Wednesday, February 21, 2018

ക്യാപ്റ്റന്‍ വെറുമൊരു സിനിമയല്ല


മലയാളിക്ക് അത്രയൊന്നും പരിചിതമല്ലാത്ത പേരാണ് ബയോപിക് എന്നത്. സിനിമാ പ്രവര്‍ത്തകരോ ആസ്വാദകരോ മലയാളത്തില്‍ ആ പദം അധികം ഉപയോഗിച്ചിട്ടുമില്ല. ഈ മാസം ഒരാഴ്ചയുടെ ഇടവേളയില്‍ പുറത്തിറങ്ങിയ രണ്ട് സിനിമകളാണ് ബയോപിക് എന്ന പദത്തേയും അത്തരം ചിത്രങ്ങളേയും മലയാളികള്‍ക്ക് കൂടുതല്‍ പ്രിയങ്കരങ്ങളാക്കിയത്.
ഫെബ്രുവരി ഒന്‍പതിന് തിയേറ്ററുകളിലെത്തിയ കമലിന്റെ മാധവിക്കുട്ടി ചിത്രം ആമിയും ഫെബ്രുവരി പതിനാറിന് റിലിസായ ജി പ്രജേഷ് സെന്നിന്റെ വി പി സത്യന്റെ ജീവിതം പറയുന്ന ക്യാപ്റ്റനും. പ്രജേഷിന്റെ ക്യാപ്റ്റന്‍ മലയാളത്തിലെ ആദ്യ സ്‌പോര്‍ട്‌സ് ബയോപിക് എന്ന നേട്ടവും സ്വന്തമാക്കി.
ബയോപിക്ക് എന്ന് പറഞ്ഞിട്ടില്ലെങ്കിലും മലയാളി ഇത്തരത്തിലുള്ള കുറേ സിനിമകള്‍ കണ്ടിട്ടുണ്ട്- ബയോപിക്കാണെന്ന് അറിയാതെയാണെങ്കിലും. 1982ല്‍ പുറത്തിറങ്ങിയ റിച്ചാര്‍ഡ് ആറ്റന്‍ബറോയുടെ ഗാന്ധി തന്നെയാണ് ഇത്തരത്തില്‍ ഓര്‍മയില്‍ നില്‍ക്കുന്ന ഏറ്റവും പ്രമുഖമായ സിനിമ.
പറഞ്ഞുവരുമ്പോള്‍ ലെനിന്‍ രാജേന്ദ്രനും കമലും തന്നെയാവണം മലയാളത്തില്‍ ബയോപിക്കുകളെ കൂടുതല്‍ ഉപയോഗപ്പെടുത്തിയിട്ടുണ്ടാവുക. ലെനിന്‍ രാജേന്ദ്രന്‍ 1987ല്‍ സ്വാതിതിരുനാളിന്റെ ജീവിതം ആസ്പദമാക്കി സ്വാതിതിരുനാളും 2011ല്‍ രവിവര്‍മയെ കേന്ദ്രകഥാപാത്രമാക്കി മകരമഞ്ഞ് എന്നീ ചിത്രങ്ങള്‍ ചെയ്തിട്ടുണ്ട്. കമലാകട്ടെ 2012ല്‍ സെല്ലുലോയ്ഡും 2018ല്‍ ആമിയും ചെയ്തു.
1983ല്‍ കെ ജി ജോര്‍ജ് സംവിധാനം ചെയ്ത ലേഖയുടെ മരണം ഒരു ഫഌഷ് ബാക്ക്, 2009ല്‍ ഹരിഹരന്‍ സംവിധാനം ചെയ്ത കേരളവര്‍മ പഴശ്ശിരാജ, 2010ല്‍ ആര്‍ സുകുമാരന്‍ സംവിധാനം നിര്‍വഹിച്ച ശ്രീനാരായണഗുരു ചിത്രം യുഗപുരുഷന്‍, 2015ല്‍ ആര്‍ എസ് വിമല്‍ സംവിധാനം നിര്‍വഹിച്ച എന്ന് നിന്റെ മൊയ്തീന്‍, 2016ല്‍ വിനീത് ശ്രീനിവാസന്‍ സംവിധാനം ചെയ്ത ജേക്കബിന്റെ സ്വര്‍ഗ്ഗരാജ്യം, 2017ല്‍ പുറത്തിറങ്ങിയ ഹരികുമാര്‍ ചിത്രം ക്ലിന്റ് തുടങ്ങിയവയെല്ലാം ഈ ഗണത്തില്‍ പെടുന്നവയാണ്. വേറേയും നിരവധി സിനിമകളുണ്ടാവാം. പെട്ടെന്ന് ഓര്‍മയില്‍ കയറിവന്നവ രേഖപ്പെടുത്തിയെന്ന് മാത്രം. ഇതിനു പുറമേ കലാഭവന്‍ മണിയുടേയും എന്‍ എന്‍ പിള്ളയുടേയും ജീവിതങ്ങളെ ആസ്പദമാക്കിയുള്ള രണ്ട് ബയോപിക്കുകള്‍ അണിയറയില്‍ ഒരുങ്ങുന്നുണ്ട്. കൂടാതെ കായികതാരം അഞ്ജുബോബി ജോര്‍ജ്ജിനെ കുറിച്ചുള്ള സിനിമയും പറ്ഞ്ഞു കേട്ടിരുന്നു.
മലയാളത്തില്‍ അധികമൊന്നും ഉണ്ടായിട്ടില്ലെങ്കിലും മറ്റു ഭാഷകളില്‍ ഇത്തരം നിരവധി ചലച്ചിത്രങ്ങള്‍ പിറവി കൊണ്ടിട്ടുണ്ട്.
ബയോപിക്ക് ചിത്രങ്ങളെ കൂടുതല്‍ ശ്രദ്ധയാകര്‍ഷിക്കുന്ന വിധത്തിലേക്ക് മലയാളി പ്രേക്ഷകരിലേക്ക് എത്തിച്ചതിനുള്ള ക്രഡിറ്റ് തീര്‍ച്ചയായും ആമിക്കും ക്യാപ്റ്റനും തന്നെയാണ്. ഒരേ മാസത്തില്‍ തൊട്ടടുത്ത ആഴ്ചകളില്‍ റിലീസായ രണ്ട് സിനിമകളും പ്രേക്ഷകരുടെ ആദരവുകളും ബഹുമതികളും അഭിനന്ദനങ്ങളും ഏറ്റുവാങ്ങി മുന്നേറുകയാണെന്നത് ഏറെ ശ്രദ്ധേയമാണ്.
ഒരുപക്ഷേ, ഡോക്യുമെന്ററി പോലെയോ ഡോക്യുഡ്രാമ പോലെയോ വിരസമോ അര്‍ധ വിരസമോ ആയിത്തീര്‍ന്നേക്കാവുന്ന രണ്ട് സിനിമകളെയാണ് തിരക്കഥയുടേയും സംവിധാനത്തിന്റേയും മികവുകളിലൂടെ കൈത്തഴക്കം വന്ന കമലും ആദ്യമായി ക്യാമറയ്ക്കു പിന്നില്‍ പ്രവര്‍ത്തിച്ച പ്രജേഷ് സെന്നും കാഴ്ചക്കാരുടെ ഹൃദയങ്ങളിലേക്ക് കോരിയിടുന്നത്.

***********   ******* ****** ******* ******


വി പി സത്യന്‍ എന്ന ഇന്ത്യന്‍ ഫുട്ബാള്‍ ടീമിന്റെ ക്യാപ്റ്റനെ അദ്ദേഹം ജീവിച്ചിരുന്ന കാലത്തൊന്നും അധികമാരും അറിയാനും മനസ്സിലാക്കാനും ശ്രമിച്ചിട്ടില്ലെന്ന സത്യം കയ്പുള്ളതാണെങ്കിലും യാഥാര്‍ഥ്യമായിരുന്നു. സത്യന്‍ മരിച്ച ഒരു പതിറ്റാണ്ടിന് ശേഷമാണ് കേരളം അദ്ദേഹത്തിന് വേണ്ട ആദരവ് നല്കിയില്ലെന്ന് തിരിച്ചറിയുന്നത്- അതിന് ക്യാപ്റ്റന്‍ എന്നൊരു ചിത്രം വേണ്ടി വന്നു. എന്നാല്‍ ജീവിച്ചിരുന്ന കാലത്തുതന്നെ സത്യന്‍ ഈ സത്യം മനസ്സിലാക്കിയിരുന്നു. ഒരുപക്ഷേ, അദ്ദേഹത്തിന്റെ ഭാര്യയും അച്ഛനും അമ്മയുമെല്ലാം ഇക്കാര്യം തിരിച്ചറിഞ്ഞുണ്ടാവണം- അല്ല, അവര്‍ തിരിച്ചറിഞ്ഞിരുന്നു.
ഇന്ത്യ കണ്ട എക്കാലത്തേയും മികച്ച ഫുട്ബാളര്‍ക്ക് ഇതില്‍ കൂടുതല്‍ അപമാനം വേറെന്ത് വേണം. കഴിവുള്ളവരെ അവരുടെ ജീവിതകാലത്ത് തിരിച്ചറിയാത്ത മലയാളിയുടെ സ്വന്തം സ്വഭാവം തന്നെയാണ് വി പി സത്യന്‍ എന്ന ഇന്ത്യന്‍ ഫുട്ബാളര്‍ക്കും സമയത്തിന് മുമ്പേ മരണവിധി സമ്മാനിച്ചിട്ടുണ്ടാവുക. ആത്യന്തികമായി കേരള പൊലീസും ഇന്ത്യന്‍ ഫുട്ബാള്‍ ആരാധകരും തന്നെയാണ് വി പി സത്യന്‍ എന്ന പ്രതിരോധനിരക്കാരനെ പ്രതിരോധിക്കാനാവാത്ത മാനസികാവസ്ഥയിലേക്ക് തള്ളിവിട്ടത്.

*** **** **** **** **** **** ****


പ്രജേഷ് സെന്‍ എന്ന തിരക്കഥാകൃത്തും സംവിധായകനും വിജയിക്കുന്നത് വി പി സത്യന്‍ എന്ന മനുഷ്യന്റെ ദുരന്തങ്ങള്‍ വരച്ചു കാണിച്ചുകൊണ്ടല്ല, വി പി സത്യന്‍ എന്ന ഫുട്ബാള്‍ താരത്തിന്റേയും മനുഷ്യന്റേയും വിജയ കഥ വരച്ചുവെച്ചാണ്. ഒരു സംവിധായകന്‍ തന്റെ സിനിമയെ എത്രമാത്രം പോസിറ്റീവായി കാണുന്നു എന്നല്ല, ഒരു വ്യക്തിയെ എത്രയേറെ പോസിറ്റീവായി സമീപിക്കാനാവുന്ന എന്നാണ് വരച്ചുകാണിക്കാനാവുന്നുവെന്നാണ് ക്യാപ്റ്റനിലൂടെ തെളിയിക്കുന്നത്. പ്രജേഷ് സംവിധാനം ചെയ്ത ആദ്യ ചലച്ചിത്രമാണ് ക്യാപ്റ്റനെങ്കിലും അത്തരമൊരു ചെറിയ തോന്നല്‍ പോലും സിനിമയിലൊരിടത്തും അനുഭവപ്പെടുന്നില്ല എന്നത് അദ്ദേഹത്തിന്റെ ക്രാഫ്റ്റ് എടുത്തു കാണിക്കുന്നു.
1999ലെ സാഫ് ഗെയിംസില്‍ ഇറാനെതിരെയുള്ള മത്സരത്തില്‍ ക്രോസ് ബാറില്‍ തട്ടിത്തെറിക്കുന്ന പെനാല്‍ട്ടിയില്‍ നിരാശനായി മൈതാനത്തെ മണ്ണിലേക്ക് തലകുമ്പിട്ടിരിക്കുന്ന വി പി സത്യനെയാണ് പ്രേക്ഷകര്‍ ആദ്യം കാണുന്നതെങ്കിലും സിനിമ അവസാനിക്കുന്നത് തലയില്‍ ഒരു രാജ്യത്തിന്റേയും നൂറുകോടിയുടേയും സ്വപ്‌നങ്ങള്‍ ചേര്‍ത്തുവെച്ച് അതുപോലെ മറ്റൊരു പെനാല്‍ട്ടിയുടെ ഉത്തരവാദിത്വം ഏറ്റെടുത്ത് ഗോള്‍ വല നിറക്കുന്ന സത്യനിലൂടെയാണ്. ഒരു ദുരന്തത്തിലൂടെ അവസാനിപ്പിക്കേണ്ടിയിരുന്ന ദൃശ്യങ്ങള്‍ എത്ര മനോഹരമായാണ് കോടിക്കണക്കിന് പേരുടെ ഹൃദയങ്ങളില്‍ എക്കാലവും സൂക്ഷിക്കാവുന്ന ആത്മഹര്‍ഷമായി പ്രജേഷ് സെന്‍ അവശേഷിപ്പിച്ചിരിക്കുന്നത്!
ഫുട്ബാളിന് വേണ്ടി മാത്രം ജീവിച്ച ഒരു മനുഷ്യനായിരുന്നു വി പി സത്യന്‍. ഫുട്ബാളും ബുള്ളറ്റും കഴിഞ്ഞേ നീയുള്ളുവെന്ന് ഭാര്യ അനിതയോട് ആദ്യരാത്രി പറഞ്ഞ വി പി സത്യനെ വെള്ളിത്തിരയില്‍ കാണുമ്പോള്‍ അതൊരു സാങ്കല്‍പ്പിക കഥയല്ലെന്ന് സാക്ഷ്യപ്പെടുത്താന്‍ അദ്ദേഹത്തിന്റെ ഭാര്യ അനിതയുണ്ടല്ലോ.
ഇന്ത്യയും കേരളവും വി പി സത്യനോട് ചെയ്തതെന്തെന്ന് സിനിമ എടുത്തു പറയുന്നുണ്ട്. മുഖ്യമന്ത്രി കെ കരുണാകരന്‍ ഊതിക്കത്തിക്കാന്‍ ശ്രമിച്ച കേരള പൊലീസിലെ ആ തീപ്പൊരി പിന്നീട് ആരും ചെറുകാറ്റുകൊണ്ടുപോലും ഒന്നുണര്‍ത്തിയില്ല. പകരം ഫുട്ബാളിനെ പ്രണയിച്ച മനുഷ്യന്‍ കൊല്‍ക്കത്തയില്‍ കളിക്കാന്‍ പോയതിന് പണിഷ്‌മെന്റ് വാങ്ങിക്കൊടുക്കാനായിരുന്നു ധൃതി കൂട്ടിയത്. ഏത് പണിഷ്‌മെന്റും മുഖ്യമന്ത്രിയോട് പറഞ്ഞാല്‍ മാറ്റിയെടുക്കാമായിരുന്നിട്ടും തന്റെ തട്ടകം കളിയാണെന്നും അത് ലോകം തിരിച്ചറിയണമെന്നും വാശിയുണ്ടായിരുന്ന സത്യന്‍ ആരോടും റെക്കമന്റിനോ ആരുടേയും കാലുപിടിക്കാനോ പോയില്ല. തന്നെ വേണ്ടാത്ത ലോകത്തോട് വിട പറഞ്ഞ് രാത്രിയ്ക്കു രാമാനം ബംഗാളിലേക്ക് വണ്ടി കയറുമ്പോള്‍ സത്യന് മുമ്പില്‍ വലിയൊരു ലോകവും അതിലേറെ വലിയ പ്രതീക്ഷയുമുണ്ടായിരുന്നു.
കുട്ടിക്കാലത്ത് കല്ലുകൊണ്ടടിച്ച് പൊട്ടിച്ച ആ കാലുതന്നെയായിരുന്നു സത്യന്റെ നിര്‍ഭാഗ്യം; അതേ കാലുകള്‍ തന്നെയായിരുന്നു മികവിന്റേയും ഭാഗ്യത്തിന്റേയും ചിറകുകള്‍ അദ്ദേഹത്തിന് സമ്മാനിച്ചതും. ഒടുവില്‍ അണ്‍ഫിറ്റിന്റെ പേരില്‍ കൊല്‍ക്കത്തയും ഇന്ത്യന്‍ ടീമും മദിരാശിയിലെ കോച്ചിംഗുമെല്ലാം സത്യന് നഷ്ടസ്വപ്നങ്ങള്‍ മാത്രമായി.
മാനസിക പ്രയാസത്തിന്റെ വലിയ അലട്ടലുകളുണ്ടാവുമ്പോള്‍ ഭാര്യയ്ക്ക് കത്തെഴുതിവെച്ച് ആത്മഹത്യയ്ക്കുള്ള പുറപ്പാട് സ്ഥിരം സംഭവമായി. ഓരോ കത്തെഴുത്തിന് ശേഷവും കൂടുതല്‍ ഫ്രഷായും അതിലേറെ മാനസിക സമാധാനത്തോടെയും രണ്ടോ മൂന്നോ ദിവസം കഴിഞ്ഞ് മടങ്ങിയെത്തുന്ന സത്യന്‍ വീണ്ടും പതിയെ മാനസിക പ്രയാസങ്ങളിലേക്ക് ഉരുണ്ടുവീഴും. തനിക്ക് കളിക്കാനാവില്ലെന്ന ദുരന്തം ഒരിക്കലും അദ്ദേഹത്തിന് അംഗീകരിക്കാനാവില്ലായിരുന്നു.

