Friday, November 26, 2010

സദാനന്ദന്റെ 'സമയം'


അങ്ങനെ അവരെല്ലാം ചേര്‍ന്ന് അയാളെ വിഡ്ഡിയാക്കി
എറണാകുളത്തു നിന്നും കണ്ണൂരിലേക്ക് പോവുകയായിരുന്ന ആ തീവണ്ടിയില്‍ അന്ന് സദാനന്ദന്‍ മാത്രമായിരുന്നില്ല യാത്ര ചെയ്തത്. മനസ്സില്‍ സ്വരുക്കൂട്ടിവെച്ച കുറേ സ്വപ്നങ്ങളും പ്രതീക്ഷകളും കൂടി ഉണ്ടായിരുന്നു തീവണ്ടിയില്‍ അയാളുടെ കൂടെ. ഇലക്ട്രിക്കല്‍ എന്‍ജിനിയറിംഗില്‍ ഡിപ്ലോമയും എറണാകുളത്ത് വിവിധ കമ്പനികളില്‍ ജോലിയും ഇന്‍ഡസ്ട്രിയല്‍ എന്റര്‍പ്രണര്‍ഷിപ്പ് ട്രെയിനിംഗും പിന്നെ ആത്മവിശ്വാസവുമാണ് അക്കാലത്ത് സദാനന്ദന്റെ കൈവശമുണ്ടായിരുന്നത്. നെയ്ത്തുകാരനായ എളമ്പിലായി കുഞ്ഞമ്പുവിന്റേയും ശാരദയുടേയും ഒന്‍പത് മക്കളില്‍ മൂന്നാമനായ എളമ്പിലായി സദാനന്ദന്‍ എന്ന 25കാരന് വ്യവസായ സ്ഥാപനം തുടങ്ങാന്‍ ഇതില്‍ക്കൂടുതലൊന്നും ആവശ്യമുണ്ടായിരുന്നില്ല.

ഒരു കഥ ഇവിടെ തുടങ്ങുന്നു
1978 ഡിസംബര്‍ 20. തോട്ടടയില്‍ 12 സെന്റ് സ്ഥലം സ്വന്തമായി വാങ്ങി അവിടെ കെട്ടിടം പണിത് സ്വപ്നക്കൂടൊരുക്കിയ സദാനന്ദന്റെ വ്യവസായം തുടങ്ങിയത് അന്നായിരുന്നു. ടീ ചെസ്റ്റ് മെറ്റല്‍ ഫിറ്റിംഗ്‌സായിരുന്നു സദാനന്ദന്റെ വിസുശ്രീ ഇന്‍ഡസ്ട്രീസില്‍ നിന്നും ഉത്പാദനം നടത്തിയത്. ചായപ്പൊടി പെട്ടികള്‍ക്ക് ബലം കിട്ടാന്‍ അടിക്കുന്ന ടിന്‍ കോട്ട് ചെയ്ത ഇരുമ്പ് പട്ടയാണ് ടീ ചെസ്റ്റ് മെറ്റല്‍ ഫിറ്റിംഗ്‌സ്. ബ്രീഫ് കെയ്‌സിനും സ്യൂട്ട്‌കെയ്‌സിനും ഉപയോഗിക്കുന്ന അലൂമിനിയം ബീഡിംഗ്‌സും ഇവിടുത്തെ ഉത്പന്നമായിരുന്നു. സഹോദരിമാരായ വിജയലക്ഷ്മിയുടേയും സുജാതയുടേയും ശ്രീലതയുടേയും ആദ്യാക്ഷരങ്ങള്‍ ചേര്‍ത്താണ് വിസുശ്രീയെന്ന പേര് സദാനന്ദന്‍ കണ്ടെത്തിയത്.
കേരള ഫിനാന്‍ഷ്യല്‍ കോര്‍പ്പറേഷനില്‍ നിന്നും സിഡ്‌കോയില്‍ നിന്നും പണം വായ്പയെടുത്താണ് സ്ഥാപനം തുടങ്ങിയത്. പത്തോളം തൊഴിലാളികളാണ് ജോലിക്കുണ്ടായിരുന്നത്. ആദ്യകാലത്ത് ഏറെ ലാഭത്തോടെ മുന്നോട്ടുപോയ സ്ഥാപനത്തിന് പിന്നെ പറയാന്‍ ഏറെ കഥകളുണ്ടായി, സദാനന്ദന്റെ ജീവിതത്തിനും. വെറും 101 ദിവസത്തിന്റെ വ്യത്യാസത്തിലാണ് ആദ്യം സര്‍ക്കാര്‍ സദാനന്ദനെ വഞ്ചിച്ചു കളഞ്ഞത്. 1979 ഏപ്രില്‍ ഒന്ന് മുതല്‍ പ്രാബല്യത്തില്‍ വന്ന ബജറ്റില്‍ ചെറുകിട വ്യവസായങ്ങള്‍ക്ക് സംസ്ഥാന സര്‍ക്കാര്‍ ഏഴ് വര്‍ഷത്തേക്ക് നികുതി ഇളവ് നല്കി. പുതിയ ബജറ്റ് നിലവില്‍ വരുമ്പോള്‍ സദാനന്ദന്റെ സ്ഥാപനത്തിന് 101 ദിവസം മാത്രമായിരുന്നു പ്രായം. അതേ സമയത്ത് തുടങ്ങിയ മറ്റു പല ചെറുകിട വ്യവസായികളും ബില്ലിലും മറ്റും കൃത്രിമം കാണിച്ചും പേര് മാറ്റിയുമൊക്കെ നികുതി ഇളവ് അനുഭവിച്ചപ്പോള്‍ ഗാന്ധിസത്തിന്റെ പിന്‍ബലംകൊണ്ടു മാത്രം ഈ മനുഷ്യന്‍ കനത്ത നികുതിയുമായി കമ്പോളത്തില്‍ പിടിച്ചു നില്‌ക്കേണ്ടി വന്നു. പ്രധാന വിപണന മേഖലയായ നീലഗിരിയില്‍ എല്ലാ ഇളവുകളോടെയും ഇതേ വ്യവസായം മറ്റൊരാള്‍ തുറന്നപ്പോള്‍ സദാനന്ദന്റെ കച്ചവടമെല്ലാം ആ വഴിയിലേക്കു പോയി. അങ്ങനെയാണ് ഐ എസ് ഐ മുദ്രയുള്ള ഉത്പന്നങ്ങള്‍ നിര്‍മ്മിക്കാമെന്ന് സദാനന്ദന്‍ ചിന്തിച്ചു തുടങ്ങിയത്.

ഐ എസ് ഐ അഥവാ ഇയാള്‍ സമയം കളഞ്ഞ ഇനം
ഐ എസ് ഐ മുദ്രയ്ക്കു വേണ്ടി അപേക്ഷ കൊടുത്തപ്പോള്‍ 1979 ഒക്‌ടോബറില്‍ ലൈസന്‍സ് കിട്ടി. എന്നാല്‍ വിസുശ്രീക്ക് ടീ ചെസ്റ്റ് മെറ്റലിന് ഐ എസ് ഐ മുദ്രയുള്ള ഉത്പന്നങ്ങള്‍ നിര്‍മ്മിക്കാന്‍ ആവശ്യമായ ഗുണനിലവാരമുള്ള അസംസ്‌കൃത വസ്തുക്കള്‍ ആഭ്യന്തര വിപണിയില്‍ ലഭ്യമായിരുന്നില്ല. അതുകൊണ്ടു തന്നെ അത്തരം ഉത്പാദനം നടന്നുമില്ല. 1982 ആഗസ്ത് മാസത്തിലാണ് ഐ എസ് ഐ നിലവാരമുള്ള ഉത്പന്നത്തിന് അനുയോജ്യമായ അസംസ്‌കൃത വസ്തുക്കളുടെ ഇറക്കുമതി ചെയ്യാനുള്ള ഓഫര്‍ വിസുശ്രീക്ക് ലഭിച്ചത്. അസംസ്‌കൃത വസ്തുക്കള്‍ 50 ടണ്ണെങ്കിലും ഇറക്കുമതി ചെയ്യേണ്ടതുള്ളതിനാല്‍ ലെറ്റര്‍ ഓഫ് ക്രഡിറ്റിനു വേണ്ടി തനിക്ക് പ്രവര്‍ത്തന മൂലധന വായ്പ നല്കിയ സ്റ്റേറ്റ് ബാങ്ക് ഓഫ് ഇന്ത്യയെ തന്നെ സദാനന്ദന്‍ സമീപിച്ചു. എന്നാല്‍ ഏറെ നാളത്തെ അലച്ചിലിനു ശേഷം സ്റ്റേറ്റ് ബാങ്ക് ഓഫ് ഇന്ത്യ സദാനന്ദന് ലെറ്റര്‍ ഓഫ് ക്രഡിറ്റ് നല്കുമ്പോള്‍ അത് ഇറക്കുമതി ലൈസന്‍സിന്റെ അവസാന ദിവസമായിരുന്നു. മാത്രമല്ല 50 ടണ്ണിന് അപേക്ഷ നല്കിയയാള്‍ക്ക് അനുവദിച്ചത് 30 ടണ്ണിനുള്ള അനുമതി മാത്രവും. മറ്റൊരു കെടുതി കൂടി ബാങ്ക് ചെയ്തുവെച്ചു. താന്‍ സെക്യൂരിറ്റിയായി ബാങ്കിന് നല്കിയ തുക കണക്കിലെടുക്കാതെ ദൈനംദിന ആവശ്യങ്ങള്‍ക്കായി അക്കൗണ്ടിലുണ്ടായിരുന്ന 20,000 രൂപ കൂടി അനുവാദം ചോദിക്കാതെ ബാങ്ക് സെക്യൂരിറ്റി ഇനത്തിലേക്ക് പിടിച്ചു. അതോടെ കൂനിന്മേല്‍ കുരു പോലെയായി സദാനന്ദന്റേയും വിസുശ്രീയുടേയും അവസ്ഥ. സ്ഥാപനം സ്തംഭനത്തിലേക്ക് പോകാന്‍ പിന്നെ ഏറെ നാളുകളൊന്നും വേണ്ടി വന്നില്ല.

ഒരു പരിശോധന; തെറ്റിന്റേയും ശരിയുടേയും ന്യായം
അന്‍പത് ടണ്ണിന് പകരം 30 ടണ്‍ ഇറക്കുമതി ചെയ്യാന്‍ മാത്രം ലെറ്റര്‍ ഓഫ് ക്രഡിറ്റ് ഹാജരാക്കിയതിനാല്‍ ലഭിക്കേണ്ടിയിരുന്ന 0.22 എം എം കനമുള്ള അസംസ്‌കൃത വസ്തു വിസുശ്രീയ്ക്ക് ലഭിച്ചില്ല. മാത്രമല്ല ഓര്‍ഡര്‍ നല്കി 45 ദിവസത്തിനകം ലഭിക്കേണ്ടിയിരുന്ന അസംസ്‌കൃത വസ്തു കമ്പനിയിലെത്തുമ്പോള്‍ അഞ്ച് മാസം കഴിഞ്ഞിരുന്നു. കരാര്‍ പ്രകാരം ഉത്പന്നങ്ങള്‍ കൊടുക്കാന്‍ നിര്‍ബന്ധിതനായതിനാല്‍ വില കൂടിയതും കനം കൂടിയതുമായ മെറ്റീരിയല്‍ ഉപയോഗിച്ച് ഐ എസ് ഐ ഉത്പന്നങ്ങള്‍ ഉണ്ടാക്കേണ്ടി വന്നു. ഉത്പാദനം തുടങ്ങിയതോടെ 1983 ഏപ്രില്‍ 19ന് ഐ എസ് ഐ പരിശോധനയ്ക്കായി ഡപ്യൂട്ടി ഡയറക്ടര്‍ കല്ല്യാണ സുന്ദരം എത്തി. ഐ എസ് ഐ നിഷ്‌ക്കര്‍ഷിച്ചതിനേക്കാള്‍ കൂടുതല്‍ കനമുള്ള അസംസ്‌കൃത വസ്തു ഉപയോഗിച്ചാണ് ഉത്പാദനം നടത്തിയതെങ്കിലും ഉദ്യോഗസ്ഥന്‍ കനക്കുറവാണ് രേഖപ്പെടുത്തിയത്. അതോടെ അന്നുതന്നെ ഉത്പന്നങ്ങളില്‍ ഐ എസ് ഐ മുദ്ര ചാര്‍ത്താനുള്ള അധികാരം നിഷേധിക്കുകയും ചെയ്തു. സാമ്പിള്‍ പരിശോധനയ്ക്ക് ഐ എസ് ഐയുടെ മദിരാശിയിലെ സതേണ്‍ റീജിയണല്‍ ലബോറട്ടറിയിലേക്ക് അയച്ചെങ്കിലും പരിശോധനാ റിപ്പോര്‍ട്ട് വിസുശ്രീക്ക് നല്കാന്‍ അധികൃതര്‍ തയ്യാറായില്ല. ലബോറട്ടറി റിപ്പോര്‍ട്ടുകള്‍ അതേപോലെ ലൈസന്‍സികള്‍ക്ക് അയച്ചുകൊടുക്കരുതെന്ന് നിര്‍ദ്ദേശമുണ്ടെന്നായിരുന്നു ഇതിന് അവര്‍ പറഞ്ഞ ന്യായം. എന്നാല്‍ പിന്നീട് നടന്ന ഒരു സാമ്പിള്‍ പരിശോധനയുടെ റിപ്പോര്‍ട്ട് സദാനന്ദന് നേരിട്ട് കിട്ടിയിരുന്നെന്നറിയുമ്പോഴാണ് ഇതിലെ കള്ളക്കളി വെളിച്ചത്ത് വരുന്നത്. മാത്രമല്ല മറ്റൊരാവശ്യത്തിന് തിരുവനന്തപുരത്തെ ഐ എസ് ഐ ബ്രാഞ്ച് ഓഫീസില്‍ പോയപ്പോള്‍ അവിടെ തന്റെ പരിശോധനാ റിപ്പോര്‍ട്ട് കാണുകയും ഉദ്യോഗസ്ഥന്റേതാണ് വീഴ്ചയെന്ന് മനസ്സിലാവുകയുമായിരുന്നു. ഒരു ഉദ്യോഗസ്ഥന്‍ വരുത്തിയ വീഴ്ച സദാനന്ദന് നഷ്ടപ്പെടുത്തിയത് ലക്ഷങ്ങള്‍ മാത്രമായിരുന്നില്ല, തന്റേയും കുടുംബത്തിന്റേയും ജീവിത മാര്‍ഗ്ഗം കൂടിയായിരുന്നു. ഐ എസ് ഐ മുദ്രയുള്ള ഉത്പന്നത്തിന്റെ മൂന്ന് ലക്ഷം രൂപയുടെ ഓര്‍ഡര്‍ മുഴുവന്‍ അതോടെ ഇല്ലാതായി. ഐ എസ് ഐ അവകാശം നിഷേധിച്ചതായി ഐ എസ് ഐ പ്രസിദ്ധീകരണങ്ങള്‍ മുഖേനയും മറ്റ് ഉത്പാദകരിലൂടെയും വാര്‍ത്ത പരന്നു. രണ്ട് മാസം കൊണ്ട് ഉത്പാദനം നടത്തി വിപണിയില്‍ എത്തിക്കേണ്ടിയിരുന്ന സാധനങ്ങള്‍ പിന്നീട് രണ്ട് വര്‍ഷങ്ങള്‍ കൊണ്ടാണ് സദാനന്ദന് ഉത്പാദിപ്പിക്കാന്‍ കഴിഞ്ഞത്.
1985 ജനുവരിയില്‍ വിസുശ്രീയെ ജില്ലാ വ്യവസായ കേന്ദ്രം പീഡിത വ്യവസായമായി പ്രഖ്യാപിച്ചു. തുടര്‍ന്ന് പുനരുദ്ധാരണത്തിന് കിറ്റ്‌കോ തയ്യാറാക്കിയ പദ്ധതിക്ക് അംഗീകാരം നല്കിയെങ്കിലും പ്രവര്‍ത്തന മൂലധനം ബാങ്ക് നിഷേധിക്കുകയും ചെയ്തു. വ്യവസായ വകുപ്പിന്റേയും ജില്ലാ കലക്ടറുടേയും നേതൃത്വത്തില്‍ വ്യവസായ പുനരുദ്ധാരണത്തിന് നിരവധി യോഗങ്ങള്‍ ചേര്‍ന്നപ്പോഴെല്ലാം ബാങ്കിന്റെ നിസ്സഹകരണത്തെ തുടര്‍ന്ന് 1989 വരേയുള്ള കാലയളവില്‍ എല്ലാ ശ്രമങ്ങളും നിഷ്ഫലമായി. മാത്രമല്ല അരലക്ഷത്തില്‍ താഴെയുള്ള കടം വസൂലാക്കാന്‍ തലശ്ശേരി കോടതിയില്‍ ബാങ്ക് കേസ് ഫയല്‍ ചെയ്യുകയും ചെയ്തു. കേസ് വാദിക്കുന്നതില്‍ നിന്ന് സദാനന്ദനെ പിന്തിരിപ്പിക്കാന്‍ ബാങ്ക് നയപരമായി പെരുമാറുകയും ചെയ്തു. വിസുശ്രീയുടെ പുനരുദ്ധാരണത്തിന് ശ്രമം നടക്കുമ്പോള്‍ 1990ല്‍ സദാനന്ദന്‍ ബാങ്കിന് ജാമ്യം നല്കിയിരുന്ന തന്റെ 42.25 സെന്റ് സ്ഥലം സ്റ്റേറ്റ് ബാങ്ക് ഓഫ് ഇന്ത്യ തങ്ങളുടെ കണക്കില്‍ വിറ്റു. വ്യവസായ സ്ഥാപനത്തില്‍ അരലക്ഷത്തിലേറെ രൂപയുടെ സ്റ്റോക്ക് ബാങ്കിന് എടുക്കാമായിരുന്നിട്ടും അതിന് ശ്രമിക്കാതെയാണ് അഞ്ച് ലക്ഷത്തിലേറെ രൂപ അന്ന് വിലയുള്ള സ്ഥലത്തിനുമേല്‍ കൈവെച്ചത്. അക്കാലത്ത് സെന്റിന് പതിനായിരത്തിലേറെ രൂപ വില വരുന്ന സ്ഥലം വെറും 52,000 രൂപയ്ക്കാണ് ബാങ്ക് വിറ്റു തുലച്ചത്. ന്യായമായും കമ്പോളവിലയില്‍ വിറ്റഴിച്ച് ബാക്കി പണം സദാനന്ദന് നല്കാനുള്ള ബാധ്യത സ്റ്റേറ്റ് ബാങ്ക് ഓഫ് ഇന്ത്യ കണ്ണൂര്‍ എസ് ഐ ബി ബ്രാഞ്ചിന് ഉണ്ടായിരുന്നു.

പിന്നീട് കേസുകളുടെ കാലം
ഇരുപത് വര്‍ഷമായി ഇ സദാനന്ദന്‍ കേസുകളുടെ ലോകത്താണ്. നീളന്‍ തുണി സഞ്ചിയും തോളില്‍ തൂക്കി ഇയാള്‍ സര്‍ക്കാര്‍ ഓഫീസുകളും കോടതികളും കയറിയിറങ്ങാന്‍ തുടങ്ങിയിട്ട് രണ്ട് പതിറ്റാണ്ട് തികയുന്നു. തലശ്ശേരി സബ് കോടതി, ഹൈക്കോടതി, സംസ്ഥാന ഉപഭോക്തൃ തര്‍ക്ക പരിഹാര കമ്മിഷന്‍ തിരുവനന്തപുരം, നാഷണല്‍ കണ്‍സ്യൂമര്‍ ഡിസ്പ്യൂട്ട്‌സ് റിഡ്‌റസല്‍ കമ്മീഷന്‍ ന്യൂദല്‍ഹി തുടങ്ങിയ ഇടങ്ങളിലൊക്കെ വിസുശ്രീയുടെ കേസുകള്‍ വാദം കേട്ടിട്ടുണ്ട്. പല കോടതികളിലും ഇയാള്‍ക്ക് വാദിക്കാന്‍ വക്കീലുണ്ടായിരുന്നില്ല. തന്റെ ന്യായങ്ങളൊന്നും കേള്‍ക്കാന്‍ ഉപഭോക്തൃ കോടതികള്‍ തയ്യാറായില്ലെന്നാണ് സദാനന്ദന്‍ പരിഭവിക്കുന്നത്. തിരുവനന്തപുരത്ത് സെക്രട്ടറിയേറ്റിന്റെ ഓരോ മുക്കിനും മൂലയ്ക്കും സദാനന്ദനെ അറിയാമായിരുന്നു. അത്രയേറെ തവണ അയാള്‍ തന്റെ സ്ഥാപനവുമായി ബന്ധപ്പെട്ട് അവിടെ ചെന്നിട്ടുണ്ട്. 1997ല്‍ മാര്‍ച്ച് ആറിന് തിരുവനന്തപുരം പാളയം രക്തസാക്ഷി മണ്ഡപത്തിനു സമീപം സീബ്രക്രോസിലൂടെ റോഡ് മുറിച്ചുകടക്കുമ്പോള്‍ ചീറിപ്പാഞ്ഞു വന്ന ഒരു ബൈക്ക് സദാനന്ദനെ ഇടിച്ചു തെറിപ്പിച്ചു. ഇടതുകാലിന്റെ രണ്ട് എല്ലുകള്‍ പൊട്ടി തിരുവനന്തപുരം മെഡിക്കല്‍ കോളെജിലും കണ്ണൂര്‍ ജില്ലാ ആശുപത്രിയിലും മംഗലാപുരം സിറ്റി ആശുപത്രിയിലുമായി ഏറെക്കാലം ചികിത്സയില്‍ കഴിഞ്ഞു ഈ മനുഷ്യന്‍. കാലിന് ശസ്ത്രക്രിയ നടത്തിയ ശേഷം ക്രച്ചസിന്റെ സഹായത്തോടെ പിന്നേയും തിരുവനന്തപുരത്തെത്തിയെങ്കിലും കേരള ഫിനാന്‍ഷ്യല്‍ കോര്‍പ്പറേഷനിലെ അധികാരകേന്ദ്രങ്ങളുടെ കനത്ത മുഖങ്ങള്‍ക്ക് ദയയുടെ ചിത്രം അന്യമായിരുന്നു.
കേരള ഫിനാന്‍ഷ്യല്‍ കോര്‍പ്പറേഷനില്‍ നിന്നും 1,44,000 രൂപ വായ്പയെടുത്തതില്‍ 1983-84 കാലഘട്ടം വരെ കൃത്യമായി തിരിച്ചടവ് നടന്നു. പിന്നീട് വ്യവസായം തകര്‍ന്നതോടെ പണമടക്കലും മുടങ്ങി. അതോടെ നോട്ടീസുകളുടെ വരവായി. റവന്യൂ റിക്കവറിക്ക് ഉത്തരവായി. വിസുശ്രീയെന്ന 35 ലക്ഷത്തിലേറെ രൂപ വിലയുള്ള സ്ഥാപനം രണ്ടര ലക്ഷം രൂപയ്ക്ക് മറ്റൊരു സ്വകാര്യവ്യക്തിക്ക് കൈമാറി. വിസുശ്രീ കേരള ഫിനാന്‍ഷ്യല്‍ കോര്‍പ്പറേഷന് 6,74,857 രൂപ അടക്കാനുണ്ടെന്ന് 1998 മെയ് 21ന് അയച്ച കത്തില്‍ പറയുന്നു. അതേ കേരള ഫിനാന്‍ഷ്യല്‍ കോര്‍പ്പറേഷന്‍ 1998 ജൂലൈ 24ന് അയച്ച മറ്റൊരു കത്തില്‍ 1,16,000 രൂപ അടക്കാനുണ്ടെന്നാണ് ചൂണ്ടിക്കാണിച്ചത്. അപ്പോള്‍ ബാക്കി അഞ്ചര ലക്ഷത്തിലേറെ രൂപ എവിടെയെന്ന് ആര്‍ക്കുമറിയില്ല. സദാനന്ദന്റെ കണക്കു പ്രകാരമാകട്ടെ 1995 ജൂണ്‍ 23ന് കേരള ഫിനാന്‍ഷ്യല്‍ കോര്‍പ്പറേഷന്റെ കത്ത് പ്രകാരം പ്രത്യേക പലിശ ഇളവായ ഒന്നര ശതമാനം കഴിച്ച് 50,991.07 രൂപയാണ് ഉണ്ടായിരുന്നത്. കത്തിലെ നിബന്ധനകള്‍ പാലിച്ച് ഈ തുകയ്ക്ക് ഇയാള്‍1995 ജൂലൈ ഏഴിന് ചെക്ക് നല്കി തന്റെ ഭാഗം ക്ലിയര്‍ ചെയ്യുകയും ചെയ്തിട്ടുണ്ട്.
വ്യവസായ സ്ഥാപനം പ്രവര്‍ത്തിക്കാത്ത കാലഘട്ടത്തില്‍ പോലും വില്‍പ്പന നികുതി ആവശ്യപ്പെട്ടാണ് അധികൃതര്‍ ഇയാളെ 'സഹായിച്ചത്'. പ്രവര്‍ത്തിച്ച കാലത്തെ കണക്കുകള്‍ കൂട്ടിയാണ് പ്രവര്‍ത്തിക്കാത്ത കാലത്തിന് വില്‍പ്പന നികുതിക്കാര്‍ വിലയിട്ടത്. 1982-87 കാലഘട്ടത്തിലെ നികുതി ഇനത്തില്‍ 57,000 രൂപയിലേറെ തുക ഇപ്പോഴും അടക്കാനുണ്ടെന്നാണ് വില്‍പ്പന നികുതി ഉദ്യോഗസ്ഥര്‍ പറയുന്നത്. അത് റവന്യൂ റിക്കവറിക്ക് നോട്ടീസ് വരികയും ചെയ്തു. ഈ തുക സംസ്ഥാന ഭരണകൂടം എഴുതിത്തള്ളുമെന്ന പ്രതീക്ഷ ഇയാള്‍ക്കുണ്ട്.

സദാനന്ദന്റെ ജീവിതത്തില്‍ ഇപ്പോള്‍....
ഏറെ മോഹങ്ങളുമായി തുടങ്ങിയ വ്യവസായ സ്ഥാപനം ഇപ്പോള്‍ ആരുടേയോ കൈവശമാണ്. തന്റെ സ്ഥലങ്ങളെല്ലാം നഷ്ടപ്പെട്ടതും വാഹനപാകടത്തില്‍ പരുക്കേറ്റതുമാണ് സ്വയം തൊഴില്‍ തേടിയിറങ്ങിയ ഇയാള്‍ക്കുണ്ടായ ലാഭങ്ങള്‍. ഒടുവില്‍ രാഷ്ട്രപതി ഡോ. എ പി ജെ അബ്ദുല്‍ കലാമിനും മുഖ്യമന്ത്രി വി എസ് അച്യുതാനന്ദനും നിവേദനം നല്കി. തന്റെ 25 ാം വയസ്സില്‍ തുടങ്ങിയ വിസുശ്രീ ഇന്‍ഡസ്ട്രീസ് എന്ന സ്ഥാപനവുമായി ഇപ്പോഴും കെട്ടിമറിയുകയാണ് ഈ മനുഷ്യന്‍. 1975ല്‍ ജെ ടി എസില്‍ വര്‍ക്ക്‌ഷോപ്പ് ഇന്‍സ്ട്രക്ടറായും 1977ല്‍ ഐ ടി ഐയില്‍ ജൂനിയര്‍ ഇന്‍സ്ട്രക്ടറായും ജോലി ചെയ്ത സദാനന്ദന് ഇപ്പോള്‍ സ്വന്തമായി വിലാസം പോലുമില്ല. ഇയാളുടെ ഭാര്യയും മക്കളും അവരുടെ വീട്ടില്‍ സദാനന്ദന്‍ ബന്ധുവീടുകളിലും സ്‌നേഹിതന്മാരുടെ വീടുകളിലും മാറിമാറിയും താമസിക്കുന്ന ഒരു അവസ്ഥയിലാണ് കഴിയുന്നത്. മക്കളുടെ ഉപരിപഠനത്തിനു പോലും ഏറെ പ്രയാസപ്പെടുമ്പോഴും നല്ലകാലത്തിന്റെ പൊന്‍പുലരി തനിക്കു മുമ്പില്‍ പൊട്ടിവിടരുമെന്ന് തന്നെയാണ് ഇയാള്‍ പ്രതീക്ഷിക്കുന്നത്.

Thursday, October 7, 2010

രാജപാഥകള്‍ തയ്യാറായി; ഇനി വനിതകളുടെ കാലം


''ഗ്രാമപഞ്ചായത്തുകളില്‍ നടപ്പാക്കിയ വനിതാ സംവരണമാണ് അതിന് (രാഷ്ട്രീയത്തില്‍ പ്രവേശിക്കാന്‍) കളമൊരുക്കിയത്. ഭര്‍ത്താവ് രാഷ്ട്രീയത്തില്‍ താത്പര്യമുള്ള ആളാണ്. സംവരണം വന്നപ്പോള്‍ അദ്ദേഹത്തിന് മത്സരിക്കാന്‍ പറ്റാതായി. അങ്ങനെയാണ് എനിക്ക് ചാന്‍സ് കിട്ടിയത്. നീ മത്സരിക്ക്, ജയിച്ചാന്‍ ഞാന്‍ കാര്യങ്ങള്‍ നോക്കിക്കൊള്ളാമെന്ന് അദ്ദേഹം പറഞ്ഞു. എന്നെ അദ്ദേഹത്തിന്റെ ബിനാമിയായി നിര്‍ത്തുകയായിരുന്നു ഉദ്ദേശ്യം. പക്ഷേ, ജയിച്ച ശേഷം ഞാന്‍ തന്നെ കാര്യങ്ങള്‍ എല്ലാം ചെയ്യാന്‍ തുടങ്ങി. വീട് വിട്ട് വെളിയില്‍ പോകാന്‍ കിട്ടിയ സന്ദര്‍ഭമായിരുന്നു അത്. ഒരുപാട് പേരെ കാണാം. പല സ്ഥലങ്ങളില്‍ പോകാം. വല്ലാത്ത ഒരു സ്വാതന്ത്ര്യം അനുഭവപ്പെട്ടു. അത്രയും കാലം വീട്ടിനുള്ളില്‍, മൂടിയ കതകുകള്‍ക്കുള്ളില്‍ കഴിഞ്ഞ എനിക്ക് അത് വലിയ കാര്യമായിരുന്നു. ഒരുപാട് കാലമായി ഞാന്‍ ആഗ്രഹിക്കുന്ന സംഗതിയായിരുന്നു പുറത്തേക്കുള്ള യാത്രകള്‍. അതുകൊണ്ടുതന്നെ പ്രവര്‍ത്തനങ്ങള്‍ ഞാന്‍ സ്വയം ചെയ്തു. ഭര്‍ത്താവിന് എന്നെ മനസ്സിലാകുമായിരുന്നു. അദ്ദേഹം ജോലി ചെയ്യാന്‍ എന്നെ അനുവദിച്ചു. ഒന്നിലും ഇടപെട്ടില്ല. സ്വതന്ത്ര സ്ഥാനാര്‍ഥിയായാണ് ഞാന്‍ മത്സരിച്ചത്. മൂന്ന് വര്‍ഷം കഴിഞ്ഞ് ഡി എം കെയില്‍ ചേര്‍ന്നു. പാര്‍ട്ടി ടിക്കറ്റില്‍ പിന്നീട് നിയമസഭാ തെരഞ്ഞെടുപ്പില്‍ മത്സരിച്ചു. നന്നായി വര്‍ക്ക് ചെയ്‌തെങ്കിലും 1500 വോട്ടിന് തോറ്റു.''
(സല്‍മ- തമിഴ് എഴുത്തുകാരിയും തിരുച്ചി ജില്ലയിലെ പൊന്നംപട്ടി സ്‌പെഷ്യല്‍ പഞ്ചായത്തിന്റെ അധ്യക്ഷയുമായിരുന്നു സല്‍മ എന്ന രാജാത്തി റുഖിയ. ഇപ്പോള്‍ തമിഴ്‌നാട് സാമൂഹ്യ ക്ഷേമബോര്‍ഡ് ചെയര്‍പേഴ്‌സണ്‍).

