട്ടികളുടെ കേന്ദ്രമായി ബ്രണ്ണന്‍. കുറേക്കൊല്ലം തോറ്റ് തോറ്റ് സ്‌കൂള്‍ വിട്ടുപോകുന്നവര്‍ മാത്രമായി അവിടുത്തെ വിദ്യാര്‍ഥികള്‍. എസ് എസ് എല്‍ സിയുടെ വിജയശതമാനം കുറഞ്ഞ് കുറഞ്ഞ് പിന്നീട് കുറയാനില്ലാത്ത വിധം പൂജ്യത്തിലേക്ക് താഴ്ന്നു.
പൂജ്യന്മാരുടെ കൂട്ടമായി ബ്രണ്ണന്‍ താഴേക്ക് വീണതോടെയാണ് തലശ്ശേരിക്കാരുടെ പഴയ ബ്രണ്ണന്‍ സായ്പിനോടുള്ള സ്‌നേഹവും ബഹുമാനവും സടകുടഞ്ഞെഴുന്നേറ്റത്. എല്ലാവരേയും സൗജന്യമായി പഠിപ്പിക്കാന്‍ തന്റെ സമ്പാദ്യം മുഴുവന്‍ മാറ്റിവെച്ച ഒരു വലിയ മനുഷ്യന്‍ തലശ്ശേരിയെ സ്‌നേഹിച്ചതു പോലെ തലശ്ശേരിക്കാരും അദ്ദേഹത്തിന് തിരിച്ചു നല്കാന്‍ തയ്യാറായി. അങ്ങനെ കൂട്ടായ്മ രൂപപ്പെട്ടു. അധ്യാപകരുടെ, രക്ഷകര്‍ത്താക്കളുടെ, പൂര്‍വ്വ വിദ്യാര്‍ഥികളുടെ, നല്ലവരായ തലശ്ശേരിക്കാരുടെ കൂട്ടായ്മ... ആ കൂട്ടായ്മ ബ്രണ്ണന് പുതിയ ചരിത്രം രചിച്ചു. രാത്രിയും പകലുമില്ലാതെ കുട്ടികളെ പഠിപ്പിച്ചു. രക്ഷിതാക്കളും സംഘാടക സമിതിയും മാറിമാറി കുട്ടികള്‍ക്ക് കൂട്ടുനിന്നു. നേരവും കാലവുമില്ലാതെ പഠിപ്പിക്കാന്‍ അധ്യാപകര്‍ തയ്യാറായി. ഒരു സമൂഹം മുഴുവന്‍ തങ്ങളുടെ കൂടെയുണ്ടെന്നറിഞ്ഞപ്പോള്‍ പഠിപ്പില്‍ ഏറ്റവും പിറകിലായിരുന്ന കുട്ടിപോലും ആഞ്ഞുപിടിച്ചു. അങ്ങനെ... അങ്ങനെ.... പൂജ്യത്തില്‍ നിന്ന് ബ്രണ്ണന്റെ വിജയശതമാനം നൂറിലേക്കെത്തി. അപ്പുറത്തേയും ഇപ്പുറത്തേയും സ്‌കൂളുകള്‍ പ്രവേശ പരീക്ഷ നടത്തി അരിച്ചെടുത്ത കുട്ടികളെ എസ് എസ് എല്‍ സിക്ക് ജയിപ്പിച്ച് വലിയ മേനി നടിച്ചപ്പോള്‍ സമൂഹത്തിന്റെ ഏറ്റവും താഴെ തട്ടില്‍ നിന്നുള്ള വിദ്യാര്‍ഥികളെ മുഴുവന്‍ പഠിപ്പിച്ച് ജയിപ്പിച്ച് ബ്രണ്ണന്‍ ഹൈസ്‌കൂള്‍ മാതൃക കാണിച്ചു. എഡ്വേര്‍ഡ് ബ്രണ്ണനെന്ന മഹാനോട് നന്ദി കാണിച്ചു.
വിജയ ശതമാനത്തിലെ തിളക്കം ബ്രണ്ണന് ഹയര്‍ സെക്കന്‍ഡറിയിലേക്ക് വഴി തുറന്നുകൊടുത്തു. താഴേ ക്ലാസ്സുമുതല്‍ ആരംഭിക്കാനുള്ള അനുമതി ലഭിച്ചു; കൂടെ ഇംഗ്ലീഷ് മീഡിയവും. ഒരുകാലത്ത് ആരും തിരിഞ്ഞു നോക്കാനില്ലാതിരുന്ന ബ്രണ്ണന്‍ സ്‌കൂളില്‍ ഒരു സീറ്റ് കിട്ടാനുള്ള പിടിവലിയായി.