ഇന്ത്യന്‍ ടീമിന്റെ ക്യാപ്റ്റായി കത്തി നില്‍ക്കുന്ന കാലത്തുപോലെ വി പി സത്യന്‍ എന്ന പ്രമുഖനെ പലരും തിരിച്ചറിഞ്ഞിരുന്നില്ല. വിമാനത്താവളത്തില്‍ വെച്ച് അനിത വി പി സത്യന്റെ പത്രവാര്‍ത്തകള്‍ ഉറക്കെ വായിക്കുന്നതുപോലും ഇതാ വി പി സത്യന്‍ ഇവിടെയുണ്ടെന്ന് ലോകത്തെ അറിയിക്കാനായിരുന്നു. എന്നിട്ടും അതേ വിമാനത്താവളത്തില്‍ ഓട്ടോഗ്രാഫിന് പേന ചോദിച്ചെത്തുന്ന രണ്ട് പെണ്‍കുട്ടികള്‍ സത്യനെ തിരിച്ചറിഞ്ഞുവെന്നാണ് കാഴ്ചക്കാര്‍ ധരിക്കുക. അകത്ത് വി ഐ പി ലോഞ്ചില്‍ രവിശാസ്ത്രിയുണ്ടെന്നും അദ്ദേഹത്തിന്റെ ഓട്ടോഗ്രാഫിനാണ് വി പി സത്യനോട് പേന വാങ്ങിയതെന്നുമുള്ള കയ്പുള്ള സത്യം അല്‍പം കൂടി കഴിഞ്ഞാണ് പ്രേക്ഷകന്‍ തിരിച്ചറിയുക. ഈ മുഷിപ്പ് മാറ്റാന്‍ സത്യനോട് നമുക്കൊരു ചായ കുടിച്ചാലോ എന്നു ചോദിക്കുന്ന അനിത, ചായക്കിടയില്‍ തിരിഞ്ഞു നോക്കുമ്പോള്‍ കാണുന്ന പ്രമുഖ വ്യക്തിയെ പരിചയപ്പടുത്തി തരാമോ എന്ന് സത്യനോട് ചോദിക്കുന്നുണ്ട്. ആരാണ് പ്രമുഖനെന്ന് നോക്കിയ സത്യന്‍, അയാള്‍ ഭയങ്കര ചൂടനാണെന്ന് കേട്ടിട്ടുണ്ടെന്നും പരിചയപ്പെടാന്‍ താനില്ലെന്നും പറയുമ്പോള്‍, നിങ്ങള്‍ ഇന്ത്യന്‍ ഫുട്ബാള്‍ ടീമിന്റെ ക്യാപ്റ്റനാണെന്ന് പറഞ്ഞാല്‍ മതിയെന്നായിരുന്നു അനിതയുടെ പക്ഷം.
പ്രമുഖനെ നോക്കാതെ കടന്നു പോകാന്‍ ശ്രമിക്കുന്ന വി പി സത്യനെ പിറകില്‍ നിന്നും 'മിസ്റ്റര്‍ ക്യാപ്റ്റന്‍, എന്താണ് മൈന്റ് ചെയ്യാതെ പോകുന്നതെന്ന' വിളി അക്ഷരാര്‍ഥത്തില്‍ പ്രേക്ഷകരെ അത്ഭുതപ്പെടുത്തും. പതിറ്റാണ്ടുകളായി മലയാള ചലച്ചിത്രത്തിന് പരിചയമുള്ള ശബ്ദത്തിന്റെ ഉടമയെ കാണുമ്പോഴാണ് ദൈവം കൗതുകങ്ങള്‍ ഒളിപ്പിച്ചു വെക്കുന്നത് എത്ര മനോഹരമായാണെന്ന് തിരിച്ചറിയുക. ഇന്ത്യന്‍ സിനിമയിലെ അത്ഭുതങ്ങളിലൊന്നും മലയാള സിനിമയുടെ സ്വകാര്യ അഹങ്കാരവുമായ മമ്മൂട്ടിയായിരുന്നു വി പി സത്യനെ തിരിച്ചറിഞ്ഞ് പിറകില്‍ നിന്ന് വിളിക്കുന്നത്. തന്നെ ആരും തിരിച്ചറിയാത്തതുകൊണ്ടാണ് താന്‍ മൈന്റ് ചെയ്യാതെ പോയതെന്ന് ഇന്ത്യന്‍ ടീമിന്റെ ക്യാപ്റ്റന്‍ പറയുമ്പോള്‍ നിങ്ങള്‍ക്കും ഇന്ത്യന്‍ ഫുട്ബാള്‍ ടീമിനും ഒരു സുവര്‍ണ്ണ കാലം വരുമെന്ന് മമ്മൂട്ടി ആംശസിക്കുന്നു. അനിതയ്‌ക്കൊരു ഓട്ടോഗ്രാഫ് വേണമെന്ന സത്യന്റെ ആവശ്യത്തിന് വിമാന ടിക്കറ്റിന് മുകളില്‍ 'ക്യാപ്റ്റന്റെ അനിതയ്ക്ക് സ്‌നേഹത്തോടെ മമ്മൂക്ക' എന്നെഴുതി ഒപ്പിട്ടു കൊടുത്ത മമ്മൂട്ടി, കേരളം അദ്ദേഹത്തോട് കാണിച്ച അവഗണനയ്ക്കാണ് പ്രായശ്ചിത്തം ചെയ്തിരിക്കുന്നത്.

ക്യാപ്റ്റനില്‍ കടന്നു വരുന്ന മമ്മൂട്ടിയും കമാല്‍ വരദൂരും വി ആര്‍ സുധീഷുമൊക്കെ, ആമിയില്‍ വള്ളത്തോളും കുട്ടികൃഷ്ണമാരാരും ചങ്ങമ്പുഴ കൃഷ്ണപിള്ളയും ബാലചന്ദ്രന്‍ ചുള്ളിക്കാടും വിജയലക്ഷ്മിയും ഉള്‍പ്പെടെയുള്ള എഴുത്തുകാര്‍ കടന്നെത്തി ആഹ്ലാദത്തിന്റെ സാംസ്‌ക്കാരിക ലോകം പണിയുന്നൊരു അനുഭവം പ്രദാനം ചെയ്യുന്നുണ്ട്.

ക്യാപ്റ്റന്‍ സത്യനെ അനശ്വരനാക്കാന്‍ ജയസൂര്യ നടത്തിയ ശ്രമങ്ങളെല്ലാം വിജയിച്ചിട്ടുണ്ട്. ജയസൂര്യയുടെ സത്യനോട് കിടപിടിച്ചു തന്നെയാണ് അനു സിതാരയുടെ അനിതയും മികച്ച പ്രകടനം കാഴ്ചവെക്കുന്നത്.
കൊറിയക്കെതിരെയുള്ള മത്സരത്തില്‍ പെനാല്‍ട്ടി ഷൂട്ടൗട്ടിന് സ്വയം തയ്യാറായി മുന്നോട്ടെത്തി ഗോളടിച്ച് ഇന്ത്യന്‍ ടീമിനെ വിജയിപ്പിച്ച് ഗ്രൗണ്ടില്‍ തല കുമ്പിട്ട ക്യാപ്റ്റനോട് 'എന്തൊരു റിസ്‌കാണ് സത്യാ നീയെടുത്തത്' എന്ന സഹ കളിക്കാരന്റെ ചോദ്യത്തോട് നൂറൂകോടി ജനങ്ങളുടെ സ്വപ്നങ്ങളുടെ ശ്വാസം നിറച്ചാണ് പന്താണ് താന്‍ തട്ടിയതെന്ന സത്യന്റെ മറുപടി തന്നെയാണ്, അവസാന ഭാഗത്ത് മകള്‍ക്ക് ഫുട്ബാളില്‍ സ്വന്തം ശ്വാസം ഊതിനിറക്കുമ്പോഴും പ്രേക്ഷകന് കിട്ടുന്നത്. മകളേ, ഇത് അച്ഛന്റെ ശ്വാസമാണ്, ഇനിയെപ്പോഴും അച്ഛന്‍ കൂടെയുണ്ടാകും പേടിക്കേണ്ടെന്ന വാക്കുകള്‍ എത്ര വലിയ ആശയമാണ് കൈമാറുന്നത്.
നാട്ടില്‍ ആദരവ് സ്വീകരിക്കാന്‍ പോയപ്പോള്‍ അമ്മയേയും പെങ്ങളേയും കണ്ടില്ലെന്നും അവരെ കാണണമെന്നും പറഞ്ഞ് തലശ്ശേരിക്ക് പുറപ്പെട്ട സത്യന്‍ റെയില്‍വേ സ്റ്റേഷനില്‍ ഒറ്റക്കാലുമായി ഭിക്ഷ യാചിക്കാനെത്തിയ യുവതിക്ക് തന്റെ പേഴ്‌സിലുള്ള പണമെല്ലാം നല്കുകയാണ്. തന്റെ കാല്‍ മുറിക്കേണ്ടി വരുമെന്ന് ഭയന്ന സത്യന്, കാലില്ലാത്ത തന്നെ സങ്കല്‍പ്പിക്കാനേ സാധിക്കുമായിരുന്നില്ല. പല്ലാവരം റെയില്‍വേ സ്റ്റേഷനിലേക്ക് വന്ന തീവണ്ടി വി പി സത്യനെന്ന ഇന്ത്യ കണ്ട എക്കാലത്തേയും മികച്ച പ്രതിരോധ നിരക്കാരനേയും പത്തു തവണ ഇന്ത്യന്‍ ഫുടബാളിന്റെ ക്യാപ്റ്റനായിരുന്ന മികച്ച കളിക്കാരനേയും കളികളില്ലാത്ത ലോകത്തേക്ക് കൂട്ടിക്കൊണ്ടു പോവുകയായിരുന്നു.
തീവണ്ടിയുടെ അനൗണ്‍സ്‌മെന്റ് പോലും കണ്ണൂരിലെ ഫുട്ബാള്‍ ഗ്രൗണ്ടില്‍ നടക്കുന്ന അനൗണ്‍സ്‌മെന്റായും റെയിലിലെ മാലിന്യങ്ങള്‍ക്കു മേല്‍ ജീവനക്കാരി വിതറുന്ന കുമ്മായം ഫുട്ബാള്‍ ഗ്രൗണ്ടിലെ വരക്കുന്ന വരയായുമാണ് അവസാനം പോലും സത്യന്‍ സങ്കല്‍പ്പിക്കുന്നത്.
രഞ്ജിപണിക്കരുടെ കോച്ച് ജാഫര്‍, എവിടെ കളിയുണ്ടായാലും അവിടെയെത്തുന്ന സിദ്ദീഖിന്റെ മൈതാനമെന്ന കഥാപാത്രം, സത്യന്റെ എക്കാലത്തേയും മികച്ച സുഹൃത്തായിരുന്ന ഷറഫലി, ജനാര്‍ദ്ദനന്റെ മുഖ്യമന്ത്രി കെ കരുണാകരന്‍ തുടങ്ങിയവയെല്ലാം മനസ്സില്‍ തങ്ങി നില്‍ക്കുന്ന കഥാപാത്രങ്ങളായിരുന്നു. ഫുട്ബാളിലേക്ക് കാറ്റ് നിറക്കാന്‍ വായവെച്ച് ഊതുന്ന ജയസൂര്യയുടെ ക്ലോസപ്പ് ഷോട്ട് മതി ഈ സിനിമ എത്രമാത്രം സത്യനെ ഉള്‍ക്കൊണ്ടിട്ടുണ്ടെന്ന് തിരിച്ചറിയാന്‍.
പ്രജേഷ് സെന്‍ എന്ന തിരക്കഥാകൃത്തില്‍ നിന്നും സംവിധായകനില്‍ നിന്നും മലയാള സിനിമ കൂടുതല്‍ ആഗ്രഹിക്കാന്‍ ഈ സിനിമ കാരണമാകുന്നുണ്ട്. അതുകൊണ്ടുതന്നെ പ്രജേഷ് എന്ന മുന്‍കാല മാധ്യമ പ്രവര്‍ത്തകനേക്കാള്‍ വലിയ ഉത്തരവാദിത്വങ്ങളാണ് അദ്ദേഹം തോളിലേറ്റിയിരിക്കുന്നത്.
ലോകകപ്പ് ഫുട്ബാള്‍ മത്സരങ്ങള്‍ വര്‍ഷമിട്ട് കാണിച്ച് കാണികളെ അത്ഭുതപ്പെടുത്തുന്ന ടൈറ്റില്‍ കാര്‍ഡില്‍ തുടങ്ങി, റേഡിയോ കമേന്ററിയും കളി കാണുന്നതിനിടില്‍ വൈദ്യുതി മുടങ്ങുമ്പോള്‍ ഇലക്ട്രിസിറ്റി ഓഫിസിന് മുമ്പില്‍ ബഹളം വെക്കുകയും ലൈന്‍മാനെ തൂക്കിയെടുത്ത് വെളിച്ചം തെളിയിക്കുകയും ചെയ്യുന്നതില്‍ വരെ ഒരു കാലഘട്ടം പുനഃസൃഷ്ടിച്ച് അതിലേക്ക് പ്രേക്ഷകരെ എത്തിക്കാന്‍ സിനിമയ്ക്ക് കഴിയുന്നു.

സ്‌പോര്‍ട്‌സ് ചാനലില്‍ ഫുട്ബാള്‍ കാണുന്നതുപോലെ, കളിക്കളത്തിലെ പന്തിനും കാലുകള്‍ക്കുമൊപ്പം പായുന്ന ക്യാമറ നല്ലൊരു ഫുട്ബാള്‍ കാണുന്ന സുഖമാണുണ്ടാക്കിയത്. റോബി വര്‍ഗ്ഗീസ് രാജിന്റെ ഛായാഗ്രഹണം, ഗോപിസുന്ദറിന്റെ സംഗീതം തുടങ്ങി എല്ലാ നന്മകളും ഒരു സിനിമയില്‍ ഒന്നിക്കണമെന്ന് ദൈവം നേരത്തെ തന്നെ കരുതിവെച്ചിരുന്നു.
ക്യാപ്റ്റനില്‍ സത്യനായ ജയസൂര്യയ്ക്കും അനിതയായ അനു സിതാരയ്ക്കും ഏറ്റെടുക്കുന്ന കഥാപാത്രങ്ങളെ ഏറ്റവും മികച്ചതാകുന്ന സിദ്ദീഖിനും സംവിധായകന്‍ പ്രജേഷ് സെന്നിനും മാത്രമല്ല, ഇത്തരമൊരു സിനിമ നിര്‍മിക്കാന്‍ തയ്യാറായ ടി എല്‍ ജോര്‍ജ്ജിനും അഭിനന്ദനത്തിന്റെ ഒരായിരം പൂച്ചെണ്ടുകള്‍.
ഒരു കാലത്ത് തങ്ങള്‍ തിരിച്ചറിയാതെ പോയ വി പി സത്യനെന്ന പ്രതിഭയെ മലയാളം ആത്മഹര്‍ഷത്തോടെ നെഞ്ചോട് ചേര്‍ക്കുന്നതും 'സത്യാ മാപ്പ്' എന്ന ഏറ്റുപറയുന്നതും കൂടിയാണ് ക്യാപ്റ്റന്‍.