അവസരങ്ങളുടെ ജാലകങ്ങളല്ല, രാജപാഥകളാണ് തയ്യാറായിക്കഴിഞ്ഞിട്ടുള്ളത്. പുരുഷ മേധാവിത്വമെന്ന ഫെമിനിസ്റ്റ് കരച്ചിലുകള്‍ക്കപ്പുറത്താണ് ഇപ്പോള്‍ കാര്യങ്ങളുടെ കിടപ്പ്. ഗ്രാമപഞ്ചായത്തുകളും ബ്ലോക്ക് പഞ്ചായത്തുകളും നഗരസഭകളും ജില്ലാ പഞ്ചായത്തുകളും കോര്‍പറേഷനുകളും ഇനി വനിതകള്‍ക്ക് സ്വന്തം. അധികാരത്തിന്റെ ഇടനാഴികളില്‍ ഇനി മുഴങ്ങുക പാദസരങ്ങളുടേയും കൈവളകളുടേയും കിലുക്കമായിരിക്കും.
ഇത്രയും കാലം അവഗണിക്കപ്പെട്ടവരെന്നും പിന്‍തള്ളപ്പെട്ടവരെന്നും പരിതപിച്ചിരുന്ന വനിതകളാണ് രാജ്യത്തിന്റെ വിധി നിര്‍ണ്ണയത്തിലും പുരോഗമനത്തിലും നിര്‍ണായകമായ പങ്ക് വഹിക്കുക. നേരത്തെ മുപ്പത്തി മൂന്ന് ശതമാനം സംവരണം ഉണ്ടായപ്പോള്‍ തന്നെ തദ്ദേശ സ്വയംഭരണ സ്ഥാപനങ്ങളില്‍ വനിതാ പ്രാതിനിധ്യം ഏറെ വര്‍ധിച്ചിരുന്നു. ആദ്യകാലത്തെ അമ്പരപ്പുകള്‍ക്ക് ശേഷം വനിതകള്‍ ശക്തമായി മുന്നേറുന്നതാണ് ഇക്കാലയളവിനുള്ളില്‍ കേരളം ഉള്‍പ്പെടെയുള്ള സംസ്ഥാനങ്ങളില്‍ കണ്ട കാഴ്ച. സ്ത്രീകള്‍ ഭരണ രംഗത്തെത്തിയാല്‍ സ്വജന പക്ഷപാതവും അഴിമതിയും കുറയുമെന്ന ഗുണങ്ങള്‍ എടുത്തു പറയപ്പെട്ടിരുന്നുവെങ്കിലും പിന്‍സീറ്റ് ഡ്രൈവിംഗിന്റെ തിക്ത ഫലങ്ങള്‍ ഉണ്ടാകാനുള്ള സാധ്യതയും ചൂണ്ടിക്കാണിക്കപ്പെട്ടിരുന്നു.
പുരുഷന്മാര്‍ ഭരണം കൈകാര്യം ചെയ്തിരുന്നപ്പോള്‍ രാഷ്ട്രീയ പാര്‍ട്ടി ഇടപെടലുകള്‍ മാത്രമായിരുന്നു ഉണ്ടായിരുന്നതെങ്കില്‍ വനിതകള്‍ രംഗത്തെത്തിയതോടെ ചിലയിടങ്ങളിലെങ്കിലും പാര്‍ട്ടിയോടൊപ്പം ഭര്‍ത്താവിന്റേയും കൈകടത്തലുകള്‍ ഭരണത്തെ സ്വാധീനിച്ചുവെന്ന ആരോപണങ്ങള്‍ ഉയര്‍ന്നുവന്നു. കൂടാതെ ഒന്നും രണ്ടും പറഞ്ഞ് പല കാര്യങ്ങളിലും 'ഉടക്ക് വെക്കാന്‍' ശ്രമിക്കുന്ന ഉദ്യോഗസ്ഥരുടെ എണ്ണവും വര്‍ധിക്കുമെന്നും ആദ്യകാല നിഗമനങ്ങളില്‍ ചിലതാണ്.
ഏതാനും പഞ്ചായത്തുകളിലോ നഗരസഭകളിലോ അങ്ങനെ സംഭവിച്ചിട്ടുണ്ടാകാം. എന്നാല്‍ എല്ലായിടത്തും ഇതായിരുന്നില്ല സ്ഥിതി. ഭരണത്തിലെ ആദ്യ നാളുകള്‍ പിന്നിട്ടപ്പോള്‍ തന്നെ വനിതകള്‍ തങ്ങളുടെ ഉത്തരവാദിത്വങ്ങളെ കുറിച്ച് ബോധവതികളായ കാഴ്ചയാണ് കാണാനായത്. അതുകൊണ്ടുതന്നെ എല്ലാ രംഗങ്ങളിലും മാറ്റങ്ങളും പ്രത്യക്ഷപ്പെടുകയുണ്ടായി. എന്താണ് ഭരണം എന്നുമാത്രമല്ല, എന്തല്ല ഭരണം എന്നുകൂടി അവര്‍ അനുഭവത്തിലൂടെ പഠിക്കുകയായിരുന്നു.
തദ്ദേശ സ്വയംഭരണ സ്ഥാപനങ്ങളില്‍ 50 ശതമാനം വനിതാ സംവരണത്തിനായി പാര്‍ലമെന്റ് ബില്‍ പാസ്സാക്കിയതിന് ശേഷം നടക്കുന്ന ആദ്യ തെരഞ്ഞെടുപ്പാണിത്. രാഷ്ട്രപതി പ്രതിഭാ സിംഗ് പട്ടേലിന്റേയും ലോക്‌സഭാ സ്പീക്കര്‍ മീരാ കുമാറിന്റേയും യു പി എ അധ്യക്ഷ സോണിയാ ഗാന്ധിയുടേയും പിന്മുറക്കാരാണ് ഒക്‌ടോബര്‍ 23നും 25നും കേരളത്തില്‍ നടക്കുന്ന തെരഞ്ഞെടുപ്പുകളിലൂടെ രംഗത്തു വരിക. ഒക്‌ടോബര്‍ 27ന് തെരഞ്ഞെടുപ്പ് ഫലം വരുമ്പോഴും നവംബര്‍ ഒന്നിന് പുതിയ ഭരണ സമിതികള്‍ രംഗത്തു വരുമ്പോഴും വനിതാ മുന്നേറ്റത്തിന്റെ പുതിയ അധ്യായങ്ങളായിരിക്കും രചിക്കപ്പെടുക.
അന്‍പത് ശതമാനം വനിതാ സംവരണമാണ് കേന്ദ്രം പാസ്സാക്കിയ ബില്ലിലുള്ളതെങ്കിലും കേരളത്തില്‍ അതിലേറെയായിരിക്കും വനിതകളുടെ പ്രാതിനിധ്യം. ഇതേതുടര്‍ന്ന് നാട്ടില്‍ പ്രചരിക്കുന്ന ഒരു തമാശയുണ്ട്- ഇനി പുരുഷന്മാര്‍ക്കായിരിക്കും സംവരണം ആവശ്യമായി വരികയെന്ന്! അതെന്തായാലും ഇനി ഓരോ വീട്ടമ്മയും ചിലപ്പോള്‍ ഒരു ഭരണകര്‍ത്താവായിരിക്കും. വീട് നന്നായി ഭരിക്കുന്ന സ്ത്രീയ്ക്ക് നാടും നന്നായി ഭരിക്കാനാവുമെന്ന് തെളിയിക്കാനുള്ള നാളുകളാണ് വരാനിരിക്കുന്നത്.
തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പിനേയും അതില്‍ വനിതാ സംവരണ ബില്‍ ചെലുത്തിയ/ ചെലുത്തുന്ന സ്വാധീനത്തേയും കുറിച്ച് ഏതാനും പേര്‍ പ്രതികരിക്കുന്നു.

എ ദേവകി (ജില്ലാ പഞ്ചായത്ത് പ്രസിഡന്റ് വയനാട്)
നേരത്തെ മുപ്പത്തി മൂന്ന് ശതമാനം വനിതാ സംവരണം വന്നപ്പോള്‍ തന്നെ അത് നല്ല രീതിയില്‍ പ്രയോജനപ്പെടുത്താന്‍ കഴിഞ്ഞിട്ടുണ്ടെന്നാണ് എനിക്ക് തോന്നുന്നത്. ഇനിയിപ്പോള്‍ അന്‍പത് ശതമാനം സംവരണം നിലവില്‍ വന്നതോടെ ഭരണതലത്തിലും അല്ലാതെയുമുളള പുരുഷ മേധാവിത്വത്തില്‍ നിന്നുള്ള മോചനമാകും സംഭവിക്കുക. ശരിക്കും പറഞ്ഞാല്‍ അന്‍പതിനും മുകളിലായിരിക്കും ഇനി അധികാര കേന്ദ്രങ്ങളില്‍ സ്ത്രീകളുടെ ശതമാനം.
സ്ത്രീകളെ സംബന്ധിച്ചിടത്തോളം, നേരത്തെ, തീരുമാനങ്ങള്‍ എടുക്കാന്‍ കഴിവുണ്ടായിട്ടും പലപ്പോഴും അംഗീകരിക്കപ്പെടാത്ത അവസ്ഥയുണ്ടായിരുന്നു. അത് ശരിക്കും ഒരു പ്രശ്‌നമായിരുന്നു. ഇനി അതിനൊരു മാറ്റമുണ്ടാകുമെന്നാണ് പ്രതീക്ഷിക്കുന്നത്.
അധികാരത്തിലേറുന്നത് സ്ത്രീകളാണെങ്കില്‍ സത്യസന്ധമായ രീതിയിലും അഴിമതി വളരെയേറെ കുറച്ചുകൊണ്ടും കാര്യങ്ങള്‍ മുന്നോട്ടു കൊണ്ടുപോകാന്‍ കഴിയുമെന്നാണ് ഞാന്‍ കരുതുന്നത്. സ്ത്രീകളാണ് തലപ്പത്ത് എന്നതിനാല്‍ ഒരുപക്ഷേ, ആദ്യഘട്ടത്തല്‍ പല കാര്യങ്ങളിലും ഉദ്യോഗസ്ഥ മേധാവിത്വം ഉണ്ടാകുമായിരിക്കാം. പക്ഷേ, സ്ഥാനമാനങ്ങളും പദവിയും അനുസരിച്ച് പ്രവര്‍ത്തിച്ചാല്‍ കാര്യങ്ങള്‍ നിയന്ത്രിക്കാന്‍ കഴിയുമെന്നാണ് എനിക്ക് അനുഭവത്തില്‍ നിന്നും മനസ്സിലായത്. മാത്രമല്ല, കഴിവുള്ളവരെ അംഗീകരിക്കാന്‍ ഉദ്യോഗസ്ഥന്മാര്‍ മടി കാണിക്കാറില്ല. അഹങ്കാരത്തിന്റെ പേരില്‍ ചിലരെങ്കിലും സ്ത്രീകളെ അംഗീകരിക്കാതിരിക്കുന്ന അവസ്ഥയുണ്ടെങ്കില്‍ അത് അവരുടെ അഹങ്കാരമല്ലാതെ മറ്റൊന്നുമല്ലല്ലോ.
വയനാട് ജില്ലാ പഞ്ചായത്ത് പ്രസിഡന്റായി നാലോ അഞ്ചോ മാസം മാത്രമാണ് എനിക്ക് പ്രവര്‍ത്തിക്കാന്‍ അവസരം ലഭിച്ചിട്ടുള്ളത്. അപ്പോഴേക്കും ജില്ലാ പഞ്ചായത്തിന്റെ കാലാവധി കഴിഞ്ഞ് പുതിയ തെരഞ്ഞെടുപ്പായി. എങ്കിലും ഉദ്യോഗസ്ഥരില്‍ നിന്നും നല്ല പിന്തുണയാണ് എനിക്ക് കിട്ടിയിരുന്നത്. അതുകൊണ്ടുതന്നെ നല്ല രീതിയില്‍ മുന്നോട്ട് പോകാന്‍ കഴിഞ്ഞെന്നാണ് കരുതുന്നത്.
സംവരണത്തിലൂടെയല്ലാതെ കേരളത്തില്‍ അധികാരത്തിലെത്തിയ ആദ്യത്തെ ആദിവാസി വനിതയാണ് ഞാന്‍. തീര്‍ച്ചയായും അക്കാര്യത്തില്‍ ഞാന്‍ മുസ്‌ലിം ലീഗിനോടാണ് കടപ്പെട്ടിരിക്കുന്നത്. ഒരു നേതാവിനു കീഴില്‍ ആത്മാര്‍ഥതയോടെ പ്രവര്‍ത്തിക്കുന്ന പാര്‍ട്ടിയാണ് ലീഗ്. വയനാട് ജില്ലാ പഞ്ചായത്ത് പ്രസിഡന്റ് സ്ഥാനത്തിന്റെ പേരില്‍ അവര്‍ക്ക് കോണ്‍ഗ്രസിനോട് മറ്റെന്തെങ്കിലും വിലപേശി വാങ്ങാന്‍ കഴിയുമായിരുന്നിട്ടും ആദിവാസി പിന്നാക്ക ന്യൂനപക്ഷ വിഭാഗങ്ങള്‍ക്കു വേണ്ടി ശക്തമായി വാദിച്ച് നേടിയെടുത്ത് അവര്‍ നല്കിയതാണ് എന്റെ ജില്ലാ പഞ്ചായത്ത് പ്രസിഡന്റ് സ്ഥാനം.
സ്ത്രീ എന്ന നിലയില്‍ ആദിവാസികളുടേയും ന്യൂനപക്ഷങ്ങളുടേയും ക്ഷേമത്തിന് വേണ്ടി കൂടുതല്‍ പ്രവര്‍ത്തിക്കാന്‍ കഴിയും എന്നാണ് എനിക്ക് തോന്നുന്നത്. ആദിവാസികള്‍ക്കും സ്ത്രീകള്‍ക്കും വേണ്ടി വയനാട്ടില്‍ ഒരു വ്യവസായ പദ്ധതിയാണ് എന്റെ സ്വപ്ങ്ങളിലൊന്ന്. തൊഴില്‍, സ്ഥലം, വീട് എന്നിവയാണ് ജനങ്ങള്‍ അടിസ്ഥാനപരമായി ആഗ്രഹിക്കുന്നത്. അത് അവര്‍ക്ക് നിറവേറ്റി കൊടുക്കാനായാല്‍ എല്ലാ കാര്യങ്ങളിലും താനേ വികസനം വരും. അത് നിറവേറ്റാനാണ് എന്റെ ശ്രമം.
ചുരുങ്ങിയ കാലത്തിനുള്ളില്‍ ആദിവാസി, ടൂറിസം മേഖലകളില്‍ നിരവധി പ്രവര്‍ത്തനങ്ങള്‍ നടത്താന്‍ സാധിച്ചുവെന്നാണ് എന്റെ കണക്കുകൂട്ടല്‍. ടൂറിസത്തിന്റെ കാര്യത്തില്‍, ഹോം സ്റ്റേയും മറ്റുമുണ്ടാകുമ്പോഴാണ് സെക്‌സ് ടൂറിസം പോലുള്ളവ വളരുന്നത്. അതുകൊണ്ടുതന്നെ പരമ്പരാഗതമായും പാരിസ്ഥിതിക സൗഹൃദവുമായ സാധ്യതകള്‍ പ്രയോജനപ്പെടുത്തിയുള്ള ഒരു ടൂറിസം വികസനമാണ് എന്റെ സ്വപ്നം. വയനാട്ടിലെ ടൂറിസം വികസനത്തെ ഏറ്റവും എതിര്‍ക്കുന്നവര്‍ ഒരുപക്ഷെ ആദിവാസികളായിരിക്കും. കാരണം ടൂറിസംകൊണ്ട് അവര്‍ക്ക് ഗുണമൊന്നും ഉണ്ടായിട്ടില്ലെന്നു മാത്രമല്ല ദോഷങ്ങള്‍ ഏറെ അനുഭവിക്കേണ്ടി വന്നിട്ടുമുണ്ട്. അതുകൊണ്ടുതന്നെ വനിത എന്ന നിലയിലും ആദിവാസി എന്ന നിലയിലും ന്യൂനപക്ഷ വിഭാഗം എന്ന നിലയിലും ജില്ലാ പഞ്ചായത്ത് പ്രസിഡന്റ് സ്ഥാന ലബ്ധിയിലൂടെ എനിക്ക് കുറച്ചെന്തെങ്കിലും പ്രവര്‍ത്തിക്കാനായിട്ടുണ്ട്, അതിലേറെ പ്രവര്‍ത്തിക്കാന്‍ ബാക്കിയുണ്ടെന്ന തിരിച്ചറിവും ഉണ്ട്.

അഡ്വ. കെ പി മറിയുമ്മ (മലപ്പുറം ജില്ലാ പഞ്ചായത്ത് മുന്‍ പ്രസിഡന്റ്)
മുപ്പത്തിമൂന്ന് ശതമാനം വനിതാ സംവരണം നിലവിലുണ്ടായിരുന്ന സ്ഥാനത്തു നിന്നും ഇപ്പോള്‍ 17 ശതമാനമാണ് വര്‍ധനവുണ്ടായിരിക്കുന്നത്. അതുകൊണ്ടുതന്നെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകളില്‍ വനിതാ സ്ഥാനാര്‍ഥികളെ കണ്ടെത്താനോ പുതിയവര്‍ അധികാരത്തിലേറിയാലുണ്ടാകുന്ന ബുദ്ധിമുട്ടുകള്‍ വര്‍ധിച്ച തോതില്‍ ഉണ്ടാകുമെന്നോ കരുതുന്നില്ല. തെരഞ്ഞെടുപ്പിന് മുന്നോടിയായി സെപ്തംബര്‍ പകുതി കഴിയുമ്പോഴേക്കും ഞങ്ങള്‍ മലപ്പുറം ജില്ലയില്‍ മാത്രം 16 മണ്ഡലങ്ങളില്‍ നേതൃത്വ പരിശീലന ക്ലാസുകളും വ്യക്തിത്വ വികസന ക്ലാസുകളുമെല്ലാം നല്കിക്കഴിഞ്ഞു. അതുകൊണ്ടുതന്നെ കാര്യങ്ങള്‍ പഴയതില്‍ നിന്നും ഏറെ മെച്ചപ്പെട്ട അവസ്ഥയാണ്. മുസ്‌ലിം ലീഗ് ഉള്‍പ്പെടെയുള്ള എല്ലാ രാഷ്ട്രീയ പാര്‍ട്ടികള്‍ക്കും വനിതാ സംഘടനകള്‍ ഉണ്ടെന്ന് മാത്രമല്ല, അവയെല്ലാം കൃത്യമായി പ്രവര്‍ത്തിക്കുന്നുമുണ്ട്. മലപ്പുറം ജില്ലാ തലത്തില്‍ കഴിഞ്ഞ 20 വര്‍ഷമായി വനിതാ ലീഗ് പ്രവര്‍ത്തിക്കുന്നുണ്ട്. സംസ്ഥാനതലത്തിലാകട്ടെ വനിതാ ലീഗ് നിലവില്‍ വന്നിട്ട് 13 വര്‍ഷങ്ങള്‍ കഴിഞ്ഞിരിക്കുന്നു.
എന്നെ സംബന്ധിച്ചിടത്തോളം ഇരുപത് വര്‍ഷത്തോളമായി രാഷ്ട്രീയ രംഗത്തുള്ള വ്യക്തിയാണ് ഞാന്‍. കുടുംബ ജീവിതവും വക്കീല്‍ പണിയുമായി മുമ്പോട്ട് പോകുമ്പോള്‍ ഭര്‍ത്താവും ഭര്‍തൃപിതാവുമൊക്കെ നിര്‍ബന്ധിച്ചാണ് ഞാന്‍ രാഷ്ട്രീയത്തിലെത്തിയത്. സമൂഹത്തിനും സമുദായത്തിനും ഏറെ നല്‍കാനുണ്ടെന്നും അത് തിരിച്ചറിഞ്ഞ് പ്രവര്‍ത്തിക്കണമെന്നും പറഞ്ഞ് അവര്‍ നല്കിയ ഉപദേശമാണ് എനിക്കുള്ള പ്രചോദനം.
സംവരണത്തിലൂടേയും അല്ലാതെയും അധികാരത്തിലേറുന്ന സ്ത്രീകളില്‍ പത്ത് ശതമാനം ഒരുപക്ഷേ കഴിവ് കുറഞ്ഞവരായിരിക്കാം. പക്ഷേ, ബാക്കിയുള്ള തൊണ്ണൂറ് ശതമാനത്തിന്റെ കാര്യം അങ്ങനെയല്ലല്ലോ. ഇപ്പോള്‍തന്നെ സ്ഥാനാര്‍ഥിയാകാനും രാഷ്ട്രീയ പ്രവര്‍ത്തനത്തിനും വനിതകള്‍ക്കിടയില്‍ നല്ല തിക്കും തിരക്കും അനുഭവപ്പെടുന്നുണ്ടെന്നാണ് ഞാന്‍ മനസ്സിലാക്കുന്നത്. നേരത്തെ പലരും ആരോപിച്ചിരുന്നതുപോലെ മുസ്‌ലിം സ്ത്രീകള്‍ രംഗത്തുണ്ടാവില്ലെന്ന പ്രചരണമൊക്കെ വിലപ്പോകാതെ വന്നിരിക്കുകയാണ്.
തന്റെ മക്കളെ പോലെതന്നെ എല്ലാ കുട്ടികളേയും ഒരേ കണ്ണോടെ കാണാന്‍ അല്ലാഹു സ്ത്രീകള്‍ക്ക് കഴിവ് നല്കിയിട്ടുണ്ട്. അത് പ്രകൃതി നിയമമാണ്. മാതൃഹൃദയത്തിന് ദൈവം നല്കിയ ഈ കഴിവ് ജനാധിപത്യ സംവിധാനത്തില്‍ സ്ത്രീകള്‍ ഭരണത്തിലേറുമ്പോള്‍ ഏറെ പ്രയോജനപ്പെടുമെന്നാണ് ഞാന്‍ കരുതുന്നത്.
നേരത്തെ ഞാനൊക്കെ രാഷ്ട്രീയത്തിലിറങ്ങുമ്പോള്‍ വിദ്യാഭ്യാസവും കഴിവുമുള്ള നാല്‍പത് ശതമാനം സ്ത്രീകള്‍ മാത്രമായിരിക്കാം രംഗത്തുണ്ടായിരുന്നത്. എന്നാല്‍ ഇപ്പോഴത് നൂറ് ശതമാനമായി വര്‍ധിച്ചിരിക്കുകയാണ്. ഇപ്പോഴത്തെ പെണ്‍കുട്ടികള്‍ക്ക് പുരുഷന്മാരേക്കാള്‍ വിദ്യാഭ്യാസമുണ്ട്. അതുകൊണ്ടുതന്നെ പക്വതയോടെയും പാകതയോടെയും കാര്യങ്ങള്‍ കാണാന്‍ കഴിയുമെന്നാണ് ഞാന്‍ മനസ്സിലാക്കുന്നത്.
സ്ത്രീ എന്ന നിലയിലുള്ള അച്ചടക്കം പാലിച്ചുകൊണ്ടും അല്ലാഹു സ്ത്രീകള്‍ക്ക് നല്കിയ അനുഗ്രഹത്തെ സ്തുതിച്ചുകൊണ്ടും പ്രവര്‍ത്തിക്കണമെന്നാണ് പുതിയ തലമുറയോട് എനിക്ക് പറയാനുള്ളത്. മാത്രമല്ല, തിന്മക്കെതിരെ പോരാടി നന്മയുടെ വിജയം ഉറപ്പാക്കണമെന്നും അല്ലാഹു ഇതൊരു സ്വാലിഹായ അമലാക്കിത്തീര്‍ത്ത് ദൈവത്തിന്റെ കോടതിയിലും ഉത്തരം പറയാന്‍ കഴിയുന്ന വിധത്തിലാക്കട്ടെയെന്നും ഞാന്‍ പ്രാര്‍ഥിക്കുന്നു.

കെ അജിത (പ്രസിഡന്റ്, അന്വേഷി)
വനിതാ സംവരണ ബില്ല് പാസ്സാക്കിയതോടെ നടക്കുന്ന തെരഞ്ഞെടുപ്പില്‍ സ്ത്രീകള്‍ക്ക് നിരവധി സാധ്യതകള്‍ ഉണ്ടെന്നാണ് ഞാന്‍ മനസ്സിലാക്കുന്നത്. സ്ത്രീകള്‍ അധികാരത്തിലേറുന്നതോടെ അഴിമതിയും സ്വജന പക്ഷപാതവുമൊക്കെ കുറയുമെന്ന് കരുതുന്നുണ്ടെങ്കിലും പിന്‍സീറ്റ് ഡ്രൈവിംഗ് ഉള്‍പ്പെടെയുള്ളവ ഉണ്ടാകുമെന്ന് പ്രതീക്ഷിക്കുന്നുണ്ട്. എന്തായാലും തന്നെ സ്ഥാനാര്‍ഥിയാക്കുന്ന രാഷ്ട്രീയ പാര്‍ട്ടിയുടെ താത്പര്യത്തിന് എതിരായി പ്രവര്‍ത്തിക്കാന്‍ സാധിക്കുകയില്ലെന്നത് വാസ്തവമാണ്.
രാഷ്ട്രീയ താത്പര്യത്തിന് മാത്രമല്ല, ചിലപ്പോള്‍ ഭര്‍ത്താക്കന്മാരുടെ താത്പര്യത്തിനും എതിരായി പ്രവര്‍ത്തിക്കാന്‍ കഴിഞ്ഞെന്നു വരില്ല. ആദ്യഘട്ടത്തില്‍ ഇത്തരത്തിലുള്ള പ്രശ്‌നങ്ങള്‍ ഉണ്ടാകുമെങ്കിലും അവയെല്ലാം തരണം ചെയ്യാന്‍ കഴിയുമെന്നാണ് ഞാന്‍ പ്രതീക്ഷിക്കുന്നത്. പുതുതായി തെരഞ്ഞെടുക്കപ്പെടുന്നവര്‍ക്ക് മികച്ച പരിശീലനങ്ങളും മറ്റും നല്‌കേണ്ടി വരും.
രാഷ്ട്രീയവും അതിലെ കള്ളങ്ങളും അറിയാതെ വരുന്നവരായിരിക്കും ഭൂരിപക്ഷം സ്ത്രീകളും എന്നതിനാല്‍ എന്തായാലും അതിന്റെയൊരു പുതുമയുണ്ടാകുമെന്നുതന്നെയാണ് എന്റെ പ്രതീക്ഷ.
''ഒരെഴുത്തുകാരി എന്ന നിലയില്‍ രാഷ്ട്രീയത്തില്‍ നിലനില്‍ക്കാന്‍ കഴിയില്ല. അത് വളരെ പ്രയാസകരമാണ്. അത് എനിക്ക് നന്നായി ഫീല്‍ ചെയ്യുന്നുണ്ട്. ചിലപ്പോള്‍ വളരെയധികം പ്രയാസം തോന്നാറുണ്ട്. എന്തിനാണ് ഞാന്‍ രാഷ്ട്രീയത്തില്‍ നില്‍ക്കുന്നത് എന്ന് തോന്നും. ഞാനെന്റെ സമയം പാഴാക്കിക്കളയുകയല്ലേ എന്ന് ചിന്തിക്കും. എന്നാല്‍ ചില നേരങ്ങളില്‍ ചില കാര്യങ്ങള്‍ ചെയ്യാന്‍ സാധിക്കുമ്പോള്‍ മറിച്ചും ചിന്തിക്കും. ഉദാഹരണത്തിന് ചില സ്ത്രീകളൊക്കെ വന്ന് എന്തെങ്കിലും സഹായമൊക്കെ ചോദിക്കുമ്പോള്‍, അവരെ സഹായിക്കാന്‍ സാധിക്കുമ്പോള്‍, അവര്‍ക്കു വേണ്ടി ചില കാര്യങ്ങളൊക്കെ ചെയ്തു കൊടുക്കാന്‍ കഴിയുമ്പോള്‍ വലിയ സന്തോഷം, സംതൃപ്തിയൊക്കെ തോന്നും. ഒരു വ്യക്തി എന്ന നിലയില്‍ നമുക്ക് ഒന്നും ചെയ്യാന്‍ സാധിക്കുകയില്ല. എഴുത്തുകാരി എന്ന നിലയില്‍ സ്ത്രീകളുടെ ദുരവസ്ഥയെ കുറിച്ച് ഇങ്ങനെ എഴുതിക്കൊണ്ടിരിക്കാന്‍ പറ്റുമായിരിക്കും. രാഷ്ട്രീയത്തില്‍ ഇരിക്കുന്നതുകൊണ്ട് എനിക്ക് അവര്‍ക്കായി ഇതുപോലെ എന്തെങ്കിലും ചെയ്തുകൊടുക്കാന്‍ പറ്റും. അങ്ങനെ ചിലതൊക്കെ ചെയ്യാന്‍ സാധിക്കുമ്പോള്‍ സന്തോഷമാണ്. രാഷ്ട്രീയത്തില്‍ വന്നതുകൊണ്ടാണ് ഇത് സാധിക്കുന്നത്.'' (സല്‍മ)