മാണിക്യക്കല്ല്
ഈയ്യിടെ മലയാളത്തില്‍ ഒരു സിനിമ പുറത്തിറങ്ങി. എന്‍ മോഹനന്‍ രചനയും സംവിധാനവും നിര്‍വഹിച്ച, പൃഥ്വിരാജ് നായകനായ മാണിക്യക്കല്ല്. ബ്രണ്ണന്‍ സ്‌കൂളിന്റെ കഥയാണ് സിനിമാ ഭാഷ്യം രചിച്ച് വെള്ളിത്തിരയിലെത്തിയത്. ഒരു വിദ്യാലയം എങ്ങനെ ഒരു നാടിന്റെ ചരിത്രത്തില്‍ തന്നെ അടയാളപ്പെടത്തുന്നുവെന്ന് ബ്രണ്ണന്‍ കാണിച്ചു തരുന്നു.
തലശ്ശേരി കോട്ടക്കു പിറകിലെ നവീകരിച്ച ഇംഗ്ലീഷ് ചര്‍ച്ചിന്റെ സെമിത്തേരിയിലെ കല്ലറയ്ക്കുള്ളില്‍ ബ്രണ്ണന്‍ സായ്പിന്റെ മൃതദേഹത്തിന്റെ പൊടിപോലും ചിലപ്പോള്‍ ബാക്കിയുണ്ടാവില്ല. പക്ഷേ, ആ മനുഷ്യന്‍ നട്ടുനനച്ച വലിയൊരു വിദ്യാലയം നഗരമധ്യത്തില്‍ തലയുയര്‍ത്തി നില്‍ക്കുന്നുണ്ട്.

വര്‍ത്തമാനം ആഴ്ചപ്പതിപ്പ്
17-07-2011

Wednesday, July 6, 2011

മഴ പെയ്യുന്നുണ്ടോ? മണ്ണിലും മനസ്സിലും


മഴയാണത്രെ മണ്ണിലും മനസ്സിലും. കനത്തു പെയ്യുന്ന മഴയെ കുറിച്ച് ആരാണ് പറഞ്ഞത്? കരഞ്ഞു പെയ്യുന്ന മഴയെ കുറിച്ച് പറഞ്ഞത് അശ്രഫ് ആഡൂരാണ്.
'മഴ ചെരിഞ്ഞ് വീഴുകയാണ്. ഇളംകാറ്റില്‍ ഇളകിയാടുന്ന മഴനാരുകള്‍ അറ്റുപോയ പട്ടത്തിന്റെ നൂല് പോലെ പിടയ്ക്കുകയാണ്. ആകാശം കറുത്തിട്ടുണ്ട്. കരിമേഘങ്ങള്‍ ആട്ടിന്‍ പറ്റങ്ങളെപ്പോലെ മെല്ലെ മെല്ലെ ചന്തത്തില്‍ നീങ്ങുന്നു. എന്നാവും അവയുടെ പനിനീര്‍ക്കുടം ഉടയുക... മഴക്കുഞ്ഞുങ്ങള്‍ പിറക്കുക...' (കരഞ്ഞുപെയ്യുന്ന മഴ).
കറുത്തിരുണ്ട ആകാശവും പെയ്യാന്‍ വിതുമ്പി നില്‍ക്കുന്ന കാര്‍മേഘങ്ങളുമൊക്കെ മലയാളിക്ക് സുപരിചിത ദൃശ്യങ്ങളാണ്. ജൂണ്‍ പിറക്കുന്നതോടെ, സ്‌കൂള്‍ തുറക്കുമെന്നും മഴ പെയ്തിറങ്ങുമെന്നും അറിയാത്തവര്‍ ആരാണുള്ളത്? പെയ്തിറങ്ങിയ മഴത്തുള്ളികള്‍ക്കിടയിലൂടെ നനഞ്ഞ വസ്ത്രങ്ങളുമായി സ്‌കൂളില്‍ പോകാത്തവര്‍ ആരാണുണ്ടാവുക? മഴ മലയാളിയുടെ ഗൃഹാതുരമായ സ്മരണയാണത്.
*** **** *** *** *** *** *** *** *** *** *** *** *** *** *** *** *** *** *** *** *** *** *** *** ***

മഴ അല്ലാഹുവിന്റെ അനുഗ്രഹമാണ്. ആകാശത്തു നിന്നും പെയ്തിറങ്ങുന്ന അനുഗ്രഹ വര്‍ഷം. മഴയെ കുറിച്ച് കേള്‍ക്കുന്ന ഓരോ അനുഗ്രഹ വാക്കുകള്‍ക്കിടയിലും ഓര്‍മ്മയിലെത്താറുള്ള ഒരു കഥയുണ്ട്. നസറുദ്ദീന്‍ ഹോജയുടെ പ്രശസ്തമായ കഥ. ആ കഥ ഇങ്ങനെയായിരുന്നു:
ഒരു ദിവസം മഴ പെയ്യുന്നതും നോക്കി ഹോജ വീട്ടിനു മുമ്പില്‍ നില്‍ക്കുകയായിരുന്നു. അപ്പോഴാണ് ഹോജയുടെ അയല്‍വാസി മഴയത്ത് നനഞ്ഞൊലിച്ച് വീട്ടിലേക്ക് ഓടുന്നതുകണ്ടത്. ഉടന്‍ വന്നു ഹോജയുടെ പ്രതികരണം: 'സുഹൃത്തേ നീയെന്താണിങ്ങനെ ഓടുന്നത്. മഴ അല്ലാഹുവിന്റെ അനുഗ്രഹമാണെന്ന് അറിഞ്ഞൂകൂടേ? താങ്കള്‍ അല്ലാഹുവിന്റെ അനുഗ്രഹത്തില്‍ നിന്നും ഓടിയൊളിക്കുകയാണോ?'
പാവം അയല്‍ക്കാരന്‍. ഹോജ പറഞ്ഞതു കേട്ടതോടെ മഴ മുഴുവന്‍ നനഞ്ഞ് സാവകാശത്തില്‍ വീട്ടിലേക്ക് നടന്നുപോയി.
മറ്റൊരു ദിവസം മഴ പെയ്തപ്പോള്‍ അയല്‍വാസി വീട്ടിനുമുമ്പിലും ഹോജ മഴയത്തുമായിരുന്നു. മഴയില്‍ വീട്ടിലേക്ക് ഓടുകയായിരുന്ന ഹോജയോട് അയല്‍വാസി ചോദിച്ചു: 'ഹോജാ, മഴ അല്ലാഹുവിന്റെ അനുഗ്രഹമാണെന്ന് പറഞ്ഞ താങ്കളിപ്പോള്‍ മഴയില്‍ നിന്നും ഓടിയൊളിക്കുകയാണോ?'
ഉരുളക്കുപ്പേരിയായിരുന്നു ഹോജയുടെ മറുപടി: 'സുഹൃത്തേ, അല്ലാഹുവിന്റെ അനുഗ്രഹം കൂടുതല്‍ കൂടുതല്‍ ലഭിക്കാന്‍ വേണ്ടിയാണ് ഞാന്‍ ഓടുന്നത്. നടന്നാല്‍ അത് കിട്ടുന്നത് കുറയുമല്ലോ?'
*** *** *** *** *** *** *** *** *** *** *** *** *** *** *** *** *** *** *** ***