Wednesday, February 14, 2018

സമര്‍പ്പണമാണ് ആമി

ആമി എന്ന ചലച്ചിത്രം കമല്‍ എന്ന സംവിധായകനായിരിക്കില്ല, കമല്‍ എന്ന തിരക്കഥാകൃത്തിനും സംഭാഷണ രചയിതാവിനുമായിരിക്കും കടുത്ത വെല്ലുവിളി സൃഷ്ടിക്കുകയെന്നാണ് കരുതിയിരുന്നത്. ആ കാരണം തന്നെയാണ് ആമി കാണാനുള്ള ആദ്യപ്രചോദനവും.
കമലാദാസ്, കമലാ സുരയ്യ തുടങ്ങി ഏതുപേരില്‍ വിളിച്ചാലും മലയാളികള്‍ക്ക് അവര്‍ മാധവിക്കുട്ടിയാണ്. വ്യത്യസ്തമായ ശൈലിയില്‍ കഥകള്‍ എഴുതുകയും ഒരേ സമയം അത്ഭുതപ്പെടുത്തുകയും വിവാദങ്ങളുണ്ടാക്കുകയും ചെയ്ത എഴുത്തുകാരി. മലയാളിക്കപ്പുറമാണ് കമലാദാസും അവരുടെ ഇംഗ്ലീഷ് രചനകളും. കമലാ ദാസിനേക്കാള്‍ മലയാളികളോട് അടുത്ത് നില്‍ക്കുന്നത് കമലാ സുരയ്യയായിരിക്കും. അതാകട്ടെ അവരുടെ രചനകളേക്കാളേറെ മതംമാറ്റം സൃഷ്ടിച്ച വിവാദങ്ങള്‍ ഉണ്ടാക്കിക്കൊടുത്ത അടുപ്പവും!
മാധവിക്കുട്ടിയുടെ രചനകള്‍ വായിച്ചവര്‍ക്കറിയാം അവരുടെ ഭാഷയുടെ നൈര്‍മല്യം. വശ്യമായ ഭാഷയില്‍ എഴുതുന്ന അവരെ വശ്യമായ രൂപമെന്നും പെരുമാറ്റമെന്നുമൊക്കെ പറഞ്ഞ് പരമാവധി അവഹേളിക്കുന്ന രൂപത്തിലേക്ക് മാറ്റാനായിരുന്നു മലയാളികള്‍ക്ക് എക്കാലവും താത്പര്യമുണ്ടായിരുന്നത്. ഒരുപക്ഷേ, 'എന്റെ കഥ'യായിരിക്കണം സാധാരണ വായനക്കാരെകൊണ്ടും എല്ലാം മഞ്ഞയും നീലയുമായി കാണാന്‍ ആഗ്രഹിക്കുകയോ ശ്രമിക്കുകയോ ചെയ്യുന്ന സ്ഥിരം നമ്മുടെ മലയാളി രീതിക്കും അവരെ അത്തരത്തില്‍ ചിത്രീകരിക്കാന്‍ താതപര്യമുണ്ടാക്കിയത്. 'എന്റെ കഥ' നിര്‍ത്തിയിടത്താണല്ലോ പമ്മന്റെ 'ഭ്രാന്ത്' തുടങ്ങുന്നത്!!
മഞ്ജുവാര്യര്‍ എന്ന അനുഗ്രഹീത നടിയുടെ നെറ്റിയില്‍ വലിയ വട്ടപ്പൊട്ടും കാതിലും കഴുത്തിലും ആഭരണങ്ങളും അണിയിച്ചും വര്‍ണ്ണപ്പകിട്ടുള്ള സാരിയുടുപ്പിച്ചും രൂപംകൊണ്ടും ഭാവംകൊണ്ടും മാത്രമേ മാധവിക്കുട്ടിയാക്കാനാവുകയുള്ളുവെന്ന് മറ്റാരേക്കാളും നന്നായി അറിയുന്നയാള്‍ സംവിധായകന്‍ കമല്‍ തന്നെയായിരിക്കണം. അതുകൊണ്ടുതന്നെയാണ് മാധവിക്കുട്ടിയുടെ ഭാഷയോട് കിടപിടിക്കുന്ന രീതിയില്‍ തിരക്കഥയും സംഭാഷണവും ഒരുക്കുന്നത് വെല്ലുവിളിയാവുന്നതും!
ആമിയുടെ തിരക്കഥയും സംഭാഷണവും ഒരുപോലെ കവിത തുളുമ്പുന്നതാക്കാന്‍ കമല്‍ വളരെയേറെ ശ്രദ്ധിച്ചിട്ടുണ്ട്. ആമി മാധവിക്കുട്ടിയോട് ചെയ്യുന്ന അനീതിയാവരുതെന്ന് അദ്ദേഹത്തിന് നിഷ്‌കര്‍ഷയുണ്ടാകണം. അതില്‍ കമല്‍ ഒരായിരം തവണ വിജയിക്കുകയും ചെയ്തിട്ടുണ്ട്. സംഭാഷണങ്ങളിലെ ചാരുതയും ശൈലിയും, പഴയ കൊല്‍ക്കത്തയും മുംബൈയും മാത്രമല്ല പുന്നയൂര്‍ക്കുളവും പുനഃസൃഷ്ടിക്കാനെടുത്ത പ്രയത്‌നം, മികച്ച ഫ്രെയിമുകള്‍, റഫീഖ് അഹമ്മദിന്റെ വരികളേയും ജയചന്ദ്രന്റെ സംഗീതത്തേയും ശ്രേയഘോഷാലിന്റെ ആലാപനത്തേയും പലയിടങ്ങളില്‍ തുടര്‍ച്ച നഷ്ടപ്പെടുത്താതെയുള്ള കോര്‍ത്തു വെക്കലുകള്‍ തുടങ്ങി എല്ലാ കാര്യങ്ങളിലും കടുത്ത ശ്രദ്ധയോടെയും അതിലേറെ പ്രതിബദ്ധതയോടെയും കമല്‍ പ്രവര്‍ത്തിച്ചിരിക്കുന്നു. ഒരുപക്ഷേ, മലയാളം മാധവിക്കുട്ടിയോട് എന്തെങ്കിലുമൊക്കെ പാതകങ്ങള്‍ ചെയ്തിട്ടുണ്ടെങ്കില്‍ അതിനുള്ള പരിഹാരമാണ് ആമി.
അനൂപ് മേനോന്‍ അവതരിപ്പിച്ച അലി അക്ബര്‍ എന്ന കഥാപാത്രം പോസ്റ്ററുകളിലെവിടേയും പ്രത്യക്ഷപ്പെടാത്തതുകൊണ്ടുതന്നെ ആ കഥാപാത്രത്തിന്റെ കടന്നുവരവ് വല്ലാത്ത അത്ഭുതവും അതിലേറെ കൗതുകവുമാണ് പ്രേക്ഷകരില്‍ സൃഷ്ടിക്കുന്നത്. ടൊവിനോ അവതരിപ്പിച്ച ശ്രീകൃഷ്ണനാകട്ടെ വളരെയധികം ഇഷ്ടം തോന്നുന്ന കഥാപാത്രവും!
ഇടപ്പള്ളി ലുലുവില്‍ നടന്ന ആമി ഓഡിയോ റിലീസില്‍ കമല്‍, മഞ്ജു വാര്യര്‍, ടൊവിനോ, മുരളി ഗോപി, ഡോ. സുലോചന നാലാപ്പാട്, മാധവിക്കുട്ടിയുടെ കുട്ടിക്കാലങ്ങള്‍ അവതരിപ്പിച്ച പെണ്‍കുട്ടികള്‍ തുടങ്ങി നിരവധി പേര്‍ പങ്കെടുത്ത ചടങ്ങില്‍ ടൊവിനോയുടേയും അനൂപ് മേനോന്റേയും കഥാപാത്രങ്ങള്‍ സസ്‌പെന്‍സാണെന്നും ഇപ്പോള്‍ പറയുന്നില്ലെന്നും കമല്‍ പറഞ്ഞിരുന്നു. മാധവിക്കുട്ടി എന്ന കഥാപാത്രമല്ലാതെ മഞ്ജു വാര്യര്‍ ഉള്‍പ്പെടെയുള്ള അഭിനേതാക്കളാരും സിനിമയിലുടനീളം പ്രത്യക്ഷപ്പെടാതിരിക്കുമ്പോഴും ടൊവിനോയുടെ ശ്രീകൃഷ്ണന്‍ ആദ്യം മുതല്‍ അവസാനം വരെ ഒരേ രീതിയില്‍ കടന്നുവരുന്നുവെന്നതും ശ്രദ്ധേയമാണ്.
ജീവചരിത്രമാണ് പറഞ്ഞുപോകുന്നതെങ്കിലും അവയെ പല സമയങ്ങളിലും പല കാലങ്ങളിലുമായി പ്രേക്ഷകരെ മുഷിപ്പിക്കാതെ ചേര്‍ത്തുവെച്ചിട്ടുണ്ട് ആമി. അപ്രതീക്ഷിതമായി സിനിമ അവസാനിപ്പിച്ചുകൊണ്ട് ഞെട്ടിക്കുകയും ചെയ്യുന്നുണ്ട് കമല്‍.
കമലയുടെ വിഭ്രാന്തികളേയും കാഴ്ചയ്ക്കുള്ളിലെ കാഴ്ചകളേയും കമലയുടെ ജീവിതം പോലെ പ്രേക്ഷകര്‍ക്ക് മുമ്പില്‍ വരച്ചുവെക്കാന്‍ ടൈറ്റില്‍ കാര്‍ഡ് മുതല്‍ അവസാന കവിതാശകലം വരെ കമലിന് കഴിഞ്ഞിരിക്കുന്നു.
കേവലമൊരു സിനിമയല്ല; സമര്‍പ്പണമാണ് ആമി.

Saturday, February 10, 2018

ശരിക്കും 'ഈട'ത്തന്നെയാണ് ഈട!


പേര് തന്നെയായിരുന്നു ആദ്യത്തെ ആകര്‍ഷണീയത- ഈട. സിനിമാ പോസ്റ്ററുകള്‍ കണ്ടപ്പോള്‍, 'ഇത് ഞമ്മളെ ഈട തന്നെയോളി' എന്നൊരു തോന്നലുണ്ടാക്കാന്‍ ആ വാചകത്തിന് കഴിഞ്ഞുവെന്നത് തികച്ചും സത്യമാണ്. പിന്നീട് കൂടുതല്‍ അന്വേഷിച്ചപ്പോള്‍ അനിയനാണ് പറഞ്ഞത്, എടക്കാടൊക്കെ ഷൂട്ടിംഗുണ്ടായിരുന്നു, കണ്ണൂരിലെ കൊലപാതക രാഷ്ട്രീയമാണ് സിനിമയുടെ പ്രമേയമെന്ന്. തലശ്ശേരിയിലും കണ്ണൂരിലും 'ഈട' പ്രദര്‍ശിപ്പിക്കുന്നതിന് അപ്രഖ്യാപിത വിലക്കുണ്ടോ എന്ന സംശയവും അവന്‍ പ്രകടിപ്പിച്ചിരുന്നു. അങ്ങനെ അപ്രഖ്യാപിതമായി സിനിമയെ വിലക്കിയോ എന്ന് കൂടുതല്‍ അന്വേഷിക്കാന്‍ സമയമുണ്ടായിരുന്നില്ല, തലശ്ശേരിയില്‍ നിന്നും തീവണ്ടി കയറിപ്പോരുമ്പോള്‍.
കണ്ണൂര്‍ ജില്ലയിലേയും തലശ്ശേരി താലൂക്കിലേയും കൊലപാതക രാഷ്ട്രീയത്തെ കുറിച്ച് ഇതിനുമുമ്പും നിരവധി സിനിമകള്‍ വന്നിട്ടുണ്ട്. പക്ഷേ, അവയില്‍ പലതും യാഥാര്‍ഥ്യത്തോട് അത്രയൊന്നും അടുപ്പം പുലര്‍ത്താന്‍ ശ്രമിച്ചിട്ടില്ലല്ലോ എന്ന തോന്നലുണ്ടാക്കിയിരുന്നു. ഒരുപക്ഷേ, ലക്ഷങ്ങള്‍ മുടക്കിയെടുക്കുന്ന സിനിമയെന്ന കലാ- വ്യവസായ വസ്തുവിന് ചില കാര്യങ്ങളിലെ പരിമിതികള്‍ ഉണ്ടായിരിക്കാം.
എന്നാല്‍ രാഷ്ട്രീയ കൊലപാതക വിഷയത്തില്‍ ചില നീതിപൂര്‍വ്വമായ സമീപനങ്ങള്‍ നിര്‍വഹിക്കാന്‍ ഈടയ്ക്ക് സാധിച്ചിട്ടുണ്ട്. കൊലപാതക രാഷ്ട്രീയത്തിന്റെ അകത്തളങ്ങളിലേക്കും പിന്നാമ്പുറ രഹസ്യങ്ങളിലേക്കും ചരിത്രത്തിന്റെ പിന്തുണയുള്ള പതിറ്റാണ്ടുകള്‍ പഴക്കമുള്ള വിവരങ്ങളിലേക്കുമെല്ലാം ഈട കൃത്യമായി സഞ്ചരിക്കുന്നുണ്ട്. അതുകൊണ്ട് ചില നേരങ്ങളില്‍ സി പി എം അനുകൂലികള്‍ക്ക് അതൊരു സി പി എം വിരുദ്ധ ചിത്രമെന്നും സംഘപരിവാര മനസ്സുള്ളവര്‍ക്ക് സംഘപരിവാറിനെതിരെയുള്ള സിനിമയെന്നും തോന്നലുണ്ടാക്കും. സത്യത്തില്‍ ചരിത്രത്തോട് നീതി പുലര്‍ത്താന്‍ ശ്രമിച്ചതുകൊണ്ടായിരിക്കണം അത്തരം തോന്നലുകള്‍ 'ഈട' ഉത്പാദിപ്പിക്കുന്നത്.
***  *** ***   *** *** *** ***



 പത്രം വായിക്കാന്‍ തുടങ്ങിയ കാലം മുതല്‍ അറിയുന്നതാണ് തലശ്ശേരിയിലെ സി പി എം- ആര്‍ എസ് എസ് കൊലപാതക രാഷ്ട്രീയം. ഇതേക്കുറിച്ചോര്‍ക്കുമ്പോള്‍ ആദ്യം മനസ്സില്‍ വരുന്ന ഒരു ചിത്രമുണ്ട്. ഇരു പാര്‍ട്ടികളും സംഘര്‍ഷം കൊടുമ്പിരികൊണ്ട എണ്‍പതുകള്‍. അന്ന് വളരെ ചെറിയ കുട്ടിയായിരുന്നു ഞാന്‍. ആരുടെയോ കൊലപാതകത്തെ തുടര്‍ന്നുണ്ടായ ഒരു ബന്ദ് ദിവസം തറവാടിന്റെ പടിപ്പുരയില്‍ നില്‍ക്കവെ, തലശ്ശേരി നഗരമധ്യത്തിലായിരുന്നിട്ടും മുടി നീട്ടി വളര്‍ത്തി, തലയില്‍ കെട്ടുകള്‍ കെട്ടിയ മൂന്നാലുപേര്‍ പെട്ടെന്ന് ഞങ്ങള്‍ കുട്ടികളെ തള്ളി നീക്കി ഞങ്ങളുടെ വീടിന്റെ പടിപ്പുരയില്‍ കയറി ഒളിച്ചു. റോഡിലൂടെ പൊലീസ് ജീപ്പ് വരുന്നതുകണ്ട് അവര്‍ ഓടിക്കയറി ഒളിച്ചതായിരുന്നു അതെന്ന് അന്നേ മനസ്സിലായി. പൊലീസ് ജീപ്പ് പോയപ്പോള്‍ റോഡ് മുറിച്ചു കടന്ന് വീതി കുറഞ്ഞ ഇടവഴിയിലൂടെ അവര്‍ ഓടിപ്പോയി. ഏത് രാഷ്ട്രീയപ്പാര്‍ട്ടിക്കാരാണ് അവരെന്ന് എനിക്ക് അന്നും ഇന്നും അറിയില്ല. ആ സംഭവത്തിന് തൊട്ടുമുമ്പൊരു ദിവസം ജൂബിലി റോഡിലോ പരിസര പ്രദേശങ്ങളിലെവിടെയോ ഒരാളെ കുത്തിക്കൊന്നെന്ന് കേട്ടിരുന്നു.
യാദൃശ്ചികമെന്ന് പറയട്ടെ, പത്രപ്രവര്‍ത്തനം തൊഴിലായി സ്വീകരിച്ചതിന് തൊട്ടുപിന്നാലെ ആദ്യം റിപ്പോര്‍ട്ട് ചെയ്ത വാര്‍ത്തകളിലൊന്ന് രാഷ്ട്രീയ കൊലപാതകം തന്നെയായിരുന്നു. മീന്‍ വില്‍പ്പനക്കാരനായ സി പി എം പ്രവര്‍ത്തകന്‍ ദാസനെ പാറാല്‍ വായനശാലയ്ക്ക് സമീപം ബോംബെറിഞ്ഞു കൊന്നു എന്ന വാര്‍ത്ത. പിന്നെ എത്രയെത്ര രാഷ്ട്രീയ സംഘര്‍ഷ വാര്‍ത്തകള്‍ റിപ്പോര്‍ട്ട് ചെയ്തു എന്ന് എനിക്കു തന്നെ അറിയില്ല.