Friday, September 10, 2010

രണ്ടു പെരുന്നാള്‍ കഥകള്‍



ഒന്ന്
കൂട്ടുകുടുംബങ്ങളുടെ പെരുന്നാള്‍
പെരുന്നാള്‍ തലേന്ന് രാത്രി വലിയ വീട് മുഴുവന്‍ വെളിച്ചമായിരിക്കും. നാളെ കുടുംബത്തിലെ മുഴുവനാളുകളും ഒത്തുചേരുന്ന സന്തോഷമായിരിക്കും തറവാട്ടിന്. പെരുന്നാള്‍ തലേന്ന് രാത്രി വീട് ഉറങ്ങുമ്പോള്‍ ഏറെ വൈകിയിരിക്കും. കുട്ടികളുടെ കശപിശയും പെരുന്നാള്‍ വസ്ത്രങ്ങള്‍ എടുത്തുവെക്കലും സ്ത്രീകളുടെ പെരുന്നാള്‍ ഒരുക്കവുമൊക്കെ കഴിയുമ്പോഴേക്കും നേരം ഏറെ വൈകിയിട്ടുണ്ടാകും.
നോമ്പിന്റെ അവസാന നാളില്‍ മഗ്‌രിബ് ബാങ്ക് കഴിയുമ്പോഴേക്കും ആകാശത്തിന് വല്ലാത്ത ചോപ്പ് നിറമായിരിക്കും. വീട്ടിലെ 'പെണ്ണുങ്ങള്‍' (വടക്കേ മലബാറില്‍ സ്ത്രീകളെ പെണ്ണുങ്ങള്‍ എന്നാണ് പറയുക, മലപ്പുറത്ത് അതിന് ഭാര്യ എന്ന അര്‍ഥവും) കൈയ്യിലണിയുന്ന മൈലാഞ്ചി പോലെ വല്ലാത്ത ചോപ്പ്. നോമ്പ് തുറന്നു കഴിഞ്ഞയുടന്‍ തക്ബീറിന്റെ മന്ത്രധ്വനികളായി. ആണ്‍കുട്ടികള്‍ പടക്കം പൊട്ടിച്ച് രസിക്കുമ്പോള്‍ പെണ്‍കുട്ടികളുടെ പട പുറത്തേ 'നീറായി'യിലെ (അടുക്കള) അമ്മിയില്‍ മൈലാഞ്ചി അരക്കുന്ന തിരക്കിലായിരിക്കും. രാത്രി മുഴുവന്‍ മൈലാഞ്ചി കൈകളിലിട്ട്, മൊഞ്ചുള്ള വിരലുകളിലെ ചോപ്പ് മുഴുവന്‍ കിടക്കയ്ക്കും പായയ്ക്കും കൂടി നല്കിയാലേ അവര്‍ക്ക് പെരുന്നാള് പൂര്‍ണ്ണമാവുകയുള്ളു.
പെരുന്നാള്‍ മാസം കണ്ടെന്ന വിവരം വരുമ്പോഴായിരിക്കും പെണ്‍കുട്ടികള്‍ കൂട്ടമായി വളപ്പിലെ വലിയ മൈലാഞ്ചിച്ചെടിയില്‍ നിന്നും ഇലകള്‍ പറിച്ചെടുക്കുക. മുറത്തില്‍ കൂട്ടിവെക്കുന്ന മൈലാഞ്ചിയിലകളെല്ലാം തണ്ടില്‍ നിന്നും വേര്‍തിരിച്ചെടുത്ത്, കഴുകി അമ്മിയില്‍ അരച്ചെടുക്കുമ്പോള്‍ ഒരു പച്ചമണം പരക്കും. മൈലാഞ്ചി അരക്കുന്ന പെണ്‍കുട്ടിയുടെ കൈകള്‍ മുഴുവന്‍ ചുവന്ന് പോയിട്ടുണ്ടാകും. ബാക്കി ആരും അരച്ച മൈലാഞ്ചി തൊടുകയേയില്ല. തൊട്ടാല്‍ ആ ഭാഗം ചുവക്കുമെന്നും പിന്നെ കൈയ്യിന്റെ മൊഞ്ച് പോയിപ്പോകുമെന്നുമായിരിക്കണം അവരുടെ പേടി. ഭംഗിയില്‍ മൈലാഞ്ചി അണിയിക്കാനറിയാവുന്നവര്‍ ആ കൂട്ടത്തില്‍ തന്നെയുണ്ടാകും. ആ സമയത്ത് അവര്‍ക്കായിരിക്കും കൂടുതല്‍ ഡിമാന്റ്.
പുറത്തേ നീറായിയില്‍ മൈലാഞ്ചി അരക്കുന്ന പെണ്‍കുട്ടികള്‍ക്ക് കൂട്ടായി തറവാട്ടിലെ തീരെ ചെറിയ ആണ്‍കുട്ടികളുണ്ടാകും. അവര്‍ക്ക് പടക്കം പൊട്ടുന്ന ഒച്ച പേടിയായതിനാല്‍ പെണ്‍കുട്ടികളോടൊപ്പമായിരിക്കും കൂടുക. മാത്രമല്ല, ഇത്താത്തമാരോടൊപ്പം കൂട്ടുകൂടിയാല്‍ തട്ടി നടക്കാനും പുന്നാരം പറയാനും ആളുണ്ടാകും.
നോമ്പ് ഇരുപതിലെത്തുമ്പോഴേക്കു തന്നെ കുട്ടികള്‍ പെരുന്നാളെത്താന്‍ ബാക്കിയുള്ള ദിവസങ്ങള്‍ എണ്ണിത്തീര്‍ക്കാന്‍ തുടങ്ങിയിട്ടുണ്ടാകും. നോമ്പ് 29ല്‍ അവസാനിക്കാനായിരിക്കും കുട്ടികള്‍ക്ക് താത്പര്യം. റമദാന്‍ 29ല്‍ അവസാനിക്കുന്നതിന് തറവാട്ടില്‍ പ്രത്യേക രസമായിരിക്കും. കുറേ കുട്ടികള്‍, ഒച്ചപ്പാട്, ബഹളം, മാസം കണ്ടെന്ന വിവരം വരുന്നുണ്ടോയെന്ന കാത്തിരിപ്പ്.... പെരുന്നാള്‍ ആകുമോ ഇല്ലേയെന്ന വല്ലാത്ത സുഖമുള്ള കാത്തിരിപ്പ്....
നോമ്പിന്റെ അവസാന നാളുകളില്‍ കുട്ടികളെല്ലാം തറവാട്ടിന്റെ 'മുല്ലാപ്പുറത്ത്' (വരാന്ത) ഒന്നിച്ചുകൂടും. മുല്ലാപ്പുറത്തെ 'തണ'യിലും (കോഴിക്കോട്ടുകാര്‍ ഇതിനെ ബഡാപ്പുറമെന്ന് വിളിക്കുന്നു) രണ്ടാള്‍ നീളമുള്ള ബെഞ്ചുകളിലും 'തള'ത്തിലെ പത്തായത്തിനു മുകളിലുമൊക്കെ തമ്പടിച്ച് കഥ പറഞ്ഞും കടംകഥ പറഞ്ഞും നേരം പോക്കും. പെരുന്നാള്‍ വസ്ത്രത്തെ കുറിച്ച് മേനി പറഞ്ഞും എടുത്ത നോമ്പുകളുടെ എണ്ണം പറഞ്ഞ് ആരാണ് കേമന്‍/കേമിയെന്ന് തീരുമാനിക്കലുമൊക്കെയായി കുട്ടികളുടെ ദിവസം തീരും. അപ്പോള്‍ അടുക്കളയില്‍ 'പെണ്ണുങ്ങള്‍' (വടക്കേ മലബാറില്‍ സ്ത്രീകളെ പൊതുവെ പെണ്ണുങ്ങള്‍ എന്നാണ് പറയുക) അവസാന നോമ്പ് തുറക്കുവേണ്ടി ഒരുക്കുന്ന അപ്പത്തരങ്ങളുടെ തിരക്കിലായിരിക്കും. ഉന്നക്കായിയും പെട്ടപ്പത്തിലും ഇറച്ചിപ്പത്തിലും കട്‌ലെറ്റും പോളയുമൊക്കെയായി അടുക്കള സുഗന്ധങ്ങളുടെ പരീക്ഷണശാലയായിരിക്കും.
എത്ര വൈകിയാലും പെരുന്നാളിന് കുട്ടികള്‍ ഉള്‍പ്പെടെ എല്ലാവരും അതിരാവിലെ എഴുന്നേല്‍ക്കും. പെരുന്നാള്‍ തലേന്ന് വീട്ടിലെ സ്ത്രീകള്‍ ഉറങ്ങുന്നതും എഴുന്നേല്‍ക്കുന്നതുമൊക്കെ അടുക്കളയിലാണെന്നു തോന്നും അവരുടെ ഒരുക്കങ്ങള്‍ കണ്ടാല്‍. പുലര്‍ച്ചെ മുതല്‍ മുട്ടമാല വലിക്കലായിരിക്കും അവരുടെ ഹോബി. അല്‍സയും ബിരിയാണിയുമൊക്കെ ഈദ്ഗാഹില്‍ പോയി മടങ്ങിയതിനു ശേഷം ചെയ്താല്‍ മതിയെങ്കിലും വിശേഷ ഭക്ഷണങ്ങള്‍ക്കിടയിലെ രാജാവായ മുട്ടമാലയെ നേരത്തെ തന്നെ ചെയ്തുവെക്കണം. ഇല്ലെങ്കില്‍ സമയത്ത് ചെയ്ത് തീര്‍ക്കാന്‍ കഴിയാതെ വരും.
'ചോളി' (കുളിമുറി)യിലെ വലിയ ചെമ്പില്‍ നിറയെ വെള്ളം ചൂടാക്കിവെച്ചിട്ടുണ്ടാകും. ആരാദ്യം കുളിക്കുമെന്നതായിരിക്കും രാവിലത്തെ ആദ്യത്തെ സൈദ്ധാന്തിക പ്രശ്‌നം. ഞാനാദ്യം, ഞാനാദ്യമെന്ന പല്ലവിക്കിടയില്‍ ആരൊക്കെയോ പിന്നാലെ പിന്നാലെ കുളിച്ചു തീര്‍ക്കും. പുതുവസ്ത്രമണിഞ്ഞും സുഗന്ധദ്രവ്യം പൂശിയും ഈദ്ഗാഹിലേക്കുള്ള യാത്ര പല പല സംഘങ്ങളായിട്ടായിരുന്നു. എല്ലാവരും ഒന്നിച്ചു പോയാല്‍ ഒന്നുകില്‍ ഓട്ടോ കിട്ടില്ല, കിട്ടുന്ന വാഹനത്തില്‍ എത്രപേര്‍ കയറിയാലും അതിന്റെ ഇരട്ടിയും അതിലേറെയും ആളുകള്‍ പുറത്തുണ്ടാകും. എല്ലാവരും ഒന്നിച്ചു നടക്കുകയാണെങ്കില്‍ ഒരു ജാഥയ്ക്കും പൊതുസമ്മേളനത്തിനുമുള്ള ആളുകളുണ്ടാകും. അതുകൊണ്ടുതന്നെ ഈദ്ഗാഹില്‍ സമയത്തിന് എത്തുകയില്ല. പണി തീരുന്നവര്‍ ഒറ്റയ്ക്കും കൂട്ടായുമാണ് ഈദ്ഗാഹിലേക്ക് തിരിക്കുക.
പെരുന്നാള്‍ നമസ്‌ക്കാരം കഴിയുന്നതോടെ പലരും പലവഴിക്കാകും. ബന്ധുവീടുകള്‍ സന്ദര്‍ശിക്കാനും കൂട്ടുകാരെ കാണാനുമൊക്കെയായി എല്ലാവരും പിരിഞ്ഞു പോകുമ്പോള്‍ അടുക്കള പിന്നേയും ഭക്ഷണത്തിരക്കിലേക്ക് പോയിട്ടുണ്ടാകും. ഒരുഭാഗത്ത് കോഴി ബിരിയാണിയുടെ സുഗന്ധംമുണ്ടാകുമ്പോള്‍ മറ്റൊരിടത്ത് അല്‍സ കടയുകയായിരിക്കും, ഒരിടത്ത് പുഡ്ഡിംഗ് ഉണ്ടാക്കാനുള്ള തിരക്കാണെങ്കില്‍ കുട്ടികളുടെ കൂട്ടായ്മയ്ക്ക് അതെല്ലാം അപ്പോഴപ്പോള്‍ രുചിച്ചു നോക്കാനും കട്ടുതിന്നാനുമുള്ള കൊതിയായിരിക്കും.
ഉച്ച ഭക്ഷണത്തിനാണ് പിന്നീട് എല്ലാവരും ഒത്തുകൂടുക. വട്ടത്തില്‍ 'സുപ്ര'യിട്ട് അതിന് ചുറ്റും എല്ലാവരും ഇരുന്ന് ഭക്ഷണം കഴിക്കുമ്പോളുള്ള രുചി പെരുന്നാളിന് മാത്രം അവകാശപ്പെട്ടതായിരിക്കും. ഭക്ഷണം പരസ്പരം പാത്രത്തിലിട്ടുകൊടുത്തും ഒരാളുടെ പ്ലേറ്റിലുള്ളത് മറ്റൊരാള്‍ അടിച്ചുമാറ്റിയുമൊക്കെയുള്ള പെരുന്നാള്‍ കൂട്ടായ്മയില്‍ 'ഫോര്‍മാലിറ്റി'കള്‍ ഉണ്ടായിരുന്നില്ല. ഭക്ഷണത്തിനു ശേഷം പാട്ടുപാടിയും പരസ്പരം കളിയാക്കിയും മിമിക്രി അവതരിപ്പിച്ചുമൊക്കെ കൊഴുക്കുന്ന കലാപരിപാടികള്‍.... സ്റ്റേജ് പോലെ ഉയരത്തിലുള്ള തണയും പത്തായവുമൊക്കെ തറവാടുകളുടെ മാത്രം പ്രത്യേകതയായിരുന്നു. കുട്ടികള്‍ സഭാകമ്പമില്ലാതെ സദസ്സിനെ അഭിമുഖീകരിക്കാന്‍ ആദ്യം പഠിക്കുന്നത് ഇവിടെ നിന്നായിരിക്കും.
തലശ്ശേരിയില്‍ പെരുന്നാളുകള്‍ക്ക് പ്രത്യേക രസമായിരിക്കും. പഴയ കുറേ മുസ്‌ലിം തറവാടുകള്‍. അവിടങ്ങളിലെല്ലാം പെരുന്നാളിന് ഒരേപോലുള്ള ഒരുക്കങ്ങള്‍.... ഭക്ഷണ വൈവിധ്യത്തിന്റെ പുത്തന്‍ പരീക്ഷണങ്ങള്‍.... ഇന്ത്യയില്‍ ആദ്യം ക്രിക്കറ്റ് കളിച്ച അതേ മൈതാനി തന്നെയാണ് കേരളത്തിലെ ആദ്യത്തെ ഈദ്ഗാഹും. മൈതാനിക്കു മുമ്പില്‍ തല ഉയര്‍ത്തി നില്‍ക്കുന്ന ഇന്തോ സാരസന്‍ മാതൃകയിലുള്ള ജുമുഅത്ത് പള്ളി. പുല്‍മൈതാനിയില്‍ നിരത്തി വിരിച്ച നമസ്‌ക്കാരപ്പായകള്‍ക്കപ്പുറത്ത് മനസ്സുകളുടെ ഐക്യപ്പെടല്‍... ഇപ്പോള്‍ ഇവിടെ കുറേ തറവാടുകള്‍ ഇല്ലാതായിക്കഴിഞ്ഞിരിക്കുന്നു. കൂട്ടുകുടുംബങ്ങളുടെ ജീവിതം കഥകള്‍ മാത്രമായിക്കൊണ്ടിരിക്കുന്ന ഒരു കാലം. ഒന്നിച്ചു കൂടി, പങ്കുവെക്കലുകളുടെ രസങ്ങള്‍ക്കപ്പുറം മനസ്സുകളുടെ അടുപ്പങ്ങളിലൂടെ ഒരു പെരുന്നാള്‍ കൂടി...

രണ്ടു

പെരുന്നാള്‍ കിനാവുകള്‍

ആലി ഹാജി പള്ളിയില്‍ നിന്നാണ് തുടങ്ങുക. തക്ബീര്‍ ചൊല്ലി ഒരുകൂട്ടം ആളുകള്‍ ജുമുഅത്ത് പള്ളിയിലേക്ക് നടക്കും. അക്കൂട്ടത്തില്‍ വമ്പന്മാരെല്ലാരുമുണ്ടാകും. കാലം അതാണ്. വേണമെങ്കില്‍ പഴമയുടെ, പൊട്ടിപ്പൊളിഞ്ഞ പ്രതീതിയുണ്ടാക്കുന്ന ബ്ലാക്ക് ആന്റ് വൈറ്റ് ഫിലിമില്‍ പകര്‍ത്താവുന്ന രംഗങ്ങള്‍. പക്ഷേ ഇതെല്ലാം ഇന്നുള്ളതിനേക്കാള്‍ മികച്ച തെളിച്ചമുള്ള ഡിജിറ്റല്‍ സാങ്കേതിക വിദ്യയിലാണ് പകര്‍ത്തേണ്ടത്. കാരണം അക്കാലമായിരുന്നു തലശ്ശേരിയുടെ ഏറ്റവും തെളിച്ചമുള്ള പെരുന്നാള്‍ കാലം.
അന്ന് സ്റ്റേഡിയം ജുമുഅത്ത് പള്ളി എന്ന പഴയ ജുമുഅത്ത് പള്ളിയില്‍ മാത്രമായിരുന്നു ഈദ്ഗാഹ് ഉണ്ടായിരുന്നത്. തലശ്ശേരിയില്‍ മാത്രമല്ല, കേരളത്തില്‍ ആകെയുള്ള ഈദ്ഗാഹ് അതാണ്.
പെരുന്നാളിന് മുമ്പ്, നോമ്പുകാലത്ത്, പാനീസും കൈയ്യില്‍ തൂക്കി അത്താഴം ബാബമാര്‍ സഞ്ചരിച്ച വഴികളിലൂടെ പെരുന്നാള്‍ രാത്രി തക്ബീര്‍ ചൊല്ലി നീങ്ങുക ചെറു സംഘങ്ങളായിരിക്കും. റോഡില്‍ നിന്നും പടിപ്പുര കടന്നെത്തുന്ന ആലിഹാജി പള്ളിയിലെ പാറകൊണ്ടുള്ള ഹൗളില്‍ തണുത്ത വെള്ളമായിരിക്കും. ആലിഹാജി പള്ളിയിലേത് മാത്രമല്ല, ഓടത്തില്‍ പള്ളിയിലെ ഹൗളിലും നാരങ്ങാപ്പുറം പള്ളിയിലെ ഹൗളിലുമെല്ലാം അക്കാലത്ത് അത്രയും തണുപ്പുള്ള വെള്ളം തന്നെയാണ് ഉണ്ടായിരുന്നത്. അക്കാലത്തിന്റെ തലശ്ശേരിക്കും നനുത്ത്, സുഖമുള്ള തണുപ്പ് നല്കുന്ന ഓര്‍മ്മക്കാലമാണ്.
തലശ്ശേരി ജുമുഅത്ത് പള്ളിക്ക് ആയിരം കൊല്ലത്തിലേറെ പഴക്കമുണ്ട്. ഇപ്പോള്‍ കാണുന്നതു പോലെ ജുമുഅത്ത് പള്ളി പണ്ടും മനോഹരമായിരിക്കണം. ഇന്തോ- സാരസന്‍ മാതൃകയില്‍ നിര്‍മ്മിച്ച കേരളത്തിലെ അപൂര്‍വ്വം പള്ളികളിലൊന്ന്. മാലിക് ഇബ്‌നു ദിനാറിന്റെ കാലത്തു തന്നെ ഈ പള്ളി നിര്‍മ്മിച്ചിരിക്കണം- കേരളത്തിലെ ആദ്യകാല പള്ളികളിലൊന്ന്. അറബി മലയാളം സാഹിത്യ വായനക്കാരെ കുടുകുടെ ചിരിപ്പിച്ച കുഞ്ഞായന്‍ മുസ്‌ല്യാരുടെ ഖബര്‍ ഈ പള്ളിപ്പറമ്പിലാണുള്ളത്.
സ്റ്റേഡിയം പള്ളിയുടെ മതിലിനോട് ചേര്‍ന്ന് നിര്‍മിച്ച മിംബര്‍. രണ്ട് പെരുന്നാള്‍ ദിനങ്ങളില്‍ മാത്രമാണ് അവിടെ ഖുതുബ നടക്കുക. പെരുന്നാളിന് തൊട്ടുമുമ്പ് പെയിന്റടിച്ച് മിംബര്‍ മനോഹരമാക്കിയിട്ടുണ്ടാകും. താത്കാലികമായി കെട്ടിയുയര്‍ത്തുന്ന കുട പെരുന്നാള്‍ നമസ്‌ക്കാരത്തിന് ശേഷമുള്ള ഖുതുബ പറയുമ്പോള്‍ ഖതീബിനെ വെയിലില്‍ നിന്നും രക്ഷപ്പെടുത്തും. പെരുന്നാള്‍ നമസ്‌ക്കാരത്തിനെത്തുന്നവരുടെ ശരീരത്തിന്റെ പിറകുവശം വിയര്‍ത്തൊലിക്കുമ്പോള്‍ ഖത്തീബിന്റെ മുഖത്തായിരിക്കും സൂര്യവെളിച്ചം മുഴുവന്‍.
കേരളത്തിലെ ആദ്യത്തെ ഈദ്ഗാഹിന് ആദ്യത്തെ ക്രിക്കറ്റ് മൈതാനം സാക്ഷി. ചരിത്രം ചില കാത്തുവെപ്പുകളുടേത് കൂടിയാണ്. പന്തുരുളുന്ന പച്ച മൈതാനിയില്‍ അന്ന് രാവിലെ കളിയുണ്ടാവില്ല. പകരം വിശ്വാസികള്‍ക്ക് ആ സ്ഥലം വിട്ടുകൊടുക്കും. അത് തലശ്ശേരിയുടെ മഹത്തായ സാംസ്‌ക്കാരിക പൈതൃകം. മുസ്‌ലിംകള്‍ നമസ്‌ക്കരിക്കുമ്പോള്‍ ചുറ്റുവട്ടത്ത് അന്യമതസ്ഥര്‍ വന്നിരിക്കുന്നുണ്ടാകും. അവര്‍ പെരുന്നാള്‍ ഖുതുബയും കഴിഞ്ഞാണ് മടങ്ങിപ്പോവുക. വൈകിട്ട് അതേ മൈതാനിയില്‍ ഈദ് സംഗമം. അക്കാലത്തെ തലശ്ശേരിയുടെ സാംസ്‌ക്കാരിക പൈതൃകം അതായിരുന്നു. പെരുന്നാള്‍ നമസ്‌ക്കാരം പോലെതന്നെ തലശ്ശേരിക്കാര്‍ക്ക് ഏറെ പ്രധാനപ്പെട്ടതായിരുന്നു പെരുന്നാള്‍ സാംസ്‌ക്കാരിക സംഗമവും. അവിടെ പ്രസംഗിക്കാനെത്തിയിരുന്നത് ഓരോ മേഖലയിലേയും മികച്ചവരായിരുന്നു.
സ്റ്റേഡിയത്തിനപ്പുറത്ത്, ജുമാ മസ്ജിദിനു പിറകില്‍ തിരയടിച്ചു കയറുന്ന അറബിക്കടല്‍. കടല്‍ സംഗീതത്തിന്റെ തണുപ്പും വെയില്‍ സൂര്യന്റെ കരുത്തുമറിയുന്ന പ്രഭാതങ്ങളാണ് പെരുന്നാളുകള്‍ക്ക്.
കാലം മാറുന്നു. പഴയ ആലിഹാജി പള്ളി ഇപ്പോഴും മെയിന്‍ റോഡിലുണ്ട്. അവിടുത്തെ ഹൗളില്‍ ഇപ്പോഴും ആ തണുത്ത വെള്ളംതന്നെയാണുള്ളത്. പഴമയുടെ പ്രൗഢിയും തലയെടുപ്പോടെ ഇവിടെയുണ്ട്. മച്ചില്‍ തൂങ്ങുന്ന സ്ഫടിക വിളക്കുകള്‍, കൊത്തുപണിയുടെ സൗന്ദര്യം, നിലത്തു പാകിയ കല്ലുകള്‍... എല്ലാം ഇപ്പോഴും പഴയതുപോലെ തന്നെ. 'ഹനഫി' നിലപാടുകള്‍ തുടരുന്ന പള്ളിയാണെങ്കിലും 'ശാഫി'കള്‍ക്കൊന്നും അതിനോട് ഇഷ്ടക്കേട് ഉണ്ടായിരുന്നില്ല.
ആലി ഹാജി പള്ളിയില്‍ നിന്നും സ്റ്റേഡിയം പള്ളിയിലേക്കുള്ള തക്ബീര്‍ ജാഥകള്‍ ഇപ്പോള്‍ ഇല്ല. ഈദ് ഗാഹില്‍ കാല്‍നടയായി നമസ്‌ക്കാരത്തിന് പോകുന്നവരും കുറവ്. എല്ലാവരും ഇപ്പോള്‍ വാഹനത്തിലാണ് യാത്ര. ഈദ്ഗാഹിന് പുറത്ത് വാഹനങ്ങളുടെ നീണ്ട നിര. നഗരത്തിലെ കുരുങ്ങിക്കുഴയുന്ന ട്രാഫിക്ക് നിയന്ത്രിക്കാന്‍ പൊലീസുകാരുടെ പട. ഈദ് മുബാറക്കിന്റെ അഭിവാദ്യക്കൈമാറ്റത്തിലെ സ്‌നേഹാശ്ലേഷങ്ങള്‍.
ഒരു പെരുന്നാല്‍ കൂടി കാലത്തിനു പിന്നിലേക്ക് മറയുന്നു. മാസം കണ്ടോ എന്നറിയാനുള്ള തലേരാത്രിയുടെ കാത്തിരിപ്പിനാണ് പെരുന്നാള്‍ പകലിനേക്കാള്‍ രസം. ഈദ് നമസ്‌ക്കാരം കഴിയുന്നതോടെ പെരുന്നാള്‍ രസവും തീരുന്നു.
കാലം ഉരുണ്ടു തീരുമ്പോള്‍ ചന്ദ്രന്‍ ആകാശക്കോണില്‍ പ്രത്യക്ഷപ്പെട്ട് ചിരിക്കുന്നുണ്ടാകും. വെളിച്ചം വിതറാന്‍ സൂര്യനുമുണ്ടാകും. മനുഷ്യന്‍ മാത്രം തലമുറകള്‍ മാറിമാറിത്തീരും. അതിനിടയില്‍ ജീവാംശങ്ങളില്‍ ഒളിപ്പിച്ചുവെച്ച കുറേ ഓര്‍മ്മകള്‍ കൈമാറിപ്പോകുന്നുണ്ടാകണം. അവിടെ ഒരോ പെരുന്നാളിനും ആലിഹാജി പള്ളിയില്‍ നിന്നും ജുമാ മസ്ജിദിലേക്ക് തക്ബീര്‍ ചൊല്ലി നടന്നു പോകുന്നവരുണ്ടാകും. വമ്പന്മാര്‍ക്കു പിറകില്‍ ആവേശത്തോടെ തക്ബീര്‍ ചൊല്ലുന്ന കുട്ടികളുണ്ടാവും. ഇരുണ്ട വഴികളില്‍ നടന്നു പോകുന്നയാളുടെ കൈകളില്‍ അങ്ങോട്ടുമിങ്ങോട്ടും നീങ്ങുന്ന പാനീസിന്റെ വെളിച്ചമുണ്ടാകും. നീണ്ട നിഴലുകളുണ്ടാകും. പിന്നെ, കുറേ പെരുന്നാള്‍ കിനാക്കളും....