മലയാള സാഹിത്യത്തില്‍ മഴ കടന്നുവരുന്ന നിരവധി കഥകളും കവിതകളുമുണ്ട്. മലയാളിയുടെ ജീവിതവുമായി ബന്ധപ്പെട്ട അവസ്ഥയാണല്ലോ മഴ. അതുകൊണ്ടുതന്നെ മഴ പറയാതെ ഒരു കഥയെങ്കിലും എഴുതാതിരിക്കാനാവില്ല കഥാകൃത്തുക്കള്‍ക്ക്.

മലയാളത്തിന്റെ പ്രിയപ്പെട്ട കഥാകാരന്‍ ടി പത്മനാഭന്റെ ഭാവിയിലേക്ക് എന്ന കഥയില്‍ ഇങ്ങനെ പറയുന്നു:
'കഴിയുന്ന വേഗത്തില്‍ വെളിയിലെത്താന്‍ ആളുകള്‍ ബദ്ധപ്പെടുമ്പോള്‍ ആ കമ്പാര്‍ട്ട്‌മെന്റിന്റെ മുന്നില്‍ രാജന്‍ സംശയിച്ചു നില്‍ക്കുകയായിരുന്നു. മഴ അപ്പോഴും പെയ്തുകൊണ്ടിരുന്നു. ആ യുവതി അവിടെത്തന്നെ ഇരിക്കുകയാണ്. രാജന്‍ എന്താണ് പറയേണ്ടത്?
മഴ ഇപ്പോഴൊന്നും തീരുമെന്ന് തോന്നുന്നില്ല.
ആ യുവതി ചിന്തയിലാണ്ടപോലെ കാണപ്പെട്ടു.
അതൊരാവശ്യമാണ്. തപിച്ച ഈ ഭൂമി ജലകണങ്ങള്‍ വീണുകുതിരട്ടെ! എന്നാല്‍ മാത്രമേ പുതിയൊരു ജീവിതത്തിന്റെ പച്ച നാളെ നമുക്കിവിടെ കാണുവാന്‍ കഴിയുകയുള്ളു.'

മലയാളിയുടെ ജീവിതത്തില്‍ മാത്രമല്ല കഥയിലും കവിതയിലുമൊക്കെ മഴ, പെയ്യുന്നതുപോലെ പ്രത്യക്ഷപ്പെടാറുണ്ട്. മഴക്കഥകളും മഴക്കവിതകളും ഇഷ്ടപ്പെടാത്തവര്‍ ആരാണുള്ളത്. ചിലപ്പോള്‍ ആഞ്ഞുപെയ്യുന്ന മഴ, മറ്റു ചിലപ്പോള്‍ ചാറിപ്പോകുന്ന മഴ, വേറെ ചിലപ്പോള്‍ പനിനീര്‍ കുടയുന്നതുപോലെ വന്നുകടന്നുപോകും. മഴയ്ക്ക് വിവിധ ഭാവങ്ങളാണ്.
വയനാട്ടില്‍ പഴയ കാലത്ത് മഴ തോരാതെ പെയ്തിരുന്നതായി പഴമക്കാര്‍ പറഞ്ഞു കേട്ടിട്ടുണ്ട്. നൂലൂപോലെ പെയ്തുകൊണ്ടിരിക്കുന്ന മഴ വയനാടിന്റെ മാത്രം പ്രത്യേകതയായിരുന്നു. ആ മഴയൊക്കെ ഇപ്പോള്‍ ഇല്ലാതായി. റോഡിന്റെ ഒരു വശത്ത് മഴ പെയ്യുമ്പോള്‍ മറുവശത്ത് ഒരു തുള്ളിയും വീഴാത്ത കാലമാണിപ്പോള്‍. വയനാടും ഏറെ മാറിപ്പോയിരിക്കുന്നു.