എന്റെ അധ്യാപകനല്ലാതിരുന്നിട്ടും സെന്റ് ജോസഫ്‌സ് സ്‌കൂളിലെ അധ്യാപകന്‍ സുരേഷ് മാഷെ ആര്‍ എസ് എസുകാര്‍ വെട്ടിക്കൊലപ്പെടുത്താന്‍ ശ്രമിച്ചുവെന്നും അദ്ദേഹം ഗുരുതരാവസ്ഥയിലായെന്നുമുള്ള വാര്‍ത്ത, യുവമോര്‍ച്ച സംസ്ഥാന വൈസ് പ്രസിഡന്റ് കെ ടി ജയകൃഷ്ണനെ ക്ലാസ് മുറിയില്‍ വിദ്യാര്‍ഥികളുടെ മുന്നില്‍ വെട്ടിക്കൊന്ന സംഭവം (കെ ടി ജയകൃഷ്ണന്‍ ക്ലാസ് മുറിയില്‍ കൊല്ലപ്പെട്ട് കിടക്കുന്നത് നേരില്‍ കണ്ടത് ഇന്നും മനസ്സിലുണ്ട്), അതേതുടര്‍ന്ന് സി പി എം അധ്യാപകനെ തേടി അദ്ദേഹത്തിന്റെ വീട്ടിലെത്തിയ ആക്രമി സംഘം പകരം മൈസൂരുവില്‍ നിന്നും പെണ്ണുകാണാന്‍ അവധിക്ക് നാട്ടിലെത്തിയ അനിയനെ വെട്ടിക്കൊന്ന സംഭവം, പിന്നെ ആ വര്‍ഷവും അതിനടുത്ത വര്‍ഷവും ഡിസംബറിലെ ആദ്യ മൂന്ന് ദിവസങ്ങള്‍ തലശ്ശേരി താലൂക്ക് രാഷ്ട്രീ കൊലപാതകങ്ങള്‍ കൊണ്ട് നിറഞ്ഞ വാര്‍ത്ത, രാഷ്ട്രീയ കൊലക്കത്തിക്ക് ഇരയായവരുടെ വീടുകളില്‍ അവരുടെ രാഷ്ട്രീയ നിറം നോക്കാതെ സന്ദര്‍ശിച്ച് പരമ്പര തയ്യാറാക്കി ചന്ദ്രികയില്‍ പ്രസിദ്ധീകരിച്ചത്, കൊലപാതക രാഷ്ട്രീയത്തിനെതിരെ മലയാള സിനിമാ താരങ്ങള്‍ ഒരു ദിവസം മുഴുവന്‍ പാനൂരില്‍ ഉപവാസം അനുഷ്ഠിച്ചത് തുടങ്ങി എത്രയോ സംഭവങ്ങളാണ് ഈട എന്ന സിനിമ എന്റെ മനസ്സിലേക്ക് എത്തിച്ചത്. കെ ടി ജയകൃഷ്ണന്റെ കൊലപാതക സ്ഥലത്തേക്ക് വാഹനത്തിലേക്ക് യാത്ര പോകവേ വടിവാളും ബോംബുകളുമായി വാഹനത്തിന് മുമ്പിലേക്ക് ചാടിവീണ ആര്‍ എസ് എസ് സംഘം, സംഘര്‍ഷം വ്യാപിക്കവെ ബോംബുകള്‍ പൊട്ടിത്തെറിച്ച് ഉയര്‍ന്ന കടുത്ത ശബ്ദവും പുകയും, പരുക്കേറ്റ നിരവധി പൊലീസുകാര്‍, ആക്രമികള്‍ പൊലീസ് വാനിന് തീയ്യിട്ടപ്പോള്‍ മാസത്തിന്റെ തുടക്കമായതിനാല്‍ വാങ്ങിവെച്ച ശമ്പളവും വാനില്‍ സൂക്ഷിച്ച വസ്ത്രങ്ങളും ഉള്‍പ്പെടെയുള്ളവ കത്തിപ്പോയി നിസ്സംഗരായിപ്പോയ പൊലീസുകാരുടെ ഭാവം, തിന്നാനും കുടിക്കാനും ഉറങ്ങാനും മാത്രമല്ല മാത്രമല്ല, മര്യാദയ്‌ക്കൊന്ന് വിശ്രമിക്കാന്‍ പോലും കഴിയാതെ പത്രത്തില്‍ പ്രസിദ്ധീകരിക്കരുതെന്ന അപേക്ഷയോടെ തലശ്ശേരി മുനിസിപ്പല്‍ സ്റ്റേഡിയത്തിന് സമീപത്ത് പണി തീരാത്ത കെട്ടിടത്തിന് മുകളില്‍ താമസ കേന്ദ്രം കാണിച്ചു തന്ന പൊലീസുകാര്‍... ഇങ്ങനെ എത്രയെത്ര സംഭവങ്ങളാണ് രണ്ടര മണിക്കൂറിനകം ഒരു സിനിമ എന്റെ മനസ്സിലേക്ക് തിക്കിത്തള്ളി തന്നത്.
*** *** *** *** ***

ഒരു പ്രണയ സിനിമയ്ക്ക് ആവശ്യമായ തരത്തിലുള്ള ചേരുവകളെല്ലാം കൃത്യമായ അളവില്‍ ചേര്‍ത്തുവെക്കാന്‍ പിന്നണി പ്രവര്‍ത്തകര്‍ ശ്രമിച്ചിട്ടുണ്ട്. അതോടൊപ്പം രാഷ്ട്രീയ സിനിമയുടെ സത്യസന്ധതയും ഈ ചിത്രം പുലര്‍ത്തുന്നുണ്ട്.
ബംഗളൂരുവില്‍ നിന്നും ഹര്‍ത്താല്‍ ദിനത്തില്‍ എടക്കാട് റയില്‍വേ സ്റ്റേഷനില്‍ വന്നിറങ്ങുന്ന നായികയിലാണ് സിനിമ തുടങ്ങുന്നത്. കണ്ണൂര്‍, തലശ്ശേരി റെയില്‍വേ സ്റ്റേഷനുകള്‍ക്കു പകരം ഇരു നഗരങ്ങള്‍ക്കും ഇടയിലുള്ള എടക്കാട് കണ്ടെത്തിയത് സംവിധായകന്റെ മികച്ച തെരഞ്ഞെടുപ്പായിരുന്നു. കാരണം നായകന്‍ ആനന്ദും നായിക അമ്മുവും ജീവിക്കുന്നത് കണ്ണൂരിനും തലശ്ശേരിക്കും ഇടയിലുള്ള ഗ്രാമങ്ങളിലായിരുന്നു.
അമ്മു കമ്മ്യൂണിസ്റ്റ് കുടുംബത്തില്‍ നിന്നും ആനന്ദ് സംഘപരിവാര്‍ കുടുംബത്തില്‍ നിന്നുമുള്ളവരാണെന്ന് വൈകാതെ തന്നെ കാഴ്ചക്കാര്‍ക്ക് ബോധ്യപ്പെടും. മാത്രമല്ല, ഹര്‍ത്താല്‍ ദിനം പെണ്‍കുട്ടിയെ വീട്ടിലെത്തിക്കാന്‍ ശ്രമിക്കുന്നതിനിടയിലുണ്ടാകുന്ന സംഭവങ്ങളും കടന്നുപോകുന്ന വഴിയില്‍ പെട്രോള്‍ തീര്‍ന്ന് ബൈക്ക് നിന്നു പോകുന്നതും, സുഹൃത്തിനോട് പെട്രോള്‍ വാങ്ങാന്‍ പോകുന്ന നായകന്‍ തിരികെ വരുമ്പോള്‍ നായികയുടെ മൊബൈല്‍ ചിത്രീകരണത്തില്‍ പെട്ടെന്ന് കയറിവരുന്നതുമെല്ലാം സിനിമയുടെ പോക്ക് ആദ്യമേ വെളിപ്പെടുത്തുന്നുണ്ട്.
കണ്ണൂര്‍, തലശ്ശേരി ഭാഗങ്ങളിലെ നിരവധി യുവതി യുവാക്കളെ പോലെ അമ്മുവും ആനന്ദും ബംഗളൂരുവിലാണ് ജോലി ചെയ്യുന്നതെന്നത് കഥയുടെ പോക്കിന് 'എളുപ്പം' സൃഷ്ടിക്കുന്നുണ്ട്. അതിനിടയില്‍ നടക്കുന്ന വിവിധ കൊലപാതകങ്ങളും അതില്‍ പ്രതിചേര്‍ക്കപ്പെടുന്നവരും അതിനു പിന്നിലെ കഥകളുമൊക്കെയാണ് ഒരു പ്രണയ ചിത്രം എന്നതിനപ്പുറത്തേക്ക് 'ഈട'യെ കൊണ്ടുചെന്നെത്തിക്കുന്നത്.
മംഗലാപുരത്തു നിന്നും ഗണേഷ് ബീഡി കമ്പനിയുമായി എത്തിയ മുതലാളി തന്റെ കച്ചവട വികസനത്തിന് വേണ്ടിയാണ് തലശ്ശേരിയിലെ കൊലപാതക രാഷ്ട്രീയത്തിന് തുടക്കമിട്ടതെന്ന് സിനിമ കൃത്യമായി വിവരിക്കുന്നു. ഒപ്പം, മനസ്സില്‍ ചാഞ്ചാട്ടമുള്ള പാര്‍ട്ടി പ്രവര്‍ത്തകരെ കൊലപാതക്കേസിലെ പ്രതികളായി ചിത്രീകരിച്ച് പൊലീസിന് കീഴടക്കുന്നതും അവര്‍ പിന്നീട് ജീവിതകാലം മുഴുവന്‍ കേസിലും കൂട്ടത്തിലുമായി പെട്ട് പാര്‍ട്ടിയുടെ സജീവ പ്രവര്‍ത്തകരായി ഗതികെട്ടു പോകുന്നതുമെല്ലാം കൃത്യമായി സിനിമ വരച്ചു കാണിക്കുന്നു. പാര്‍ട്ടിക്കു വേണ്ടി സമരം നടത്തി വെടിയേറ്റ് പരുക്കേറ്റ് ജീവിതകാലം മുഴുവന്‍ കിടപ്പിലാകുന്ന സഖാവിനുമറിയാം താന്‍ തെരഞ്ഞെടുപ്പിന് കെട്ടിവെക്കാനുള്ള കാശ് കൊടുക്കുമ്പോള്‍ പത്രങ്ങളില്‍ ഫോട്ടോവരാനും ഏതെങ്കിലുമൊരു രക്തസാക്ഷി ദിനാചരണത്തില്‍ വീല്‍ ചെയറില്‍ പ്രദര്‍ശിപ്പിക്കാനും മാത്രമുള്ളതാണെന്ന്. ഒരു ഭാഗത്ത് തെങ്ങിന്റെ മറവുപറ്റി ബോംബുണ്ടാക്കുമ്പോള്‍ മറുഭാഗത്ത് ഭഗവത്ഗീതയുടെ പാഠങ്ങളാണ് കുട്ടികള്‍ക്ക് പകര്‍ന്നേകുന്നത്, ഒരേ രാഷ്ട്രീയപ്പാര്‍ട്ടി! കണ്ണൂര്‍ രാഷ്ട്രീയത്തെ എത്ര കൃത്യമായി മനസ്സിലാക്കി അവതരിപ്പിച്ചിരിക്കുന്നു സംവിധായകന്‍!
രാഷ്ട്രീയ കൊലപാതകങ്ങളിലൊന്നും പ്രതിയല്ലാതിരുന്ന ആനന്ദിനെ തന്റെ കാമുകിയുടെ അമ്മാവന്‍ കൊല്ലപ്പെടുമെന്ന വിവരം കൈമാറിയതിന് കേസിലെ പ്രതിയാക്കാന്‍ അവന് താത്പര്യമുള്ള രാഷ്ട്രീയ പ്രസ്ഥാനം ശ്രമിക്കുമ്പോള്‍, അവന്‍ തന്നെയാണ് കൊലപാതകത്തിന് പിന്നില്‍ പ്രവര്‍ത്തിച്ചതെന്ന് സാഹചര്യ തെളിവുകള്‍ മുന്നില്‍ നിരത്തി അവളുടെ പാര്‍ട്ടിക്കാരും തീരുമാനിക്കുന്നു. രണ്ടായാലും പ്രതിയാകുന്നത് അവനും അവന്റെ മറപറ്റി അവളുമായിരുന്നു. ആനന്ദിനെ പ്രതിയാക്കാനുള്ള ഗൂഢാലോചന നടന്നതായി പാര്‍ട്ടിക്കു വേണ്ടി ബലിദാനിയാകേണ്ടി വന്ന ദരിദ്ര കുടുംബത്തിലെ യുവാവിന്റെ സഹോദരി അവനെ ധരിപ്പിക്കുന്നു. (സഹോദരിയുടെ കുടുംബം ദരിദ്രരായതിനാല്‍, അവളുടെ ആങ്ങള എല്ലാ കാലത്തും കൊലപാതകക്കേസുകളിലും പാര്‍ട്ടി പ്രതിയാകുന്ന കേസുകളിലും ജയിലില്‍ പോകാന്‍ വിധിക്കപ്പെട്ടവനായിരുന്നു. എന്നിട്ടും അവര്‍ ചിന്തിക്കുന്നത് ധനികനായ തന്റെ അമ്മാവന്‍, സംഘനേതാവാണല്ലോ തന്നേയും കുടുംബത്തേയും പോറ്റുന്നത് എന്നായിരുന്നു. എന്നിട്ടുമൊടുവില്‍ അവനും കൊലപ്പെടുന്നു. അതോടെ തീര്‍ത്തും ദരിദ്രാവസ്ഥയിലായ കുടുംബത്തിന് വേണ്ടി അവളും നടത്തുന്നത് പാര്‍ട്ടി പ്രവര്‍ത്തനം തന്നെ! ഒളിവില്‍ കഴിയുന്ന പാര്‍ട്ടി പ്രവര്‍ത്തകര്‍ക്ക് തിന്നാനുണ്ടാക്കി കൊടുത്തും പാത്രം കഴുകിയും അവള്‍ ജീവിക്കുന്നു! അവള്‍ തന്നെയാണ് പാര്‍ട്ടിയുടെ വഞ്ചന ആനന്ദിനെ അറിയിക്കുന്നതും. തന്റെ ആങ്ങളയ്ക്ക് പറ്റിയ ദുരന്തം ആനന്ദിനുണ്ടാവരുതെന്ന് ജീവിതവും അനുഭവങ്ങളും കൊണ്ട് അവള്‍ പഠിച്ചിരുന്നു.)
പാര്‍ട്ടി നേതാവുമായി അമ്മുവിന്റെ വിവാഹം നടക്കുന്നതിന് തൊട്ടുമുമ്പ് ബംഗളൂരുവില്‍ ആനന്ദുമായുള്ള റജിസ്റ്റര്‍ വിവാഹത്തിനുള്ള നടപടികള്‍ സ്വീകരിച്ചിരുന്നു അവള്‍. അക്കാര്യങ്ങളൊന്നും വീട്ടുകാര്‍ അറിയുന്നുമില്ല. ഇരുവരും രണ്ട് രാഷ്ട്രീയ പ്രസ്ഥാനത്തിലുള്ള കുടുംബക്കാരാണെന്നതും അവര്‍ക്ക് പ്രശ്‌നമായിരുന്നില്ല. കാര്യങ്ങള്‍ അറിഞ്ഞിരുന്ന അമ്മുവിന്റെ അച്ഛന്‍ ഇരു ധ്രുവങ്ങളിലുള്ള രാഷ്ട്രീയ വിശ്വാസമായതിനാല്‍ ഇരുവര്‍ക്കും ഒന്നിച്ചു ജീവിക്കാന്‍ ബുദ്ധിമുട്ടാകുമെന്ന് ഉപദേശിക്കുകയും ചെയ്തിരുന്നു.

ഇന്ത്യന്‍ രാഷ്ട്രീയത്തിന്റെ സമകാലിക അവസ്ഥ മാത്രമല്ല, തളിപ്പറമ്പിലെ അരിയില്‍ ഷുക്കൂറിനെ വധിച്ച രീതിയില്‍ സെല്‍ഫിയെടുത്ത് നായകന്‍ ആനന്ദിനെ വെട്ടിക്കൊല്ലാന്‍ ശ്രമിച്ചതു കൂടി സിനിമയില്‍ ഉള്‍പ്പെടുത്താന്‍ സംവിധായകന്‍ തന്റേടം കാണിച്ചിട്ടുണ്ട്.
ഒടുവില്‍ ഇരുപാര്‍ട്ടിക്കാരും വേട്ടയാടുന്ന നായികയും നായകനും ഗ്രാമത്തിലെ കാവില്‍ ഒന്നിക്കുന്നതോടെ സിനിമ അവസാനിക്കുകയും ചെയ്യുന്നു.
നവാഗതനാണെങ്കിലും മികച്ച സംരംഭത്തിലൂടെ തന്റെ വരവറിയിച്ചിട്ടുണ്ട് സംവിധായകന്‍ ബി അജിത് കുമാര്‍.

അബി എന്ന മലയാളത്തിന്റെ മിമിക്രി- സിനിമാ കലാകാരന് മലയാള ചലച്ചിത്രം നല്കാന്‍ മടി കാണിച്ച ഇരിപ്പിടങ്ങള്‍ അദ്ദേഹത്തിന്റെ മകന്‍ ഷെയിന്‍ നിഗാം നേടിയെടുക്കുമെന്ന പ്രഖ്യാപനമാണ് ഈടയിലെ നായകവേഷം. പല സന്ദര്‍ഭങ്ങളിലും വളരെ തന്മയത്വത്തോടെ സ്വന്തം വേഷം കൈകളില്‍ ഭദ്രമാക്കാന്‍ ഷെയിന്‍ നിഗാമിന് സാധിച്ചിട്ടുണ്ട്. തൊണ്ടിമുതലും ദൃക്‌സാക്ഷിയിലുമൂടെ ചലച്ചിത്ര രംഗത്തേക്കെത്തിയ നിമിഷ സജയനും കൈവിട്ടു പോകാത്ത തരത്തില്‍ സ്വന്തം കഥാപാത്രത്തെ ആവിഷ്‌ക്കരിക്കാന്‍ സാധിച്ചിട്ടുണ്ട്.

അലന്‍സിയര്‍, സുരഭി ലക്ഷ്മി, പി ബാലചന്ദ്രന്‍, സുജിത് ചന്ദ്രന്‍, മണികണ്ഠന്‍ ആചാരി, ബാബു അന്നൂര്‍, ഷെല്ലി തുടങ്ങിയ താരങ്ങളെല്ലാം തങ്ങളുടെ കഥാപാത്രങ്ങളോട് നീതി പുലര്‍ത്തിയിട്ടുണ്ട്.
ഒരു സിനിമ വെറുമൊരു കഥ മാത്രമല്ലെന്നും ചരിത്രം കൂടിയാണെന്നും ഈട പറയുന്നു. താത്പര്യമുണ്ടായാലും ഇല്ലെങ്കിലും ഈട സത്യസന്ധമായി കാര്യങ്ങളെ കാണാന്‍ ശ്രമിച്ചിട്ടുണ്ട്.
ശരിക്കും 'ഈട'ത്തന്നെയാണ് സിനിമ. ഞമ്മളെ നാട്ടില്‍- ഈട!