Wednesday, September 8, 2010

നോമ്പിന്റെ സുഗന്ധം തുര്‍ക്കുമാന്‍ ഗേറ്റില്‍ നിന്ന് തായത്തെരുവിലേക്ക്



നോമ്പ് ആദ്യം സുഗന്ധമായാണ് അനുഭവപ്പെടുക. തുടക്കം മാത്രമല്ല, ഞങ്ങള്‍ തലശ്ശേരിക്കാര്‍ക്ക് റമദാനെന്നാല്‍ ആദ്യം മുതല്‍ അവസാനം വരെ സുഗന്ധത്തിന്റെ അകമ്പടിയുള്ള മാസമാണ്. ഞങ്ങളുടെ പ്രൗഢവും ഗംഭീരവുമായ ഭക്ഷണ പദാര്‍ഥങ്ങള്‍ തീന്മേശകളെ ഉയര്‍ച്ച താഴ്ചകളില്ലാതെ അലങ്കരിക്കുന്നത് ഈ മാസത്തിലാണ്. ഞങ്ങളുടെ ഭക്ഷണ രീതികളെ മറ്റുള്ളവര്‍ എന്തുപറയുന്നെന്നും എന്ത് വിളിക്കുന്നുവെന്നും ഞങ്ങളാരും പരിഗണിക്കാറേയില്ല. പേര്‍ത്തും പേര്‍ത്തും ഞങ്ങളുടെ ഭക്ഷണ രീതികളെ കളിയാക്കുകയും അതിശയത്തോടെ കാണുകയുമൊക്കെ ചെയ്ത പലരും പിന്നീട് അതിഥികളായി ഇവയൊക്കെ കഴിക്കുകയും അനുമോദിക്കുകയുമൊക്കെ ചെയ്തിട്ടുണ്ടെന്നത് വേറെ കഥ.
നോമ്പിന്റെ ആദ്യ സുഗന്ധം അടിച്ചു കയറുക പള്ളികളില്‍ നിന്നാണ്. നോമ്പ് തുടങ്ങാന്‍ കഷ്ടിച്ച് ഒരാഴ്ച ബാക്കിയുണ്ടാകുമ്പോഴായിരിക്കും പള്ളികളില്‍ വെള്ള പൂശുകയും പഴയ പുല്‍പ്പായകള്‍ മാറ്റി പുതിയത് വിരിക്കുകയും ചെയ്യുക. നോമ്പിന് പുതിയ പായയുടെ മണം കൂടിയുണ്ട്. പള്ളിച്ചുമരിലടിച്ച ചുണ്ണാമ്പിന്റേയും പുതിയ പായകളുടേയും മണവും നോമ്പ് എത്തിയെന്ന് ഓര്‍മ്മിപ്പിക്കും. നോമ്പ് സുഗന്ധമായി പിന്നെ അറിയുക ഉന്നക്കായയുടേയും ഇറച്ചിപ്പത്തിലിന്റേയും കോഴിയടയുടേയും കൈവീശലിന്റേയും ഉള്ളിവടയുടേയും പരിപ്പു വടയുടേയും ബ്രഡ് പൊരിച്ചതിന്റേയും കായ നിറച്ചതിന്റേയും പെട്ടിപ്പത്തിലിന്റേയും അപ്പം നിറച്ചതിന്റേയും തരി കാച്ചിയതിന്റേയും കഞ്ഞിയുടേയും കക്കറോട്ടിയുടേയും അരിയൊറോട്ടിയുടേയും നെയ്പ്പത്തിലിന്റേയും ഇറച്ചിക്കൂട്ടാന്റേയുമൊക്കെ മണമായാണ്. ഇങ്ങനെ പറയുമ്പോള്‍ തോന്നുക നോമ്പെന്നാല്‍ തലശ്ശേരിക്കാര്‍ക്ക് (തലശ്ശേരി എന്നതിനെ കണ്ണൂരെന്നും മാഹിയെന്നുമൊക്കെ കൂടി വായിക്കാവുന്നതാണ്) തിന്നാനുള്ള മാസമെന്നാണ്. എന്നാല്‍ കേട്ടോളൂ, ഞങ്ങളുടെ നാട്ടിലെ പെണ്ണുങ്ങള്‍ (ആണുങ്ങളും) അത്താഴത്തിന് ശേഷം ഖുര്‍ആന്‍ പാരായണം ചെയ്ത്, പള്ളികളില്‍ പ്രഭാഷണങ്ങള്‍ ശ്രദ്ധിച്ച് ഇബാദത്തുകളില്‍ മുഴുകി വൈകിട്ട് രണ്ടോ മൂന്നോ മണിക്കൂറുകള്‍ കൊണ്ടാണ് തീന്മേശയൊരുക്കാനും വയറു നിറയ്ക്കാനുമുള്ള കൊതിപ്പിക്കുന്ന വിഭവങ്ങള്‍ ഉണ്ടാക്കുന്നത്. സംശയം തീര്‍ക്കാന്‍ തലശ്ശേരി വന്ന് ഒരു നോമ്പ് തുറന്നു പോവുന്നതിനും സന്തോഷമേയുള്ളു.
പറഞ്ഞു വരുന്നത് മുഗള്‍ ഭരണത്തിന്റെ 'തിരു'ശേഷിപ്പുകള്‍ ബാക്കിയുള്ള പഴയ ദല്‍ഹിക്കും കേരളത്തിലെ ഏക മുസ്‌ലിം രാജവംശമായ അറക്കലിന്റെ അടയാളങ്ങള്‍ ഇപ്പോഴും ബാക്കി കിടക്കുന്ന കണ്ണൂരിലെ തായത്തെരുവിനും നോമ്പിന്റെ രാത്രികള്‍ക്കുള്ള അതിശയിപ്പിക്കുന്ന സാമ്യത്തെ കുറിച്ചാണ്. ആറ്് വര്‍ഷങ്ങള്‍ക്ക് മുമ്പ് പഴയ ദല്‍ഹിയിലെ തുര്‍ക്കുമാന്‍ ഗേറ്റും ഉര്‍ദു ബസാറും ജുമാമസ്ജിദും ചാന്ദ്‌നിചൗക്കുമൊക്കെ സന്ദര്‍ശിച്ചത് ഒരു റമദാന്‍ രാത്രിയിലായിരുന്നു. കൂടെ സുഹൃത്തും നേരത്തെ ചന്ദ്രികയിലും വര്‍ത്തമാനത്തിലും സഹപ്രവര്‍ത്തകനും പിന്നീട് ദല്‍ഹി ചന്ദ്രിക ബ്യൂറോവിലും മില്ലി ഗസറ്റിലും ഏഷ്യന്‍ ഏജിലും മലയാളം ന്യൂസ് ദല്‍ഹി റിപ്പോര്‍ട്ടറും ഇന്ത്യന്‍ എക്‌സ്പ്രസ് ചെന്നൈ സീനിയര്‍ റിപ്പോര്‍ട്ടറുമൊക്കെയായി പ്രവര്‍ത്തിച്ചിരുന്ന എ പി മുഹമ്മദ് അഫ്‌സലാണ് ഉണ്ടായിരുന്നത്. പഴയ ദല്‍ഹിയും തുര്‍ക്കുമാന്‍ഗേറ്റും ഉര്‍ദു ബസാറുമൊക്കെ അവന്റെ സ്വപ്ന പ്രദേശങ്ങളായിരുന്നു. അതിനുമപ്പുറത്ത് അഭയ കേന്ദ്രങ്ങളായിരുന്നു.
പുതിയ ദല്‍ഹിയില്‍ നിന്നും വ്യത്യസ്തമായി വീതി കുറഞ്ഞ നിരത്തുകളും തീപ്പെട്ടി അടുക്കിയതു പോലുള്ള വീടുകളുമുള്ള പഴയ ദല്‍ഹി മുസ്‌ലിം ഭൂരിപക്ഷ പ്രദേശമാണ്. ഇടുങ്ങിയ വഴികളിലൂടെ ചീറിപ്പായുന്ന ഇരുചക്ര വാഹനങ്ങളും ആഞ്ഞു ചവിട്ടി ഇടുക്കുകളിലൂടെ കടന്നു പോകുന്ന സൈക്കിള്‍ റിക്ഷകളും പര്‍ദ്ദയണിഞ്ഞ് (പര്‍ദ്ദയില്ലാതെ ഫാഷന്‍ വേഷത്തിലും) ഏത് രാത്രിയിലും ഭയമില്ലാതെ കടന്നു പോകുന്ന സ്ത്രീകളും പെണ്‍കുട്ടികളും, ഷെര്‍വാണി ധരിച്ച് മുഗള്‍ ഭരണത്തിന്റെ ഏതോ മധുര സ്മരണയിലെന്നപോലെ വെറുതെ ബീഡിയും വലിച്ചിരിക്കുന്ന പുരുഷന്മാരുമൊക്കെ ഇവിടുത്തെ കാഴ്ചകളാണ്. തുര്‍ക്കുമാന്‍ഗേറ്റ് കടക്കുന്നതോടെ പാലും നെയ്യുമൊക്കെ കൂടിച്ചേര്‍ന്ന ഒരു ഗന്ധമാണ് ആദ്യം മൂക്കിലെത്തുക. വടക്കേ ഇന്ത്യക്കാരന്റെ പാലും നെയ്യുമൊക്കെ ചേര്‍ന്ന വിഭവത്തോടും ഗന്ധത്തോടുമൊക്കെ മലയാളി ആദ്യം വിമുഖത പ്രകടിപ്പിക്കുമെങ്കിലും പിന്നീട് അതിനോട് താദാത്മ്യം പ്രാപിക്കും.
വഴികളും റോഡുകളും കെട്ടുപിണഞ്ഞു കിടക്കുന്ന പഴയ ദല്‍ഹിയിലെ തെരുവുകളില്‍ ആദ്യമെത്തുമ്പോള്‍ ആരും അതിശയിച്ചു പോകും. എല്ലാറ്റിനും ഒരേ വീതിയും ഒരേ തിരക്കും... സമാനമായ കാഴ്ച. എല്ലായിടത്തും ഇരുചക്ര വാഹനങ്ങളും സൈക്കിള്‍ റിക്ഷകളും ചീറിപ്പായുന്നുണ്ടാകും. കുട്ടികള്‍ സൈക്കിള്‍ റിക്ഷയുടെ പിറകില്‍ തൂങ്ങി കളിക്കുന്നുണ്ടാകും. വാഹനങ്ങള്‍ ഇടതടവില്ലാതെ ഓടുന്ന റോഡില്‍ കുഞ്ഞുങ്ങള്‍ ഉള്‍പ്പെടെ കളിക്കുന്നത് കണ്ടാല്‍ പേടി തോന്നും. വാഹനങ്ങള്‍ മാത്രമല്ല, മനുഷ്യരും ഇതേ റോഡിലൂടെയാണ് ഒഴുകുന്നത്. പഴയ ദല്‍ഹിയില്‍ രാത്രികളിലാണ് ജീവിതം കൂടുതല്‍ സജീവമാകുന്നതെന്ന് തോന്നുന്നു.
റമദാന്‍ രാത്രികള്‍ സജീവമാക്കുകയെന്നാല്‍ തറാവീഹ് നമസ്‌ക്കരിക്കുകയെന്നും ഖുര്‍ആന്‍ പാരായണം ചെയ്യുകയെന്നുമൊക്കെയുള്ള അര്‍ഥം പഴയ ദല്‍ഹിയിലുമുണ്ട്. അത്രതന്നെ പ്രാധാന്യത്തോടെ അവര്‍ തെരുവിലെ അലച്ചിലിനേയും കാണുന്നുണ്ട്. പാലുകൊണ്ടും നെയ്യുകൊണ്ടും ഇറച്ചികൊണ്ടും ഉണ്ടാക്കിയ വിഭവങ്ങള്‍ക്ക് ആവശ്യക്കാര്‍ ഏറെയാണ്. ഓരോ പീടിക മുറിയിലും വ്യത്യസ്തമായ വിഭവങ്ങളുണ്ടാക്കി വാങ്ങാനെത്തുന്നവരെ കാത്തുനില്‍ക്കുന്നുണ്ടാകും. റോഡരികുപറ്റി ഒറ്റ മേശയില്‍ ഒതുക്കിയ ഭക്ഷണ വില്‍പന ശാലകളുമുണ്ട്. റോഡരികിലെ തിരക്കില്‍ നിന്ന് കടയിലെ സാധനങ്ങള്‍ വാങ്ങി അഴിടെ നിന്നുതന്നെ ഭക്ഷണം കഴിക്കാം. വലിയ ഹോട്ടലുകളില്‍ കയറണമെന്നുള്ളവര്‍ക്ക് അങ്ങനെയാകാം. ഹോട്ടലിനു മുമ്പില്‍ നിരന്നിരിക്കുന്ന പട്ടിണിപ്പാവങ്ങളെ കണ്ടില്ലെന്ന് നടിക്കാം. ഏതെങ്കിലും പണക്കാരന്‍ സ്‌പോണ്‍സര്‍ ചെയ്ത ഭക്ഷണം വിതരണം ചെയ്യുന്നതുവരെ പാവങ്ങളുടെ ഹോട്ടലിനു മുമ്പില്‍ അച്ചടക്കത്തോടെ ഇരിക്കും. തനിക്ക് നേരമുള്ളപ്പോള്‍ ഹോട്ടലുകാരന്‍ ഭക്ഷണം നല്കുമ്പോള്‍ അവിടെ തിക്കും തിരക്കും രൂപപ്പെടും.
മസാല ചേര്‍ത്ത് കനലിന്റെ ആവിയില്‍ പൊരിച്ചെടുക്കുന്ന ചിക്കന്‍ കബാബുകള്‍ തിന്നാന്‍ ഏറെ രുചിയുള്ളതാണെന്ന് അഫ്‌സല്‍ പറയുമായിരുന്നു. റോഡരികില്‍ കനലിനു മുകളില്‍ വലിയ ചെമ്പുകളില്‍ ഒരുക്കിയ ബിരിയാണി ത്രാസില്‍ തൂക്കി നല്‍കുമ്പോള്‍ അതിനും ഭയങ്കര രുചിയാണെന്ന് അഫ്‌സല്‍. മുന്നൂറ് ഗ്രാം ബിരിയാണിക്ക് പത്ത് രൂപയായിരുന്നു വില. ഏതായാലും ഇവയൊന്നും പരീക്ഷിക്കാനുള്ള ധൈര്യം എനിക്ക് അന്നുണ്ടായിരുന്നില്ല. ദല്‍ഹി തെരുവുകളിലെ അലച്ചിലും നാടുവിട്ടുള്ള ദുരിത ജീവിതവും അവനെ എന്തിനോടും ഇഴുകിച്ചേരാന്‍ പ്രാപ്തനാക്കിയിരുന്നു. അതുകൊണ്ടായിരിക്കണം പകലിനേക്കാള്‍ രാത്രി ജീവിതമുള്ള തുര്‍ക്കുമാന്‍ ഗേറ്റിനേയും അവിടുത്തുകാരേയും അവന്‍ ഏറെ ഇഷ്ടപ്പെട്ടത്; ആഴ്ചയില്‍ ഒരിക്കലെങ്കിലും ആ പ്രദേശം സന്ദര്‍ശിക്കാന്‍ അവന്‍ ശ്രദ്ധവെച്ചത്. മാത്രമല്ല, പൗരാണികതയെ സ്‌നേഹിക്കുന്നവര്‍ക്ക് ഒരു വല്ലാത്ത ഗൃഹാതുരത്വം ആ പ്രദേശം സമ്മാനിച്ചിരുന്നു.
പഴയ ദല്‍ഹിയുടെ കാഴ്ചയില്‍ നിന്നും അനുഭവങ്ങള്‍ ഇങ്ങ് കേരളത്തിലേക്കെത്തുന്നു. രാജവാഴ്ചയുടെ ഓര്‍മ്മകള്‍ പേറുന്ന പഴയ ദല്‍ഹിക്കും അത്രത്തോളമല്ലെങ്കിലും രാജവാഴ്ച ഓര്‍മ്മിപ്പിക്കുന്ന കണ്ണൂരിലെ തായത്തെരുവിനും കാഴ്ചയ്ക്കും ജീവിതത്തിനുമൊക്കെ ചില സാമ്യങ്ങളുണ്ട്. ഇടുങ്ങിയ തെരുവുകള്‍ അങ്ങോട്ടുമിങ്ങോട്ടും പോകുന്ന പഴയ ദല്‍ഹി പോലെ തായത്തെരുവിലും ഇടുങ്ങിയ വഴികള്‍ എങ്ങോട്ടൊക്കെയോ പോകുന്നുണ്ട്. തൊട്ടുതൊട്ടുള്ള കുഞ്ഞുകുഞ്ഞു കെട്ടിടങ്ങള്‍ക്കാണ് അവിടെ വീടെന്ന് വിശേഷിപ്പിക്കുന്നതെങ്കില്‍ ഇവിടെ വീടുകള്‍ വലുതാണ്- അവ അടുത്തടുത്താണെങ്കിലും! പണ്ടെന്നോ പോയ്‌പ്പോയ സുവര്‍ണ്ണ കാലത്തെ ഓര്‍മ്മിച്ചാണ് പഴയ ദല്‍ഹിയിലുള്ളവര്‍ സ്വപ്നങ്ങള്‍ നെയ്യുന്നതെന്നപോലെ തായത്തെരുവിലും ഏതൊക്കെയോ പഴമയുടെ സുഗന്ധമുള്ള ഓര്‍മ്മകള്‍ താലോലിക്കപ്പെടുന്നുണ്ട്. പഴയ ദല്‍ഹിയിലുള്ളവര്‍ തങ്ങളുടെ പഴമയുടെ സംസ്‌ക്കാരം കൈവിടാത്തതുപോലെ തായത്തെരുവിലുള്ളവരും തങ്ങളുടെ പഴമ കൈവിട്ടിട്ടില്ല. തായത്തെരുവിലും രാത്രി ജീവിതത്തിനാണ് ആസ്വാദ്യത കൂടുതല്‍. (നോമ്പിന് രാത്രികള്‍ കൂടുതല്‍ സജീവമാകുന്നു. മറ്റു മാസങ്ങളില്‍ തായത്തെരുവില്‍ അത്ര പെട്ടെന്നൊന്നും രാത്രി എത്താറില്ല.) റോഡുകള്‍ തുര്‍ക്കുമാന്‍ ഗേറ്റിലേയും ഉര്‍ദു ബസാറിലേയും പോലെ വീതി കുറഞ്ഞതല്ല. എങ്കിലും ചീറിപ്പായുന്ന ഇരുചക്ര വാഹനങ്ങളും സൈക്കിളുമായി റോഡില്‍ കളിക്കുന്ന ചെറിയ കുട്ടികളും പീടിക വരാന്തയില്‍ സൊറ പറയുന്ന പുരുഷന്മാരുമൊക്കെ ഇവിടേയുമുണ്ട്.
പഴയ ദല്‍ഹിയില്‍ റമദാന്‍ നാളുകളില്‍ രാത്രി തറാവീഹ് നമസ്‌ക്കരിക്കണമെന്ന് നിര്‍ബന്ധമുള്ളവരെ പോലെ തന്നെ അതില്‍ തീരെ ശ്രദ്ധയില്ലാത്തവരേയും കാണാന്‍ കഴിഞ്ഞിരുന്നു. തൊട്ടടുത്ത പള്ളിയില്‍ നമസ്‌ക്കാരം നടക്കുമ്പോള്‍ റോഡില്‍ സൊറ പറഞ്ഞും ബീഡി വലിച്ചും ചായ കുടിച്ചും നേരം കൊല്ലുന്ന നിരവധി പേരുണ്ടായിരുന്നു. ചിക്കന്‍ കബാബും ബിരിയാണിയുമൊക്കെ നിരന്തരം വിറ്റുപോകുന്ന കടകള്‍ക്കു മുമ്പില്‍ നല്ല തിരക്കായിരിക്കും. തായത്തെരുവിലേയും സിറ്റിയിലേയും കബാബ് കടകള്‍ക്കു മുമ്പിലും 'ചെത്തയിസ്' വില്‍ക്കുന്നിടത്തും ഐസ്‌ക്രീം വില്‍പ്പന ശാലയ്ക്കു മുമ്പിലും വല്ലാത്ത തിരക്കായിരിക്കും നോമ്പിന്റെ രാത്രികളില്‍. അറക്കല്‍ കൊട്ടാരത്തിലെ ഗോപുര മണിക്കു മുമ്പിലെ വഴിയില്‍ കബാബ് കടകളും ചെത്തയിസ് ടെന്റുകളും കാവ വില്‍പ്പന ശാലകളും നോമ്പുകാലത്ത് മാത്രമായി രാത്രി സജീവമായി പ്രവര്‍ത്തിക്കുമ്പോള്‍ തൊട്ടപ്പുറത്തെ പള്ളികളില്‍ തറാവീഹ് നമസ്‌ക്കാരം മുറപോലെ നടക്കുകയായിരിക്കും. അടുത്തടുത്ത് സ്ഥിതി ചെയ്യുന്ന പള്ളികളില്‍ നിറയെ ആളുകളുണ്ടാകും. തറാവീഹിന് ശേഷം കബാബ് തിന്നാനും ചെത്തയിസ് ആസ്വദിക്കാനും കാവ കുടിക്കാനും പള്ളിയില്‍ നിന്നിറങ്ങിയ ആളുകളില്‍ നല്ലൊരു ഭാഗം എത്തും. രാത്രികളില്‍ തുര്‍ക്കമാന്‍ ഗേറ്റിലേതു പൊലെ ഭയലേശമില്ലാതെ തായത്തെരുവിലും ചെറിയ കുട്ടികള്‍ ഉള്‍പ്പെടെയുളളവര്‍ അലങ്കരിച്ച പാതകളിലൂടെ നോമ്പിനെ 'ഹയാത്താ'ക്കുകയായിരിക്കും.
രാജഭരണത്തിന്റെ മധുരമുള്ള ഓര്‍മകള്‍ പേറുന്നുണ്ട് പഴയ ദല്‍ഹിയിലേയും തായത്തെരുവിലേയും പാതകള്‍ എന്നതായിരിക്കണം ഇവ രണ്ടിനേയും സാമ്യപ്പെടുത്തുന്നത്. രണ്ടിടത്തേയും ചിക്കന്‍ കബാബിന് ഒരേ ഗന്ധമെന്നത് ഈ രണ്ടു നാട്ടുകാരും തമ്മിലുള്ള എന്തൊക്കെയോ ബന്ധങ്ങള്‍ വെളിപ്പെടുത്തുന്നുണ്ട്. അല്ലെങ്കില്‍ അതിന്നുമപ്പുറം നമ്മുടെ കണക്കു കൂട്ടലുകള്‍ക്ക് കണ്ടെത്താനാവാത്ത ചില അംശബന്ധങ്ങള്‍ ഇവയ്ക്ക് രണ്ടിനുമുണ്ടായിരിക്കാമല്ലോ.
ഇപ്പോള്‍, നോമ്പിന്റെ ഗന്ധമെന്നാല്‍ എനിക്ക് പള്ളിയിലെ ചുണ്ണാമ്പ് വലിച്ച ചുമരിന്റേയും പുതിയ പുല്‍പ്പായയുടേയും ഉമ്മയുണ്ടാക്കുന്ന ഉന്നക്കായയുടേയും മാത്രം മണമല്ല; പഴയ ദല്‍ഹിയിലെ തിരക്കുള്ള തെരുവുകളിലെ പാലും നെയ്യും ഇറച്ചിയും കൂടിച്ചേര്‍ന്ന ഭക്ഷണങ്ങളുടേയും തായത്തെരുവിലെ ചിക്കന്‍ കബാബിന്റേയും ചെത്തയിസിന്റേയും കാവയുടേയും കൂടി മണമാണ്.

Wednesday, September 1, 2010

ക്ലാസ്സ്മേറ്റ്‌സ്




വെള്ളിത്തിരയില്‍ നിറഞ്ഞാടുന്ന യുവത്വം പാടിത്തീര്‍ക്കുന്നു.
മതിയാവില്ലൊരുനാളിലും ഈ നല്ലൊരു നേരം
ഇനിയില്ലിതുപോലെ സുഖമറിയുന്നൊരു കാലം...

വീട്ടില്‍ പണിയൊതുക്കി, മകളുടെ കുട്ടിയെ അടുത്ത വീട്ടിലാക്കി, സൊറ പറഞ്ഞ്, കയറ്റം കയറി, വിശാലമായ കുന്നിന്‍പുറത്തെ വളര്‍ന്നുപൊങ്ങിയ പുല്ലുകള്‍ വകഞ്ഞുമാറ്റി, കംബ്ലാരി ഇ കെ നായനാര്‍ സ്മാരക വായനശാലയിലെ അക്ഷയ ക്ലാസ്സ് മുറിയില്‍ മൂവര്‍ സംഘമെത്തിയത് പഠിക്കാനാണ്- കംപ്യൂട്ടര്‍ പഠിക്കാന്‍! കണ്ണൂര്‍ ജില്ലയിലെ ശ്രീകണ്ഠപുരത്തിനു സമീപം വള്ള്യാട് പട്ടികവര്‍ഗ്ഗ കോളനിയിലെ 66 വയസ്സുകാരി എം ചിയ്യയിയും 60 വയസ്സുള്ള കിഴക്കെ പുരയില്‍ ജാനകിയും 52കാരി പെരിങ്കൊളവന്‍ നാരായണിയും ക്ലാസ്‌മേറ്റ്‌സാണ്. വെറും ക്ലാസ്സ്‌മേറ്റ്‌സല്ല- ഇ ക്ലാസ്‌മേറ്റ്‌സ്. മൂന്നു പേരും ഒരുമിച്ചാണ് കംപ്യൂട്ടര്‍ ക്ലാസ്സിനു പോയിരുന്നത്. മുമ്പൊരിക്കലും അവര്‍ പഠിക്കാന്‍ പോയിട്ടില്ല, സ്‌കൂളിലും കുടിപ്പള്ളിക്കൂടകത്തിലുമൊന്നും അവര്‍ പഠിച്ചിട്ടേയില്ല. പിന്നെ, ഇപ്പോഴെന്താണിങ്ങനെ!
ചീയ്യയിയുടേയും ജാനകിയുടേയും നാരായണിയുടേയും മക്കളൊക്കെ സ്‌കൂളിലും കോളെജിലും പോയിട്ടുണ്ട്. എന്നാല്‍ അവരാരും കംപ്യൂട്ടര്‍ പഠിച്ചിട്ടില്ല. അമ്മമാര്‍ക്കാകട്ടെ സ്‌കൂള്‍ വിദ്യാഭ്യാസം തീരെയില്ലെങ്കിലും മക്കളെ കവച്ചു വെക്കാന്‍ അവര്‍ കംപ്യൂട്ടര്‍ പഠിച്ചിട്ടുണ്ട്.

കംപ്യൂട്ടര്‍ കാണാനൊരു മോഹം
അമ്മമാര്‍ക്ക് ആദ്യമുണ്ടായിരുന്ന ആഗ്രഹം കംപ്യൂട്ടര്‍ കാണണമെന്നുമാത്രമായിരുന്നു. കംപ്യൂട്ടര്‍ പഠിക്കാന്‍ അമ്മയ്ക്ക് കണ്ണ് കാണില്ലെന്ന് മക്കള്‍ പറഞ്ഞ് കളിയാക്കി. അപ്പോള്‍ ചിയ്യയിക്ക് തോന്നിയത് കംപ്യൂട്ടര്‍ പഠിക്കാനല്ലല്ലോ കാണാനല്ലേ പോകുന്നത് എന്നായിരുന്നു. കംപ്യൂട്ടര്‍ കാണാനുള്ള ആഗ്രഹം പഠിക്കുന്നതിലേക്ക് വഴിമാറിയപ്പോള്‍ ഒരു ഗ്രാമം മുഴുവന്‍ കംപ്യൂട്ടര്‍ സാക്ഷരത കൈവരിച്ചു. അക്ഷയ പദ്ധതിക്കു കീഴില്‍ സമ്പൂര്‍ണ്ണ കംപ്യൂട്ടര്‍ സാക്ഷരത കൈവരിച്ച പഞ്ചായത്തായി കണ്ണൂര്‍ ജില്ലയിലെ ശ്രീകണ്ഠപുരം മാറി.
ജീവിതത്തില്‍ പേനയും പെന്‍സിലുമെടുത്ത് എഴിതിയിട്ടില്ലാത്ത ചീയ്യയിയും ജാനകിയും നാരായണിയുമെല്ലാം കീബോര്‍ഡും മൗസും ഉപയോഗിച്ച് സാക്ഷരരായി. എഴുതാനും വായിക്കാനും പഠിച്ചില്ലെങ്കിലും കംപ്യൂട്ടര്‍ എന്താണെന്ന സാമാന്യ വിവരം കിട്ടി. കംപ്യൂട്ടര്‍ കണ്ടപ്പോഴുള്ള ആഹ്ലാദം അത് പഠിക്കാനുള്ള ആഗ്രഹമായി മാറിയപ്പോള്‍ ചീയ്യയി മെല്ലെ മെല്ലെ കീബോര്‍ഡില്‍ വിരലുകളമര്‍ത്തി. മൗസ് ഉപയോഗിച്ച് കൈയ്യടക്കം വരുത്തി. പിന്നെ കംപ്യൂട്ടറിനെ ഇഷ്ടപ്പെട്ടു. കംപ്യൂട്ടറിനോട് സൗഹൃദം കാണിച്ചു. ഒടുവില്‍ കംപ്യൂട്ടറും ചിയ്യയിയോട് സൗഹൃദം കാണിച്ചു. അങ്ങനെ ചിയ്യയി കേരളത്തിന്റെ ചരിത്രത്തില്‍ ഇടം പിടിച്ചു. കേരളത്തെ സമ്പൂര്‍ണ്ണ സാക്ഷരതാ സംസ്ഥാനമായി പ്രഖ്യാപിച്ച മലപ്പുറത്തുകാരി ചേലക്കാടന്‍ ആയിഷയെ പോലെ ചിയ്യയിയും ചരിത്രമായി. കേരളത്തിലെ സമ്പൂര്‍ണ്ണ കംപ്യൂട്ടര്‍ സാക്ഷരത കൈവരിച്ച ആദ്യഗ്രാമപഞ്ചായത്തായി ശ്രീകണ്ഠപുരത്തെ പ്രഖ്യാപിച്ചത് ചിയ്യയി ആയിരുന്നു. സംസ്ഥാന ആരോഗ്യമന്ത്രി പി കെ ശ്രീമതിയും കെ സി ജോസഫ് എം എല്‍ എയും കേരള സ്റ്റേറ്റ് അക്ഷയ പ്രൊജക്ട് ഡയറക്ടര്‍ ടി കെ മന്‍സൂറും പിന്നെ നിരവധി പ്രസംഗകരും നിറഞ്ഞ വേദിയില്‍, തന്റെ നാട്ടുകാരായ ആയിരക്കണക്കിന് ആളുകള്‍ക്കു മുമ്പില്‍, ലോകത്തേക്ക് തുറന്നുവെച്ച ക്യാമറക്കണ്ണുകളെ സാക്ഷി നിര്‍ത്തി ചിയ്യയി പ്രസംഗിച്ചു: 'ബഹുമാനപ്പെട്ട അധ്യക്ഷന്‍ കെ സി ജോസഫ്, ആരോഗ്യമന്ത്രി പി കെ ശ്രീമതി ടീച്ചര്‍.......' സ്‌കൂളില്‍ പോയി പഠിച്ചിട്ടാല്ലത്തു പോലെ ചീയ്യയി അതിനു മുമ്പൊരിക്കലും സ്റ്റേജിലും കയറിയിരുന്നില്ല. മൈക്കിനു മുമ്പില്‍ നിന്നിരുന്നില്ല. എന്നിട്ടും ചിയ്യയി എന്ന പട്ടികവര്‍ഗ്ഗക്കാരിയായ അറുപത്തിയാറു വയസ്സുകാരി ചെറിയ വിറയലോടെ ലോകത്തോട് വിളിച്ചു പറഞ്ഞു. ഇതാ എന്റെ ഗ്രാമം കേരളത്തിലെ ആദ്യത്തെ സമ്പൂര്‍ണ്ണ കംപ്യൂട്ടര്‍ സാക്ഷരഗ്രാമമായിരിക്കുന്നു. അക്ഷയ അംബാസിഡര്‍ മമ്മൂട്ടി പറയുന്നതു പോലെ അക്ഷയ അറിവിന്റെ ജാലകം ഞങ്ങളിതാ തുറന്നിട്ടിരിക്കുന്നു.

കംപ്യൂട്ടറില്‍ മാങ്ങ പറിച്ചു, ജീവിതത്തില്‍ റബ്ബര്‍ പാലെടുത്തു
ശ്രീകണ്ഠപുരം ടൗണില്‍ നിന്നും കയറ്റവും ഇറക്കവുമുള്ള വഴികളിലൂടെ, മലയിലെ കുണ്ടും കുഴിയും നിറഞ്ഞ പാതകളിലൂടെ, ഇരുഭാഗത്തും കല്‍പണകളുള്ള മലമ്പാത ചെന്ന് ചേരുന്നത് പട്ടികവര്‍ഗ്ഗ കോളനികളിലാണ്. മാവിലന്‍ സമുദായ അംഗങ്ങള്‍ താമസിക്കുന്ന കംബ്ലാരിയും വള്ള്യാടുമാണ് ഇവിടുത്തെ കോളനികള്‍. അക്ഷയ പ്രഖ്യാപനം നടത്തിയ ചീയ്യയിയുടെ വീട് ചോദിച്ചപ്പോള്‍ മൂന്നുംകൂടിയ വഴിയിലെ ഹോട്ടലിലുള്ളവര്‍ കൂടെയൊരു പയ്യനെ അയച്ചു തന്നു. പത്താം ക്ലാസ്സില്‍ പഠനം നിര്‍ത്തി കൂലിപ്പണിക്കു പോകുന്ന പയ്യന്‍. അവന്റെ കൂടെ ടാറിട്ട റോഡിറങ്ങി, മഴക്കാലത്ത് വെള്ളമൊഴുകുന്നതും വേനലിലും മഴയിലും വഴിയായുപയോഗിക്കുന്നതുമായ കുഞ്ഞിടവഴിയിലൂടെ നടന്ന്, റബ്ബര്‍ മരങ്ങള്‍ക്കിടയിലെ തണുപ്പിലൂടെ കടന്ന് ചീയ്യയിയുടെ വീട്ടിലെത്തി. തണുത്ത അന്തരീക്ഷത്തിനു നടുവിലെ വീട്ടില്‍ കോരന്‍ മാത്രമാണ് അപ്പോഴുണ്ടായിരുന്നത്. കണ്ണിന് ഓപ്പറേഷന്‍ കഴിഞ്ഞതിനാല്‍ പണിക്കു പോകാനാകാതെ വീട്ടില്‍ വിശ്രമിക്കുന്ന കോരേട്ടന്‍ ചീയ്യയിയുടെ ഭര്‍ത്താവാണ്. കുറച്ചു കഴിഞ്ഞപ്പോള്‍ ചീയ്യയി വന്നു. റബ്ബര്‍ കറ പുരണ്ട മുണ്ടും മുഴുക്കൈയ്യന്‍ കുപ്പായവുമിട്ട്, കൈയ്യില്‍ റബ്ബര്‍ പാല്‍ ശേഖരിച്ച പാത്രവുമായാണ് അവരെത്തിയത്. കേരളത്തിലെ ആദ്യ സമ്പൂര്‍ണ്ണ ഗ്രാമ പ്രഖ്യാപനം നടത്തിയ ചീയ്യയിക്ക് പ്രഖ്യാപനം നടത്തിയ 2006 നവംബര്‍ 11ന് മുമ്പും ശേഷവും ഒരേ ഭാവം. വീട്ടിനകത്ത് കയറി വേഷം മാറി മുണ്ടും ബ്ലൗസും തോര്‍ത്തുമണിഞ്ഞെത്തിയ ചീയ്യയി കംപ്യൂട്ടര്‍ പഠിച്ചതിനെ കുറിച്ച് പറഞ്ഞു തുടങ്ങി.
'കംപ്യൂട്ട്‌റ്ന്ന് കേട്ട്‌ട്ടേയുള്ളു. നമ്മള് കണ്ട്ട്ടില്ലാലോ. അതോണ്ട് കാണണന്നു കരുതിയാ ആദ്യം പോയത്. വള്ള്യാട് അതുല്യ കുടുംബശ്രീയിലെ അംഗമായതിനാല്‍ കംപ്യൂട്ടര്‍ പടിക്കണംന്ന് പ്രസിഡന്റും സെക്രട്ടറിയും പറഞ്ഞപ്പോ അതങ്ങ് ചെയ്തു. ഇതുവരെ ഇസ്‌കൂളിലൊന്നും പോയിട്ട്ല്ലാലോ, അതോണ്ട് പേടിയായിരുന്നു. അക്ഷരങ്ങളൊന്നും അറിയില്ല. മണലെഴുത്ത് മാത്രാണ് പടിച്ചത്. എന്നാ കംപ്യൂട്ട്‌റ് പടിച്ചു തൊടങ്ങിയപ്പോ നല്ലരസം തോന്നി. ഞാനും ജാനകീം നാരായണീം കംപ്യൂട്ടറിന്റെ രസങ്ങള് പറഞ്ഞപ്പളാ കോളനീലെ മറ്റു പെണ്ണുങ്ങക്കും ഇത് പടിക്കണംന്ന് തോന്നിയത്. നമ്മള് കംപ്യൂട്ടറില്‍ മാങ്ങപറിച്ചു, നെല്ല് കോഴി തിന്നാതെയും കോഴീനെ കുറുക്കന്‍ പിടിക്കാതെയും വീട്ടിന്റകത്ത് എത്തിക്കാന്‍ പടിച്ചു, പൂക്കള മത്സരം, തോണി കടത്തല്‍, ഒറ്റ ഇരട്ട.... അങ്ങനെ കൊറേ പടിച്ചു. കംപ്യൂട്ടറില്‍ പേര് അടിക്കാന്‍ പടിപ്പിക്കുമ്പോ എനിക്ക് സുഖല്ലായിരുന്നു. അതോണ്ട് പടിക്കാന്‍ കഴിഞ്ഞില്ല. കളിച്ചും പടിച്ചും നാളുകള്‍ കഴിഞ്ഞ് കംപ്യൂട്ട്‌റ് പോയപ്പം സങ്കടം തോന്നി. പരിപാടിക്ക് പ്രസംഗിക്കണമെന്നു പറഞ്ഞപ്പം പേടിച്ചിരുന്നു. ഇതുവരെ സ്റ്റേജിലൊന്നും കാരീറ്റില്ലാലോ, അതോണ്ടായിരുന്നു പേടി. കംപ്യൂട്ടര്‍ തുടര്‍ന്ന് പടിക്കാന്‍ പഞ്ചായത്ത് എന്തെങ്കിലും ചെയ്തു തരുമായിരിക്കും. ഇത്രയധികം ബുദ്ധിമുട്ടി പടിച്ചതല്ലേ.' ചീയ്യേയിക്ക് പ്രതീക്ഷ.
'നമ്മളിത്രയൊന്നും പ്രതീക്ഷിച്ചില്ലാലോ. യുനെസ്‌ക്കോയുടെ ആളുകള് രണ്ട് പ്രാവശ്യം വന്നിരുന്നു. (എന്താണ് യുനസ്‌ക്കോയെന്ന് ചീയ്യയിക്ക് അറിയില്ല- അന്നും ഇന്നും!). ഡല്‍ഹിയില്‍ നിന്നും ഒരാള്‍ വന്നിരുന്നു. അക്ഷയയുടെ ഹമീദ്കുട്ടിയും പിന്നെ ടീച്ചറും നല്ല താത്പര്യമെടുത്തിരുന്നു.' (ടീച്ചറിന്റെ പേര് മറന്നുപോയി. മുസ്‌ലിമിന്റെ പേരായതുകൊണ്ട് അത്ര ഓര്‍മ്മയില്ലെന്ന് ചീയ്യയി).
ജാനകിക്കും കംപ്യൂട്ടറിനെ കുറിച്ച് പറയുമ്പോള്‍ അടുത്ത ബന്ധത്തിലെ ആരെയോ കുറിച്ച് പറയുന്നതു പോലെ. 'കംപ്യൂട്ടര്‍ പടിക്കാന്‍ തുടങ്ങിയപ്പോള്‍ വിഷമമായിരുന്നു. അതു പോയപ്പോഴും വിഷമമായി. ഇനിയും പടിക്കണമെന്നുണ്ട്.' മുഖം നിറയെ ചിരിച്ചുകൊണ്ടാണ് ജാനകിയുടെ സംസാരം. മൗസ്, കീബോര്‍ഡ്, മോണിറ്റര്‍, സി ഡി, ഫ്‌ളോപ്പി.... ഇതില്‍ കുറേ പേരുകള്‍ ഓര്‍മ്മയുണ്ട്. 'വളഞ്ഞ പേരുകള്‍' മറന്നുപോയത്രെ.
'ചേച്ചിമാരെ ഒരു കാര്യം ചോദിച്ചോട്ടെ, കംപ്യൂട്ടര്‍ പഠിച്ചല്ലോ, ശരിക്കും സ്‌കൂളില്‍ പോകാന്‍ തോന്നുന്നുണ്ടോ?' ചോദ്യം കേട്ടപ്പോള്‍ ചീയ്യയിയും ജാനകിയും ഒരുമിച്ച് ഉത്തരം പറഞ്ഞു. 'അയ്യോ, ഇസ്‌കൂളി പോകാന്‍ തോന്നുന്നുണ്ടോന്നോ..?'
കംബ്ലാരിയിലെ ഇ കെ നായനാര്‍ സ്മാരക വായനശാലയില്‍ അക്ഷയ പദ്ധതിയുടെ ഭാഗമായി കുറച്ചു കാലം കൂടി കംപ്യൂട്ടര്‍ ഉണ്ടായിരുന്നെങ്കില്‍ ഇനിയും പഠിക്കാമായിരുന്നത്രെ അവര്‍ക്ക്. സ്‌കൂളിലും കോളെജിലും പഠിച്ചിരുന്ന കാലം ഓര്‍മ്മിക്കാന്‍ യുവതലമുറയ്ക്ക് ഓട്ടോഗ്രാഫുകളുണ്ടായിരുന്നു. അതു മറിച്ചു നോക്കി പഴയ കാര്യങ്ങള്‍ ചുണ്ടിലൊരു നേരിയ ചിരിയോടെ ഓര്‍ത്തെടുക്കാമായിരുന്നു. ചീയ്യയിക്കും ജാനകിക്കും നാരായണിക്കുമൊന്നും അക്ഷയയില്‍ പഠിച്ചതിന് ഓട്ടോഗ്രാഫില്ലല്ലോ. അവര്‍ കുടുംബശ്രീ യോഗത്തിന് ഒത്തുകൂടുമ്പോള്‍ പഴയ കംപ്യൂട്ടര്‍ ക്ലാസ്സിലെ രസം പറയും. കിണറ്റിന്‍ കരയിലെ പരദൂഷണ സദസ്സിലും കുളിക്കടവിലേയും അലക്കുനേരത്തേയും വാചകമടിയിലും അവരുടെ നാവില്‍ കംപ്യൂട്ടറാണ് വരിക. അവരുടെ മനസ്സിലും ചിന്തയിലും നിറയെ ഇപ്പോള്‍ കംപ്യൂട്ടറാണ്. പണ്ടെന്നോ അനുഭവിക്കാതെ നഷ്ടപ്പെട്ടു പോയ വിദ്യാലയക്കാലം കുറച്ചുനാളെങ്കിലും തിരിച്ചു നല്കിയത് കംപ്യൂട്ടറായിരുന്നല്ലോ.