എന്‍ പി മുഹമ്മദിന്റെ ഒരു കഥയുണ്ട്. മുഹമ്മദിന്റെ ജനനം എന്നാണ് അതിന്റെ പേര്. കഥ കാണുക:
'മഴയോട് ചോദിക്ക: ആകാശത്തുനിന്നു കടിച്ചു മുരളുന്നതും കണ്ണീരായി കരയിലും കടലിലും വീഴുന്നതും പുകയായി ആകാശം തേടുന്നതും (പിന്നീട്) മണ്ണിലേക്ക് ഊര്‍ന്നിറങ്ങി കാണാതാവുന്നതും ആരുടെ ശക്തി കൊണ്ടാണ്?
മഴ അല്ലാഹുവെ കീര്‍ത്തിക്കുന്നു.
അവന്‍ പരമകാരുണികനും സര്‍വലോക രക്ഷിതാവുമാകുന്നു.
അല്ലാഹു എല്ലാ കാര്യങ്ങളെ കുറിച്ചും അഗാധജ്ഞാനമുള്ളവനാകുന്നു.'
*** *** *** *** *** *** *** *** *** *** *** *** *** *** *** *** *** *** *** ***

അടുത്ത കാലത്ത് മലയാള നോവല്‍ സാഹിത്യത്തില്‍ ഏറ്റവും കൂടുതല്‍ വില്‍പ്പന നടന്ന പുസ്തകമാണ് ബിന്യാമീന്റെ ആടുജീവിതം. മരുഭൂമിയില്‍ ആടുകളോടൊപ്പം ഒറ്റപ്പെട്ടുപോകുന്ന നജീബ് ഒരു മഴയത്ത് ആഹ്ലാദിക്കുകയാണ്. നജീബിന്റെ അറബിയാകട്ടെ മഴയെ പേടിച്ച് വാഹനവുമായി മസാറ വിട്ടുപോയ്ക്കളയുകയും ചെയ്യുന്നു. മഴ കനത്തു പെയ്ത അന്നുരാത്രിയില്‍ നജീബ് ശരിക്കും ആസ്വദിക്കുകയായിരുന്നു. ജീവിതത്തില്‍ ഒരു പ്രതീക്ഷയുമില്ലാതിരുന്ന ഒരുവന് മഴ വലിയൊരു പ്രതീക്ഷ നല്കിയതുപോലെ.
മഴത്തുള്ളികള്‍ ദേഹത്തേക്ക് വീണപ്പോഴാണ് നജീബ് അതിന്റെ വേദനയറിയുന്നത്. കുളിച്ചിട്ടും നഖവും മുടിയും മുറിച്ചിട്ടും മാസങ്ങള്‍ എത്രയോ കഴിഞ്ഞിരിക്കുന്നു. ശരീരം വെള്ളം കാണാത്ത ദിവസങ്ങള്‍. ആ നാളുകളിലൊന്നിലാണ് മരുഭൂമിയില്‍ മഴ കനത്തു പെയ്തത്. മസാറയ്ക്ക് സമീപം തമ്പില്‍ ഉറങ്ങുകയായിരുന്ന അറബി മഴപെയ്ത്തും ഇടിമിന്നലും കണ്ട് പേടിച്ചു വിറച്ചുപോയി. അയാള്‍ നജീബിനെ ആദ്യമായി പേരുചൊല്ലി വിളിച്ചത് ആ മഴപ്പെയ്ത്തിലെ പേടിയിലായിരുന്നു. തന്റെ തമ്പിലേക്ക് നജീബിനെ വളിച്ചുകയറ്റിയതും ആ മഴയില്‍ മാത്രമായിരുന്നു. എന്നിട്ടും പേടികൂടിയപ്പോള്‍ അയാള്‍ തന്റെ വാഹനവുമായി വീട്ടിലേക്ക് മടങ്ങിപ്പോയ്ക്കളഞ്ഞു.
അന്നുരാത്രി മുഴുവന്‍ നജീബ് മഴയത്ത് ആഹ്ലാദിച്ചു. നജീബ് മാത്രമല്ല, തന്നോടൊപ്പം യാത്രവന്ന സമീപത്തെ മസാറയിലെ മലയാളിയും ആ മഴയെ ആഹ്ലാദത്തോടെയാണ് വരവേറ്റത്. മൂര്‍ദ്ദാവിലേക്ക് ആഞ്ഞുപതിച്ച മഴത്തുള്ളിക്ക് എത്രമാത്രം വേദയുണ്ടാക്കാനാകുമെന്നും നജീബ് അന്നാണറിഞ്ഞത്. ദേഹത്തെ ചെളി മുഴുവന്‍ മഴ കഴുകിക്കളഞ്ഞ രാത്രി.
നജീബിനോടൊപ്പം വായനക്കാരനും അന്നുരാത്രിയിലെ മരുഭൂമഴയില്‍ നനഞ്ഞു കുളിച്ചുപോകും.
*** *** *** *** *** *** *** *** *** *** *** *** *** *** *** *** *** *** *** ***