Tuesday, January 23, 2018

പാട്ടുകള്‍ പാടി, കടലുകള്‍ താണ്ടി ജൊവാനലീന്‍


ആദ്യനോട്ടത്തില്‍ മലയാള ചലച്ചിത്ര താരം കല്‍പ്പനയെ ഓര്‍മ്മവരും, പക്ഷേ, പേര് കേട്ടാല്‍ മലയാളിയുടെ നാവിന് അത്ര പെട്ടെന്നൊന്നും വഴങ്ങുകയുമില്ല- ഫിലിപ്പിനോ സ്വദേശി ജൊവാനലീന്‍ അന്റോണിയോ ബറൂസോ എന്ന് നാവു വടിച്ചാലും ഇല്ലെങ്കിലും കുറച്ചു കഷ്ടപ്പെട്ടാലേ മലയാളിക്ക് പറയാനാവു.
അല്‍ ഖോര്‍ ബലദ്‌ന പാര്‍ക്കാണ് ജൊവാനിന്റെ ഇപ്പോഴത്തെ കര്‍മകേന്ദ്രം. ബലദ്‌നയിലെ പ്രോഗ്രാം കോര്‍ഡിനേറ്ററാണ് അവര്‍. കുറച്ചു നാളുകളിനി ഖത്തറിലുണ്ടാവും ജൊവാന്‍.
നാല്‍പ്പതുകാരിയായ ജൊവാനലീനെ കുറിച്ച് പറയാന്‍ എന്താണ് വിശേഷമെന്ന് തോന്നിയേക്കാം. ഖത്തറിലെത്തുന്നതിന് മുമ്പുള്ള ഒരു വ്യാഴവട്ടക്കാലം ലോകം ചുറ്റുകയായിരുന്നു അവര്‍. ഇക്കാലത്തിനിടയില്‍ ലോകത്തിലെ 156 രാജ്യങ്ങളാണ് അവര്‍ കണ്ടുതീര്‍ത്തത്. വെറുതെ കാണുകയായിരുന്നില്ല, കടലില്‍ പാട്ടുപാടി, രാജ്യങ്ങള്‍ സന്ദര്‍ശിച്ച് സംഗീത സാന്ദ്രമായ പന്ത്രണ്ടു വര്‍ഷങ്ങള്‍ അവര്‍ കൂട്ടിച്ചേര്‍ക്കുകയായിരുന്നു.
ഏഴ് വന്‍കരകളിലൂടേയും രാജ്യങ്ങളിലൂടെ സഞ്ചരിച്ച ജൊവാനലീന്‍ കടലില്‍ സ്വപ്‌നത്തിലെന്നപോലെ പാട്ടുപാടി യാത്ര പോവുകയായിരുന്നു. വലിയ വിനോദ യാത്രാ കപ്പലുകളിലെ ഗായക സംഘമായിരുന്നു ജൊവാനലിന്റെ കുടുംബം. അച്ഛനും അമ്മയും സഹോദരനുമെല്ലാം സംഗീത ലോകത്തുള്ളവര്‍. അതുകൊണ്ടുതന്നെ ജൊവാന്റെ ചെറുപ്പവും സംഗീത സാന്ദ്രമായിരുന്നു. പാട്ടുപഠിച്ചില്ലെങ്കിലും സംഗീതം രക്തത്തിലുണ്ടായിരുന്നു. ഇംഗ്ലീഷ് ഗാനങ്ങളിലൂടെയാണ് താന്‍ ഇംഗ്ലീഷ് സംസാരിക്കാന്‍ പഠിച്ചതെന്ന് ജൊവാന്‍ പറയുന്നു.
ഇംഗ്ലീഷ് ഗാനങ്ങളധികവും പഴയ പാട്ടുകളാണ് ജൊവാന്റെ ചുണ്ടില്‍ തത്തിക്കളിക്കുന്നത്. കാരണം, വിനോദ യാത്രാ കപ്പലുകളില്‍ ഭൂരിപക്ഷവും പ്രായമായവരായിരുന്നു ഉണ്ടാകാറുള്ളത്.
കുടുംബ ബാന്റിനോടൊപ്പം കപ്പലില്‍. കൂടെ പിയാനോ വായിക്കാന്‍ അച്ഛന്‍ ഹൊണോറാറ്റോ ബറുസോ ജൂനിയര്‍, അമ്മ ഫ്‌ളോറിന്‍ ബറൂസോ, ഗിറ്റാറും ഡ്രമ്മുമായി സഹോദരങ്ങള്‍ ജുവാല്‍ ബറൂസോയും ജാക്ക് റയാന്‍ ബറൂസോയും- കുടുംബം മുഴുവന്‍ കപ്പലില്‍. ജൊവാനലീനിന്റെ ഭാഷയില്‍ പറഞ്ഞാല്‍ പണവും സൗകര്യങ്ങളും ഇഷ്ടം പോലെ കിട്ടും, പക്ഷേ, കരയും നാടും കാണാന്‍ പ്രയാസമായിരിക്കും.
ലോകരാജ്യങ്ങളിലെ നിരവധി ഭരണാധികാരികള്‍ ഉള്‍പ്പെടെ പ്രമുഖരില്‍ പലരേയും ജൊവാനലീന്‍ അടുത്തുകണ്ടത് വിനോദ യാത്ര കപ്പലിലാണ്. പക്ഷേ, അവരുടെ സ്വകാര്യത മാനിക്കേണ്ടതുള്ളതുകൊണ്ട് പേരുകളൊന്നും വെളിപ്പെടുത്തുന്നില്ലെന്ന് അവര്‍.
കപ്പല്‍ കാലത്തായിരുന്നു ജൊവാനലീനിന്റെ വിവാഹം. തായ്‌ലന്റ് സ്വദേശിയുമായ വൈവാഹിക ജീവിതം നീണ്ടുനിന്നത് കേവലം രണ്ടാഴ്ച മാത്രം. പക്ഷേ, അതിലൊരു പെണ്‍കുഞ്ഞിനെ കിട്ടി- ഇപ്പോള്‍ ഫിലിപ്പൈന്‍സില്‍ ഹൈസ്‌കൂള്‍ ക്ലാസില്‍ പഠിക്കുന്ന മകള്‍ ആഞ്ചലിക്ക മാക് ലെക്‌സുവാത്.
തന്റെ ആദ്യ ഭര്‍ത്താവുമായി ജൊവാനലീന്‍ പിരിഞ്ഞെങ്കിലും മകള്‍ അച്ഛനെ കാണാന്‍ ഇടയ്ക്ക് തായ്‌ലന്റിലേക്ക് പോകാറുണ്ടെന്ന് അവര്‍ പറഞ്ഞു.


യാത്രയുടെ തോഴി


ജീവിതം യാത്രയാണെന്ന് ജൊവാന്‍ നേരത്തെ തന്നെ മനസ്സിലാക്കിയിരുന്നു. മാതാപിതാക്കളും സഹോദരങ്ങളുമെല്ലാം കപ്പലിലായിരുന്നതിനാല്‍ യാത്രയിലുള്ള ജീവിതത്തെ കുറിച്ച് അവര്‍ നേരത്തെ തന്നെ മനസ്സിലാക്കിയിരുന്നു. പാട്ടുകാരിയായി കപ്പലിലെത്തിയതോടെ കടലും തിരകളും കടല്‍ക്കോളും കാറ്റുമെല്ലാം ജീവിതത്തിന്റെ ഭാഗമായി.
നല്ല കാലാവസ്ഥയുള്ള കാലങ്ങളിലാണ് വിനോദ സഞ്ചാര കപ്പലുകള്‍ യാത്ര ചെയ്യുക. പക്ഷേ, ചിലപ്പോഴെങ്കിലും കടല്‍ ക്ഷോഭത്തിലും കടലിന്റെ ഭയാനകതയിലും അവര്‍ പെട്ടുപോകാതിരിക്കാറില്ല. ഒരിക്കല്‍ ആസ്‌ത്രേലിയന്‍ സന്ദര്‍ശനത്തിനിടെയാണ് വലിയ കാറ്റ് വന്ന് കപ്പലിനെ വലിച്ചു നീക്കിയത്. ആഞ്ഞുവീശിയ ചുഴലിക്കാറ്റ് സഞ്ചാര ദിശയില്‍ നിന്നും കിലോമീറ്ററുകള്‍ നീക്കി കപ്പലിനെ സിഡ്‌നി തുറമുഖത്തെത്തിച്ചു. അന്ന് മരണത്തെ മുന്നില്‍ കണ്ടതായി അവര്‍ ഓര്‍ക്കുന്നു. കപ്പലില്‍ സൂക്ഷിച്ച ഗ്ലാസും പ്ലേറ്റുമെല്ലാം തലകുത്തി നിലത്തേക്ക് വീണു, ഗ്ലാസ് ഡോറുകളും ജനലുകളും തകര്‍ന്നു തരിപ്പണമായി, ആടിയുലഞ്ഞ കപ്പലില്‍ ആളുകള്‍ തലകുത്തി വീണു; കപ്പലിനും  കേടുപാടുകള്‍ സംഭവിച്ചു- എങ്കിലും അതൊരു അനുഭവമായിരുന്നുവെന്ന് ഇപ്പോഴവര്‍ പിറകോട്ടേക്ക് നോക്കി ചിരിച്ചുകൊണ്ട് പറയുന്നു.
ചുഴലിക്കാറ്റിന്റെ ഭയാനകത അനുഭവിച്ചപ്പോഴും തൊട്ടിലാട്ടുന്ന കുഞ്ഞിനെ പോലെ എന്നാണ് ജൊവാനലീന്‍ അതിനെ കുറിച്ച് പറയുന്നത്. പ്രകൃതി അമ്മയാണെങ്കില്‍ ജൊവാനിന്റെ കപ്പല്‍ തൊട്ടിലായിരുന്നു, അതില്‍ കിടന്നാടുന്ന കുട്ടിയായി മാറി ജൊവാന്‍. ജീവിതത്തേയും അനുഭവങ്ങളേയും സ്വപ്‌നങ്ങളേയുമെല്ലാം പ്രകൃതിയുമായി കൂട്ടിയോജിപ്പിച്ചു കാണാനാണ് അവര്‍ ഇഷ്ടപ്പെടുന്നത്. അനുഭവങ്ങളുടെ കടല്‍ ഹൃദയത്തില്‍ താങ്ങുന്നതുകൊണ്ടാവണം, ജൊവാനിന് ഇപ്പോഴും കാര്യങ്ങളെയെല്ലാം എളുപ്പത്തില്‍ കാണാനാവുന്നത്.

'വനിതാ മഗല്ലന്‍'


മാതൃഭാഷയായ തഗലോഗിന് പുറമേ ഇംഗ്ലീഷും തായി ഭാഷയും സംസാരിക്കാനാവുന്ന ജൊവാനലീന്‍ ആറോ ഏഴോ തവണ ലോകം ചുറ്റി സഞ്ചരിച്ചിട്ടുണ്ട്. ആദ്യമായി ലോകം ചുറ്റി സഞ്ചരിച്ച മഗല്ലനെ പോലെ ജൊവാനലീനും കടലാഴങ്ങളെ പ്രണയിച്ച് ലോകം ചുറ്റി- രാത്രിയുടെ കടുത്ത ഇരുളില്‍ ആകാശത്തിലെ നക്ഷത്രങ്ങളെ നോക്കി മഗല്ലന്‍ ഉറക്കെപ്പാടിയോ എന്നറിയില്ല. എന്നാല്‍ ജൊവാനലീന്‍ ആകാശത്തെ മാത്രമല്ല, ഭൂമിയിലെ നക്ഷത്രങ്ങളെ നോക്കിയും പാട്ടുകള്‍ പാടി. ഒരേപാട്ട് പലര്‍ക്കുവേണ്ടിയും പല തവണ പാടി.

കപ്പലിലെ പാട്ടുകള്‍


വൈകുന്നേരങ്ങളിലാണ് ജൊവാനും കുടുംബവും സംഗീതവുമായി കപ്പലിലെ വേദിയിലെത്തുക. വൈകിട്ട് അഞ്ചര മുതല്‍ ഏഴര മണി വരെ കോക്ടെയില്‍ മ്യൂസിക്കാണ് അവതരിപ്പിക്കുക. പിന്നെ രണ്ടര മണിക്കൂര്‍ നിശ്ശബ്ദം. വിനോദ യാത്രികര്‍ക്ക് അവരുടേതായ ആസ്വാദനങ്ങളില്‍ മുഴുകാം. രാത്രി ഒന്‍പതരയ്ക്ക് വീണ്ടും സംഗീതം ആരംഭിക്കും. പാര്‍ട്ടി മ്യൂസിക്ക് എന്നാണ് അതിന് പേര് നല്കിയിരിക്കുന്നത്. അര്‍ധരാത്രി വരെ തുടരുന്ന പാര്‍ട്ടി മ്യൂസിക്കില്‍ അതിഥികളുടെ സൗകര്യത്തിനും ഇഷ്ടത്തിനുമനുസരിച്ച് നിരവധി പാട്ടുകള്‍ പാടും.
ഈ സമയത്താണ് അതിഥികളില്‍ പലരേയും പരിചയപ്പെടുക. വിവിധ തരക്കാരും തലത്തിലുള്ളവരുമായ അതിഥികളെ കഴിഞ്ഞ പന്ത്രണ്ട് വര്‍ഷത്തിനിടയില്‍ ജൊവാന്‍ കണ്ടിട്ടുണ്ട്. ചില അനുഭവങ്ങള്‍ വിവരിക്കുമ്പോള്‍ അവര്‍ തന്നെ ചിരിക്കുന്നുണ്ട്, മറ്റു ചിലതിന് അവര്‍ക്ക് ചമ്മലുണ്ടാവുന്നുണ്ട്, വേറെ ചിലതാകട്ടെ അവര്‍ക്കു തന്നെ പറയാന്‍ ലജ്ജയുമുണ്ട്.
കപ്പലിലെ സംഗീത ജോലിയായതിനാല്‍  മദ്യത്തില്‍ നീന്തിത്തുടിക്കാനാവുമെന്നാണ് അവര്‍ പറയുന്നത്. തനിക്കും കപ്പല്‍ സംഘത്തിനും മാത്രമല്ല, യാത്രക്കാര്‍ക്കും അങ്ങനെയൊക്കെയാവാനാവും. പക്ഷേ, മദ്യവും പുകവലിയൊമൊന്നും ഒരിക്കല്‍ പോലും പരീക്ഷിച്ചു നോക്കാന്‍ ജൊവാന്‍ തയ്യാറായിട്ടില്ല. അതൊന്നും ശരിയല്ലെന്നാണ് ജൊവാന്റെ പക്ഷം. മാത്രമല്ല, മദ്യം ഉപയോഗിക്കുന്നു  എന്നതാണ് ആദ്യ ഭര്‍ത്താവുമായി തെറ്റിപ്പിരിയാനുണ്ടായ പ്രധാന കാരണം. പിന്നീട് ഏഴ് വര്‍ഷം ബോയ്ഫ്രണ്ടായിരുന്നയാളേയും മദ്യ സേവയുടെ വിവരമറിഞ്ഞതോടെ ജൊവാന് ഉപേക്ഷിക്കേണ്ടി വന്നു. അയാളുമായി വിവാഹം ഉറപ്പിച്ചിരിക്കെയായിരുന്നു തെറ്റിപ്പിരിയല്‍. അക്കാലമാണ് ജൊവാനെ കടലില്‍ നിന്നും കരയിലേക്കൊരു ചുവടുമാറ്റത്തിന് പ്രേരിപ്പിച്ചത്. അല്ലായിരുന്നുവെങ്കില്‍ താന്‍ കടലില്‍ ചാടി ചത്തുപോയേനെയെന്ന് അവര്‍ പറയുന്നു. ബന്ധം പിരിഞ്ഞതോടെ മാനസികമായി ഏറെ പ്രയാസപ്പെട്ടതോടെ അമ്മയോട് പറയുകയായിരുന്നു, തനിക്കൊരു മാറ്റം വേണമെന്ന്. അങ്ങനെയാണ് ജൊവാന്‍ ജോലിയുമായി ബന്ധപ്പെട്ട് ഖത്തറിലെത്തിയത്.