പഠന കാലത്തിന്റെ ആഹ്ലാദത്തില്‍ വെള്ളിത്തിരയിലെ യുവത്വം ആടിപ്പാടി മറയും. യഥാര്‍ഥത്തില്‍ ചില ജീവിതങ്ങളുണ്ട്, തങ്ങളുടെ ഏതാനും ദിവസത്തെ പഠനം ബാക്കിയുള്ള കാലത്തേക്ക് മുഴുവനുള്ള ഊര്‍ജ്ജ പ്രസരണ സ്വപ്നങ്ങളായി നിലനിര്‍ത്തുന്ന ചില ജീവിതങ്ങള്‍. അവയാണ് ചീയ്യയിയുടേയും ജാനകിയുടേയും നാരായണിയുടേയുമക്കെ.

കാണാതൊരു കിളിയെങ്ങോ കൊഞ്ചുന്നതു പോലെ
കണ്ണീരിനു കൈപ്പില്ലെന്നറിയുന്നതുപോലെ
പുതുമഴയുടെ കൊലുസിളകിയ കനവുകളുടെ പദചലനം.

ചിത്രങ്ങള്‍: എം വി സുമേഷ്‌

Sunday, August 29, 2010

മുത്തങ്ങയില്‍ നിന്ന് വെള്ളാരങ്കുന്നിലേക്കുള്ള ദൂരം

എളുപ്പത്തില്‍ ഉത്തരം പറയാനാണെങ്കില്‍ ചോദ്യം ഇതാണ് - വയനാട്ടിലെ മുത്തങ്ങയില്‍ നിന്നും വെള്ളാരങ്കുന്നിലേക്ക് എത്രദൂരമുണ്ടാകും? റോഡ് മാര്‍ഗ്ഗമാണെങ്കില്‍ അന്‍പത് കിലോമീറ്ററില്‍ താഴെ എന്ന് ഒറ്റവാക്കില്‍ പറഞ്ഞൊഴിയാം. അത് വയനാടിന്റെ ഭൂമിശാസ്ത്രം അറിയുന്നവര്‍ക്ക് മാത്രം. എന്നാല്‍ കേരളത്തിന്റെ രാഷ്ട്രീയ പശ്ചാതലം അറിയുന്നവര്‍ക്ക് യഥാര്‍ഥത്തില്‍ മുത്തങ്ങ വനഭൂമിയില്‍ നിന്നും കല്പറ്റ നഗരത്തിലെ വെള്ളാരങ്കുന്നിലേക്കുള്ള ദൂരം അത്രയൊന്നുമല്ല.
1992- 93 കാലത്ത് മുത്തങ്ങ വനഭൂമിയില്‍ അവകാശം സ്ഥാപിച്ച സി കെ ജാനുവിന്റേയും എം ഗീതാനന്ദന്റേയും ആദിവാസി ഗോത്രമഹാസഭയുടെ പ്രവര്‍ത്തനങ്ങളില്‍ നിന്നും പ്രചോദനമുള്‍ക്കൊണ്ടാണ് 2010ല്‍ സി പി എമ്മിന്റെ നേതൃത്വത്തിലുള്ള ആദിവാസി ക്ഷേമ സമിതി പ്രവര്‍ത്തകര്‍ വെള്ളാരങ്കുന്നില്‍ അവകാശം സ്ഥാപിച്ചത്. ആദ്യത്തേത് കൊടുവനംമാണെങ്കില്‍ രണ്ടാമത്തേത് നഗരത്തിനു സമീപത്തെ 'കുഞ്ഞുമല'യാണെന്ന് മാത്രം. മുത്തങ്ങയുടെ അവകാശികള്‍ സര്‍ക്കാരും വനം വകുപ്പുമാണെങ്കില്‍ വെള്ളാരങ്കുന്നിന് മുദ്രക്കടലാസില്‍ പേരുള്ള ഉടമസ്ഥരുണ്ട്.
വയനാട്ടിലെ ആദിവാസികളായ ആദിവാസികള്‍ മുഴുവന്‍ മണ്ണും വീടും കിട്ടുമെന്ന് കരുതി സി കെ ജാനുവിനോടൊപ്പം പോയ്ക്കളയുമെന്ന ഭയംകൊണ്ടാണ് സി പി എം ആദിവാസി ക്ഷേമ സമിതി രൂപപ്പെടുത്തിയത്. ജാനു മുത്തങ്ങയില്‍ തോറ്റപ്പോള്‍ കുറേ ആദിവാസികളെ ചേര്‍ത്ത് സി പി എം വയനാട്ടിന്റെ വിവിധ ഭാഗങ്ങളില്‍ അതേരീതിയില്‍ കയ്യേറ്റം നടത്തിയിരുന്നു. അതിന്റെയെല്ലാം അവസ്ഥ ഇപ്പോള്‍ എന്താണെന്ന് അറിയണമെങ്കില്‍ ആദിവാസി ക്ഷേമ സമിതിയുടെ പഴയകാല നേതാക്കളോട് തന്നെ ചോദിക്കേണ്ടി വരും.
സി കെ ജാനുവും സംഘവും മുത്തങ്ങ കയ്യേറുമ്പോള്‍ സെക്രട്ടറിയേറ്റിന്റെ ചക്രം തിരിച്ചുകൊണ്ടിരുന്നത് ഇന്നത്തെ കേന്ദ്ര പ്രതിരോധ മന്ത്രിയായ എ കെ ആന്റണിയായിരുന്നു. അന്ന് കേരളത്തിന്റെ പ്രതിപക്ഷ നേതാവ് ഇന്നത്തെ മുഖ്യമന്ത്രിയായ സഖാവ് വി എസ് അച്യുതാനന്ദനും. ഭരണകക്ഷിയായ യു ഡി എഫിനോടൊ പ്രതിപക്ഷ കക്ഷിയായ എല്‍ ഡി എഫിനോടൊ അക്കാലത്ത് സി കെ ജാനുവിന് യാതൊരു അനുകൂല മനസ്ഥിതിയുമുണ്ടായിരുന്നില്ല. അതുകൊണ്ട് മുത്തങ്ങയല്ല, അതിനേക്കാള്‍ കൊടും വനമുണ്ടെങ്കില്‍ അവിടേയും കയ്യേറി അധികാരം സ്ഥാപിക്കാന്‍ സി കെ ജാനുവും എം ഗീതാനന്ദനും ശ്രീരാമന്‍ കൊയ്യോനും നയിച്ച ആദിവാസി ഗോത്രമഹാസഭയ്ക്ക് യാതൊരു ബുദ്ധിമുട്ടുമുണ്ടായിരുന്നില്ല. അവരുടെ ആവശ്യം ആദിവാസികള്‍ക്ക് ഭൂമി കിട്ടുക എന്നതു മാത്രമായിരുന്നു.
എന്നാല്‍ വെള്ളാരങ്കുന്നില്‍ കയ്യേറ്റം നടത്തുമ്പോള്‍ ആദിവാസി ക്ഷേമ സമിതി എന്ന സംഘടനയ്ക്ക് സി പി എമ്മുമായി തീര്‍ത്തും വിധേയത്വമുണ്ടെന്ന് മാത്രമല്ല, സെക്രട്ടറിയേറ്റ് തിരിയുന്നതു പോലും അവരുടെ നേതാക്കളുടെ ഇച്ഛയ്ക്കനുസരണമാണ് എന്ന അനുകൂല ഘടകവുമുണ്ട്. അതുകൊണ്ടുതന്നെ ഭൂമി കൈയ്യേറിയാല്‍ എളുപ്പത്തിലല്ലെങ്കിലും തങ്ങള്‍ക്ക് പകരം ഭൂമി കിട്ടുമെന്ന് ആദിവാസി ക്ഷേമ സമിതിയുടെ നേതാക്കള്‍ക്ക് നന്നായി അറിയാമായിരുന്നു. അല്ലെങ്കില്‍ സി പി എം നേതാക്കള്‍ അവരെ ധരിപ്പിച്ചിരുന്നു. ഭൂമി കിട്ടാനാണെങ്കില്‍ കൊമ്പനാനകള്‍ വിഹരിക്കുന്ന മുത്തങ്ങ വനത്തിനു പകരം നഗര സൗകര്യങ്ങളെല്ലാമുള്ള വെള്ളാരങ്കുന്ന് ആകട്ടെയെന്ന് കരുതിയതില്‍ തെറ്റില്ല.
സമര ഭൂമിയില്‍ ദിനങ്ങള്‍ കഴിയുന്നതിനിടയിലാണ് ആഗസ്ത് 31ന് മുമ്പ് കയ്യേറ്റക്കാരെ ഒഴിപ്പിക്കണമെന്ന് കോടതി നിര്‍ദ്ദേശം നല്കുന്നത്. സര്‍ക്കാറിനെ സംബന്ധിച്ചിടത്തോളം അത് താങ്ങാവുന്നതിന് അപ്പുറത്തുള്ള വിധിയായിരുന്നു. ഭരിക്കുന്ന പാര്‍ട്ടിയുടെ പോഷക സംഘടന നടത്തുന്ന സമരത്തെ അതേ ഭരണക്കാരുടെ പൊലീസ് എടുത്തെറിയുക എന്നുപറഞ്ഞാല്‍ അത് സങ്കല്‍പ്പിക്കാവുന്നതിന് അപ്പുറമാണ്. മുത്തങ്ങയിലേതുപൊലെ വെടിവെപ്പു പോലും ഉണ്ടായേക്കാവുന്ന സന്ദര്‍ഭമാണത്. എതിര്‍ഭാഗത്ത് പൊലീസാണെന്ന് കണ്ടാല്‍ സി പി എം പ്രവര്‍ത്തകര്‍ക്ക് അത് തങ്ങളുടെ പൊലീസാണെന്ന കാര്യം മറന്നു പോകും. അങ്ങനെയൊരു അവസ്ഥയുണ്ടായാല്‍ മുത്തങ്ങയില്‍ ആദിവാസിയായ ജോഗിയും പൊലീസുകാരന്‍ വിനോദുമാണ് കൊല്ലപ്പെട്ടതെങ്കില്‍ വെള്ളാരങ്കുന്നില്‍ അവസ്ഥ വേറെയാകും. അങ്ങനെയാണെങ്കില്‍ മുത്തങ്ങയെ കുറിച്ച് വാതോരാതെ പറഞ്ഞതു മുഴുവന്‍ ഇല്ലാതായിപ്പോകും. എങ്കില്‍ ഇത് പരിഹരിക്കാന്‍ എന്തുണ്ട് വഴി? സി പി എമ്മല്ലേ പാര്‍ട്ടി, ബുദ്ധി കൂടിപ്പോയ പ്രശ്‌നമല്ലേ ഉണ്ടാകൂ.
പഴയ പ്രതിപക്ഷ നേതാവ് വി എസ് അച്യുതാനന്ദന്‍ മുഖ്യമന്ത്രിയായി ഭരണം നടത്തുമ്പോള്‍ പഴയ യു ഡി എഫ് സര്‍ക്കാറിനെ എതിര്‍ത്തതില്‍ ഇനിയൊരു ആദിവാസി വെടിവെപ്പ് മാത്രമേ നടക്കാന്‍ ബാക്കിയുള്ളു. ബാക്കിയെല്ലാം പലിശയും പിഴപ്പലിശയും കൂട്ടുപലിശയും ചേര്‍ത്ത് നടന്നു കഴിഞ്ഞു. എ കെ ആന്റണിയേയും ഉമ്മന്‍ചാണ്ടിയേയും വിമര്‍ശിച്ച എല്ലാകാര്യങ്ങളും അച്യുതാനന്ദന്‍ സഖാവ് ഒറ്റക്ക് തന്നെ ചെയ്തു തീര്‍ത്തു. കൂടെയുള്ള മന്ത്രിമാര്‍ തങ്ങളാലാവും വിധം ചീത്തപ്പേര് പിന്നേയും മോശമാക്കിയിട്ടുണ്ട്. അത്തരമൊരു അവസരത്തിലാണ് തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പു കൂടി വരുന്നത്. ഇനി വെളുക്കാന്‍ തേച്ചത് പാണ്ഡ് മാത്രമല്ല, വെള്ള പെയിന്റ് ഉണ്ടാക്കാനുള്ള മെഷീന്‍ തന്നെയാകേണ്ടെന്ന് സി പി എം കരുതിയതിന്റെ ഫലമാണ് ആദിവാസി ക്ഷേമ സമിതി നേതാക്കളുമായി നടത്തുന്ന ചര്‍ച്ച.
മുഖ്യമന്ത്രിയുടെ പ്രസ്താവനയിലൂടെ ഒരു മാന്യമായ സമരമൊഴിപ്പിക്കലാണ് നിലവില്‍ സി പി എം ആഗ്രഹിക്കുന്നത്. മൂന്ന് മാസത്തിനുള്ളില്‍ ഭൂമിയില്ലാത്ത ആദിവാസികള്‍ക്ക് ഭൂമി നല്‍കുമെന്നാണ് മുഖ്യമന്ത്രി പറയുന്നത്. മുഖ്യമന്ത്രിക്കും സി പി എമ്മിനും ആദിവാസി ക്ഷേമ സമിതിക്കും അറിയാം, ഇനി വരാനിരിക്കുന്നത് തദ്ദേശ സ്വയം ഭരണ സ്ഥാപനങ്ങളിലേക്കുള്ള തെരഞ്ഞെടുപ്പാണ്. അതിന്റെ പേരില്‍ രണ്ടുമാസങ്ങള്‍ കഴിഞ്ഞു പോകും. പിന്നെയുള്ള ഒരു മാസക്കാലം എന്തെങ്കിലും തട്ടും തരികിടയും പറഞ്ഞ് ഒഴിഞ്ഞു നില്‍ക്കാം. ഒന്നു തട്ടിയും മുട്ടിയും നിന്നാല്‍ ഭരണം അവസാനിക്കാറാകുമ്പോഴേക്കും ഭൂമി വിതരണത്തിനുള്ള നടപടികള്‍ തുടങ്ങി വെക്കുകയോ, അസംബ്ലി തെരഞ്ഞെടുപ്പിന്റെ പേരില്‍ അടുത്ത മന്ത്രിസഭയിലേക്ക് തട്ടുകയോ ചെയ്യാം. അങ്ങനെയെങ്കില്‍ അടുത്ത വര്‍ഷം മറ്റൊരു സമരത്തിനുള്ള വകുപ്പുമായി. കയ്യേറ്റക്കാര്‍ ഇപ്പോള്‍ ഭൂമി ഒഴിഞ്ഞില്ലെങ്കില്‍ കോടതി ഉത്തരവ് പ്രകാരം ബലമായി ഒഴിപ്പിക്കേണ്ടി വരുന്നതിനേക്കാള്‍ നല്ലത് പറഞ്ഞത് പറ്റിക്കുന്നതു തന്നെ!
അപ്പോള്‍ ഇനിയാണ് തുടക്കത്തില്‍ ചോദിച്ച ചോദ്യത്തിന് ഉത്തരം ആവശ്യമുള്ളത്. ശരിക്കും മുത്തങ്ങയില്‍ നിന്നും വെള്ളാരങ്കുന്നിലേക്ക് എത്രദൂരമുണ്ട്.

*************************************************************************************

ജഗതി ശ്രീകുമാറിന്റെ തീരുമാനം അഭിനന്ദനാര്‍ഹമാണ്. സിക്കിം, ഭൂട്ടാന്‍ സംസ്ഥാന ലോട്ടറികളുടെ പരസ്യത്തില്‍ നിന്നും പിന്മാറുകയാണെന്ന അദ്ദേഹത്തിന്റെ തീരുമാനത്തിന് പിന്നില്‍ മുഖ്യമന്ത്രി വി എസ് അച്യുതാനന്ദന്റെ വാക്കുകളാണെന്ന് പറയാനും ജഗതി മറന്നില്ല. പണത്തിന് വേണ്ടി മാത്രമായിരുന്നു താന്‍ ലോട്ടറി പരസ്യത്തില്‍ അഭിനയിച്ചതെന്നും വളരെ ഗുരുതരമായ സ്ഥിതിവിശേഷമാണ് അന്യ സംസ്ഥാന ലോട്ടറികള്‍ കേരളത്തിലുണ്ടാക്കുന്നതെന്ന് തനിക്കറിയില്ലെന്നും അദ്ദേഹം തുറന്നു പറഞ്ഞു. ഒപ്പം, ഒരു വരികൂടി ജഗതി കൂട്ടിച്ചേര്‍ത്തു. തന്നെപ്പോലുള്ളവര്‍ പരസ്യങ്ങളില്‍ അഭിനയിക്കുമ്പോള്‍ പണം മാത്രമല്ല, അത്തരം പരസ്യങ്ങളുടെ വിശ്വാസ്യതയും സമൂഹത്തിലുണ്ടാക്കുന്ന ഫലങ്ങളും കൂടി പരിഗണിക്കണമെന്നും അദ്ദേഹം ചൂണ്ടിക്കാട്ടി. തന്റെ സഹപ്രവര്‍ത്തകരും ഇക്കാര്യം ശ്രദ്ധിക്കണമെന്ന് ജഗതി ആവശ്യപ്പെട്ടിട്ടുണ്ട്.
സ്ത്രീ പീഡന കേസില്‍ ആരോപണം ഉയര്‍ന്നതിനെ തുടര്‍ന്ന് ഒരു പരിപാടിയില്‍ ജഗതി ശ്രീകുമാറിനെ ആദരിക്കുന്ന ചടങ്ങില്‍ നിന്നും വിട്ടുനിന്നയാളാണ് മുഖ്യമന്ത്രി വി എസ് അച്യുതാനന്ദന്‍. മലയാള സിനിമയില്‍ മമ്മൂട്ടിയും മോഹന്‍ലാലും കഴിഞ്ഞാല്‍ ഏറ്റവും കൂടുതല്‍ ആരാധകരുള്ള താരം ഒരുപക്ഷെ ജഗതി ശ്രീകുമാറായിരിക്കും. ഹാസ്യമായാലും ഗൗരവമായാലും അതിനുമപ്പുറം ഏത് വേഷത്തിലായാലും തന്റേതായ ഒരു ടച്ച് നല്കാന്‍ മിടുക്കനാണ് ജഗതി ശ്രീകുമാര്‍. 'സൂപ്പര്‍ സ്റ്റാര്‍ സരോജ് കുമാറിനെ' നവരസവും അഭിനയവും പഠിപ്പിക്കാനെത്തുന്ന അധ്യാപകന്‍ മാത്രം മതി ജഗതിയിലെ പ്രതിഭയെ തിരിച്ചറിയാന്‍. എന്നിട്ടും ഒരു കേസിന്റെ പേരില്‍ മുഖ്യമന്ത്രി ജഗതിക്കെതിരെ തിരിഞ്ഞപ്പോള്‍ അതിലെ ന്യായങ്ങളും അന്യായങ്ങളും ഏറെയൊന്നും ചര്‍ച്ച ചെയ്യപ്പെട്ടില്ല. ഒരു ചോദ്യം മാത്രമായിരുന്നു ഉയര്‍ന്നിരുന്നത്. മികച്ച നടനുള്ള പുരസ്‌ക്കാരം ജഗതിക്ക് കിട്ടിയിരുന്നെങ്കില്‍ മുഖ്യമന്ത്രി അവാര്‍ഡ് നല്കുമായിരുന്നില്ലേ എന്ന്. ഭാഗ്യമോ നിര്‍ഭാഗ്യമോ കഴിഞ്ഞ രണ്ടോ മൂന്നോ വര്‍ഷങ്ങള്‍ക്കിടയില്‍ ജഗതിക്ക് മികച്ച നടനുള്ള പുരസ്‌ക്കാരം നേടാനായില്ല.
അങ്ങനെയാണ് ലോട്ടറി വിവാദത്തില്‍ മുഖ്യമന്ത്രിയുടെ പ്രസ്താവനയ്ക്ക് അടിവരയിട്ട് തന്റെ പ്രവര്‍ത്തനം വിലയിരുത്താന്‍ ജഗതി ഒരുമ്പെട്ടത്. അത് തുറന്നു പറയാനും അദ്ദേഹം മടി കാട്ടിയില്ല. വി എസ് അച്യുതാനന്ദന്‍ ലോട്ടറിക്കെതിരെ നടത്തിയ പ്രസ്താവന കേരളീയ മനഃസാക്ഷിയില്‍ ഉയര്‍ത്തിയ ചോദ്യം ജഗതി ശ്രീകുമാര്‍ കുറച്ചുകൂടി ശക്തമാക്കി. എന്തായാലും സമൂഹം ആദരിക്കുന്ന ഒരു കലാകാരന്‍ എന്ന നിലയില്‍ തീര്‍ത്തും ഉത്തമമായ നിലപാടാണ് ജഗതിയില്‍ നിന്നും ഉണ്ടായത്. സ്ത്രീ പീഡനക്കേസില്‍ ജഗതിയെ വിമര്‍ശിച്ച മുഖ്യമന്ത്രി ലോട്ടറി നിലപാടില്‍ ജഗതിയെ അഭിനന്ദിക്കുക കൂടി ചെയ്തിരുന്നെങ്കില്‍ കാര്യങ്ങള്‍ കുറച്ചുകൂടി മികച്ചതായേനേ

Tuesday, August 24, 2010

ഞാന്‍ എന്തുകൊണ്ട് ഹിന്ദുവല്ല



ഹൈദരബാദ് സര്‍വ്വകലാശാലയിലെ പൊളിറ്റിക്കല്‍ സയന്‍സ് വിഭാഗം ചെയര്‍മാനാണ് സോഷ്യല്‍ ആക്ടിവിസ്റ്റും എഴുത്തുകാരനുമായ കാഞ്ച ഐലയ്യ. ഇന്ത്യന്‍ ജാതി സമ്പ്രദായത്തിനെതിരെ ആശയസമരം നടത്താന്‍ മുന്‍പന്തിയിലുള്ള കാഞ്ച ഐലയ്യ ഹിന്ദുത്വത്തിനെതിരെയുള്ള സമര പോരാട്ടങ്ങളില്‍ മുന്‍പന്തിയില്‍ നില്‍ക്കുന്നുവെന്ന പേരിലാണ് ഏറെ അറിയപ്പെടുന്നത്. 1952 ഒക്‌ടോബര്‍ അഞ്ചിന് ആന്ധ്രപ്രദേശിലെ വാറങ്കല്‍ ജില്ലയിലെ പപ്പയ്യാപ്പേട്ട് ഗ്രാമത്തില്‍ കുറുമ ഗൊല്ലയെന്ന പിന്നാക്ക വിഭാഗത്തില്‍ ജനിച്ച അദ്ദേഹത്തിന്റെ കുടുംബ തൊഴില്‍ ആടിനെ മേയ്ക്കലായിരുന്നു. സംവരണാടിസ്ഥാനത്തില്‍ സീറ്റ് ലഭിച്ചതുകൊണ്ടുമാത്രമാണ് കാഞ്ച ഐലയ്യക്ക് പഠനം തുടരാനായത്. ബിരുദതലം വരെ തെലുങ്ക് മീഡിയത്തിലായിരുന്നു പഠനം.
1985ല്‍ ആന്ധ്രയിലെ മഹാബുബ്‌നഗര്‍ ജില്ലയില്‍ ദാരിദ്ര്യത്തെ തുടര്‍ന്ന് പട്ടിണി മരണമുണ്ടായപ്പോള്‍ അദ്ദേഹം സൗജന്യ ഭക്ഷണശാലകള്‍ ആരംഭിച്ചു. പട്ടിണിപ്പാവങ്ങള്‍ക്കു വേണ്ടിയുള്ള ഭക്ഷണശാലകളിലൂടെ ജാതീയതക്കും ദലിത് പിന്നാക്കാവസ്ഥക്കുമെതിരെ പ്രചരണം നടത്തി. കഴിഞ്ഞ കാല്‍ നൂറ്റാണ്ടിലേറെയായി ഡോ. കാഞ്ച ഐലയ്യ ഇന്ത്യയിലെ തൊട്ടുകൂടായ്മയ്ക്കും ജാതീയതയ്ക്കും നിരക്ഷരതക്കുമെതിരെ പൊരുതുകയാണ്.
ഹൈദരബാദ് ഉസ്മാനിയ സര്‍വ്വകലാശാലയില്‍ നിന്നും പൊളിറ്റിക്കല്‍ സയന്‍സില്‍ ഡോക്ടറേറ്റ് നേടിയ അദ്ദേഹത്തിന്റെ പി എച്ച് ഡി തീസിസ് ഗൗതമ ബുദ്ധന്റെ പൊളിറ്റിക്കല്‍ ഫിലോസഫിയെ കുറിച്ചായിരുന്നു. ദലിത് ബഹുജന പ്രസ്ഥാനത്തിന്റെ മുന്‍നിരയില്‍ പ്രവര്‍ത്തിക്കുന്ന കാഞ്ച ഐലയ്യ, ഡോ. ജോസഫ് ഡിസൂസയുടെ നേതൃത്വത്തിലുള്ള ആള്‍ ഇന്ത്യ ക്രിസ്ത്യന്‍ കൗണ്‍സിലുമായി ചേര്‍ന്നും പ്രവര്‍ത്തിക്കുന്നുണ്ട്. അമേരിക്ക കേന്ദ്രമായി പ്രവര്‍ത്തിക്കുന്ന ദലിദ് ഫ്രീഡം നെറ്റ്‌വര്‍ക്കുമായും ചേര്‍ന്ന് പ്രവര്‍ത്തിക്കുന്നുണ്ട് കാഞ്ച. അദ്ദേഹത്തിന്റെ പുസ്തകങ്ങള്‍ പ്രചരിപ്പിക്കുന്നതില്‍ മുന്‍പന്തിയിലുള്ള ദലിത് ഫ്രീഡം നെറ്റ്‌വര്‍ക്കാണ്. നിരവധി പുസ്തകങ്ങളുടെ കര്‍ത്താവായ കാഞ്ച ഐലയ്യ ദിനപത്രങ്ങളിലും ആനുകാലികങ്ങളിലും തുടര്‍ച്ചയായി ലേഖനങ്ങളും പ്രസിദ്ധീകരിക്കാറുണ്ട്. ദലിത് ബഹുജന കാഴ്ചപ്പാടില്‍ നിന്നുകൊണ്ട് ഹിന്ദുത്വത്തിനെതിരെ എഴുതിയ 'ഞാന്‍ എന്തുകൊണ്ട് ഹിന്ദുവല്ല' എന്ന 1996ല്‍ പ്രസിദ്ധീകരിച്ച പുസ്തകം ബെസ്റ്റ് സെല്ലറായിരുന്നു. ഗോഡ് ആസ് പൊളിറ്റിക്കല്‍ ഫിലോസഫര്‍: ബുദ്ധാസ് ചാലഞ്ച് ടു ബ്രാഹ്മണിസം, എ ഹോളോ ഷെല്‍, ദി സ്റ്റേറ്റ് ആന്റ് റിപ്രസ്സീവ് കള്‍ച്ചര്‍, മനതത്വം (ഞങ്ങളുടെ തത്വചിന്ത-തെലുങ്ക്), ബഫലോ നാഷണലിസം: എ ക്രിട്ടിക്ക് ഓഫ് സ്പിരിച്യുല്‍ ഫാഷിസം എന്നിവയാണ് അദ്ദേഹത്തിന്റെ മറ്റു കൃതികള്‍.

കാഞ്ച ഐലയ്യയുടെ പുസ്തകം ഞാന്‍ എന്തുകൊണ്ട് ഹിന്ദുവല്ല ചിത്രീകരിക്കുന്നത് ദലിതുകളുടേയും മറ്റു പിന്നാക്ക വിഭാഗങ്ങളുടേയും ജീവിതാനുഭവങ്ങളുടെ പശ്ചാതലത്തിലാണ്. അനുമോദനങ്ങള്‍ പോലെ നിരവധി പ്രതികൂല അഭിപ്രായങ്ങളും നേടിയ പുസ്തകമാണ് ഞാന്‍ എന്തുകൊണ്ട് ഹിന്ദുവല്ല.
താന്‍ ഏറെ അനുഭവിച്ച ജാതി സമ്പ്രദായങ്ങള്‍ക്കെതിരേ ശക്തമായ പോരാട്ടത്തിന്റെ പാതയിലാണ് കാഞ്ച. ചണ്ടാളന്മാരും ആദിവാസികളും ഹിന്ദു വിഭാഗത്തില്‍പ്പെടുന്നില്ലെന്ന് വാദിക്കുന്ന കാഞ്ച തന്റെ രക്ഷിതാക്കളോ മറ്റു പിന്നാക്ക ജാതിയില്‍പെടുന്നവരോ ഹിന്ദുക്കളാണെന്ന് കരുതിയിരുന്നില്ലെന്നും പറയുന്നുണ്ട്.
ആഗസ്ത് 25ന് ഹൈദരബാദിലെ ആന്ധ്രപ്രദേശ് സെക്രട്ടറിയേറ്റിന് സമീപത്തെ ലുംബിനി പാര്‍ക്കിലെ ഓപ്പണ്‍ ഓഡിറ്റോറിയത്തിലും കോത്തി പ്രദേശത്തെ ഗോകുല്‍ ചാറ്റ് ഷോപ്പിലും സ്‌ഫോടനങ്ങള്‍ നടക്കുമ്പോള്‍ കാഞ്ച ഐലയ്യ തലശ്ശേരിയിലായിരുന്നു. അക്കാദമി ഫോര്‍ സ്റ്റഡീസ് ആന്റ് റിസര്‍ച്ചിന്റെ ആഭിമുഖ്യത്തില്‍ നടത്തിയ ഇസ്‌ലാമിക് സെമിനാറില്‍ പങ്കെടുക്കാന്‍ എത്തിയതായിരുന്നു അദ്ദേഹം. ഹൈദരബാദ് സ്‌ഫോടനങ്ങളുടെ പശ്ചാതലത്തില്‍ 2007 ആഗസ്ത് 26ന് വര്‍ത്തമാനത്തിന് അനുവദിച്ച അഭിമുഖത്തില്‍ നിന്ന്:

? തുടക്കം ഹൈദരബാദ് സ്‌ഫോടനങ്ങളെ കുറിച്ച് തന്നെയാകട്ടെ. സ്‌ഫോടനങ്ങളെ കുറിച്ച് താങ്കളുടെ അഭിപ്രായമെന്താണ്?
= ഹൈദരബാദ് സ്‌ഫോടനങ്ങള്‍ നിര്‍ഭാഗ്യകരമായിപ്പോയി. ഹൈദരബാദില്‍ നടക്കുന്ന രണ്ടാമത്തെ സ്‌ഫോടനമാണിത്. നേരത്തെ ബി ജെ പി ഭരണകാലത്തും ഇവിടെ സ്‌ഫോടനമുണ്ടായിരുന്നു.