കേരള സാഹിത്യ അക്കാദമിയുടെ ഏറ്റവും മികച്ച യാത്രാ വിവരണത്തിനുള്ള 2010ലെ പുരസ്‌ക്കാരത്തിന് അര്‍ഹമായ മരുഭൂമിയുടെ ആത്മകഥയില്‍ വി മുസഫര്‍ അഹമ്മദ് മരുഭൂമിയിലെ മഴയെ കുറിച്ച് മനോഹരമായി വിവരിക്കുന്നുണ്ട്. മലയാളിയുടെ മനസ്സിലുള്ള മഴയല്ല മരുഭൂമിയിലെ മഴ. മലയാളിക്ക് സങ്കല്‍പ്പിക്കാന്‍ പോലും കഴിഞ്ഞേക്കില്ല ആ മഴ.
'ഉച്ച കഴിഞ്ഞപ്പോള്‍ മാനത്ത് മഴയുടെ ലക്ഷണങ്ങള്‍ കണ്ടുതുടങ്ങി. മഴ പെയ്യാന്‍ സാധ്യതയില്ലാത്ത കാലമാണ്. അതിനാല്‍ മാനം വെറുതെ ഇരുളുകയാണെന്ന് തോന്നി. പൊടുന്നനെ അല്‍ നഫൂദ് മരുഭൂമിയില്‍ നിന്ന് സൂര്യവെളിച്ചം അപ്രത്യക്ഷമായി. ആകാശം അതിന്റെ നിഴലുടുപ്പായ മഴയെ തുറന്നുവിട്ടു. അല്‍പ്പം ശക്തമായിത്തന്നെ മഴ പെയ്തു. മരുഭൂമിയുടെ നടുക്ക് നില്‍ക്കുമ്പോള്‍ മഴ കാണുന്നത് ആദ്യമാണ്.
മഴയുടെ ആദ്യ തുള്ളികള്‍ വീണുതുടങ്ങിയപ്പോള്‍ തന്നെ മരുഭൂമി അതിന്റെ വായ തുറന്നുപിടിച്ചു. വെള്ളത്തെ മണല്‍പ്പരപ്പ് വലിച്ചു കുടിക്കാന്‍ തുടങ്ങി. അത്രയും ദാഹിച്ച് കിടക്കുകയായിരിക്കണം മരുപ്രദേശം. 20 മിനുട്ട് പെയ്ത മഴയെ അത് കുടിച്ചു വറ്റിച്ചു. ഒരു തുള്ളി വെള്ളം പോലും പുറത്തുവിടാതെ. നാട്ടില്‍ പുതുമഴയില്‍ പാറ്റകള്‍ പൊടിയുന്നതിനെ ഓര്‍മിപ്പിച്ചുകൊണ്ട് ആ നനവില്‍ വണ്ടുകളെപ്പോലെ തോന്നിച്ച ചില പ്രാണികള്‍ പാറി നടന്നു. തേളുകള്‍ നനഞ്ഞ മണലില്‍ കുഴിച്ച് ഒളിച്ചു താമസിക്കാനുള്ള വീടുകള്‍ പണിതുകൊണ്ടിരുന്നു.
ഏറെ നാളത്തെ ചൂടും വിയര്‍പ്പും തുടച്ചുമാറ്റി അല്‍ രജാജിലെ കല്ലുകളും ആ മഴയില്‍ കുളിച്ചു തണുത്തു. ഇനി ഒരു മഴ വരുംവരെ അവയ്ക്ക് കുളിക്കാനാവില്ല. കുളിച്ചൊരുങ്ങി പുറത്തേക്ക് നടക്കാന്‍ അവ തയ്യാറെടുക്കുകയാണോ എന്ന് തോന്നിച്ചു. ഇല്ല, അവയ്ക്ക് ചലിക്കാനാവില്ല. മരുഭൂമിയില്‍ പൂണ്ടുനില്‍ക്കുന്നത് തുടരാതെ അവയ്‌ക്കൊന്നും ചെയ്യാനില്ല.' (മരുഭൂമിയുടെ ആത്മകഥ- ഭാഷയില്ലാത്ത വാക്കുകള്‍ എന്ന അധ്യായത്തില്‍ നിന്ന്).
*** *** *** *** *** *** *** *** *** *** *** *** *** *** *** *** *** *** *** ***

'മഴ കത്തി കഴുകി വന്നെന്റെ
മനസ്സിലെ തീയും കെടുത്തി
മരുതലങ്ങളില്‍ മഴത്തുള്ളി വെന്തു
പുഴകളില്‍ കുഞ്ഞുങ്ങള്‍പോല്‍ മഴ തുള്ളുന്നു.
ചുഴികളില്‍ നെഞ്ചിടിപ്പായി
ഞരമ്പുകളില്‍ പെയ്തുതോരുന്നു
മഴ
മരണം
മരുനിലക്കാഴ്ചകള്‍'.
(മഴ- രാഘവന്‍ അത്തോളി)
*** *** *** *** *** *** *** *** *** *** *** *** *** *** *** *** *** *** *** ***