കപ്പല്‍ കാഴ്ചകളിലേക്കൊരു ജാലകം


വിവിധ തരക്കാരായ അതിഥികള്‍ക്ക് മുമ്പിലാണ് ജൊവാനും സംഘത്തിനും ഗാനങ്ങള്‍ അവതരിപ്പിക്കേണ്ടി വരിക. മുമ്പിലുള്ളവര്‍ ആരാണെന്നതല്ല, തന്റെ ഗാനം മനോഹരമായിരിക്കണം എന്നതിലായിരുന്നു ജൊവാന്റെ ശ്രദ്ധ. ലോകപ്രശസ്തരായ വ്യക്തികളും ഭരണാധികാരികലും രാജകുടുംബങ്ങളുമെല്ലാം ഇത്തരത്തില്‍ ജൊവാന്റെ പാട്ടുകള്‍ കേട്ടിട്ടുണ്ടാകണം. ഒരാഴ്ച യാത്രയ്ക്ക് ഇരുപതിനായിരം ഡോളര്‍ വരെ വിനോദ സഞ്ചാര കപ്പലുകള്‍ ഈടാക്കാറുണ്ട്. അത്തരത്തില്‍ തുക മുടക്കാനാവുന്നവരാണ് തനിക്കു മുമ്പില്‍ ഇരിക്കുന്നതെന്ന ബോധ്യവും ജൊവാനലീന് ഉണ്ടായിരുന്നു.
കടല്‍പോലെ തന്നെയാണ് കപ്പല്‍ ജീവിതവും. അനുഭവങ്ങളുടെ വലിയ തിരമാലകളും ഒഴുകിപ്പോകുന്ന കൂറ്റന്‍ മഞ്ഞുകട്ടകളുമെല്ലാം കപ്പലോട്ടക്കാരിലുമുണ്ടാകും.
ഒരിക്കല്‍ കപ്പല്‍ വാടകയ്‌ക്കെടുത്ത 'ഷൂസ് ഒണ്‍ലി ക്രൂസി'ന്റെ കഥ രസകരമായിരുന്നു. ഒരു രാവിലെ ഉറക്കമുണര്‍ന്ന് തന്റെ മുറിക്കു പുറത്തിറങ്ങിയ ജൊവാന്‍ ഞെട്ടലോടെ ഇരുകണ്ണുകളും ഇറുക്കിയടച്ച് മുറിയിലേക്ക് തന്നെ ഓടിക്കയറി. അച്ഛനെ ടെലിഫോണില്‍ വിളിച്ചു: 'പപ്പാ, എന്താണിത്, കപ്പലിലുള്ളവരാരും ഉടുതുണിയിട്ടിട്ടില്ലല്ലോ.' ജൊവാന്റെ പപ്പ ഹൊണൊറാറ്റോ ബറൂസോ ജൂനിയര്‍ ഞെട്ടി!. മോളേ, ഞാനൊന്ന് കപ്പിത്താനെ വിളിച്ചു നോക്കട്ടെയെന്ന മറുപടി നല്കി ഫോണ്‍ വെച്ചു. സംഭവം രസകരമായിരുന്നു. ഒരാഴ്ചത്തേക്ക് കപ്പല്‍ വാടകക്കെടുത്തിരുന്നത് ഒരു സംഘമായിരുന്നു- ഷൂസ് ഒണ്‍ലി ക്രൂസ് എന്ന പേരിലുള്ള സംഘം. സമൂഹത്തിന്റെ ഉന്നത നിലകളില്‍ ജോലിയും ശമ്പളവുമുള്ള സംഘം. എത്ര പണം വേണമെങ്കിലും വാരിയെറിയാനുള്ള കഴിവ് അവര്‍ക്കുണ്ടായിരുന്നു. അതുകൊണ്ടുതന്നെയാണ് സാധാരണ തുകയുടെ മൂന്നിരട്ടി കൊടുത്ത് അവര്‍ കപ്പല്‍ വാടകയ്‌ക്കെടുത്തത്.  വസ്ത്രം ധരിക്കാതിരിക്കുക എന്നതാണ് അവരുടെ സംഘടനയുടെ പ്രധാന 'ഹോബി'. കേവലം പാദരക്ഷകള്‍ മാത്രമാണ് അവര്‍ അണിയുക. ആണായാലും പെണ്ണായാലും ഷൂസിന്റെ മറയല്ലാതെ ശരീരത്തില്‍ മറ്റൊന്നുമുണ്ടാവില്ല. പിറന്നപടി എന്ന് അതിനെ വിശേഷിപ്പിക്കാമോ എന്നറിയില്ല.
കപ്പിത്താന്‍ പറഞ്ഞ വിവരമറിഞ്ഞപ്പോള്‍ ഇത്തവണ ജൊവനലീന്‍ ഇരട്ട ഞെട്ടലിലേക്ക് വീണു. കപ്പലിലെ യാത്രക്കാര്‍ എങ്ങനെയെങ്കിലു നടക്കട്ടെ. തനിക്കവരെ പരിഗണിക്കേണ്ടതില്ല, പക്ഷേ, വൈകിട്ടെങ്ങനെ പാട്ടുപാടും? അവരുടെ നേരെ നഗ്നശരീരത്തിലേക്ക് നോക്കി തനിക്ക് പാടാനാവില്ലെന്ന് ജൊവാനലീന് അറിയാമായിരുന്നു. പിന്നൊന്നും ആലോചിച്ചില്ല, കറുത്ത കട്ടിക്കണ്ണട തന്റെ മുഖത്ത് ഫിറ്റു ചെയ്തു അവര്‍. വൈകിട്ട് കാഴ്ചക്കാരെ നോക്കി പാട്ടുപാടേണ്ടിയിരുന്ന ജൊവാന്‍ മുഖത്ത് കറുത്ത ഗ്ലാസും ഫിറ്റ് ചെയ്ത് അരികിലേക്ക് തന്റെ മുഖവും ശരീരവും തിരിച്ച് യാത്രക്കാരിലേക്ക് നോക്കാതെ പാട്ടു പൂര്‍ത്തിയാക്കി. അച്ഛനും സഹോദരങ്ങളുമെല്ലാം സംഗീതോപകരണങ്ങളില്‍ വിരലുകള്‍പായിക്കുമ്പോള്‍ ആരേയും നോക്കാതെ ജൊവാന് തന്റെ കര്‍മം പൂര്‍ത്തിയാക്കേണ്ടി വന്നു. അന്നത്തെ കാര്യങ്ങള്‍ ഓര്‍ക്കുമ്പോള്‍ ചമ്മിയ ചിരിയുണ്ട് ജൊവാനലീന്റെ മുഖത്ത്.
ഷൂസ് ഒണ്‍ലി ക്രൂസ് മാത്രമല്ല, സ്വവര്‍ഗ്ഗാനുരാഗികളായ സ്ത്രീകളും പുരുഷന്മാരുമെല്ലാം ഇത്തരത്തില്‍ കപ്പല്‍ യാത്രക്കാരിലെത്താറുണ്ട്. സ്വവര്‍ഗ്ഗാനുരാഗികളായ പുരുഷന്മാര്‍ ഹൃദയ വിശാലതയുള്ളവരാണെങ്കില്‍ സ്ത്രീകള്‍ അസൂയയുടെ അങ്ങേയറ്റത്തുള്ളവരായിരിക്കുമെന്നാണ് ജൊവാന്റെ അഭിപ്രായം.
ലോകത്തിലെ ഏറ്റവും സുരക്ഷിതമായ രാജ്യമായി ജൊവാന് തോന്നിയത് നോര്‍വേയാണ്. സുരക്ഷിതത്വം ആവോളമുണ്ടെങ്കിലും ചെലവേറിയ രാജ്യം കൂടിയാണ് നോര്‍വേയെന്നും അവര്‍ സാക്ഷ്യപ്പെടുത്തുന്നു.

പ്രകൃതിയുടെ കരീബീയന്‍ സൗന്ദര്യം


കടലായ കടലുകളും ലോകത്തിലെ വിവിധ ഭാഗങ്ങളും പല തവണ കണ്ടിട്ടുണ്ടെങ്കിലും ജൊവാനലീന് ഏറ്റവും ഇഷ്ടം കരീബിയന്‍ ദ്വീപുകളാണ്. അവിടെയെത്തിയാലാണത്രെ പ്രകൃതിയുടെ സ്വച്ഛന്ദത ശരിക്കും അനുഭവിക്കാനാവുക. ലോകം ഇത്രയേറെ വികസിച്ചെന്ന് വീമ്പിളക്കുമ്പോഴും കരീബിയന്‍ ദ്വീപുകളെ അതിനൊന്ന് തൊടാന്‍ പോലും കഴിഞ്ഞിട്ടില്ല. നീലജലാശയത്തില്‍ എന്ന മലയാള കവി ഭാവനപോലെ തെളിഞ്ഞ നീലജലം- കടലിന്റെ അടിത്തട്ടുവരെ സുന്ദരമായി കാണാനാവുമെന്നാണ് ജൊവനലീനിന്റെ പക്ഷം. സുന്ദരമായ കാറ്റും മനോഹരമായ പ്രകൃതിയും ജീവിത സായന്തനങ്ങളെ മനോഹരമാക്കുമെന്നാണ് ജൊവാനലീന്‍ പ്രതീക്ഷിക്കുന്നത്. അതുകൊണ്ടുതന്നെ റിട്ടയര്‍മെന്റ് കാലത്തോടെ കരീബിയന്‍ ദ്വീപുകളിലേക്ക് ജീവിതം പറിച്ചു നടണമെന്നും അവര്‍ ആഗ്രഹിക്കുന്നു. വിശാലമായ കടല്‍ത്തീരത്ത് മലര്‍ന്നുകിടന്ന് ആകാശം നോക്കി, നക്ഷത്രങ്ങളെയുമെണ്ണി നല്ല വായു ശ്വസിച്ച് ജീവിക്കാമെന്ന് അവര്‍ സ്വപ്‌നം കാണുന്നു.
കരീബിയന്‍ ദ്വീപുകളില്‍ ഇപ്പോഴും പരമ്പരാഗത രീതിയിലുള്ള ജീവിതമാണ് ആളുകള്‍ നയിക്കുന്നത്. ആദിവാസി ജീവിതം- വൈദ്യുതിയില്ല, മൊബൈല്‍ ഫോണുകളില്ല, സാങ്കേതിക സൗകര്യങ്ങളുടെ കടപ്പാടുകളും കഷ്ടപ്പാടുകളുമൊന്നുമില്ല. കടല്‍ പോലെ ജീവിതവും സ്വച്ഛന്ദം!

ലോകം ചുറ്റി; ഇന്ത്യ മാത്രം കണ്ടില്ല

ശ്രീലങ്കയില്‍ ഉള്‍പ്പെടെ യാത്ര ചെയ്‌തെങ്കിലും ഇന്ത്യയില്‍ ഇന്നോളം കാലുകുത്തിയിട്ടില്ല ജൊവാനലീന്‍ അന്റോണിയോ ബറൂസോ. ഇന്ത്യയെ കുറിച്ച് ധാരാളം കേട്ടിട്ടുണ്ട്, താജ് മഹല്‍ കാണണമെന്ന് അതിയായ ആഗ്രഹവുമുണ്ട്. പക്ഷേ, ഇതുവരേയും അതിന് സാധിച്ചിട്ടില്ല. ഖത്തറിലെ ജോലിക്കാലം പൂര്‍ത്തിയാക്കിയതിന് ശേഷം വീണ്ടും കപ്പലിലേക്ക് മടങ്ങണമെന്ന് ആഗ്രഹിക്കുന്ന ജൊവാന് ആ തവണയെങ്കിലും ഇന്ത്യ സന്ദര്‍ശിക്കാനാവുമെന്നാണ് പ്രതീക്ഷ പ്രകടിപ്പിച്ചത്.
ഇന്ത്യ കണ്ടിട്ടില്ലെങ്കിലും ഇന്ത്യക്കാരെ കുറിച്ച് വളരെ മികച്ച അഭിപ്രായമാണ് അവര്‍ മനസ്സില്‍ കാത്തുസൂക്ഷിക്കുന്നത്. ചെറുപ്പത്തില്‍ സ്‌കൂളില്‍ പഠിക്കുന്ന കാലത്ത് സ്‌കൂള്‍ കലോത്സവത്തിന്റെ ഭാഗമായി 'മിസ് ഇന്ത്യ'യുടെ വേഷമിട്ടിട്ടുണ്ട് അവര്‍. സാരിയുടുത്ത്, നെറ്റിയില്‍ വലിയ പൊട്ടുതൊട്ട് താന്‍ മിസ് ഇന്ത്യയായിരുന്നുവെന്ന് പറയുമ്പോള്‍ ജൊവാന്റെ കണ്ണുകളില്‍ തിളക്കം. തന്റെ കൂട്ടുകാരികളില്‍ പലരും വിവിധ രാജ്യങ്ങളിലെ സുന്ദരിമാരെ അവതരിപ്പിച്ചപ്പോള്‍ ജൊവാന്‍ സുന്ദരിയായ ഇന്ത്യക്കാരിയായി.
സൗന്ദര്യത്തിന്റെ ഏറ്റവും പൂര്‍ണ്ണമായ രൂപമാണ് ഇന്ത്യന്‍ വനിതകളുടേത് എന്ന അഭിപ്രായക്കാരിയാണ് ജൊവാന്‍. കളിപ്പാവകളുടെ രൂപമാണത്രെ ഇന്ത്യന്‍ സുന്ദരികളുടെ മുഖത്തിന്. സ്ത്രീകളെ മാത്രമല്ല, ഇന്ത്യന്‍ പുരുഷന്മാരെ കുറിച്ചും നല്ല അഭിപ്രായക്കാരിയാണ് ജൊവാന്‍. ഇന്ത്യന്‍ പുരുഷന്മാര്‍ ആകര്‍ഷണീയത ഏറെയുള്ളവരാണെന്ന തോന്നലുണ്ട് അവര്‍ക്ക്.



https://www.qatarsamakalikam.com/single-post/2018/01/10/cruise-life

ഉപരോധം ഖത്തറിന് നല്കിയത്

ചുറ്റുവട്ടത്തുമുള്ള രാജ്യങ്ങള്‍ പറ്റാവുന്ന അതിര്‍ത്തികളെല്ലാം അടച്ചിട്ടാല്‍ ഒരു രാജ്യം എന്തുചെയ്യും? ചോദ്യം ഖത്തറിനോടാണെങ്കില്‍ ഉത്തരം ഇവിടുത്തുകാരുടെ അനുഭവമാണ്- സ്വയംപര്യാപ്തത്‌യ്ക്കാവശ്യമായതെല്ലാം വേഗത്തില്‍ ചെയ്യും. ബലദ്‌നയുടെ പരസ്യവാചകം പോലെ- ടുഗെതര്‍, ടുവേര്‍ഡ് സെല്‍ഫ്‌സഫിഷ്യന്‍സി! (സ്വയംപര്യാപ്തതയിലേക്ക് നമ്മളൊരുമിച്ച്).
സ്വപ്‌നം കാണുന്നതു പോലെയായിരുന്നു ആളുകള്‍ ആ വാര്‍ത്ത കേട്ടത്. ഉപരോധം മറികടക്കാന്‍ നാലായിരം പശുക്കള്‍ ഖത്തറിലെത്തുന്നു. കുറേയെണ്ണം പറന്നെത്തും; വേറെ കുറേയെണ്ണം കപ്പലിലും. ആസ്‌ത്രേലിയയില്‍ നിന്നും അമേരിക്കയില്‍ നിന്നും പശുക്കളെ കൊണ്ടുവരാന്‍ വേണ്ടി മാത്രം ഖത്തര്‍ എയര്‍വെയ്‌സ് പറന്നു- ഒരു രാജ്യം ഒന്നിച്ചു നിന്ന കാഴ്ച!


ബലദ്‌ന അഥവാ നമ്മുടെ രാജ്യം


ഏതൊരു വികസനത്തിന്റേയും ആദ്യ ചുവട് വെയ്പുണ്ടാകുന്നത് സ്വപ്‌നങ്ങളിലാണ്. ഒരു സ്വപ്‌നം വലിയ യാഥാര്‍ഥ്യമായി മാറിയ കാഴ്ചയാണ് അല്‍ഖോറിലെ ബലദ്‌ന ഫാമും ഉത്പന്നങ്ങളും. 
തദ്ദേശീയമായി ഉത്പാദിപ്പിക്കുന്ന ആട്ടിറച്ചിയും ആട്ടിന്‍ പാല്‍ ഉത്പന്നങ്ങളും എന്ന ലക്ഷ്യത്തോടെയായിരുന്നു ബലദ്‌ന ഫാമിന്റെ തുടക്കം. ഫാം വികസിപ്പിക്കുമ്പോള്‍ പശുവിന്‍ പാല്‍ ഉത്പാദിപ്പിക്കാനും ലക്ഷ്യമുണ്ടായിരുന്നു. എന്നാല്‍ പൊടുന്നനെ അതൊന്നും ആരംഭിക്കാനുള്ള പദ്ധതിയുണ്ടായിരുന്നില്ല. ആടുകളിലായിരുന്നു ആദ്യശ്രദ്ധ. അതുകൊണ്ടുതന്നെ മുപ്പതിനായിരത്തിലേറെ ആടുകളെ പാര്‍പ്പിക്കാവുന്ന തരത്തിലുള്ള വിശാലമായ ഷെഡ്ഡുകളും അനുബന്ധ സൗകര്യങ്ങളും ഇവിടെ ഏര്‍പ്പെടുത്തിയിരുന്നു. ഉപരോധം വന്നതോടെയാണ് പശുക്കള്‍ക്കും സൗകര്യങ്ങളായത്. ബലദ്‌ന അവരുടെ ലോഗോയിലെ മരം പോലെ പെട്ടെന്ന് വളര്‍ന്ന് രാജ്യത്തിന് തണലായി നില്‍ക്കാന്‍ തുടങ്ങിയത്.
ശമാല്‍ റോഡില്‍ എക്‌സിറ്റ് 44ല്‍ നിന്നും വലത്തോട്ടേക്കുള്ള യാത്രയാണ് ബലദ്‌നയുടെ ഏക്കറുകള്‍ പരന്നു കിടക്കുന്ന ഫാമിലേക്കെത്തിക്കുക. സന്ദര്‍ശകര്‍ക്ക് ഗേറ്റ് രണ്ടിലൂടെ അകത്തേക്ക് പ്രവേശിക്കാനാവും. ബലദ്‌ന ഫാമിന്റെ ഗേറ്റ് കടക്കുന്നതോടെ പുതിയ ലോകത്തേക്കും പ്രത്യാശയുടെ തുരുത്തിലേക്കും എത്തിച്ചേര്‍ന്ന പ്രതീതിയാണുണ്ടാവുക. പച്ചപ്പുല്‍ത്തകിടിയും ബോണ്‍സായി മരങ്ങളും ഇരിപ്പിടങ്ങളുമുള്ള മനോഹരമായ ഭൂവിഭാഗം ഒരുഭാഗത്ത്; അഡ്മിനിസ്‌ട്രേഷനും ഹോട്ടലുകളും ഉള്‍പ്പെടെയുള്ള കെട്ടിടം മറ്റൊരു ഭാഗത്ത്; നിറങ്ങളുടെ സൗന്ദര്യത്തില്‍ പഴമയുടെ പ്രൗഢിയോടെ നില്‍ക്കുന്ന പള്ളിയും സന്ദര്‍ശക ഹാളും പശുത്തൊഴുത്തകളുമുള്ള മറ്റൊരിടം; അവയ്‌ക്കെല്ലാം പിറകില്‍ ആടുകള്‍ക്കും പശുക്കുട്ടികള്‍ക്കും കാലിത്തീറ്റ നിര്‍മാണത്തിനുമൊക്കെയായി വിശാലമായ വേറെയുമൊരിടം. അന്തംവിട്ടുനില്‍ക്കുന്നവര്‍ക്ക് ബലദ്‌നയുടെ പാര്‍ക്കില്‍ പോയി ആസ്വദിക്കാം- മൃഗശാലയിലേതുപോലെ മൃഗങ്ങളേയും പക്ഷികളേയും കാണാം, ജലയാത്ര നടത്താം, സാഹസിക പാര്‍ക്കിലെ റോപ് വേയിലൂടെ ഊരിയിറങ്ങാം- വരൂ, ബലദ്‌ന നിങ്ങളെ കാത്തിരിക്കുന്നു- ഇത് നമ്മുടെ രാജ്യം!