? മക്കാ മസ്ജിദിലും സ്‌ഫോടനമുണ്ടായിരുന്നല്ലോ. അതിനു പിന്നിലും മുസ്‌ലിം തീവ്രവാദി സംഘടനകളാണെന്നാണ് പറയപ്പെടുന്നത്.
= നേരത്തെ മക്കാ മസ്ജിദില്‍ ബോംബ് വെച്ചത് മുസ്‌ലിംകളാണെന്ന് വിശ്വസിക്കാന്‍ പ്രയാസമുണ്ട്. കാരണം, കേരളത്തിലേതു പോലെയല്ല ഹൈദരബാദിലേയോ മറ്റ് ഇന്ത്യന്‍ സംസ്ഥാനങ്ങളിലേയോ മുസ്‌ലിംകളുടെ അവസ്ഥ. അവിടുത്തുകാര്‍ കേരളത്തിലെ മുസ്‌ലിംകളേക്കാള്‍ കടുത്ത യാഥാസ്ഥിതികരാണ്. അതുകൊണ്ട് തന്നെ മസ്ജിദില്‍ സ്‌ഫോടനം നടത്തുമെന്ന് വിശ്വസിക്കാന്‍ പ്രയാസമുണ്ട്. മക്കാ മസ്ജിദില്‍ സ്‌ഫോടനമുണ്ടായപ്പോള്‍ പൊലിസ് വളരെ വേഗത്തില്‍ നടപടികള്‍ എടുത്തിരുന്നു. മുസ്‌ലിം തീവ്രവാദികള്‍ എന്തിനാണ് മസ്ജിദില്‍ സ്‌ഫോടനമുണ്ടാക്കിയത് എന്ന ചോദ്യത്തിന് ഉത്തരം കിട്ടേണ്ടതുണ്ട്. മക്കാ മസ്ജിദില്‍ സ്‌ഫോടനം നടന്നപ്പോള്‍ ഹിന്ദു- മുസ്‌ലിം കലാപം പ്രതീക്ഷിച്ചവര്‍ക്ക് തെറ്റിപ്പോയി. ബി ജെ പിയും സംഘപരിവാര്‍ സംഘടനകളും കലാപത്തിന് കോപ്പ് കൂട്ടിയിരുന്നെങ്കിലും അത് പാളിപ്പോവുകയായിരുന്നു. ഇപ്പോഴുണ്ടായ സ്‌ഫോടനം മുതലെടുക്കാനാണ് ഇനി ഇത്തരം സംഘടനകള്‍ ശ്രമിക്കുക. രണ്ട് വര്‍ഷം കഴിഞ്ഞാല്‍ നടക്കുന്ന തെരഞ്ഞെടുപ്പിനു വേണ്ടി ഇത്തരം സംഭവങ്ങള്‍ ഉപയോഗപ്പെടുത്തി സംഘപരിവാരം പ്രചരണം നടത്തും.

? അങ്ങനെയെങ്കില്‍ ഇത്തരം സ്‌ഫോടനങ്ങള്‍ക്കു പിന്നില്‍ ആരായിരിക്കും? അത് എങ്ങനെയാണ് കണ്ടെത്താനാവുക?
= മുസ്‌ലിംകളും ദലിതുകളും യോജിക്കാന്‍ കഴിയുന്ന മേഖലകളില്‍ പരസ്പരം സഹകരിച്ച് നീങ്ങുന്ന അവസ്ഥയാണ് ഇപ്പോള്‍ ആന്ധ്രപ്രദേശിലുള്ളത്. ഇങ്ങനെ പോയാല്‍ അധികാരം പോലും കൈയ്യാളാന്‍ കഴിയുന്ന വിധത്തിലേക്ക് ഇത് വളരും. ഒരുപക്ഷെ അത്തരമൊരു കാര്യത്തില്‍ അസഹിഷ്ണുതയുള്ള ആരെങ്കിലുമായിരിക്കും ഹൈദരബാദിലെ സ്‌ഫോടനങ്ങള്‍ക്ക് പിന്നിലെന്ന് സംശയിക്കുന്നതില്‍ തെറ്റില്ല. ഇത് ആരാണ് ചെയ്തതെന്ന് കണ്ടെത്തേണ്ടതുണ്ട്. ആന്ധ്രപ്രദേശില്‍ ഇപ്പോള്‍ നടക്കുന്ന ദലിത് പിന്നാക്ക മുസ്‌ലിം ഐക്യത്തിന് വെല്ലുവിളിയായിരിക്കും ഇത്തരം സ്‌ഫോടനങ്ങള്‍. ദലിതുകളും പിന്നാക്കക്കാരും കൊല്ലപ്പെടുകയും സ്‌ഫോടനങ്ങള്‍ക്ക് പിറകില്‍ മുസ്‌ലിംകളാണെന്ന് സംശയിക്കുകയും ചെയ്താല്‍ ഇത്തരം കൂട്ടായ്മകളെ അത് പ്രതികൂലമായി ബാധിക്കും. ഈ കാര്യങ്ങള്‍ മനസ്സിലാക്കി വേണം ഹൈദരബാദ് സ്‌ഫോടനത്തെ വിലയിരുത്താന്‍.

? ഇത്തരം സ്‌ഫോടനങ്ങള്‍ക്കു പിറകില്‍ മുസ്‌ലിം സംഘടനകളാണെങ്കില്‍ എന്തുചെയ്യാന്‍ കഴിയും?
= എന്റെ കാഴ്ചപ്പാടില്‍ മുസ്‌ലിം ബുദ്ധിജീവികള്‍ ഈ കാര്യത്തില്‍ കുറച്ചു കൂടി കാര്യക്ഷമത കാണിക്കണം. കാരണം രാജ്യത്ത് പലയിടങ്ങളിലായി സ്‌ഫോടനങ്ങള്‍ നടക്കുകയും അതെല്ലാം മുസ്‌ലിം നാമധാരികളുടെ തലയില്‍ കെട്ടിവെക്കുകയും ചെയ്യുന്നുണ്ട്. അങ്ങനെ വരുമ്പോള്‍ സ്‌ഫോടനങ്ങള്‍ക്ക് പിറകില്‍ പ്രവര്‍ത്തിക്കുന്നവരെ കുറിച്ച് അന്വേഷിക്കേണ്ട ബാധ്യത മുസ്‌ലിം ബുദ്ധിജീവികള്‍ക്കുണ്ട്. സര്‍ക്കാറിന്റെ ഏജന്‍സികള്‍ നടത്തുന്ന അന്വേഷണങ്ങള്‍ മുറപോലെ മുമ്പോട്ട് പോകട്ടെ. മുസ്‌ലിം ബുദ്ധിജീവികള്‍ക്ക് എന്തുകൊണ്ട് സമാന്തരമായി അന്വേഷണം നടത്തിക്കൂടാ. പ്രത്യേകമായ അന്വേഷണ സംഘത്തെ നിയോഗിച്ച് കാര്യങ്ങള്‍ പഠിക്കാനുള്ള ഉത്തരവാദിത്വം അവര്‍ പ്രകടിപ്പിക്കണം. സ്‌ഫോടനങ്ങളെ കുറിച്ച് പഠിക്കുകയും അതിന് പിന്നിലുള്ളവര്‍ ആരാണെന്ന് കണ്ടെത്തുകയും ചെയ്യണം. മുസ്‌ലിംകളല്ല ഇതിന് പിന്നിലെങ്കില്‍ അത് പുറത്തുകൊണ്ടുവരേണ്ടത് അത്യാവശ്യമാണ്. ഇനി മുസ്‌ലിം തീവ്രവാദി സംഘടനകളാണ് ഇവയ്ക്കു പിറകിലെങ്കില്‍ ഇത്തരം പ്രവര്‍ത്തികള്‍ അവസാനിപ്പിക്കാനുള്ള ബാധ്യതയും മുസ്‌ലിം ബുദ്ധിജീവികള്‍ക്കുണ്ട്. തീവ്രവാദി സംഘങ്ങളുമായി സംസാരിക്കാനും അവരെ അതില്‍ നിന്ന് പിന്തിരിപ്പിക്കാനും കഴിയണം. മാത്രമല്ല രാജ്യത്തുടനീളം സഞ്ചരിച്ച് ഇത്തരം പ്രവര്‍ത്തനങ്ങള്‍ക്കെതിരെ ബോധവത്ക്കരണവും സെമിനാറുകളും സംഘടിപ്പിക്കുകയും ചെയ്യണം. മാത്രമല്ല തങ്ങളുടെ പ്രതിഷേധം പ്രകടിപ്പിക്കാന്‍ സ്‌ഫോടനങ്ങളും ആക്രമണങ്ങളും നടത്തുന്നതിന് പകരം ജനാധിപത്യപരമായ രീതികള്‍ അവലംബിക്കുകയും വേണം.

? ഇന്ത്യയിലെ പുതിയ വിവാദം അമേരിക്കയുമായുള്ള 1 2 3 ആണവ കരാറിനെ കുറിച്ചാണ്.
= ഹൈദരബാദ് സ്‌ഫോടനങ്ങളെ വേണമെങ്കില്‍ ഈ കരാറുമായി ബന്ധിപ്പിക്കാന്‍ കഴിയും. ഇന്ത്യയുടെ അമേരിക്കയുമായുള്ള ആണവ കരാറിന് എതിരേയുള്ള വികാരമായി ഹൈദരബാദ് സ്‌ഫോടനത്തെ ചിത്രീകരിക്കാനുള്ള സാധ്യതയുണ്ട്. കൂടാതെ കരാര്‍ ചര്‍ച്ചകളില്‍ നിന്നും ഇന്ത്യയുടെ ശ്രദ്ധതിരിക്കാനുള്ള അവസ്ഥയ്ക്കും സ്‌ഫോടനങ്ങള്‍ ഇടയാക്കിയിട്ടുണ്ട്. ഇന്ത്യയില്‍ കോണ്‍ഗ്രസ് ഭരിക്കുന്ന പ്രധാന സംസ്ഥാനമാണ് ആന്ധ്രപ്രദേശ്. കേന്ദ്രസര്‍ക്കാറിനെതിരെയുള്ള വികാരം പ്രകടിപ്പിക്കാന്‍ മികച്ച സ്ഥലമായി തീവ്രവാദികള്‍ ഹൈദരബാദിനെ തെരഞ്ഞെടുത്തെന്ന് വേണമെങ്കില്‍ പറയാം. പക്ഷേ, അതിനുമപ്പുറം സ്‌ഫോടനം നടത്തി കരാറിനെ കുറിച്ചുള്ള ചര്‍ച്ചകള്‍ പോലും ഇല്ലാതാക്കാനുള്ള ഗൂഢാലോചന നടന്നിട്ടുണ്ടോ എന്നും പരിശോധിക്കേണ്ടതുണ്ട്.

? താങ്കള്‍ എങ്ങനെയാണ് ആണവകരാറിനെ കാണുന്നത്?
= ഇന്ത്യ അമേരിക്കയുമായി 1 2 3 കരാറില്‍ ഒപ്പിടുന്നത് സ്വമേധയാ അല്ലെന്നാണ് ഞാന്‍ വിശ്വസിക്കുന്നത്. ആരുടേയോ സമ്മര്‍ദ്ധ ഫലമായാണ് ഇതിന് തുനിഞ്ഞിട്ടുള്ളത്. കുറേ കടലാസുകള്‍ മുമ്പില്‍ വെച്ച് ഭീഷണിപ്പെടുത്തി അതിലൊപ്പിട്, ഇതിലൊപ്പിട് എന്ന രീതിയിലാണെന്നു തോന്നുന്നു ഇപ്പോഴത്തെ ഇന്ത്യന്‍ അവസ്ഥ. ഒരുപക്ഷേ ഇന്ത്യന്‍ ഭരണാധികാരികള്‍ ചില കാര്യങ്ങളില്‍ ആരെയൊക്കെയോ ഭയപ്പെടുന്നുണ്ടാകാം.

? താങ്കള്‍ ഹിന്ദുത്വത്തെ വല്ലാതെ വിമര്‍ശിക്കുന്നുണ്ടല്ലോ?
= ഞാന്‍ ഹിന്ദുത്വത്തെ വെറുക്കുന്നുണ്ട്. ഹിന്ദുത്വം ഞങ്ങളുടേതല്ല. ഞങ്ങള്‍ക്കെതിരാണത്. ഞങ്ങള്‍ ഹിന്ദുക്കളായാല്‍ ബ്രാഹ്മണന്‍മാര്‍ മതഗ്രന്ഥങ്ങള്‍ മാറ്റുമെന്നും ഞങ്ങളുടെ ഭക്ഷണ രീതിയിലും ദൈവത്തിലും ദൈവവിശ്വാസത്തിലും മാറ്റങ്ങള്‍ വരുത്തുമെന്നും ഉറപ്പാണ്. ഹിന്ദു ദൈവങ്ങളുടെ ചിത്രങ്ങള്‍ നോക്കൂ. അവര്‍ ആയുധങ്ങള്‍ ധരിച്ചിട്ടുണ്ട്. ഞങ്ങള്‍ വായിച്ചറിഞ്ഞിട്ടുള്ളത് ഹിന്ദു ദൈവങ്ങള്‍ ഞങ്ങളുടെ പൂര്‍വ്വികരെ വധിച്ചിട്ടുണ്ടെന്നാണ്. ഞാനെങ്ങനെയാണ് കൊലയാളികളെ പ്രകീര്‍ത്തിക്കുക. ഇതെന്തൊരു മതമാണ്. ഇവിടെ പ്രധാനപ്പെട്ട് മൂന്ന് മതങ്ങളുണ്ട്- ബുദ്ധ, ക്രൈസ്തവ, ഇസ്‌ലാം. ഈ മതങ്ങളെല്ലാം പ്രവാചകന്മാരിലൂടേയും അവരുടെ സമൂഹത്തിനു വേണ്ടിയുള്ള സഹനത്തിലൂടേയുമാണ് കെട്ടിപ്പടുത്തിട്ടുള്ളത്. ഈ മതങ്ങളൊന്നും അവരുടെ ഭൂരിപക്ഷം വരുന്ന ജനങ്ങളുടെ ദൈവത്തിന്റെ കാലില്‍ നിന്നാണ് സൃഷ്ടിച്ചതെന്ന് പറഞ്ഞിട്ടില്ല. എന്റെ കാഴ്ചപ്പാടില്‍ ഹിന്ദുത്വം മതമല്ല. മതമെന്നാല്‍ ഉയര്‍ന്ന സാമൂഹികമായ ശക്തി പ്രദാനം ചെയ്യുന്നതായിരിക്കണം. ഹിന്ദുത്വത്തില്‍ ദൈവികമായ യാതൊന്നുമില്ല. ബ്രാഹ്മണന്‍മാരും ബനിയകളും ക്ഷത്രിയന്മാരുമൊക്കെ ആരാധിക്കുന്നത് ആക്രമണോത്സുകതയുള്ള ദൈവങ്ങളെയാണ്. അതാകട്ടെ ശൂദ്രന്മാര്‍ക്കും ചണ്ഡാളന്മാര്‍ക്കും ആദിവാസികള്‍ക്കുമൊക്കെ എതിരെ സൃഷ്ടിക്കപ്പെട്ടിട്ടുള്ളതും. ഹിന്ദുത്വം വെറും ആരാധനാ സമ്പ്രദായത്തിനപ്പുറം ഒരു മതമാണെങ്കില്‍ അതിന് ജനങ്ങള്‍ക്കെല്ലാം തുല്യാവകാശം നല്കുന്ന വേദഗ്രന്ഥം വേണം. നാല് ജാതികള്‍ സൃഷ്ടിച്ചെന്ന് പറയുന്ന ഭഗവത്ഗീത തുല്യാവകാശം നല്കുന്നില്ലല്ലോ. പിന്നാക്ക ഹിന്ദുക്കള്‍ മതത്തിന്റെ അടിസ്ഥാനത്തില്‍ ഹിന്ദുക്കളാണെന്ന് വിശ്വസിക്കുന്നില്ല. ഋഗ്വേദത്തിന്റേയും ഭഗവത്ഗീതയുടേയും അടിസ്ഥാനത്തില്‍ ശുദ്രന്മാര്‍ ദൈവത്തിന്റെ കാലില്‍ നിന്നും ബ്രാഹ്മണന്‍മാര്‍ തലയില്‍ നിന്നുമാണ് ഉണ്ടായത്. എന്റെ വിശ്വാസ പ്രകാരം വേദങ്ങള്‍ ദൈവികമല്ല, ബ്രാഹ്മണര്‍ സൃഷ്ടിച്ചതാണത്.

? ഇന്ത്യയിലെ ഹിന്ദുത്വത്തിന്റെ അവസ്ഥ എന്താണ്?
= ഇന്ത്യയിലോ ഇന്ത്യന്‍ ഉപഭൂഖണ്ഡത്തിലോ ഹിന്ദുത്വം വളരുന്നില്ല. അത് മരിച്ചുകൊണ്ടിരിക്കുകയാണ്. ഇസ്‌ലാം ഇന്ത്യന്‍ ഉപഭൂഖണ്ഡത്തില്‍ വര്‍ധിച്ചു വരികയാണ്. അതിന് ഒരു പ്രധാന കാരണം ഹിന്ദുത്വത്തിലെ ജാതിയതയാണ്. മുസ്‌ലിംകള്‍ മനസ്സിലാക്കേണ്ട ഒരു കാര്യമുണ്ട്. ഇന്ത്യന്‍ ഉപഭൂഖണ്ഡത്തില്‍ ഇസ്‌ലാം വളരുന്നുണ്ടെങ്കിലും മറ്റു പലയിടങ്ങളിലും അത് നില്‍ക്കുന്നിടത്തു തന്നെയാണുള്ളത്. ക്രിസ്ത്യാനിറ്റി വ്യാപിക്കുന്നിടത്ത് ഇസ്‌ലാം വളരുന്നില്ല. ആഗോളാടിസ്ഥാനത്തില്‍ ഇസ്‌ലാം ഇത്തരമൊരു അവസ്ഥ അഭിമുഖീകരിക്കുന്നുണ്ട്.

? ഇന്ത്യന്‍ മുസ്‌ലിംകളെ പൊതുവെ എങ്ങനെ വിലയിരുത്തുന്നു?
= മുസ്‌ലിംകള്‍ മറ്റു പലകാര്യങ്ങളിലും ശ്രദ്ധിക്കേണ്ടതുണ്ട്. എന്തുകൊണ്ട് അവര്‍ക്ക് തങ്ങളുടെ മതത്തിലെ ശാസ്ത്രീയ തത്വങ്ങള്‍ മറ്റുള്ളവര്‍ക്ക് പകര്‍ന്നു കൂടാ. ഇന്ത്യന്‍ മുസ്‌ലിംകള്‍ക്കിടയില്‍ എയ്ഡ്‌സ് തീര്‍ത്തും കുറവാണ്. മുസ്‌ലിംകള്‍ക്കിടയിലെ സുന്നത്ത് കര്‍മ്മമാണ് അതിന് പ്രധാന കാരണം. എല്ലാ മത- ജാതി വിഭാഗങ്ങളും പിന്തുടരേണ്ട ഒരു ശാസ്ത്രീയ കാര്യമാണ് ലിംഗഛേദം. പലപ്പോഴും മുസ്‌ലിംകളെ ഇതിന്റെ പേരില്‍ മറ്റുള്ളവര്‍ ആക്ഷേപിക്കാറുണ്ടെങ്കിലും അതിന്റെ ശാസ്ത്രീയത അവരാരും തിരിച്ചറിഞ്ഞിട്ടില്ലെന്നതാണ് സത്യം. മതത്തിലുള്ള കാര്യങ്ങള്‍ സമൂഹവുമായി പങ്ക് വെക്കാന്‍ ബുദ്ധിജീവികള്‍ ഉള്‍പ്പെടെയുള്ളവര്‍ പ്രവര്‍ത്തിക്കേണ്ടതുണ്ട്.

? ഇന്ത്യയിലെ പിന്നാക്കക്കാരിലെ വിദ്യാഭ്യാസത്തെ കുറിച്ച്?
= പിന്നാക്ക വിഭാഗങ്ങള്‍ ആദ്യം ചെയ്യേണ്ടത് ഇംഗ്ലീഷ് പഠിച്ച് തങ്ങളുടെ നില ഭദ്രമാക്കുക എന്നതാണ്. പ്രാദേശിക ഭാഷകള്‍ മരിക്കുകയോ ജീവിക്കുകയോ ചെയ്യട്ടെ. ഇംഗ്ലീഷാണ് പഠിക്കേണ്ടത്. ഇംഗ്ലീഷ് പറയുന്നവര്‍ക്ക് എല്ലായിടത്തും വിലയുണ്ട്. മുസ്‌ലിംകളുടെ മദ്‌റസകളും മറ്റും ഇത്തരം പഠനങ്ങള്‍ക്കു കൂടി ഉപയോഗിക്കേണം.

? പൊലിസ് സേനയിലും അതുപോലുള്ള തന്ത്രപ്രധാനമായ മേഖലകളിലും പിന്നാക്കക്കാരുടെ അഭാവമാണ് പലപ്പോഴും പ്രശ്‌നങ്ങള്‍ക്ക് കാരണമാകാറുള്ളതെന്ന് പറയാറുണ്ട്. താങ്കളുടെ കാഴ്ചപ്പാട് എന്താണ്?
= പൊലിസ് സേനയിലും അതുപോലുള്ളവയിലും ഹിന്ദുത്വത്തിന്റെ പ്രതിനിധികള്‍ക്ക് നല്ല സ്വാധീനമുണ്ട്. ഈയ്യിടെ അറിഞ്ഞ ഒരു വാര്‍ത്ത തൃച്ചിയിലെ ഒരു പൊലിസ് സൂപ്രണ്ടിനെ കുറിച്ചാണ്. ആയുധങ്ങള്‍ കണ്ടെടുക്കാനുള്ള തിരച്ചില്‍ ശക്തമാക്കിയ അദ്ദേഹം മികച്ച പൊലിസ് ഓഫിസറെന്ന പേര് സമ്പാദിച്ചിരുന്നത്രെ. തൃച്ചിയിലെ ഒരിടത്തു നിന്നും അദ്ദേഹം 10 കാറുകളിലായി സൂക്ഷിച്ച ആയുധങ്ങള്‍ റെയിഡിനിടയില്‍ കണ്ടെടുത്തത് വലിയ വാര്‍ത്തയായിരുന്നു. ഒടുവിലാണ് കണ്ടെത്തിയത് അദ്ദേഹം തന്നെയാണ് പ്രസ്തുത ഓപ്പറേഷനു വേണ്ടി ആളുകളെ ഏര്‍പ്പാട് ചെയ്ത് കാറുകള്‍ എത്തിച്ചതെന്ന്. അത്രയും നിഗൂഢമായും നീചമനസ്സോടെയുമാണ് ഇന്ത്യയിലെ പല പൊലിസ് ഓഫിസര്‍മാരും പ്രവര്‍ത്തിക്കുന്നത്. ഇവരില്‍ നിന്ന് എങ്ങനെയാണ് നീതി പ്രതീക്ഷിക്കാനാവുക.

Saturday, August 21, 2010

പൂക്കാരി പെണ്ണുങ്ങള്‍


വടക്കോട്ടേക്കുള്ള രാത്രിവണ്ടിക്ക് എപ്പോഴും ചീഞ്ഞ നാറ്റമാണ്. അര്‍ധരാത്രിയോടെ എത്തുന്ന തീവണ്ടിയിലെ യാത്രക്കാരില്‍ ഏറിയപങ്കും പാതി മയക്കത്തിലായിരിക്കും. തമിഴ്‌നാട്ടില്‍ നിന്നും വരുന്ന വണ്ടിക്ക് ആദ്യം അനുഭവപ്പെടുക തമിഴന്റെ മണമാണ്. പഴകിയ ഇരുമ്പിന്റെ പരമ്പരാഗത തീവണ്ടി മണത്തിനപ്പുറമാണ് അത്. ജനറല്‍ കമ്പാര്‍ട്ട്‌മെന്റില്‍ ചാഞ്ഞും ചെരിഞ്ഞും ഒടിഞ്ഞുമൊക്കെ ഉറങ്ങുന്ന തമിഴന്മാരും തമിഴത്തികളും. മുകളിലെ ബെര്‍ത്തില്‍ പാന്‍ വായിലിട്ട് ചവച്ച് ഉറക്കത്തിലോ ഉണര്‍ച്ചയിലോ എന്നറിയാതെ ജോലിയും തേടി കേരളത്തിലേക്ക് വരുന്ന ബീഹാറികളും ബംഗാളികളും. തീവണ്ടിയുടെ വെറും നിലത്ത് സ്വയമറിയാതെ ഉറങ്ങുന്നവര്‍. ഉറക്കെ കരയുന്ന കുഞ്ഞിനെ താരാട്ടുപാടാന്‍ ബര്‍ത്തുകള്‍ ചേര്‍ത്ത് കെട്ടിയുണ്ടാക്കിയ തൊട്ടില്‍. ഭിക്ഷക്കാരും തെരുവ് തെണ്ടികളും വേശ്യകളും ആരുമറിയാതെ നാടുവിടുന്നവരുമെല്ലാമുണ്ടാകും കാലുകുത്താന്‍ ഇടമില്ലാത്ത ബോഗിയില്‍. എല്ലാം ചേരുമ്പോള്‍ വടക്കോട്ടേക്കുള്ള രാത്രി വണ്ടിയുടെ ചിത്രമായി. ഇതേ വണ്ടിയുടെ തെക്കന്‍ യാത്രയിലും തിരക്ക് ഇതുപോലെ തന്നെ.
അന്ന്, നേരത്തെ എത്തിയ തീവണ്ടിയില്‍ യാത്രക്കാരും കുറവായിരുന്നു. അവധി ദിവസത്തിന്റെ ആലസ്യത്തില്‍ വീട്ടില്‍ കിടന്നുറങ്ങുകയായിരിക്കണം പതിവ് യാത്രക്കാര്‍. പകുതി ഉറക്കത്തോടെയും പാതിരാവിന്റെ തളര്‍ച്ചയോടെയും കമ്പാര്‍ട്ട്‌മെന്റിലേക്ക് കാലെടുത്തുവെച്ചപ്പോള്‍ എത്തിപ്പോയത് പുതിയ ലോകത്തായിരുന്നു- വസന്തം പെയ്തിറങ്ങിയ തീവണ്ടി. മുല്ലയും റോസും പിന്നെ പേരറിയാത്ത എത്രയോ പൂക്കളും ബെര്‍ത്തായ ബെര്‍ത്തുകളിലെല്ലാം നിറഞ്ഞു കിടക്കുന്നു. എല്ലാ പൂക്കളുടേയും സുഗന്ധം മൂക്കിലേക്ക് അടിച്ചു കയറിയപ്പോള്‍ രാത്രി വണ്ടിയുടെ ചീഞ്ഞമണം എങ്ങോട്ടോ പോയൊളിച്ചിരിക്കുന്നു.
തീവണ്ടി മുറിയില്‍ പരന്നുകിടക്കുന്ന പൂവായ പൂവിന്റെയെല്ലാം ഉടമകള്‍ രണ്ടു പെണ്ണുങ്ങളാണ്. അതിലൊരാളുടെ പേര് ശാന്തിയെന്നാണ് അവരുടെ സംസാരത്തില്‍ നിന്ന് മനസ്സിലായി. മറ്റെയാളുടെ പേരെന്താണാവോ? എന്തെങ്കിലുമാകട്ടെ, അവര്‍ കാഴ്ചക്കാര്‍ക്ക് പൂക്കാരിപ്പെണ്ണുങ്ങളാണ്.
മദിരാശിയില്‍ നിന്നും വരുന്ന തീവണ്ടിയില്‍ സേലത്തു നിന്നായിരിക്കും ഇവര്‍ കയറിയിട്ടുണ്ടാവുക. നാല്പത് വയസ്സിന് താഴെ മാത്രമേ ഇരുവര്‍ക്കും പ്രായമുള്ളു. ഒരു പേനയുടെ പരസ്യ വാചകം പോലെ 'ഒരല്പം കൂടുതല്‍ ബോള്‍ഡാ'യിരുന്നു ഇരുവരും. പൂക്കള്‍ തൊടാന്‍ ശ്രമിക്കുന്നവരെ വാക്കുകളുടെ ഉറുമിവീശി നിലംപരിശാക്കുന്നുണ്ട് രണ്ടുപേരും. തീവണ്ടി നിര്‍ത്തുന്ന സ്റ്റേഷനായ സ്റ്റേഷനുകളിലെല്ലാം ഇവര്‍ പൂക്കള്‍ ഇറക്കുന്നുണ്ടായിരുന്നു. ഇവരുടെ പൂക്കളാണ് കേരളത്തിലെ കല്ല്യാണ മണ്ഡപങ്ങളെ അണിയിച്ചൊരുക്കുന്നത്, മണവാട്ടികളെ സുന്ദരികളാക്കുന്നത്. രാത്രികളില്‍ നിന്ന് പകലുകളിലേക്കുള്ള ഇവരുടെ യാത്രകളായിരിക്കണം കേരളത്തിലെ കാറ്റിന് പൂക്കളുടെ സുഗന്ധം നല്കുന്നത്.

പിറകോട്ടേക്ക് ഓടുന്ന ഓര്‍മ്മകള്‍
പൂക്കാരികളെ കണ്ടപ്പോള്‍ ഓര്‍മ്മകള്‍ ഓടിയത് പിറകോട്ടേക്കായിരുന്നു. നാല് വര്‍ഷത്തിലേറെ പിറകിലേക്ക്. സ്ഥലം: കേരള- കര്‍ണ്ണാടക അതിര്‍ത്തിയായ ഗുണ്ടല്‍പേട്ട്. കേരളത്തിലെ ഓണക്കാലം ഗുണ്ടല്‍പേട്ടിലെ കര്‍ഷകര്‍ക്ക് ശരിക്കും 'തിരുവോണ'ക്കാലമാണ്. മലയാളിയുടെ വീടിനു മുമ്പില്‍ ഒരുങ്ങുന്ന ഓണപ്പൂക്കളങ്ങളുടെ വലിയൊരു സംഭാവന ഗുണ്ടല്‍പേട്ടില്‍നിന്നുള്ളതാണ്.
ദേശീയപാതയ്ക്ക് ഇരുവശവും നീണ്ടുപരന്നു കിടക്കുന്ന പൂപ്പാടങ്ങള്‍. അവിടെ നിറയെ പൂത്തുകിടക്കുന്ന ചെണ്ടുമല്ലിപ്പൂക്കള്‍. അതിനിടയില്‍ പൂ പറിക്കുന്ന കറുത്ത ദേഹങ്ങള്‍. മഞ്ഞപ്പൂക്കളുടെ നിറവസന്തത്തിനിടയില്‍ വെളുത്ത പല്ലുകള്‍ കാണിച്ച് വിടര്‍ന്നു ചിരിക്കുന്ന കറുത്ത മനുഷ്യര്‍.
എന്തായിരുന്നു അവളുടെ പേര്? ഇപ്പോള്‍ ഓര്‍ക്കുന്നില്ല. ഫോട്ടോഗ്രാഫര്‍ അജിലാലിന്റെ ക്യാമറയ്ക്ക് മുമ്പില്‍ പൂക്കാരിയുടെ സകല ഭാവങ്ങളോടെയും അവള്‍ നിന്നു. നീണ്ടുമെലിഞ്ഞ രൂപത്തില്‍ വെളുത്ത പല്ലുകളായിരുന്നു അവളുടെ ഐഡന്റിറ്റി. മുഖത്ത് എപ്പോഴും ചിരിയുടെ അലയൊലികള്‍. കന്നഡയില്‍ നിര്‍ത്താതെ സംസാരിച്ചുകൊണ്ടിരുന്നു ആ പെണ്‍കുട്ടി.
(ബ്ലോഗില്‍ ചേര്‍ക്കാനായി ഗുണ്ടല്‍പ്പേട്ടിലെ ആ പെണ്‍കുട്ടിയുടെ ഫോട്ടോയ്ക്ക് വേണ്ടി അജിലാലിനെ വിളിച്ചു. അജി അയച്ചു തന്ന ഫോട്ടോയില്‍ അവളുടെ പേരുണ്ടായിരുന്നു- ഭാഗ്യം. കേരളത്തിലെ ഓണം അവള്‍ക്ക് സ്വന്തം പേരുപോലെ ഭാഗ്യമാണ്- ജീവിതത്തിന്റെ ഭാഗ്യം.)