മഴ തോരാതെ പെയ്ത ഒരു വൈകുന്നേരം ഇപ്പോഴും ഓര്‍മയുണ്ട്. വര്‍ഷങ്ങള്‍ക്കുമുമ്പൊരു മഴക്കാലമാണ്. വയനാട്ടിലെ വൈത്തിരിയിലെ മല മുകളില്‍ നീലക്കുറിഞ്ഞി പൂത്തിട്ടുണ്ട് എന്ന് വിളിച്ചു പറഞ്ഞത് അക്കാലത്തെ വര്‍ത്തമാനം വൈത്തിരി ഏജന്റ് കരുണേട്ടനാണ്. മലമുകളിലെ നീലക്കുറിഞ്ഞിയും തേടി തേലിയത്തോട്ടത്തിനു നടുവിലൂടെ ഞാനും അഷറഫ് ചേരാപുരവും മണിക്കൂറുകളോളമാണ് മലമുകളിലേക്ക് നടന്നു കയറിയത്. കോടമഞ്ഞുള്ള ദിവസമായിരുന്നു അത്. മലയിലെ കാട്ടിലെവിടെയോ ഒറ്റക്കൊമ്പന്‍ ഇറങ്ങിയിട്ടുമുണ്ടത്രേ. പക്ഷേ, നീലക്കുറിഞ്ഞി ലക്ഷ്യമാക്കിയുള്ള യാത്രയില്‍ അതൊന്നും തടസ്സമായി തോന്നിയിരുന്നില്ല. ഒടുവില്‍ വഴിതെറ്റി എത്തിയത് വെള്ളച്ചാട്ടത്തിനു നടുവിലാണ്. വഴിയറിഞ്ഞും അറിയാതേയും അവിടുന്ന് വീണ്ടും നീലക്കുറിഞ്ഞി മലയിലേക്ക്. എല്ലാം കഴിഞ്ഞ് മടങ്ങുമ്പോഴേക്കും നേരം വൈകിത്തുടങ്ങിയിരുന്നു. മാനം കറുത്തിരുണ്ടിരുന്നു. മലയിറങ്ങുമ്പോള്‍, തേയിലത്തോട്ടത്തിന് നടുവിലൂടെ നടക്കുമ്പോള്‍ ആ കര്‍ക്കിടകം മുഴുവന്‍ ഞങ്ങളുടെ മേലേക്ക് തിമിര്‍ത്തു പെയ്തു. നനുത്ത മണ്ണിലെ അട്ടകള്‍ ഞങ്ങളുടെ കാലുകളില്‍ ചോരകുടിച്ചു തടിച്ചു.
*** *** *** *** *** *** *** *** *** *** *** *** *** *** *** *** *** *** *** ***

ഒരു കുടം വെള്ളം
തലയില്‍
ഒന്നിച്ചു കമഴ്ത്തിയാല്‍
മുടിക്കുറ്റി നോവും
ശ്വാസം പിടയ്ക്കും
മൂളിപ്പാട്ടു-
മുറിഞ്ഞൊലിച്ചു
വഴുക്കും.

ആകാശക്കലം
ആരോ
കമഴ്ത്തുന്നുണ്ട്.
അതു
ഇഴകളായ് ചീന്തി
തിരികളായ് വന്നേ
തൊടുകയുള്ളു

ഏറ്റ- വെയിലിനെയെല്ലാം
ഒപ്പിയെടുക്കുന്ന
നനവിന്റെ നൂലുകള്‍
ആരോ
വലിയ വീഴ്ചകളെ
എടുത്തു
തലനാരുവണ്ണം
പകുത്ത്
തലയെടുപ്പില്‍
തൂവല്‍ കനമായി
വച്ചുതരുന്നുണ്ട്.

അകത്തു
മഴയുള്ള
ആരോ.
(മഴയുടെ കനം- വീരാന്‍കുട്ടി)
*** *** *** *** *** *** *** *** *** *** *** *** *** *** *** *** *** *** *** ***