ധവള വിപ്ലവം സമാഗതമായി


അയ്യായിരത്തോളം പശുക്കളും മുപ്പതിനായിരത്തിലേറെ ആടുകളുമാണ് ബലദ്‌ന ഫാമിലുള്ളത്. ആട്ടിന്‍കുട്ടികളേയും പശുക്കുട്ടികളേയും 'പൊന്നുപോലെ' നോക്കാന്‍ മികച്ച സൗകര്യങ്ങളാണ് ഇവിടെ ഒരുക്കിയിരിക്കുന്നത്. കേവലം പാല്‍ ഉത്പാദിപ്പിക്കുക എന്നത് മാത്രമല്ല ബലദ്‌നയുടെ ലക്ഷ്യം. 
രാജ്യത്തിന് മികച്ച ഉത്പന്നങ്ങള്‍ ലഭ്യമാക്കുകയെന്നതാണ് ബലദ്‌ന ഊണിലും ഉറക്കിലും ചിന്തിക്കുന്നത്. ഉന്നത ഗുണനിലവാരമുള്ള ഉത്പന്നങ്ങള്‍ അന്താരാഷ്ട്ര അളവുകോലുകള്‍ക്കനുസരിച്ച് മികവ് ഉറപ്പ് വരുത്തുകയും ശുദ്ധമായിരിക്കുകയും ചെയ്യുക, ബലദ്‌നയിലൂടെ മൂല്യവത്തായ ഉത്പന്നങ്ങള്‍ ഉപഭോക്താക്കള്‍ക്ക് സമ്മാനിക്കുക, മികച്ചതും ഊഷ്മളമായതും നന്മയും പൈതൃകവുമായ പരമ്പരാഗത രീതിയിലുള്ളവയില്‍ സ്വയംപര്യാപ്തത കൈവരിക്കുകയും അതില്‍ അഭിമാനിക്കുകയും ചെയ്യുകയെന്നതാണ് ബലദ്‌ന വിശ്വസിക്കുന്നത്.
പാല്‍ ഉത്പാദനമാണ് ബലദ്‌നയുടെ പ്രഥമ ലക്ഷ്യം. മികച്ച പ്രോട്ടീനും കൊഴുപ്പും അടങ്ങിയ കാല്‍സിയത്തിന്റേയും ഫോസ്ഫറസിന്റേയും സിങ്കിന്റേയും വൈറ്റമിന്‍ ബിയുടേയും ചേര്‍ച്ചകളുള്ള ആട്ടിന്‍ പാല്‍, അവാസി ആട്ടിന്‍ പാലില്‍ നിന്നുള്ള മികച്ച വെണ്ണയും കട്ടിത്തൈരും ഉള്‍പ്പെടെ പോഷണത്തിന്റെ കലവറ.
പ്രതിവര്‍ഷം 120 മുതല്‍ 150 ലിറ്റര്‍ വരെ പാലാണ് പെണ്ണാടുകളില്‍ നിന്നും ലഭിക്കുക. ആടുകളുടെ ഉത്പാദനം വര്‍ധിക്കുന്നതോടെ പാലുത്പാദനത്തിലും വന്‍ കുതിച്ചു ചാട്ടമാണ് നിര്‍വഹിക്കപ്പെടുക.
പാലും വെണ്ണയും തൈരും പാല്‍ക്കട്ടിയും നെയ്യും ഉള്‍പ്പെടെ മുപ്പതോളം ഉത്പന്നങ്ങളാണ് ബലദ്‌ന ഫാമില്‍ നിന്നും ഖത്തറിന്റെ വിവിധ ഭാഗങ്ങളില്‍ എത്തുന്നത്.

പാലില്‍ തുടങ്ങി വ്യത്യസ്ത ഇനങ്ങളിലേക്ക്

മികച്ചയിനം അവാസി ആടുകളുടെ ഉത്പാദന കേന്ദ്രം കൂടിയാണ് ബലദ്‌ന ഫാം. ഉയര്‍ന്ന അളവില്‍ പാല്‍ മാത്രമല്ല മാംസവും തരുന്ന വര്‍ഗ്ഗമാണ് അവാസി. മിഡില്‍ ഈസ്റ്റിലെ ഉയര്‍ന്ന താപനില തരണം ചെയ്യാനാവും എന്നതിന് പുറമേ വിവിധയിനം രോഗങ്ങളെ പ്രതിരോധിക്കാനും കഴിവുള്ളവയാണ് ഈ ആട് വര്‍ഗ്ഗം.
പാലും പാലുത്പന്നങ്ങളും പോലെ ബലദ്‌നയുടെ മാംസ- മാംസോത്പന്നങ്ങളും ഏറെ രുചികരവും ആരോഗ്യദായകവുമാണെന്നാണ് അനുഭവസ്ഥര്‍ വിവരിക്കുന്നത്. വളര്‍ത്തു മൃഗങ്ങളുടേയും ഇറച്ചിയുത്പാദിപ്പിക്കുന്ന മൃഗങ്ങളുടേയും ആരോഗ്യാവസ്ഥ പരിശോധിക്കാന്‍ വ്യത്യസ്തമായ മാര്‍ഗ്ഗങ്ങളാണ് ബലദ്‌നയില്‍ കൈക്കൊള്ളുന്നത്. മൃഗങ്ങളുടെ രക്തപരിശോധനയും മറ്റ് ദ്രവ പരിശോധനകളും നിര്‍വഹിക്കുന്നത് ആരോഗ്യസ്ഥിതി തിരിച്ചറിയാന്‍ ഏറെ സഹായിക്കുന്നു. പാലിന്റേയും ഇറച്ചിയുടേയും ഉത്പാദന നിലവാരം വര്‍ധിപ്പിക്കുന്നതിന്റെ ഭാഗമായി കൃത്രിമ ബീജസങ്കലന കേന്ദ്രവും ബലദ്‌ന കഴിഞ്ഞ വര്‍ഷം തുടങ്ങിയിട്ടുണ്ട്. മികച്ചയിനം അവാസി ആടുകളേയും ഷാമി ആടുകളേയും ചേര്‍ത്താണ് ഉന്നത ഗുണനിലവാരമുള്ള ഉത്പാദനം നടത്തുന്നത്.
ആടുകളും പാലും ഇറച്ചിയും മാത്രമല്ല കാലിത്തീറ്റ ഉത്പാദനത്തിലും ബലദ്‌ന സ്വയംപര്യാപ്തതയുടെ മാര്‍ഗ്ഗങ്ങളാണ് അവലംബിച്ചിരിക്കുന്നത്. ആടുകളുടേയും പശുക്കളുടേയും പോഷകാഹാരവുമായി ബന്ധപ്പെട്ട് മികച്ച പഠനങ്ങളും നിരീക്ഷണം നടത്തിയതിന് ശേഷമാണ് കാലിത്തീറ്റ നിര്‍മാണത്തില്‍ പുരോഗതി പ്രാപിച്ചത്. ആടുകളുടേയും പശുക്കളുടേയും വ്യത്യസ്ത തീറ്റകള്‍ ചേര്‍ത്ത് ആവശ്യമായ പോഷണത്തോടെ നിര്‍മിച്ചെടുക്കുന്ന കാലിത്തീറ്റ ഫാമില്‍ ഉപയോഗിക്കുന്നതിന് പുറമേ ആവശ്യക്കാര്‍ക്ക് വില്‍പ്പന നടത്തുകയും ചെയ്യുന്നുണ്ട്.
ഫാമില്‍ നിന്നുള്ള ഏറ്റവും പുതിയ മാംസം ഉപഭോക്താക്കള്‍ക്ക് നേരിട്ട് ലഭിക്കാനുള്ള മാര്‍ഗ്ഗങ്ങളും ബലദ്‌നയിലുണ്ട്. രണ്ട് അറവുശാലകള്‍ ഉള്‍പ്പെടെയാണ് ഇറച്ചി സംസ്‌ക്കരണ യൂണിറ്റ് പ്രവര്‍ത്തിക്കുന്നത്. ബലദ്‌ന ഫാമും പാര്‍ക്കും സന്ദര്‍ശിക്കാനെത്തുന്ന ഉപഭോക്താക്കള്‍ക്ക് നേരിട്ട് മാംസവും മാംസോത്പന്നങ്ങളും ലഭിക്കുന്ന ചെറിയ യൂണിറ്റാണ് ആദ്യത്തേത്. രണ്ടാമത്തേതാകട്ടെ അന്താരാഷ്ട്ര നിലവാരത്തില്‍ വന്‍കിട രീതിയില്‍ അറവും മറ്റ് ക്രമങ്ങളും നിര്‍വഹിച്ച് വലിയ അളവില്‍ വിതരണം ചെയ്യാനാവുന്നതാണ്.

വികസനക്കുതിപ്പില്‍

നിലവിലുള്ള അയ്യായിരത്തിന് പുറമേ പതിനായിരം പശുക്കള്‍ കൂടി രണ്ടു മാസത്തിനകം ബലദ്‌നയില്‍ എത്തിച്ചേരും. പുതിയ പശുക്കളെ ഖത്തറിലെത്തിക്കാനുള്ള കപ്പല്‍ അമേരിക്കയിലേക്ക് പോയിട്ടുണ്ട്. ഫെബ്രുവരിയോടെ കപ്പല്‍ ഹമദ് തുറമുഖത്ത് നങ്കൂരമിടുമ്പോള്‍ ബലദ്‌നയും ഖത്തറും പുതിയ ചരിത്രത്തിനാവും സാക്ഷ്യം വഹിക്കുക. പതിനായിരം പശുക്കളെ സ്വീകരിക്കാനുള്ള പുതിയ സൗകര്യങ്ങള്‍ ബലദ്‌നയില്‍ പുരോഗമിക്കുകയാണ്.
അടുത്ത വര്‍ഷം പകുതിയാകുമ്പോഴേക്കും മധ്യപൗരസ്ത്യ ദേശത്തെ ഏറ്റവും വലിയ പാല്‍ ഉത്പാദന കേന്ദ്രമായി മാറാനുള്ള തയ്യാറെടുപ്പില്‍ കൂടിയാണ് ബലദ്‌ന ഫാം. ബലദ്‌നയുടെ ഉത്പാദനം 350 ടണ്‍ ലിറ്ററായി വര്‍ധിക്കുന്നതോടെ ഖത്തറിനാവശ്യമായ മുഴുവന്‍ പാലും ബലദ്‌നയില്‍ നിന്നും എത്തിച്ചേരും.
നിലവില്‍ മണിക്കൂറില്‍ എഴുന്നൂറിലേറെ പശുക്കളെ കറക്കാവുന്ന വിധത്തിലാണ് മില്‍ക്ക് പാര്‍ലര്‍ സജ്ജീകരിച്ചിരിക്കുന്നത്. മധ്യപൗരസ്ത്യ ദേശത്തെ ഏറ്റവും വലിയ മില്‍ക്ക് പാര്‍ലറും ബലദ്‌നയുടെ സ്വന്തമാണെന്നതാണ് മറ്റൊരു പ്രത്യേകത.
അല്‍ ഖോറിന് സമീപത്തെ ഉമ്മുല്‍ ഹവായയില്‍ 20 ലക്ഷം ചതുരശ്ര മീറ്റര്‍ സ്ഥലത്താണ് ബലദ്‌നാ ഫാം സ്ഥിതി ചെയ്യുന്നത്. പശുക്കളെ താമസിപ്പിക്കാനും കാലിത്തീറ്റ ഉത്പാദിപ്പിക്കാനും സൂക്ഷിക്കാനും മറ്റ് അനുബന്ധ സൗകര്യങ്ങള്‍ക്കുമായാണ് 18 ലക്ഷം ചതുരശ്ര മീറ്റര്‍ സ്ഥലം ഉപയോഗപ്പെടുത്തുന്നത്. ബലദ്‌നയുടെ രണ്ടാംഘട്ട പ്രവര്‍ത്തനങ്ങള്‍ പൂര്‍ത്തിയാകുന്നതോടെ 500 ടണ്‍ പാല്‍ ഉത്പാദിപ്പിക്കാവുന്ന അവസ്ഥയിലേക്കാണ് വളരുക.



പിന്നേയുമുണ്ട് വിശേഷങ്ങള്‍

പാലും പാലുത്പന്നങ്ങളും ഇറച്ചിയും ഉത്പാദിപ്പിക്കുക മാത്രമല്ല, അവ വില്‍പ്പന നടത്താനും രുചിയറിവുകളിലേക്ക് പകര്‍ന്നു നല്കാനും നിരവധി സ്ഥാപനങ്ങളും ബലദ്‌ന നേരിട്ട് നടത്തുന്നുണ്ട്. ഉമ്മു അല്‍ ഹവായയിലെ ബലദ്‌ന ആസ്ഥാനത്ത് പ്രവര്‍ത്തിക്കുന്ന വില്‍പ്പന കേന്ദ്രത്തിന് പുറമേ കോര്‍ണിഷില്‍ ഖത്തര്‍ നാഷണല്‍ മ്യൂസിയത്തിന് സമീപത്തെ ഓറിയന്റല്‍ പേള്‍ റസ്റ്റോറന്റിന് പിന്നില്‍, പേള്‍ ഖത്തറിലെ മദീന സെന്‍ട്രലേ, മാള്‍ ഓഫ് ഖത്തര്‍ ഈസ്റ്റ് ഗേറ്റ് മൂന്ന് എന്നിവിടങ്ങളിലെല്ലാം ബലദ്‌നയുടെ സ്ഥാപനങ്ങള്‍ പ്രവര്‍ത്തിക്കുന്നുണ്ട്.