തീവണ്ടി ഇപ്പോഴും മുമ്പോട്ടേക്ക് തന്നെ
യാത്രക്കിടയില്‍ ആരാണ് പൂവുകള്‍ തൊട്ടതെന്നറിയില്ല. പേരറിയാത്ത ആ സ്ത്രീയാണ് ഉച്ചത്തില്‍ സംസാരിക്കുന്നത്. പൂക്കള്‍ തൊട്ടവനെ കള്ളന്‍ എന്നുറക്കെ വിളിച്ചു പറഞ്ഞ് അവള്‍ യാത്രക്കാരുടെ മുഴുവന്‍ ശ്രദ്ധയും ആകര്‍ഷിച്ചു. കുറേപേര്‍ അവളോടൊപ്പം ചേര്‍ന്നപ്പോള്‍ വേറെ കുറേ പേര്‍ തമിഴ് വികാരത്തിന് എതിരായിരുന്നു. തീവണ്ടിയില്‍ ഒച്ചവെക്കുന്നത് ആരെടി എന്നായിരുന്നു മുഖമില്ലാത്ത ഒരാളുടെ ചോദ്യം. പക്ഷേ, വിട്ടുകൊടുക്കാന്‍ അവള്‍ തയ്യാറായിരുന്നില്ല. ഒന്നിനു പിറകെ ഒന്നായി അവള്‍ക്കറിയാവുന്ന തെറിപ്പദങ്ങളെല്ലാം പരീക്ഷിച്ചു ആ 'ബോള്‍ഡായ' സ്ത്രീ.
തീവണ്ടി ഒരു സ്റ്റേഷനില്‍ നിര്‍ത്തിയപ്പോള്‍ രണ്ട് തമിഴ് സ്ത്രീകളും ചേര്‍ന്ന് കുറേ പൂക്കെട്ടുകളെടുത്ത് ഇറക്കിവെച്ചു. പിന്നെ, ആരെയോ മൊബൈലില്‍ വിളിച്ച് സംസാരിച്ചു. ആ പുവ് കച്ചവടത്തിന് കൊണ്ടുപോകുന്ന ആളെയായിരിക്കണം അവര്‍ വിളിച്ചിട്ടുണ്ടാവുക. അയാള്‍ പുലര്‍ച്ചെ സ്റ്റേഷനിലെത്തി പൂക്കെട്ടുകളെടുക്കുവോളം അവ അവിടെ സുഗന്ധം പരത്തി നില്‍ക്കുമായിരിക്കും.

എന്റെ സ്റ്റേഷന്‍ എത്തുകയാണല്ലോ
പുറത്ത് മഴ പെയ്യുന്നുണ്ടായിരുന്നു. കമ്പാര്‍ട്ട്‌മെന്റിലെ എല്ലാ ജനാലകളിലും ഷട്ടര്‍ താഴ്ത്തിയപ്പോള്‍ പൂക്കളുടെ മണം മുഴുവന്‍ അവിടെ തങ്ങിനിന്നു. ഉറക്കച്ചടവോടെ പൂക്കാരികള്‍ രണ്ടുപേരും സീറ്റില്‍ ചടഞ്ഞിരിക്കുന്നുണ്ടായിരുന്നു.
ഇനി എനിക്ക് ഇറങ്ങാനുള്ള സ്ഥലമായി. അവിടേയും പൂക്കാരികള്‍ കെട്ടുകള്‍ ഇറക്കിവെച്ചു. അതിനിടയില്‍ കമ്പാര്‍ട്ട്‌മെന്റിലെ ആരെയോ അവര്‍ ചീത്ത പറയുന്നുണ്ടായിരുന്നു. പൂവിന്റെ സുഗന്ധം പൂക്കാരികളുടെ വാക്കുകള്‍ക്കുണ്ടായിരുന്നില്ല. തമിഴ്‌നാട്ടിലെ പൂപ്പാടങ്ങളില്‍ വിരിഞ്ഞ കുറേ പൂക്കള്‍- അവ നാളെ രാവിലെ ബസ് സ്റ്റാന്റിലെ പൂ വില്‍പ്പനക്കാര്‍ ആര്‍ക്കൊക്കെയോ വില്‍ക്കും. റെയില്‍വേ സ്റ്റേഷനില്‍ ഇപ്പോള്‍ അനാഥമായതുപോലെ കിടക്കുന്ന ഈ പൂക്കള്‍ ഓര്‍ഡര്‍ ചെയ്തവര്‍ എവിടെയോ ഉറങ്ങുന്നുണ്ട്. ഇവ അണിഞ്ഞ് കതിര്‍മണ്ഡപത്തിലേക്ക് വലതുകാല്‍ വെക്കേണ്ടുന്ന മണവാട്ടികള്‍ ഏതൊക്കെയോ വീടുകളില്‍ സുന്ദര സ്വപ്നവും കണ്ട് ഉറങ്ങാതെ കിടക്കുന്നുണ്ടാകും.
എന്നേയും പൂക്കളേയും വിട്ട് തീവണ്ടി യാത്ര തുടര്‍ന്നു; പൂക്കാരികളും. ഞാനും നടന്നകന്നു. ഇനി പൂക്കള്‍ മാത്രം.

ചിത്രം: അജിലാല്‍

Thursday, August 19, 2010

നാടകാന്തം അറസ്റ്റ്


അബ്ദുന്നാസര്‍ മഅ്ദനി കേരള രാഷ്ട്രീയത്തില്‍ ചര്‍ച്ച ചെയ്യപ്പെടാന്‍ തുടങ്ങിയിട്ട് ഏകദേശം രണ്ട് പതിറ്റാണ്ട് കാലമാകുന്നു. ഈ കാലം കൊണ്ട് ഇന്ത്യന്‍ നീതിന്യായ വ്യവസ്ഥയില്‍ ചര്‍ച്ച ചെയ്യാന്‍ കഴിയുന്ന ഒരു പേരായി മാറാന്‍ കഴിഞ്ഞു എന്നതാണ് അദ്ദേഹത്തിന്റെ 'വളര്‍ച്ച' സൂചിപ്പിക്കുന്നത്. ആദ്യകാലത്ത് മനോഹരമായ ശൈലിയില്‍ മതപ്രസംഗവും പിന്നീട് അതിനേക്കാള്‍ നല്ല ശൈലിയില്‍ ഉശിരന്‍ പ്രസംഗങ്ങളും നടത്തിയ മഅ്ദനി കേരളത്തിലങ്ങോളമിങ്ങോളം നടത്തിയ യാത്രയില്‍ 'കരിമ്പൂച്ചകളെ' കൂടെക്കൂട്ടിയും സമൂഹത്തെ 'ഞെട്ടിച്ചിരുന്നു'. അതേ മഅ്ദനിയാണ് പിന്നീട് കേരളത്തിന്റേയും ഇന്ത്യന്‍ നീതിന്യായ വ്യവസ്ഥയുടേയും മുമ്പില്‍ ഗംഭീരമായൊരു ചോദ്യചിഹ്നമായി മാറിയത്.
ആയിരം കുറ്റവാളികള്‍ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടരുതെന്നാണ് ഇന്ത്യയുടെ അടിസ്ഥാന നീതിശാസ്ത്രം. പക്ഷേ, വിചാരണ കൂടാതെ ഒരാളെ എത്രകാലം തടവിലിടാമെന്നതിന് ഇവിടെ കൈയ്യും കണക്കുമില്ല. പണ്ട്, ബ്രിട്ടീഷുകാരുടെ കാലത്ത് അന്തമാന്‍ ജയിലില്‍ അകപ്പെട്ടവരെ പോലെ യാതൊരു അന്തവും കുന്തവുമില്ലാത്ത ശിക്ഷാ വിധിയായിരുന്നു അബ്ദുന്നാസര്‍ മഅ്ദനിയെ കോയമ്പത്തൂര്‍ ജയിലില്‍ കാത്തിരുന്നത്. എന്നാല്‍ ഒടുവില്‍ എല്ലാ നടപടികളും കഴിഞ്ഞ് വിധി വന്നപ്പോള്‍ മഅ്ദനി നിരപരാധിയായിരുന്നു. അപ്പോള്‍ കഴിഞ്ഞു പോയ ഒന്‍പതര വര്‍ഷത്തിന് ഏത് നിയമ സംഹിതയിലാണ് പ്രായശ്ചിതമുള്ളത് എന്ന ചോദ്യം ന്യായമാണെങ്കിലും ഉറക്കെ ചോദിച്ചു കൂടായിരുന്നു. കാരണം ആരുടെ പക്കലും ഉത്തരമുണ്ടായിരുന്നില്ല.
താന്‍ സമൂഹത്തോട് തെറ്റ് ചെയ്തുപോയിരുന്നെന്നും കഴിഞ്ഞ കാലത്തെ ചെയ്തികള്‍ക്ക് സമൂഹം മാപ്പ് തരണമെന്നും ഇതേ മഅ്ദനി തന്നെയാണ് ആവശ്യപ്പെട്ടത്. ഇനിയത് ആവര്‍ത്തിക്കില്ലെന്ന് മാത്രമല്ല, തന്റെ ശിഷ്ടകാലം സമൂഹത്തിന്റെ നന്മയ്ക്ക് വേണ്ടി ഉപയോഗിക്കുമെന്നും ആണയിട്ട അദ്ദേഹം തന്റെ ഒരു കാല്‍ ബോംബിട്ട് തകര്‍ത്തവര്‍ക്ക് മാപ്പ് കൊടുക്കാനും തയ്യാറായിരുന്നു. ഒരു മനുഷ്യന്‍ പ്രായശ്ചിത്തവുമായി മുമ്പോട്ട് വന്നാല്‍ പിന്നീട് അയാളെ ശിക്ഷയില്‍ നിന്ന് ഒഴിവാക്കണമെന്നാണ് മതവിധി. എന്നാല്‍ മഅ്ദനിയുടെ കാര്യത്തില്‍ ആ നീതിയും ലഭിച്ചില്ല. പിന്നീട് കശ്മീരില്‍ പട്ടാളക്കാരുടെ വെടിയേറ്റ് കൊല്ലപ്പെട്ട നാല് മലയാളികളുടെ ചെയ്തികളെ ചുറ്റിപ്പറ്റിയുള്ള അന്വേഷണങ്ങളാണ് വീണ്ടും മഅ്ദനിക്ക് കാരാഗൃഹത്തിനുള്ള വഴിയൊരുക്കിയത്. ഇതില്‍ താന്‍ നിരപരാധിയാണെന്ന് അദ്ദേഹം ആണയിടുന്നുണ്ടെങ്കിലും അത് തെളിയക്കാനുള്ള അവസരങ്ങള്‍ വരുന്നേയുള്ളു. പക്ഷേ, ഏതൊരാളേയും അപരാധിയാക്കി വിലങ്ങണിയിക്കാന്‍ കെല്‍പ്പുള്ളവരുടെ നാട്ടില്‍ നീതിയും അനീതിയും കണ്ണുകെട്ടിയ ശില്‍പത്തിന്റെ ഏതുത്രാസിനു മുമ്പിലാണ് തൂക്കപ്പെടുക എന്നതാണ് കാര്യം.
അബ്ദുന്നാസര്‍ മഅ്ദനിയെ അറസ്റ്റ് ചെയ്യുന്നതുമായി ബന്ധപ്പെട്ട വിഷയം കഴിഞ്ഞ ഒരാഴ്ചക്കാലമായി കേരളത്തിലും പിറകേ ഇന്ത്യന്‍ മാധ്യമങ്ങളിലും സജീവ ചര്‍ച്ചാവിഷയമാണ്. അറസ്റ്റിലാകുമോ, കീഴടങ്ങുമോ എന്നതായിരുന്നു നെടുനാളത്തെ പ്രധാന ചര്‍ച്ചാ വിഷയം. ചാനലുകളായ ചാനലുകള്‍ മുഴുവന്‍ കിട്ടാവുന്ന സകല പ്രഗത്ഭരേയും ചര്‍ച്ചയില്‍ പങ്കെടുപ്പിച്ചു. മഅ്ദനിയെ അറസ്റ്റു ചെയ്താല്‍ കേരളം തിളച്ചു മറിയുമോ, പിടിച്ചാല്‍ കിട്ടാത്ത വിധം വര്‍ഗ്ഗീയ കലാപം പൊട്ടിപ്പുറപ്പെടുമോ എന്നൊക്കെ തിരിച്ചും മറിച്ചും ചര്‍ച്ച ചെയ്തവര്‍ക്ക് അറിയാതെ പോയത് കേരളത്തിന്റെ മനഃസാക്ഷിയായിരുന്നു. മഅ്ദനിയെ എന്നല്ല, കുറ്റം ചെയ്ത ആരെ പിടികൂടിയാലും ഒരു ചുക്കും ഇവിടെ സംഭവിക്കില്ലായിരുന്നു. പക്ഷേ, ഒരാളെ കുറ്റവാളി എന്ന് വിശേഷിപ്പിക്കണമെങ്കില്‍ കോടതി അയാള്‍ക്കെതിരെ വിധിക്കണമെന്ന ചെറിയ ന്യായം ബാക്കിയുണ്ടായിരുന്നു. എന്നിട്ടും അതെല്ലാം മറന്നേക്കൂ എന്ന മട്ടില്‍ ഒരു കൊടും കുറ്റവാളിയോടെന്ന പോലെയാണ് സമൂഹത്തില്‍ പലരും (പ്രമുഖ മാധ്യമങ്ങള്‍ ഉള്‍പ്പെടെ) പെരുമാറിയത്. തങ്ങള്‍ ഉദ്ദേശിച്ചയാള്‍ കുറ്റവാളിയോ നിരപരാധിയോ ആകണമെന്ന വല്ലാത്തൊരു വാശി ഈ അടുത്ത കാലത്തായി മാധ്യമങ്ങള്‍ വല്ലാതെ പ്രകടിപ്പിക്കുന്നത്. കുറ്റപത്രം തയ്യാറാക്കുന്നതും വിചാരണ നടത്തുന്നതും ഒടുവില്‍ വിധി പറയുന്നതുമെല്ലാം ഇത്തരം മാധ്യമങ്ങളാണ്. ആദ്യത്തെ ആവേശത്തിന് പറയുന്ന കാര്യങ്ങള്‍ പിന്നീട് തിരുത്തേണ്ട ഗതി ഉണ്ടാകാറുണ്ടെങ്കിലും ഇത്തരക്കാരൊന്നും പിന്നീട് ആരോടും മാപ്പു പറഞ്ഞതായി കേട്ടറിവ് പോലുമില്ല. അങ്ങനെയാണെങ്കില്‍ ചെയ്ത തെറ്റിന് പരസ്യമായി മാപ്പ് പറഞ്ഞ മഅ്ദനിയാണ് ഇവരേക്കാള്‍ കേമന്‍.
നാടകാന്തം കവിത്വമെന്നാണ് ചൊല്ല്. എന്നാലിപ്പോള്‍ നാടകാന്തം അറസ്റ്റായിരിക്കുന്നു. സിനിമയായിരുന്നെങ്കില്‍ ചിത്രീകരണത്തിനിടയില്‍ തിരക്കഥയില്‍ എത്ര മാറ്റങ്ങളും വരുത്താം. പ്രദര്‍ശനത്തിനെത്തിയാലും വെട്ടിയൊട്ടിക്കലും കൂട്ടിച്ചേര്‍ക്കലുമൊക്കെ നടത്താനാവും. പക്ഷേ, നാടകത്തെ സംബന്ധിച്ചിടത്തോളം സ്റ്റേജില്‍ കയറിക്കഴിഞ്ഞാല്‍ പിന്നെ എഡിറ്റിംഗ് ബുദ്ധിമുട്ടുള്ള സംഗതിയാണ്. അങ്ങനെയാകുമ്പോള്‍ ആരുടെ രചനയ്‌ക്കൊത്തായിരിക്കാം മഅ്ദനി നാടകം അരങ്ങേറിയിട്ടുണ്ടാവുക? കശ്മീരില്‍ കൊല്ലപ്പെട്ട മലയാളി യുവാക്കളെ കുറിച്ചുള്ള അന്വേഷണം ബംഗ്ലാദേശിലുള്ള തടിയന്റവിട നസീര്‍ വരെ എത്തുകയും അവിടുന്നിങ്ങോട്ട് അബ്ദുന്നാസര്‍ മഅ്ദനിയിലേക്കൊരു പാലം പണിയുകയുമായിരുന്നു. കശ്മീരില്‍ തീവ്രവാദ പ്രവര്‍ത്തനത്തിന് പോയവരെ കുറിച്ചുള്ള കേസ് ഒടുവില്‍ ബങ്കളൂരുവിലെ സ്‌ഫോടനത്തില്‍ എത്തിച്ചേര്‍ന്ന് ഒന്നുമല്ലാതായി പോകുന്നതിന് പിന്നില്‍ മറ്റെന്തു കാര്യമാണുള്ളത്.
അബ്ദുന്നാസര്‍ മഅ്ദനി കേരളം മുഴുവന്‍ കാടിളക്കിയ ഒരു കാലമുണ്ടായിരുന്നു. എന്നിട്ടും അയാള്‍ക്കെതിരെ കേരളത്തില്‍ വലിയ തോതില്‍ കേസും അറസ്റ്റുമൊന്നുമുണ്ടായില്ല. രണ്ടു തവണയും പിടിയിലാകുന്നത് അയല്‍ സംസ്ഥാനങ്ങളിലെ കേസുകളിലാണ്. കോയമ്പത്തൂര്‍ സ്‌ഫോടനവുമായി ബന്ധപ്പെട്ട കേസില്‍ ആവശ്യം പോലെ തെളിവുകള്‍ നിരത്തിയിട്ടു പോലും ഒടുവില്‍ മഅ്ദനിയെ നിരപരാധിയെന്നാണ് കോടതി വിധിച്ചത്. എന്നാല്‍ ഇപ്പോഴാകട്ടെ മുഴുവന്‍ സമയവും പൊലീസ് സംരക്ഷണത്തില്‍ കഴിയുന്ന മഅ്ദനി പൊലീസുകാര്‍ അറിയാതെ കുടകില്‍ പോയി തടിയന്റവിട നസീറുമായി സ്‌ഫോടനത്തിന് പദ്ധതികളിട്ടു എന്നാണ് പറയുന്നത്. അങ്ങനെയെങ്കില്‍ നിയമപാലകരുടെ നേരെ നോക്കി പല്ലിളിക്കുന്നതിനും അവരെ അവഹേളിക്കുന്നതിനും തുല്യമാണത്. കാരണം പൊലീസ് അനുഗമിക്കുന്ന ഒരാള്‍ അവരെ കബളിപ്പിച്ചുവെന്നു പറഞ്ഞാല്‍ പൊലീസിന് അതിലും വലിയ നാണക്കേട് വരാനില്ല. അതല്ല, പൊലീസ് കൂടി അറിഞ്ഞാണ് ഇതൊക്കെ ചെയ്യുന്നതെങ്കില്‍ ഇവിടെ ആരേയും വിശ്വസിക്കാന്‍ കഴിയാതായിരിക്കുന്നു എന്നല്ലേ അര്‍ഥം. രണ്ടായാലും നാട്ടിലെ സമാധാനം നഷ്ടപ്പെട്ടു എന്നാണ് ചുരുക്കം. പൊലീസുകാര്‍ കൂടി അറിഞ്ഞാണ് മഅ്ദനി കുടകില്‍ പോയി തടിയന്റവിട നസീറുമായി ചര്‍ച്ച നടത്തിയതെന്നാണ് കഴിഞ്ഞ ദിവസം ഒരു പത്രം വെണ്ടക്ക നിരത്തിയത്. മഅ്ദനിക്ക് വേണ്ടി പൊലീസ് ഈ രേഖകളെല്ലാം നശിപ്പിച്ചു കളയുകയും ചെയ്തുവത്രേ. നന്നായിപ്പോയി. ബൈലൈന്‍ സ്റ്റോറികളുടെ എണ്ണം പെരുപ്പിക്കാന്‍ വേണ്ടി ഒരു സമൂഹത്തെ മുഴുവന്‍ സൂചി മുനയില്‍ നിര്‍ത്തരുതെന്നേ ഇത്തരക്കാരോട് പറയാനുള്ളു.
അബ്ദുന്നാസര്‍ മഅ്ദനി കുറ്റക്കാരനാണെങ്കില്‍ ശിക്ഷിക്കപ്പെടണം. അതില്‍ രണ്ടു തരമില്ല. അയാള്‍ നിരപരാധിയാണെങ്കില്‍ ഇത്രയും നാള്‍ കളിച്ച നാടകത്തിന് ആരെങ്കിലും മറുപടി പറയുമോ ആവോ? അതുണ്ടാകില്ല. നാട്ടില്‍ വര്‍ഗ്ഗീയതയും കുഴപ്പങ്ങളും ഉണ്ടാക്കാന്‍ ശ്രമിച്ചവരില്‍ ഒരു മഅ്ദനിയുടെ മാത്രം പേരല്ലല്ലോ കാണാനുണ്ടാവുക. അതിന് പ്രവീണ്‍ തൊഗാഡിയ എന്നോ നരേന്ദ്ര മോഡി എന്നോ പ്രജ്ഞാസിംഗ് ഠാക്കൂര്‍ എന്നോ മുത്തലിക്ക് എന്നോ ഒക്കെയും പേരുകള്‍ നല്‍കാനാകും. പക്ഷേ, അക്കാര്യത്തെ കുറിച്ച് ആരും മിണ്ടാറില്ലെന്ന് മാത്രം.

Wednesday, August 18, 2010

ഒരു തട്ടുകടക്കാരന്‍ ജീവിതം പറയുന്ന വിധം


നീണ്ട 19 വര്‍ഷങ്ങള്‍ക്ക് മുമ്പൊരു പാതിരാത്രിയില്‍ സെക്കന്റ് ഷോയും കഴിഞ്ഞ് മടങ്ങിയേടത്താണ് കണ്ണൂര്‍ ചൊവ്വ തിലാന്നൂര്‍ പറമ്പത്ത് മൈലാഞ്ചിയില്‍ നാസറിന്റെ ജീവിതത്തിന് മാറ്റം വന്നത്. ചൊവ്വ പ്രതിഭാ കോളെജില്‍ നിന്നും തേര്‍ഡ് ഗ്രൂപ്പില്‍ പ്രീഡിഗ്രി പാസ്സായി നില്‍ക്കുന്ന പയ്യന്‍ കവിതാ തിയേറ്ററില്‍ 1921 സിനിമയുടെ സെക്കന്റ് ഷോ കഴിഞ്ഞതോടെ കണ്ണൂരില്‍ നാലാളറിയുന്ന നാസറായി, പിന്നെ പിന്നെ നാസര്‍ക്കയായി.... പുട്ടിന്റേയും ബീഫിന്റേയും പത്തിലിന്റേയും ചിക്കന്‍ പാര്‍ട്‌സിന്റേയും കല്ലുമ്മക്കായ പൊരിച്ചതിന്റേയും സ്വാദൂറുന്ന മറ്റൊരു പേരായി.
നാസറിന്റെ സഹോദരന്‍ മുജീബിന്റെ ഭാര്യയുടെ പിതാവ് അബ്ദുറഹ്മാന്‍ കാല്‍ടെക്‌സില്‍ തട്ടുകട നടത്തുന്നുണ്ടായിരുന്നു. 1921ലെ മമ്മൂട്ടിയുടെ അബ്ദുല്‍ ഖാദറും രതീഷിന്റെ ലവക്കുട്ടിയുമൊക്കെ നല്കിയ ആവേശം നാസറിന്റെ സിരകളിലൂടെ തട്ടുകടയിലെ ജോലിയിലേക്ക് പ്രവേശിച്ചു. അതോടെ നാസര്‍ എല്ലാവര്‍ക്കും പ്രിയപ്പെട്ടവനായി.
സായാഹ്നത്തിലെ ചെരിഞ്ഞു പതിക്കുന്ന വെയില്‍. ആകാശത്തേക്ക് തുറന്നുവെച്ച രണ്ട് കൈകളില്‍ നിന്നും പറന്നുയരുന്ന പ്രാവിന്റെ ശില്‍പം റോഡിനു മധ്യത്തില്‍ സ്ഥാപിച്ച കാല്‍ടെക്‌സ് ജംഗ്ഷന്‍. നീണ്ട ഇലകളുള്ള മൂന്ന് മരങ്ങള്‍ റോഡരികില്‍ തണല്‍ വിരിച്ച് നില്‍ക്കുന്നുണ്ട്. മരങ്ങള്‍ക്കിപ്പുറത്ത്, കെ എസ് ആര്‍ ടി സി ബസ് സ്റ്റാന്റ് കെട്ടിടത്തിനോരത്ത് നിരത്തി നിര്‍ത്തിയിരിക്കുന്ന മുന്നോ നാലോ തട്ടുകടകള്‍. അവിടങ്ങളിലൊക്കെ അടുപ്പിനും ജീവിതത്തിനും ചൂട് തുടങ്ങുന്നേയുള്ളു. ഒരു ഭാഗത്ത് ചിക്കന്‍ പാര്‍ട്‌സുകള്‍ മുറിച്ച് വൃത്തിയാക്കുന്നുണ്ടാകും, കൂട്ടിയിട്ട ഉള്ളി മുറിച്ചിടുന്ന തിരക്ക്, പത്തിലുണ്ടാക്കാനുള്ള മാവ് കുഴക്കുന്നയാള്‍ വേറൊരു ഭാഗത്ത്.... തട്ടുകടയില്‍ തിരക്ക് കൂടുന്നതിന് മുമ്പ് വെയിലേല്‍ക്കാതെ മാറി നിന്ന് നാസര്‍ തന്റെ കഥ പറഞ്ഞു.

നാസര്‍ കഥ പറയുന്നു
അബ്ദുറഹ്മാനിക്കാന്റെ കൂടെ മൂന്ന് കൊല്ലമുണ്ടായിരുന്നു. അതിനു ശേഷം ഞാന്‍ സ്വന്തമായി കട തുടങ്ങി. തട്ടുകട തുടങ്ങാന്‍ മുപ്പത്തി അയ്യായിരത്തോളം രൂപയാണ് ചെലവ് വന്നത്. അക്കാലത്ത് ഇന്നത്തെ പോലെയല്ല, വൈകിട്ട് മൂന്ന് മണിക്ക് തുടങ്ങിയാല്‍ പുലരുന്നതു വരെ തട്ടുകട പ്രവര്‍ത്തിക്കും. ഇപ്പോള്‍ രാത്രി 11 മണി ആകുമ്പോഴേക്കും അടക്കണമെന്നാണ് നിയമം. അല്ലെങ്കില്‍ പൊലീസ് അടപ്പിക്കും. വൈകുന്നേരത്തെ അതേ ആവേശത്തില്‍ വേണം പുലരുന്നതു വരെ ജോലി ചെയ്യാന്‍. പുലരുമ്പോഴേക്കും തളര്‍ന്നിട്ടുണ്ടാകും. പിന്നെ ഉച്ചവരെ വീട്ടില്‍ കിടന്നുറങ്ങും. പിന്നേയും വൈകുന്നേരം ജോലി. കടയിട്ട് രണ്ടാഴ്ചയായപ്പോഴാണ് ഞാന്‍ ഒരിക്കലും മറക്കാത്ത ഒരു സംഭവമുണ്ടായത്.
അന്നൊരുനാള്‍ രാത്രി മുസ്‌ലിം ലീഗ് നേതാവ് വി കെ അബ്ദുല്‍ ഖാദര്‍ മൗലവിയോടൊപ്പം പാണക്കാട് സയ്യിദ് മുഹമ്മദലി ശിഹാബ് തങ്ങള്‍ വന്നു. നാസറിന്റെ സ്‌പെഷ്യലായ പുട്ട് ബിരിയാണിയായിരുന്നു ശിഹാബ് തങ്ങള്‍ കഴിച്ചത്. അന്നത്തെ രാത്രി ഇന്നലെയെന്ന പോലെ ഓര്‍മ്മയുണ്ടെന്ന് നാസര്‍.
ഭക്ഷണം കഴിച്ച ശിഹാബ് തങ്ങള്‍ സന്തോഷത്തോടെ 100 രൂപ എടുത്തുതന്നു. ആ പണം ഉപയോഗിക്കരുതെന്നും സൂക്ഷിക്കണമെന്നും പറഞ്ഞു. ശിഹാബ് തങ്ങള്‍ പറഞ്ഞതുകൊണ്ട് നാസര്‍ ഇപ്പോഴും അത് അനുസരിക്കുന്നു. അന്ന് അദ്ദേഹം നല്കിയ 100 രൂപ ഇപ്പോഴും സൂക്ഷിച്ചിട്ടുണ്ട്.

നാസറേ രണ്ട് പുട്ട് ബിരിയാണി....
ആ അവിടെ രണ്ട് പുട്ട് ബിരിയാണി കൊടുക്ക്.... നാസര്‍ക്കാ പുട്ടും മുട്ടേം വേണം.... അവിടെന്താ വേണ്ടത് പത്തിലും ചിക്കന്‍ പാര്‍ട്‌സുമെടുത്താലോ.... കുറേ നാളായല്ലോ കണ്ടിട്ട് വെള്ളാപ്പവും മുട്ടറോസ്റ്റുമായാലോ...... നല്ലൊരു ചായയും കല്ലുമ്മക്കായ പൊരിച്ചതും കൊടുക്ക്..... സന്ധ്യയാകുന്നതോടെ നാസറിന്റെ കടയില്‍ ഇങ്ങനെയുള്ള ശബ്ദങ്ങളാണ് കേള്‍ക്കുക. പുട്ടും കല്ലുമ്മക്കായ ഫ്രൈയോ ലിവര്‍ ഫ്രൈയോ ഒന്നിച്ച് ചേര്‍ത്ത് കുരുമുളകും ഉള്ളിയുമൊക്കെ കൂട്ടിക്കലര്‍ത്തി ഫ്രൈ പാനില്‍ ഒരിക്കല്‍ കൂടി ചൂടാക്കി എടുക്കുന്ന ഐറ്റമാണ് പുട്ട് ബിരിയാണി. പുട്ട് പൊടിച്ചിട്ട് മുട്ടയും ചേര്‍ത്ത് പാനിലൊന്ന് കുഴച്ചെടുത്താല്‍ പുട്ടും മുട്ടയും റെഡി. നെയ്പത്തില്‍ മുറിച്ച് ചിക്കന്‍ പാര്‍ട്ട്‌സും നന്നായൊന്ന് ചേര്‍ത്ത് ഉള്ളിയും വിതറി വിശക്കുന്നവന്റെ മുമ്പിലെത്തുപ്പോള്‍ അതിന് വല്ലാത്തൊരു രുചി. പുട്ട്, പൊറോട്ട, വെള്ളാപ്പം, ഇടിയപ്പം, പത്തില്‍, കപ്പ, ബീഫ് ഫ്രൈ, ലിവര്‍ ഫ്രൈ, ബീഫ് കറി, കടലക്കറി, ചിക്കന്‍ ലിവര്‍, ചിക്കന്‍ പാര്‍ട്‌സ്, കല്ലുമ്മക്കായ ഫ്രൈ, മുട്ടറോസ്റ്റ്, കല്ലുമ്മക്കായ പൊരിച്ചത്, ബ്രഡും ഓംലെറ്റും തുടങ്ങി നിരവധി ഇനങ്ങള്‍ ഇവിടെയുണ്ടാകും. ഭക്ഷണങ്ങളെല്ലാം കണ്‍മുമ്പില്‍ നിന്നുമുണ്ടാക്കുന്നതുകൊണ്ടും വളരെ വേഗത്തില്‍ കഴിച്ചു പോകാമെന്നതും രുചിയുടെ താജ്മഹല്‍ സൃഷ്ടിക്കുന്നതും കൂടുതല്‍ ആളുകളെ ഇങ്ങോട്ടേക്ക് ആകര്‍ഷിക്കുന്നു.