അടുത്ത മഴയുടെ ആരംഭത്തിനു മുമ്പേ കാര്യസ്ഥന്‍ വിവരമറിയിച്ചു. കെട്ടിമേയുന്നില്ലാത്രെ. തന്നെ ചോര്‍ന്നൊലിച്ച് വീഴട്ടെ എന്നാണ് ഏമാന്‍ പറയുന്നത്.
വാടക മുന്‍കൂര്‍ വാങ്ങാന്‍ കാര്യസ്ഥന്‍ മടിച്ചു. അയാള്‍ നിര്‍ബന്ധിച്ച് കൊടുത്തു.
മഴ വന്നു. കാറ്റിന്റെ മൂളക്കം ആദ്യം വയലും കടന്ന് കവുങ്ങുകള്‍ക്കിടയിലൂടെ വന്നു. പിന്നീട് ചാറല്‍ മഴയായി. അതിന് കനംകൂടി. വരുച്ചാലുകളില്‍ മഴവെള്ളം ഒത്തുകൂടി. കവുങ്ങുകളും വാഴകളും കുതിര്‍ന്നുവിറച്ചു.
അകത്തിരിക്കെ ഭീതിയോടെ അയാള്‍ കണ്ടു. പൊളിഞ്ഞ ഭിത്തിയുടെ വിടവിലൂടെ മണ്ണുകുതിര്‍ന്നു ചോര്‍ന്ന മഴവെള്ളം ചോരപോലെ അകത്തേക്ക് കുത്തിയൊഴുകി. ഉടമസ്ഥന്‍ ആഗ്രഹിച്ചപോലെ എല്ലാം തകര്‍ന്ന് നിലം പറ്റുകയാണോ? ഇറയത്തുനിന്ന് വൈക്കുല്‍ പറന്നു. ചുവന്നു കലങ്ങിയ വെള്ളം വിടവിലൂടെ കുത്തിയൊഴുകുന്നു. അയാള്‍ മഴ നനഞ്ഞുനിന്ന് മുറ്റത്തു നിന്ന് മണ്ണുകുഴച്ചെടുത്ത് ഉരുട്ടിക്കൂട്ടി ചുവരിലെ വിടവടച്ചു. മേല്‍പ്പുരയില്‍ നിന്ന് കുത്തിയൊഴുകുന്ന വെള്ളത്തിന് ചുവട്ടില്‍ അടുക്കളയിലെ പാത്രങ്ങള്‍ നിരത്തി. കാറ്റടിച്ചു കയറിയ വെള്ളം തുണിമുക്കി തുടച്ചുകളഞ്ഞു.
മഴയുടെ ഇരമ്പം നിന്നു. കരഞ്ഞു തളര്‍ന്ന കുഞ്ഞിന്റെ രോദനം പോലെ കാറ്റിന്റെ അവസാനത്തെ മൂളലുകള്‍ ബാക്കി നിന്നു.
(അഭയം വീണ്ടും- എം ടി വാസുദേവന്‍ നായര്‍)
*** *** *** *** *** *** *** *** *** *** *** *** *** *** *** *** *** *** *** ***

ചെറുപ്പത്തിലാണ് തറവാട്ടിലെ വലിയ മുറ്റത്ത് നിര്‍ത്താതെ പെയ്യുന്ന മഴ ചെറിയൊരു പുഴയുണ്ടാക്കും. ഒഴുകിപ്പോകുന്ന വെള്ളത്തിലേക്ക് കടലാസു തോണികള്‍ ഇറക്കുമ്പോള്‍ ഭയങ്കര ആവേശമായിരിക്കും. മഴവെള്ളപ്പുഴയില്‍ കുടുങ്ങിപ്പോയ ഉറുമ്പുകള്‍ കടലാസുതോണിയില്‍ കയറി രക്ഷപ്പെടുമെന്ന് വെറുതെ വ്യാമോഹിക്കും. പക്ഷേ, കുറച്ചുദൂരം ഒഴുകിനടക്കുന്ന കടലാസുതോണി നനഞ്ഞു കുതിര്‍ന്ന് വെള്ളത്തില്‍ മുങ്ങും. മഴ തോര്‍ന്ന് വെള്ളം തീരുമ്പോള്‍ ചുരുട്ടിക്കൂട്ടിയ നിലയില്‍ കടലാസ് തോണി മുറ്റത്തിന്റെ ഏതെങ്കിലുമൊരു കോണില്‍ കിടക്കുന്നുണ്ടാകും.
മനസ്സിന്റെ ഒരു മൂലയില്‍ ഇപ്പോഴും ആ കടലാസ് തോണി കിടക്കുന്നുണ്ടോ? അതില്‍ ഏതെങ്കിലുമൊക്കെ ഉറുമ്പ് പിടിച്ചു കയറി മഴപ്പുഴയില്‍ നിന്ന് രക്ഷപ്പെടുന്നുണ്ടാകുമോ? ബാല്യങ്ങള്‍ നഷ്ടപ്പെട്ടുപോയവര്‍ക്ക് ഇതൊക്കെ മനസ്സിലാകുന്നുണ്ടാകുമോ? ആര്‍ക്കറിയാം.
*** *** *** *** *** *** *** *** *** *** *** *** *** *** *** *** *** *** *** ***

മഴ നിര്‍ത്താതെ പെയ്ത് വലയില്‍ വെള്ളം പെരുകി. ഉച്ച കഴിഞ്ഞു. അപ്പോഴും അകലെ പുഴക്കരയില്‍ അവള്‍ നില്‍ക്കുന്നത് അയാള്‍ക്ക് കാണാമായിരുന്നു....
അമ്മാമന്റെ കൈ പിടിച്ച് അവള്‍ ഒതുക്കുകല്ലുകള്‍ കയറി.
ചന്ദ്രികയെ കണ്ട് ലീലയ്ക്ക് സഹിച്ചില്ല. ആകെ നനഞ്ഞു കുതിര്‍ന്നിരുന്നു. സാരിയുടെ അറ്റം നിലത്തു മഴ വെള്ളത്തില്‍ ഇഴയുന്നുണ്ടായിരുന്നു. മുടി അഴിഞ്ഞു കിടന്നിരുന്നു.
നിയ്യെവിടെയായിരുന്നു ഇത്രനേരം?
ചന്ദ്രിക ഒന്നും പറയാതെ അകത്തേക്ക് നടന്നു. അവര്‍ പിറകെ ചെന്നു.
എവിടെ നിന്റെ പുസ്തകം?
കൈയില്‍ പുസ്തകം ഉണ്ടായിരുന്നില്ല. എവിടെ വെച്ചു എന്ന് അവള്‍ക്ക് ഓര്‍മ്മയുണ്ടായിരുന്നില്ല.
പൊഴക്കരേല് ഇരിക്ക്യാരുന്നു. മഴേത്ത്.
അമ്മാവന്‍ ഷര്‍ട്ടൂരിയിട്ടു. അയാള്‍ തലയില്‍ നിന്നും പിരടിയില്‍ നിന്നും മഴവെള്ളം തോര്‍ത്തുകൊണ്ടു തുടച്ചു.
വിളിച്ചാല് വരേണ്ടേ? പറഞ്ഞാല് കേക്കേണ്ടേ?
(മയ്യഴിപ്പുഴയുടെ തീരങ്ങളില്‍- എം മുകുന്ദന്‍)
*** *** *** *** *** *** *** *** *** *** *** *** *** *** *** *** *** *** *** ***