കല്ലുമ്മക്കായ ഫ്രൈ; ഒന്നല്ല 16 പ്ലേറ്റ്
ജോക്കര്‍ സിനിമയുടെ ലൊക്കേഷനും അന്വേഷിച്ച് ലോഹിതദാസും സംഘവും ഒരുനാള്‍ കണ്ണൂരിലെത്തി. ലൊക്കേഷന്‍ ഇഷ്ടപ്പെടാതെ രാത്രി മടങ്ങുമ്പോഴാണ് വിശപ്പ് തീര്‍ക്കാന്‍ കാല്‍ടെക്‌സില്‍ ഇറങ്ങിയത്. ലോഹിതദാസിനോടൊപ്പം നിര്‍മ്മാതാവ് മിലന്‍ ജലീല്‍, മിമിക്‌സ്-ചലച്ചിത്രതാരം നാദിര്‍ഷ, മറ്റ് പേരറിയാത്ത ചിലരൊക്കെയുമുണ്ടായിരുന്നു. മറ്റു ഭക്ഷണങ്ങള്‍ കഴിച്ച ലോഹിതദാസിനോടും സംഘത്തോടും നാസര്‍ കല്ലുമ്മക്കായ ഫ്രൈയെ കുറിച്ച് പറഞ്ഞു. നേരത്തെ കഴിച്ച് ശീലമില്ലാത്തതിനാല്‍ ആദ്യം ലോഹിതദാസിനും സംഘത്തിനും വലിയ താത്പര്യം തോന്നിയില്ലത്രെ. എന്നാല്‍ ഒരു പ്ലേറ്റ് കഴിച്ചു നോക്കൂ എന്ന നാസറിന്റെ നിര്‍ബന്ധത്തിന് അവര്‍ വഴങ്ങി. രുചി ഇഷ്ടപ്പെട്ടപ്പോള്‍ എല്ലാവരും ചേര്‍ന്ന് എട്ട് പ്ലേറ്റ് കല്ലുമ്മക്കായ ഫ്രൈ വാങ്ങി. മറ്റൊരു എട്ടെണ്ണം പാര്‍സലാക്കാന്‍ പറഞ്ഞു. ഇത്രയും റോഡരികിലെ തട്ടുകടയില്‍ നടന്നത്. പാര്‍സല്‍ പൊതിഞ്ഞെടുത്ത് ലോഹിതദാസും സംഘവും വന്ന ക്വാളിസില്‍ കൊണ്ടുവെക്കാന്‍ ചെന്നപ്പോഴാണ് നാസര്‍ ശരിക്കും ഞെട്ടിയത്. കറുത്ത ഗ്ലാസ്സിട്ട വാഹനത്തിനകത്തിരുന്ന് നടന്‍ ദിലീപ് ചിരിക്കുന്നു. ഇത്രയും നേരം ദിലീപ് ക്വാളിസിലുള്ള കാര്യം ആരും അറിഞ്ഞിരുന്നില്ല. ഒച്ചവെക്കരുതെന്നും ആളുകൂടിയാല്‍ ബുദ്ധിമുട്ടാകുമെന്നുമുള്ള ദിലീപിന്റെ അഭ്യര്‍ഥന മാനിച്ച് നാസര്‍ മിണ്ടാതിരുന്നു. നാസറിന്റെ പുട്ടും കല്ലുമ്മക്കായ ഫ്രൈയും ക്വാളിസിലിരുന്ന് ദിലീപ് ആരുമറിയാതെ കഴിച്ചു.
വേറൊരു ദിവസത്തെ സന്ധ്യാ സമയവും നാസര്‍ ഓര്‍മ്മയില്‍ സൂക്ഷിക്കുന്നുണ്ട്. കടയില്‍ തിരക്ക് തുടങ്ങി വരുന്നേയുള്ളു. അപ്പോഴാണ് ജംഗ്ഷനില്‍ കൈതപ്രം ദാമോദരന്‍ നമ്പൂതിരി പ്രത്യക്ഷപ്പെടുന്നത്. 'അദ്ദേഹം കുറച്ചു സമയം തട്ടുകടകളെല്ലാം വീക്ഷിക്കുന്നത് ഞാന്‍ കാണുന്നുണ്ടായിരുന്നു. എല്ലാ കടകളും നോക്കിയതിനു ശേഷം കൈതപ്രം നേരെ ഇങ്ങോട്ടേക്ക് വന്നു. പുട്ടും കടലക്കറിയുമാണ് അദ്ദേഹം ഇവിടെ നിന്നും കഴിച്ചത്. മാത്രമല്ല കുറച്ചപ്പുറമുണ്ടായിരുന്ന, വിശന്നു വലഞ്ഞ ഒരാള്‍ക്ക് ഭക്ഷണം വാങ്ങിക്കൊടുക്കുകയും ചെയ്തു കൈതപ്രം'.

വെയില്‍ പിന്നേയും താണിട്ടുണ്ട്. നാസറിന്റെ കടയ്ക്കു മുമ്പില്‍ നിന്നും നോക്കുമ്പോള്‍ കലക്ടറേറ്റിനു പിറകില്‍ ഒളിക്കാനുള്ള ശ്രമത്തിലാണ് സൂര്യന്‍. അബ്ദുല്ലയും ജൂനിയര്‍ നാസറും ഹസ്സനും ഇര്‍ഷാദും സാദിഖും അടങ്ങുന്ന നാസറിന്റെ ഐവര്‍ സംഘം തിരക്കിലാണ്. ഇവരെല്ലാം ജോലിക്കാര്‍ എന്നതിലേറെ നാസറിന്റെ സുഹൃത്തുക്കളാണ്. ഓരോരുത്തരും സ്വന്തം കട പോലെയാണ് കൈകാര്യം ചെയ്യുന്നത്. സൗഹൃദവും തൊഴിലും ഒത്തുചേരുന്ന ഇവിടെ ആര്‍ക്കും ദിവസക്കൂലിയല്ല, ലാഭവിഹിതമാണ് കിട്ടുക. അതുകൊണ്ടുതന്നെ എല്ലാവരും അത്യുത്സാഹത്തിലാണ്. ഇന്ന് കിട്ടുന്ന ലാഭം തന്റേത് കൂടിയാണെന്ന് അവര്‍ക്കെല്ലാവര്‍ക്കുമറിയാം.
പറയുന്നതിനിടയില്‍ നാസറിന്റെ കുസൃതി നിറഞ്ഞ നോട്ടം. എല്ലായ്‌പോഴും ലാഭം കിട്ടുമെന്നൊന്നും വിചാരിക്കേണ്ട. ആയിരത്തിലേറെ രൂപ നഷ്ടം വന്ന ദിവസങ്ങളുമുണ്ടായിട്ടുണ്ട്. നഗരമധ്യത്തിലെ തട്ടുകടക്കാരന് കണ്ണൂരിലെ സംഘര്‍ഷങ്ങള്‍ നഷ്ടങ്ങളുണ്ടാക്കിയിട്ടുണ്ടോയെന്ന് ചോദിച്ചപ്പോഴും കുട്ടിത്തം വിടാത്ത ഭാവത്തോടെയായിരുന്നു ഉത്തരം. ഇവിടുത്തെ എല്ലാ രാഷ്ട്രീയക്കാര്‍ക്കും ഞങ്ങളെയെല്ലാം അറിയാം. അതുകൊണ്ട് ആരും പ്രശ്‌നങ്ങള്‍ക്ക് വന്നിട്ടില്ല. ഒരു രാത്രി കലക്ടറേറ്റ് മൈതാനിയില്‍ പി കെ കുഞ്ഞാലിക്കുട്ടിക്ക് സ്വീകരണം കൊടുത്ത ദിവസം ചെറിയ സംഘര്‍ഷമുണ്ടായി. അപ്പോള്‍ കുറേ നേരം കട അടച്ചിട്ട് മാറി നിന്നു. സമയം കഴിഞ്ഞപ്പോള്‍ വീണ്ടും തുറന്നു. ആരും പ്രശ്‌നമുണ്ടാക്കിയിട്ടില്ല.

ഓസിയടിക്കുന്നവരെ കൈയ്യോടെ പിടിക്കുന്ന വിധം
തിരക്കുള്ള നേരത്ത് കൂടുതല്‍ തിരക്കാക്കുന്നവര്‍ പണം തരാതെ മുങ്ങുമെന്ന കാര്യം ഉറപ്പാണ്. അതുകൊണ്ടുതന്നെ അവരെ നോട്ട് ചെയ്തുവെക്കും. ശ്രദ്ധ തെറ്റുന്ന ഏതെങ്കിലും സമയത്ത് അവര്‍ മുങ്ങിയാല്‍ പെട്ടെന്നൊരു അന്വേഷണം നടത്തും. ബസ് സ്റ്റോപ്പിലും സമീപത്തുമൊക്കെ. ഒരിക്കല്‍ പണം തരാതെ മുങ്ങിയ ആളെ ബസ്സില്‍ നിന്നും പിടികൂടി പണം വാങ്ങിയിട്ടുണ്ട്. വിശന്നു വലഞ്ഞു വരുന്നവരോട് വിവരങ്ങള്‍ അന്വേഷിച്ച് അര്‍ഹതയുള്ളവരാണെങ്കില്‍ അവര്‍ക്ക് ഭക്ഷണം നല്കാറുണ്ട്. ആരേയും ആട്ടിപ്പായിക്കാറില്ലെന്ന് പറയുമ്പോള്‍ നാസറിന്റെ കണ്ണുകളില്‍ വയറു നിറഞ്ഞവന്റെ സംതൃപ്തി.
മലയാളത്തിനു പുറമേ ഹിന്ദിയും തമിഴും കന്നഡയും തെലുങ്കും അത്യാവശ്യം ഇംഗ്ലീഷും കൈകാര്യം ചെയ്യാന്‍ സാധിക്കുന്നതിനാല്‍ പിടിച്ചു നില്‍ക്കാനാവുന്നുണ്ടെന്ന് നാസര്‍. തെരുവ് ഗുണ്ടകളോ ഗുണ്ടാ പിരിവുകാരോ ബുദ്ധിമുട്ടിക്കാറില്ല.
പയ്യാമ്പലത്തെ ദിനേശ് ബീഡി ഓഫിസില്‍ ഹെഡ് ക്ലര്‍ക്കായിരുന്ന പരേതനായ മുഹമ്മദ് കോയയുടേയും ഹലീമയുടേയും മൂന്ന് മക്കളില്‍ രണ്ടാമനാണ് നാസര്‍. സഊദിയില്‍ ജോലി ചെയ്യുന്ന മുജീബും ബി എഡ് ബിരുദധാരി സാജിതയുമാണ് സഹോദരങ്ങള്‍. മൈമൂനയാണ് ഭാര്യ. നജ, അഫ്‌ലഹ് മക്കളാണ്.
ഉമ്മയും ഭാര്യയും മക്കളുമടങ്ങുന്ന കുടുംബത്തിനു പുറമേ തന്റെ സഹപ്രവര്‍ത്തകരായ അഞ്ച് പേരുടെ കുടുംബങ്ങളും പുലരുന്നത് ഈ തട്ടുകടിയിലൂടെയാണെന്ന് നാസറിന് നല്ല ബോധ്യമുണ്ട്. മാത്രമല്ല, കല്ലുമ്മക്കായ കൊണ്ടുവരുന്ന റംലയുടേയും പാര്‍വ്വതിയുടേയും കപ്പ നല്കുന്ന മാധവിയുടേയും പുട്ടുമായെത്തുന്ന സൈനബയുടേയും ഹലീമയുടേയും വെള്ളാപ്പവുമായെത്തുന്ന സമീറിന്റേയും വെള്ളം കൊണ്ടുവരുന്ന നസീറിന്റേയുമൊക്കെ കുടുംബങ്ങള്‍ ജീവിച്ചു പോകാന്‍ തന്റെ തട്ടുകട നിമിത്തമാകുന്നുവെന്നത് ഈ 36കാരനെ സന്തുഷ്ടനാക്കുന്നു..

വര്‍ഷങ്ങള്‍ക്കു മുമ്പൊരുനാള്‍ മുംബൈയിലെ തെരുവ്. ഗള്‍ഫിലേക്ക് പോകുന്ന സുഹൃത്തിനെ യാത്രയാക്കാന്‍ പോയതായിരുന്നു നാസര്‍. വഴിയില്‍ കണ്ടുമുട്ടിയ ഒരാള്‍ പെട്ടെന്ന് തിരിഞ്ഞ് നിന്നു ചോദിച്ചു: നാസര്‍ക്കയല്ലേ, കാല്‍ടെക്‌സില്‍ തട്ടുകട നടത്തുന്ന......

Saturday, August 7, 2010

'റോസാപ്പൂച്ചട്ടിയില്‍' ആരവങ്ങള്‍ അവസാനിക്കുന്നില്ല




(എ പി അബ്ദുല്ലക്കുട്ടിയുടെ എം പിക്കും എം എല്‍ എയ്ക്കും ഇടയിലെ 'സംഘര്‍ഷ' കാലഘട്ടത്തില്‍ 'പുടവ' വനിതാ മാസികയ്ക്ക് വേണ്ടി തയ്യാറാക്കിയത്)
കണ്ണൂര്‍ പള്ളിക്കുന്നിലെ 'റോസ് പോട്ട്'. ഈ വീടിന് മുമ്പില്‍ അഡ്വ. എ പി അബ്ദുല്ലക്കുട്ടിയെന്നോ ഡോ. വി എന്‍ റോസിനയെന്നോ ബോര്‍ഡ് തൂങ്ങുന്നില്ല. ഈ വീട്ടിലെ വക്കീല്‍ കക്ഷികളെ സ്വീകരിക്കാറില്ല. ഇവിടുത്തെ ഡോക്ടര്‍ പുതിയതെരുവിലാണ് ക്ലിനിക്ക് നടത്തുന്നത്- റോസ് ക്ലിനിക്ക്.
'ഇബാദത്ത് എടക്കാതെ കറാമത്ത് കിട്ടിയ' കഥയാണ് അബ്ദുല്ലക്കുട്ടിയുടെ പുതിയ അവസ്ഥയെ അദ്ദേഹത്തിന്റെ ഉമ്മ വിശേഷിപ്പിക്കുന്നത്. 'നീ ഇപ്പോഴാണ് വലിയ നേതാവായത്. പൊലീസൂം തോക്കുമൊക്കെ ഇപ്പോഴാണല്ലോ ഉള്ളത്' എന്ന ഉമ്മയുടെ തമാശ കലര്‍ന്ന വാചകത്തോടെയാണ് അബ്ദുല്ലക്കുട്ടി സംസാരിക്കാന്‍ തുടങ്ങിയത്. പണ്ട് ജില്ലാ പഞ്ചായത്ത് അംഗമായപ്പോഴും രണ്ടു തവണ എം പിയായപ്പോഴുമൊന്നും എ പി അബ്ദുല്ലക്കുട്ടി എന്ന 'അത്ഭുതക്കുട്ടിക്ക്' പൊലീസ് കാവലുണ്ടായിരുന്നില്ല. പക്ഷേ, ഇപ്പോള്‍ വീട്ടിനു മുമ്പില്‍ പൊലീസ് കാവല്‍ നില്‍ക്കുന്നുണ്ട്. പോകുന്ന ഇടങ്ങളിലെല്ലാം സെക്യൂരിറ്റിയുണ്ട്. പാര്‍ലമെന്റ് അംഗമല്ലാത്ത അബ്ദുല്ലക്കുട്ടക്കാണ് പാര്‍ലമെന്റ് അംഗമായിരുന്ന അബ്ദുല്ലക്കുട്ടിയേക്കാള്‍ 'വില'.
എം പിയായിരുന്ന കാലത്തേക്കാള്‍ തിരക്കാണ് എം പിയല്ലാത്ത അബ്ദുല്ലക്കുട്ടിക്ക്. സി പി എമ്മില്‍ നിന്നും പുറത്തേക്ക് പോയി കോണ്‍ഗ്രസില്‍ ചേര്‍ന്നതോടെ അബ്ദുല്ലക്കുട്ടിയുടെ തിരക്ക് പിന്നേയും വര്‍ധിച്ചു. നേരത്തെ കണ്ണൂരിലും പരിസരങ്ങളിലും ദല്‍ഹിയുമായിരുന്നു പ്രവര്‍ത്തന കേന്ദ്രമെങ്കില്‍ ഇപ്പോള്‍ കോണ്‍ഗ്രസിനു വേണ്ടി കേരളം മുഴുവന്‍ സഞ്ചരിക്കേണ്ടി വരുന്നു. കോണ്‍ഗ്രസിന്റേയും മുസ്‌ലിം ലീഗിന്റേയും നിരവധി പരിപാടികളില്‍ പങ്കെടുക്കാനുണ്ട്. എന്തായാലും തിരക്കോട് തിരക്ക്. ആളെ കാണാന്‍ പോലും കിട്ടാത്ത അവസ്ഥ.
എം പി സ്ഥാനത്തിന്റെ കാലാവധി കഴിഞ്ഞാല്‍ തനിക്കും മക്കള്‍ക്കും ഭര്‍ത്താവിനെ കാണാന്‍ കിട്ടുമെന്നും വീട്ടുകാര്യങ്ങള്‍ അദ്ദേഹം നോക്കിനടത്തുമെന്നും ഡോ. റോസിന ആഗ്രഹിച്ചിരുന്നു. പക്ഷേ, 'ഇബാദത്തെടുക്കാതെ കറാമത്ത് കിട്ടിയ' മനുഷ്യന് എവിടെയുണ്ട് നേരം? റോസിനയുടെ പരാതികളോട് അബ്ദുല്ലക്കുട്ടിക്ക് പറയാന്‍ മറുപടികളുണ്ട്- പൊതുപ്രവര്‍ത്തനത്തിന് ഇറങ്ങിയ ഒരാള്‍ക്ക് അയാള്‍ വിചാരിച്ചാല്‍ പോലും ജനങ്ങളില്‍ നിന്നും മാറി നിന്നുള്ള ജീവിതം ഉണ്ടാവുമെന്ന് തോന്നുന്നില്ല.
കണ്ണൂരില്‍ നിന്നും 10 കിലോമീറ്റര്‍ അകലെ നാറാത്ത് എന്ന ഗ്രാമത്തിലെ ടി പി മൊയ്തീന്റേയും എ പി സൈനബയുടേയും മകനാണ് എ പി അബ്ദുല്ലക്കുട്ടി. മാതാപിതാക്കളേയും സഹോദരങ്ങളേയും കുറിച്ച് ചോദിച്ചാല്‍ അദ്ദേഹത്തിന് പറയാനൊരു രസികന്‍ മറുപടിയുണ്ട്- 'ഒരേട്ടന്‍, ഒരേച്ചി, ഒരനിയന്‍, ഒരനിയത്തി, ഒരുപ്പ, ഒരുമ്മ- ഇങ്ങനെ എല്ലാം ഓരോന്നുവീതം. പടച്ചവന്റെ അനുഗ്രഹംകൊണ്ടും ഉമ്മ എന്നെ നടുമധ്യത്തില്‍ പെറ്റതുകൊണ്ടും എല്ലാവരേയും ഓരോന്നു വീതം കിട്ടിയ സന്തോഷമുള്ള ഒരാള്‍'.
മുസ്‌ലിം ഭൂരിപക്ഷ മേഖലയാണ് നാറാത്ത്. മലബാറിലെ മറ്റ് മുസ്‌ലിം ഭൂരിപക്ഷ പ്രദേശങ്ങളെയെല്ലാം പോലെ പത്താം ക്ലാസ് കഴിയുന്നതോടെ ഗള്‍ഫിലേക്ക് പറക്കുകയെന്നതായിരുന്നു നാറാത്തുകാരുടേയും ലക്ഷ്യം. എസ് എസ് എല്‍ സി കഴിഞ്ഞതോടെ അബ്ദുല്ലക്കുട്ടിയേയും ഗള്‍ഫിലേക്ക് അയക്കാനായിരുന്നു ഉപ്പ ആഗ്രഹിച്ചിരുന്നത്. എന്‍ജിനിയറായ മൂത്ത സഹോദരന്‍ എസ് എസ് എല്‍ സി കഴിഞ്ഞ അബ്ദുല്ലക്കുട്ടിക്ക് ഒരു ഉപദേശം കൊടുത്തു. എല്ലാവരേയും പോലെ കോളെജിലേക്ക് പോകേണ്ടതില്ല. ഐ ടി ഐയില്‍ ചേര്‍ന്ന് ഡ്രാഫ്റ്റ്‌സ്മാന്‍ സിവില്‍ പഠിക്കുക. പ്ലാനും എസ്റ്റിമേറ്റും വരയാന്‍ പഠിച്ചാല്‍ മാത്രം മതി. ഗള്‍ഫിലെത്തിയാല്‍ തൊഴില്‍ ഉറപ്പ്. അങ്ങനെയാണ് തളിപ്പറമ്പ് സര്‍ സയ്യിദ് കോളെജില്‍ പ്രീഡിഗ്രിക്ക് സെക്കന്റ് ഗ്രൂപ്പെടുത്ത് ചേര്‍ന്നിരുന്ന പയ്യന്‍ കണ്ണൂര്‍ ഐ ടി ഐയില്‍ മനസ്സില്ലാ മനസ്സോടെ എത്തിയത്. അവിടെയാണ് അബ്ദുല്ലക്കുട്ടിയെന്ന നാടറിഞ്ഞ നേതാവ് പിറന്നത്.
ഐ ടി ഐയില്‍ എത്തിയതോടെ എസ് എഫ് ഐയില്‍ ചേര്‍ന്ന അബ്ദുല്ലക്കുട്ടിക്ക് പിന്നെ വളര്‍ച്ചയുടെ കാലമായിരുന്നു. എസ് എഫ് ഐ നേതൃത്വത്തിലേക്ക് ഉയര്‍ന്ന അബ്ദുല്ലക്കുട്ടി സ്വകാര്യ മേഖലയില്‍ വിദ്യാഭ്യാസ സ്ഥാപനങ്ങള്‍ അനുവദിക്കുന്നതിനെതിരെ സമര രംഗത്തിറങ്ങി. അടിയും ജയില്‍വാസവും ജീവിതത്തെ മാറ്റിമറിച്ചു. ഐ ടി ഐ പഠനം പൂര്‍ത്തിയാക്കാനായില്ല. പിന്നീട് കണ്ണൂര്‍ എസ് എന്‍ കോളെജില്‍ ചേര്‍ന്ന് പ്രീഡിഗ്രിയും ബി എ മലയാളവും. അതിനു പിറകെ തിരുവനന്തപുരം ലോ അക്കാദമിയില്‍ നിന്നും എല്‍ എല്‍ ബി. 1996ല്‍ വളപട്ടണം ഡിവിഷനില്‍ നിന്നും കണ്ണൂര്‍ ജില്ലാ പഞ്ചായത്തില്‍ അംഗം. 1999ലും 2004ലും കണ്ണൂരിനെ പ്രതിനിധീകരിച്ച് പാര്‍ലമെന്റില്‍ അംഗത്വം. അതിനിടയില്‍ 1999ല്‍ എന്റോള്‍ ചെയ്തു.
ചെറുപ്പത്തില്‍ അബ്ദുല്ലക്കുട്ടി നാറാത്ത് അറിയപ്പെട്ടിരുന്നത് 'പള്ളിയില്‍ അവുല്ല' എന്നായിരുന്നു. എല്ലാ സമയത്തും പള്ളിയുമായുള്ള ബന്ധമാണ് അബ്ദുല്ലക്കുട്ടിയെന്ന നാട്ടുകാരുടേയും വീട്ടുകാരുടേയും അവുല്ലയെ പള്ളിയില്‍ അവുല്ലയാക്കിയത്. അബ്ദുല്ലക്കുട്ടിയെ പള്ളിയില്‍ വയദ് പറയുന്ന മുസ്‌ല്യാരുകുട്ടി ആക്കണമെന്നായിരുന്നു ഉമ്മയുടെ ആഗ്രഹം. ഉമ്മ ആഗ്രഹിച്ചതു പോലെ മകന്‍ നാടായ നാട്ടിലെല്ലാം പ്രസംഗിച്ചു നടന്നു, പക്ഷേ, മതമായിരുന്നില്ല രാഷ്ട്രീയമായിരുന്നെന്ന് മാത്രം.
കോണ്‍ഗ്രസുകാരനായിരുന്നു അബ്ദുല്ലക്കുട്ടിയുടെ ഉപ്പ. അടിയന്തരാവസ്ഥക്ക് ശേഷമുള്ള തെരഞ്ഞെടുപ്പ്. ഒന്‍പത് വയസ്സുകാരനായ അബ്ദുല്ലക്കുട്ടിയെ പുലര്‍ച്ചെ വിളിച്ചുണര്‍ത്തിച്ച് ഉപ്പ അടുത്തുള്ള രാമുണ്ണിയുടെ വീട്ടില്‍ പോയി ഇന്ദിരാഗാന്ധിയുടെ തെരഞ്ഞെടുപ്പ് വാര്‍ത്ത അറിഞ്ഞുവരാന്‍ അയച്ചു. അക്കാലത്ത് അബ്ദുല്ലക്കുട്ടിയുടെ വീട്ടില്‍ വൈദ്യുതിയും റേഡിയോയുമൊന്നും ഉണ്ടായിരുന്നില്ല. തറവാട്ടു വളപ്പിലെ കുടികിടപ്പുകാരനായിരുന്നു രാമുണ്ണി. ബീഡിത്തൊഴിലാളിയും കമ്മ്യൂണിസ്റ്റുകാരനുമായ രാമുണ്ണി അബ്ദുല്ലക്കുട്ടിക്ക് വാര്‍ത്ത പറഞ്ഞു കൊടുത്തു: 'പോയിട്ടു പറ നിന്റെ ഉപ്പാനോട്, ഓള് തോറ്റ് തുന്നംപാടി'. ഇതറിഞ്ഞ ഉപ്പ മരിച്ച വാര്‍ത്ത കേട്ടപോലെ ഒറ്റ ഇരുപ്പായിരുന്നെന്ന് അബ്ദുല്ലക്കുട്ടി ഓര്‍ക്കുന്നു. പിന്നീട് രണ്ടു ദിവസം അദ്ദേഹം ഭക്ഷണം കഴിക്കാന്‍ പോലും താത്പര്യം കാണിച്ചിരുന്നില്ല.
ഇന്ദിരാഗാന്ധിയോട് ഉപ്പയ്ക്കുള്ള ആദരവിനും രാമുണ്ണിയേട്ടനുള്ള വിരോധത്തിനുമിടയിലാണ് അബ്ദുല്ലക്കുട്ടിയുടെ വളര്‍ച്ച. കമ്മ്യൂണിസ്റ്റ് പ്രാദേശിക നേതാക്കളുടെ പാലുപോലുള്ള പെരുമാറ്റത്തില്‍ ആകര്‍ഷിക്കപ്പെട്ടാണ് താന്‍ കമ്മ്യൂണിസത്തിലേക്കെത്തിയതെന്ന് അബ്ദുല്ലക്കുട്ടി സാക്ഷ്യപ്പെടുത്തുന്നു.
ചെറിയ ടൗണായ പുതിയതെരുവിലെ അഞ്ച് ദന്തല്‍ ക്ലിനിക്കിലൊന്നാണ് ഡോ. റോസിനയുടേത്. പുതിയ തെരുവിലെ ഏക വനിതാ ദന്തിസ്റ്റിന് ക്ലിനിക്കില്‍ നല്ല തിരക്കാണ് അനുഭവപ്പെടുന്നത്. റോസ് ക്ലിനിക്ക് ആരംഭിച്ച് ഒരാഴ്ച കഴിഞ്ഞപ്പോഴാണ് രസകരമായ സംഭവമുണ്ടായത്. ക്ലിനിക്കിന് സമീപത്തെ ചര്‍ച്ചില്‍ നിന്നും ഫാദര്‍ വന്ന് ഡോക്ടറോട് പറഞ്ഞു: 'ഡോ. റോസിനയെ പള്ളിയിലൊന്നും കാണുന്നില്ലല്ലോ. ഞായറാഴ്ചയെങ്കിലും പള്ളിയില്‍ വന്നുകൂടെ.' ഡോ. റോസിന ക്രിസ്ത്യാനിയാണെന്ന് കരുതിയായിരുന്നു ഫാദര്‍ അങ്ങനെ ചോദിച്ചത്. 'ഞങ്ങള്‍ ഞായറാഴ്ച പള്ളിയില്‍ പോകാറില്ല അച്ചോ' എന്നായിരുന്നു ഡോക്ടറുടെ മറുപടി.
ബന്ദ്- ഹര്‍ത്താല്‍ വിരുദ്ധ നിലപാട്, ഉംറ, ഈദ് നമസ്‌ക്കാരം, നരേന്ദ്രമോഡിയുടെ വികസനത്തെ കുറിച്ചുള്ള പരാമര്‍ശം എന്നിവയിലൂടെയാണ് അബ്ദുല്ലക്കുട്ടി സി പി എമ്മിന് അനഭിമതനായത്. അങ്ങനെയാണ് പാര്‍ട്ടിയില്‍ നിന്ന് തരംതാഴ്ത്തലും സസ്‌പെന്‍ഷനും പുറത്താക്കലുമുണ്ടായത്. പാര്‍ട്ടി നേതൃത്വത്തിലിരിക്കെ ഉംറ ചെയ്ത അബ്ദുല്ലക്കുട്ടിക്കെതിരെ നടപടി സ്വീകരിക്കാന്‍ മുസ്‌ലിം പ്രതിഷേധം ഭയന്ന് സി പി എമ്മിന് കഴിഞ്ഞിരുന്നില്ല. പെരുന്നാള്‍ ദിവസം കണ്ണൂര്‍ ടൗണിലെ ഐ എസ് എം നേതൃത്വത്തിലുള്ള ഈദ്ഗാഹില്‍ പങ്കെടുത്തതിനും പാര്‍ട്ടിക്ക് നിശ്ശബ്ദത പാലിക്കേണ്ടി വന്നു. പക്ഷേ വികസന സ്വപ്നങ്ങളേയും നരേന്ദ്രമോഡിയേയും കൂട്ടിക്കെട്ടിയപ്പോള്‍ അത് അവസരമാക്കി പാര്‍ട്ടി നടപടി സ്വീകരിക്കുകയായിരുന്നു. അങ്ങനെ ദീര്‍ഘകാലത്തെ സി പി എം ബന്ധത്തില്‍ നിന്നും അബ്ദുല്ലക്കുട്ടി എന്ന അത്ഭുതക്കുട്ടി പുറത്തേക്ക് കടന്നു. ഇതിനു ശേഷമാണ് ഉമ്മ തന്റെ മകന് ഇബാദത്ത് എടുക്കാതെ കറാമത്ത് കിട്ടിയ കഥ പറഞ്ഞ് കളിയാക്കിയത്.
സി പി എമ്മില്‍ നിന്നും കോണ്‍ഗ്രസിലേക്കുള്ള തന്റെ മാറ്റം കാലുമാറ്റമല്ല കാഴ്ചപ്പാട് മാറ്റമാണെന്ന് അബ്ദുല്ലക്കുട്ടി പറയുമ്പോള്‍ അതില്‍ അദ്ദേഹത്തിന് ചൂണ്ടിക്കാണിക്കാന്‍ നിരവധി ന്യായങ്ങളുണ്ട്. കമ്മ്യൂണിസ്റ്റ് പ്രത്യയശാസ്ത്രത്തിലെ പോഴത്തരങ്ങളാണ് തന്നെ അതില്‍ നിന്നും മാറി നില്‍ക്കാന്‍ പ്രേരിപ്പിച്ചതെന്ന് അദ്ദേഹം പറയുന്നു. പാര്‍ട്ടി അറിയാതെ രഹസ്യമായാണ് ഉംറയ്ക്ക് പോയത്. പക്ഷേ, അത് പുറത്തറിഞ്ഞപ്പോള്‍ ഉര്‍വ്വശീ ശാപം ഉപകാരമായി. ഭൗതികവാദത്തിനും ആത്മീയതയ്ക്കുമിടയില്‍ കുറച്ചു കാലമായി വലിയ ആത്മസംഘര്‍ഷമായിരുന്നു അനുഭവിച്ചിരുന്നത്. മകന്റെ സുന്നത്ത് കര്‍മ്മം, കുട്ടികളുടെ മതപഠനം തുടങ്ങിയ കാര്യങ്ങളിലെല്ലാം തീരുമാനമെടുക്കുമ്പോള്‍ മനസ്സില്‍ വല്ലാത്ത സംഘര്‍ഷങ്ങള്‍ രൂപപ്പെട്ടിരുന്നു. ഒരു ന്യൂനപക്ഷ സഖാവിന് പലപ്പോഴും കോംപ്രമൈസ് ചെയ്യേണ്ടി വരും, അപ്പോള്‍ പിന്നെ തീരുമാനമെടുക്കാതെ വയ്യ. അതുകൊണ്ടു തന്നെ പാര്‍ട്ടിയേയും തന്റെ മനഃസാക്ഷിയേയും വഞ്ചിക്കാത്ത തീരുമാനമാണ് സ്വീകരിച്ചതെന്നും കാഴ്ചപ്പാട് മാറുകമാത്രമാണ് ഉണ്ടായതെന്നും അബ്ദുല്ലക്കുട്ടി വിശദീകരിക്കുന്നു.
പാര്‍ട്ടിയും കാഴ്ചപ്പാടും മാറിയപ്പോള്‍ അബ്ദുല്ലക്കുട്ടിയും വീടും ആക്രമിക്കപ്പെട്ടു. ഒരിക്കല്‍ കാറിനു നേരെ കല്ലേറ്, മറ്റൊരിക്കല്‍ വീട്ടിനു നേരെ ബോംബേറ്- എന്നാലും മാനസികമായി തകരാനും ഇതെല്ലാം ചിന്തിച്ചിരിക്കാനും അബ്ദുല്ലക്കുട്ടിക്ക് നേരമില്ല. തന്റെ കാര്യത്തില്‍ ഉമ്മയേക്കാള്‍ ധൈര്യം ഭാര്യക്കാണെന്ന് അബ്ദുല്ലക്കുട്ടി സാക്ഷ്യപ്പെടുത്തുന്നു.
അബ്ദുല്ലക്കുട്ടിക്കും റോസിനയ്ക്കും രണ്ടു മക്കളാണുള്ളത്. നാലാം തരത്തില്‍ പഠിക്കുന്ന അമന്‍ റോസും യു കെ ജി വിദ്യാര്‍ഥിനിയായ തമന്ന അബ്ദുല്ലയും.

Followers

Blog Archive

About Me

My photo
thalassery, muslim/ kerala, India