മഴയനുഭവങ്ങളുള്ള എത്രയോ ഭാഗങ്ങള്‍ ചരിത്രത്തിലുണ്ട്. മഴയെ കുറിച്ച് ഖുര്‍ആന്‍ വിവരിക്കുന്നുണ്ട്.
അല്ലെങ്കില്‍, അവരുടെ ഉപമ ആകാശത്തുനിന്ന് (ഒഴുകിവരുന്ന) ഒരു പെരുമഴ പോലെയാകുന്നു. അതില്‍ അന്ധകാരങ്ങളും ഇടിയും മിന്നലുമുണ്ട്.
ഇടിവാളുകള്‍ നിമിത്തം മരണത്തെ ഭയന്ന് അവര്‍ (ആ മഴയില്‍ പെട്ടവര്‍) തങ്ങളുടെ വിരലുകളെ തങ്ങളുടെ ചെവിയില്‍ ഇടുന്നു!
അല്ലാഹു അവിശ്വാസികളെ വലയം ചെയ്യുന്നവനാകുന്നു.
(വിശുദ്ധ ഖുര്‍ആന്‍ 2:19)
*** *** *** *** *** *** *** *** *** *** *** *** *** *** *** *** *** *** *** ***

നൂഹ് നബിയുടെ കപ്പലിനെ കുറിച്ച് ഖുര്‍ആന്‍ പറയുന്നത് നിര്‍ത്താതെ പെയ്ത മഴയുമായി ബന്ധപ്പെട്ടാണല്ലോ. പ്രവാചകന്‍ നൂഹ് തന്റെ ജനതയില്‍ വിശ്വസിച്ചവരോട് കപ്പലില്‍ കയറാന്‍ ആജ്ഞാപിക്കുകയും പക്ഷി-മൃഗാദികളില്‍ നിന്ന് ഓരോ ഇണകളെ തന്നോടൊപ്പം കൂട്ടുകയും ചെയ്തു. ഏഴ് രാത്രിയും ഏഴ് പകലും നിര്‍ത്താതെ പെയ്ത മഴ നൂഹ് നബിയുടെ സമുദായത്തിനുള്ള പരീക്ഷണമായിരുന്നു. വിശ്വസിച്ചവരെ രക്ഷപ്പെടുത്തുകയും അവിശ്വാസികളെ ശിക്ഷിക്കുകയും ചെയ്തു അല്ലാഹു ആ മഴയിലൂടെ.
*******************************************************************************

മഴക്കാറുകളില്‍ നിന്നു കുത്തി ഒഴുകുന്ന വെള്ളം (മഴയും) നാം ഇറക്കി.
അതുകൊണ്ടു നാം ധാന്യവും സസ്യവും (ഉത്പാദിപ്പിച്ച്) വെളിക്കു വരുത്തുവാന്‍ വേണ്ടി
ഇടതിങ്ങിയ തോട്ടങ്ങളും (വെളിക്കു വരുത്തുവാന്‍)
(വിശുദ്ധ ഖുര്‍ആന്‍ 78: 14-16)
*******************************************************************************

നിങ്ങള്‍ക്ക് മഴ വര്‍ഷിക്കുന്നവന്‍ ആരാണ്? മേഘങ്ങളില്‍ നിന്നും അവന്‍ ജലം ഇറക്കിയില്ലായിരുന്നെങ്കില്‍ ആരാണ് നിങ്ങള്‍ക്ക് വെള്ളം തരികയെന്ന് അല്ലാഹു ചോദിക്കുന്നുണ്ട്.
*******************************************************************************

കനത്ത മഴയെ തുടര്‍ന്ന് വെള്ളത്തില്‍ അമര്‍ന്നു പോകുന്ന എത്രയോ നഗരങ്ങളുണ്ട്. അത്രയും കാലം സുഖമായി ജീവിച്ചിരുന്നവര്‍ പെട്ടെന്നൊരുനാള്‍ മഴ കനത്തു പെയ്യുന്നതോടെ വെള്ളപ്പൊക്കത്തില്‍ ആ നഗരം ജീവിക്കാന്‍ കഴിയാത്ത വിധത്തിലായിത്തീരുന്നു.
മഴ അനുഗ്രഹമാണ്. നമ്മളറിയാതെ നമുക്കു ചുറ്റും പെയ്തുതീരുന്ന അനുഗ്രഹം!

പുടവ വനിതാ മാസിക ജൂലൈ 2011

Followers

About Me

My photo
thalassery, muslim/ kerala, India