ഫാമും കാണാം കുടുംബത്തോടൊപ്പം ഉല്ലാസവുമാകാം
നെയ്യപ്പം തിന്നാല്‍ മാത്രമല്ല ബലദ്‌ന ഫാമിലെത്തിയാലും രണ്ടുണ്ട് കാര്യം. ഫാമും കാണാം, കുടുംബത്തോടൊപ്പം ഉല്ലസിക്കുകയും ചെയ്യാം. അവസാന ഘട്ടത്തിലുള്ള സന്ദര്‍ശക ഗ്യാലറിയുടെ പണി പൂര്‍ത്തിയാകുന്നതോടെ മില്‍ക്ക് പാര്‍ലറില്‍ 'കറങ്ങുന്ന' പശുക്കളെ കറന്ന് പാലെടുക്കുന്നത് കാണാനുള്ള സൗകര്യം പൊതുജനങ്ങള്‍ക്ക് ലഭ്യമാകും. അണുബാധയുമായി ബന്ധപ്പെട്ട പ്രശ്‌നങ്ങള്‍ ഉണ്ടാകുമെന്നതിനാല്‍ പശുക്കളുടേയും ആടുകളുടേയും ഫാം സന്ദര്‍ശിക്കുന്നതിന് വിലക്കുണ്ടാകുമെങ്കിലും നിരനിരയായി വന്ന് പശുക്കള്‍ യന്ത്രത്തില്‍ കയറി പാല്‍ കറക്കാന്‍ നില്‍ക്കുന്നത് ഗ്യാലറിയില്‍ നിന്ന് കാണാനാകും. സന്ദര്‍ശകക്ക് പ്രിയങ്കരമായ മറ്റു കാഴ്ചകളും ഗ്യാലറിയില്‍ അധികൃതര്‍ ഒരുക്കുന്നുണ്ട്. ബലദ്‌ന ഫാമിന് മുമ്പിലുള്ള പുല്‍ത്തകിടിയില്‍ സജ്ജീകരിച്ച സീറ്റുകളില്‍ കുടുംബത്തോടൊപ്പം സമയം ചെലവഴിക്കാനും കുഞ്ഞു കുതിരകളില്‍ കുട്ടികള്‍ക്ക് സവാരി ചെയ്യാനുമെല്ലാം ഇവിടെ ഇപ്പോള്‍ തന്നെ സൗകര്യം ഏര്‍പ്പെടുത്തിയിട്ടുണ്ട്. ബലദ്‌ന ഫാമിനകത്തെ പള്ളിയില്‍ സ്ത്രീകള്‍ക്കും പുരുഷന്മാര്‍ക്കും നമസ്‌ക്കാരിക്കാന്‍ മികച്ച കലാസൗന്ദര്യത്തോടെ നിര്‍മിച്ച രണ്ട് പള്ളികളും ഭക്ഷണം കഴിക്കാനും റിഫ്രഷ്‌മെന്റിനും ഹോട്ടലുകളും കഫ്റ്റീരിയകളും പാലും ഇറച്ചിയും വാങ്ങാന്‍ സ്റ്റാളുകളുമുണ്ട്. കുടുംബത്തോടൊപ്പം എത്തുന്നവര്‍ക്ക് പുറമേ നിന്നുള്ള ഭക്ഷണം ഇവിടെ അനുവദനീയമല്ല എന്ന കാര്യം മാത്രമാണ് ശ്രദ്ധിക്കേണ്ടത്.
ഓരോ ആഴ്ചയും പതിനായിരത്തോളം പേരാണ് ഫാം സന്ദര്‍ശിക്കാനും ഉല്ലസിക്കാനുമായി ബലദ്‌നയിത്തെുന്നത്. കുടുംബാംഗങ്ങള്‍ക്കും കുട്ടികള്‍ക്കും പുതിയ പാഠങ്ങള്‍ പകര്‍ന്നു നല്കുന്നതിനോടൊപ്പം കളിച്ചുല്ലസിക്കാനുള്ള അവസരം കൂടിയാണ് ബലദ്‌ന സമ്മാനിക്കുന്നത്.
മനോഹരമായി നിര്‍മിച്ച പള്ളികള്‍ക്ക് വര്‍ണ്ണക്കണ്ണാടികളോടു കൂടിയ ജനവാതിലുകളും മരം കൊണ്ടുള്ള വാതിലുകളും പ്രൗഡിയുടെ ഖത്തരി പാരമ്പര്യമാണ് സമ്മാനിക്കുന്നത്. വര്‍ണ്ണ വെളിച്ചത്തിലുള്ള പള്ളികളുടെ രാത്രികാഴ്ച അതിമനോഹമാക്കാനും അധികൃതര്‍ക്കായിട്ടുണ്ട്. സ്ത്രീകള്‍ക്കും പുരുഷന്മാര്‍ക്കും വെവ്വേറെ നിര്‍മിച്ച പള്ളികള്‍ക്ക് സമീപത്തായി മജ്‌ലിസുകളും ഏര്‍പ്പെടുത്തിയിട്ടുണ്ട്.


ബലദ്‌ന പാര്‍ക്ക്



ഖത്തറിലെങ്ങുമില്ലാത്ത വ്യത്യസ്തമായ സൗകര്യങ്ങളോടെയാണ് ബലദ്‌ന പാര്‍ക്ക് സജ്ജീകരിച്ചിരിക്കുന്നത്. നിരന്നു നില്‍ക്കുന്ന ഈന്തപ്പനകള്‍ക്കിടയിലൂടെയാണ് ബലദ്‌ന പാര്‍ക്കിലേക്കുള്ള പ്രവേശന കവാടം സജ്ജീകരിച്ചിരിക്കുന്നത്. പാര്‍ക്കിനകത്തേക്ക് കടക്കാന്‍ 35 റിയാലാണ് ഫീസ് ഏര്‍പ്പെടുത്തിയിട്ടുള്ളത്. പാര്‍ക്കിനകത്ത് കളിപ്പൊയ്കയില്‍ സജ്ജീകരിച്ച സ്റ്റണ്ട് ബോട്ട് സവാരിയും പൊയ്കയ്ക്ക് മുകളിലൂടെ ആര്‍ച്ച് രൂപത്തിലുള്ള മരപ്പാലവും അതിനപ്പുറം സജ്ജീകരിച്ച മൃഗശാലയുമെല്ലാം കുട്ടികളേയും കുടുംബങ്ങളേയും ഏറെ ആകര്‍ഷിക്കും. കളിപ്പൊയ്കയില്‍ നീന്തിത്തുടിക്കുന്ന താറാവുകള്‍ക്കൊപ്പം കുഞ്ഞുബോട്ടില്‍ സ്വയം ഡ്രൈവ് ചെയ്ത് യാത്ര ചെയ്യാനാവും. അതിനടുത്തായി സജ്ജീകരിച്ച അഡ്വഞ്ചര്‍ പാര്‍ക്കില്‍ റോപ്പിലൂടെ തൂങ്ങിയാടി ഊരിയിറങ്ങാനും വ്യത്യസ്ത സാഹസിക യാത്രകള്‍ നിര്‍വഹിക്കാനും സാധിക്കും. മാത്രമല്ല, ഒറ്റയ്ക്കും കുടുംബത്തോടൊപ്പവും സൈക്കിള്‍ സവാരിയും ഇവിടുത്തെ പ്രത്യേകതയാണ്. ബലദ്‌ന പാര്‍ക്കല്‍ സജ്ജീകരിച്ച കളിസൗകര്യങ്ങള്‍ ഖത്തറില്‍ മറ്റൊരിടത്തും കാണാനാവില്ല. പാര്‍ക്കില്‍ കയറാനുള്ള ഫീസിന് പുറമേ മൃഗശാല കാണുന്നതിനൊഴികെ മറ്റെല്ലാ സൗകര്യങ്ങളും ഉപയോഗപ്പെടുത്താന്‍ വെവ്വേറെ ടിക്കറ്റെടുക്കേണ്ടതുണ്ട്. 
നൂറ്റാണ്ടുകള്‍ ജീവിക്കുന്ന ആമ, വിവിധയിനം ആടുകള്‍, മയില്‍, പ്രാവ്, വ്യത്യസ്തയിനം കോഴി, കഴുത, പശു, മുയല്‍, കങ്കാരു തുടങ്ങി വ്യത്യസ്ത ജീവികളെയാണ് മൃഗശാലയില്‍ ക്രമീകരിച്ചിരിക്കുന്നത്.



ബലദ്‌നയിലും മലയാളിക്കട


ചന്ദ്രനിലെത്തിയ നീല്‍ ആസ്‌ട്രോംഗിനേയും എഡ്വിന്‍ ആല്‍ഡ്രിനേയും മൈക്കല്‍ കോളിന്‍സിനേയും വരവേറ്റത് 'എന്നാ ഒരു ചായ എടുക്കട്ടെ' എന്നു ചോദിച്ച മലയാളിയാണെന്ന പഴയൊരു കഥയുണ്ട്. എവറസ്റ്റ് കീഴടക്കി പതാക നാട്ടി അഭിമാനത്തോടെ കൈയ്യുയര്‍ത്തിയ ഹിലാരിയോടും ടെന്‍സിംഗിനോടും 'ഈ തണുപ്പിന് ചൂടു ചായയാ നല്ലതെന്ന്' ഉറക്കെപ്പറഞ്ഞ ഒരു മലയാളിയുടേയും കഥ നാട്ടില്‍ പണ്ടേ പ്രചാരത്തിലുണ്ട്. കളിയാക്കുന്ന കുഞ്ഞുകഥകളെ 'ട്രോളു'കളെന്ന് വിശേഷിപ്പിക്കാത്ത കാലമായിരുന്നു അത്. ആംസ്‌ട്രോംഗിനും മുമ്പ് ചന്ദ്രനിലും ഹിലാരിക്കു മുമ്പ് എവറസ്റ്റിലും മലയാളി എത്തി കച്ചവടം തുടങ്ങിയിട്ടുണ്ടാകുമെന്നാണ് ഈ കഥകള്‍ കളിയായും കാര്യമായും പറയുന്നത്. അതുപോലെ തന്നെയാണ് ബലദ്‌ന പാര്‍ക്കിലും. ആളുകള്‍ ബലദ്‌ന പാര്‍ക്ക് അന്വേഷിച്ചെത്തുമ്പോഴേക്കും അവിടെ രണ്ട് മലയാളികള്‍  കടയിട്ട് തുടങ്ങിയിരുന്നു. പാര്‍ക്കിലേക്കുള്ള ടിക്കറ്റെടുത്ത് പ്രവേശന കവാടം കടന്നാലുടന്‍ ഇടതുഭാഗത്തൊരു മിനി മാര്‍ട്ട്. അവിടെ കാസര്‍ക്കോട്ടുകാരായ അഷറഫും ഹാഷിമും ബഷീറുമുണ്ട്.
വെള്ളവും പെപ്‌സിയും പോപ്‌കോണും ചോക്കലേറ്റും ഐസ്‌ക്രീമും ചിപ്‌സും ഉള്‍പ്പെടെ കുടുംബത്തോടൊപ്പം എത്തുന്നവര്‍ക്ക് 'കൊറിക്കാവുന്ന' വിഭവങ്ങളുമായാണ് മിനി മാര്‍ട്ട് സജ്ജീകരിച്ചിരിക്കുന്നത്. കഴിഞ്ഞ മാസം എട്ടാം തിയ്യതിയാണ് മിനി മാര്‍ട്ടിന് തുടക്കമായത്.


ഖഹ്‌വ രുചിയുമായി ഹാഫിസുണ്ട്


ബംഗാളിയാണ് ഹാഫിസ് റഹ്മാന്‍. ബലദ്‌നയിലെ മജ്‌ലിസില്‍ എത്തുന്നവര്‍ക്ക് അറബ് ആതിഥ്യത്തിന്റെ ഖഹ്‌വ നല്കാന്‍ ഹാഫിസ് അവിടെയുണ്ടാകും. മധുരമുള്ള ഈത്തപ്പഴവും ചൂടോടെയുള്ള ഖഹ്‌വയും ഹാഫിസ് അതിഥികള്‍ക്ക് സമ്മാനിക്കും. ഖഹ്‌വ കൂജ കുഞ്ഞു പിഞ്ഞാണ പാത്രത്തില്‍ മുട്ടിച്ച് പരമ്പരാഗത രീതിയില്‍ തന്നെയാണ് അതിഥികളെ ഖഹ്‌വ നല്കി ഹാഫിസ് റഹ്മാന്‍ സ്വീകരിക്കുക.

https://www.qatarsamakalikam.com/single-post/2017/12/30/qatar-baladna-story

Monday, September 4, 2017

അതിരുകള്‍ക്കപ്പുറം അല്‍ ജസീറ


(വര്‍ഷങ്ങള്‍ക്ക് മുമ്പ് അല്‍ ജസീറ ചാനല്‍ ആദ്യമായി സന്ദര്‍ശിച്ചപ്പോള്‍ എഴുതിയ കുറിപ്പാണിത്. ഖത്തറിനെതിരെ സഊദി അറേബ്യയും യു എ ഇയും ബഹറൈനും ഈജിപ്തും 2017 ജൂണ്‍ അഞ്ചിന് ഉപരോധം പ്രഖ്യാപിച്ചപ്പോള്‍ പഴയ കുറിപ്പ് ഒരിക്കല്‍ കൂടി വായിച്ചു നോക്കി. ബ്ലോഗിലേക്ക് കാത്തുവെക്കണമെന്ന് തോന്നി. ഉപരോധ രാജ്യങ്ങളുടെ പ്രധാന ആവശ്യങ്ങളിലൊന്ന് അല്‍ ജസീറ ചാനല്‍ അടച്ചു പൂട്ടണമെന്നായിരുന്നു. അല്‍ ജസീറ എന്തായിരുന്നു എന്നു പറയുമ്പോള്‍ ചിലപ്പോള്‍ എന്തല്ല എന്നും മനസ്സിലാക്കാന്‍ ഈ കുറിപ്പ് ഉപകരിച്ചേക്കാം.)




Dear my wife,
How do you? How my lovely son Mohamed? How your family. I wish all of them good and happy. I am good and everything ok. In the near future I will be with you, Don’t worry be patient. I do not have any objection to take with you our son Mohamed to Qatar or any place.
Take Care. See you

(പ്രിയപ്പെട്ട ഭാര്യയ്ക്ക്,
സുഖമല്ലേ, എന്റെ പ്രിയപ്പെട്ട മകന്‍ മുഹമ്മദിന് എങ്ങനെയുണ്ട്? നിന്റെ കുടുംബത്തിന് സുഖമല്ലേ? എല്ലാവര്‍ക്കും നന്മയും സന്തോഷവും ഞാന്‍ ആശംസിക്കുന്നു. എനിക്കിവിടെ എല്ലാം നല്ലത് തന്നെ. സമീപഭാവിയില്‍ തന്നെ ഞാന്‍ നിന്നോടൊപ്പമുണ്ടാകും. ഭയപ്പെടേണ്ടതില്ല. എല്ലാം ക്ഷമയോടെ നേരിടുക. നമ്മുടെ മകനെ ഖത്തറിലോ അല്ലെങ്കില്‍ മറ്റെവിടേക്കെങ്കിലുമോ നീ കൊണ്ടുപോകുന്നതില്‍ എനിക്ക് വിരോധമില്ല. എല്ലാ കാര്യങ്ങളും ശ്രദ്ധിക്കണം. നമുക്ക് വീണ്ടും കാണാം.)
കത്ത് ഇംഗ്ലീഷില്‍ നിന്നും മലയാളത്തിലേക്ക് മൊഴിമാറ്റം നടത്തുമ്പോള്‍ അതിലെ വൈകാരികതയുടെ പകുതിയും നഷ്ടപ്പെട്ടു പോകും. ഗ്വാണ്ടനാമോ തടവറയില്‍ ആറര വര്‍ഷക്കാലം കഴിച്ചു കൂട്ടേണ്ടി വന്ന അല്‍ ജസീറ ചാനലിന്റെ സുഡാനിയായ ക്യാമറാമാന്‍ സമി അല്‍ ഹാജ് എന്ന സമി മുഹിയുദ്ദീന്‍ മുഹമ്മദ് അല്‍ ഹാജ് ജയിലില്‍ നിന്നും തന്റെ ഭാര്യയ്ക്ക് എഴുതിയ കത്താണിത്. അല്‍ ജസീറ ചാനലിന്റെ ഖത്തറിലെ ആസ്ഥാനത്തെ മ്യൂസിയത്തിലാണ് സമിയുടെ കത്ത് കാഴ്ചക്കാര്‍ക്കായി കാത്തുവെച്ചിരിക്കുന്നത്. ഗ്വാണ്ടനാമോയില്‍ നിന്നും പരിശോധിച്ച സീല്‍ കത്തില്‍ പതിച്ചിട്ടുണ്ട്.
സമിയുടെ കത്ത് മാത്രമല്ല, അല്‍ ജസീറ കാഴ്ചക്കാര്‍ക്കു വേണ്ടി മ്യൂസിയത്തില്‍ ഒരുക്കിവെച്ചിരിക്കുന്നത്. എക്‌സ്‌ക്ലൂസീവ് സ്റ്റോറികള്‍ ബ്രേക്ക് ചെയ്ത് ലോകത്തെ ഞെട്ടിക്കുന്ന അതേ ആവേശത്തോടെ  തന്നെയാണ് തങ്ങള്‍ക്കുണ്ടായ നഷ്ടങ്ങളും പത്രപ്രവര്‍ത്തന കാലത്ത് ഏറ്റുവാങ്ങേണ്ടി വന്ന ദുരിതങ്ങളും ചിത്രപ്പെടുത്തി വെച്ചിട്ടുള്ളത്; ഒപ്പം കുറഞ്ഞ കാലംകൊണ്ട് നേടിയെടുത്ത എണ്ണിയാലൊടുങ്ങാത്ത പുരസ്‌ക്കാരങ്ങളും.
പത്രപ്രവര്‍ത്തകന്റെ നെഞ്ചുതുളച്ച് കടന്നുപോയ വെടിയുണ്ടയുടെ പാട് ബാക്കി കിടക്കുന്ന ടീ ഷര്‍ട്ട്, ബോംബാക്രമണത്തില്‍ തകര്‍ന്നു പോയ ബ്യൂറോയില്‍ നിന്നും കഷ്ടിച്ച് എടുത്തുകൊണ്ടുവന്ന കേടായ ഉപകരണങ്ങള്‍, ആദ്യകാലത്തെ ഏറ്റവും ചുരുങ്ങിയ സാങ്കേതിക സൗകര്യങ്ങള്‍, അല്‍ ജസീറയുടെ ലോഗോ കാലിഗ്രഫിയില്‍ ഡിസൈന്‍ ചെയ്ത ഹംദി അല്‍ ശരീഫിന്റെ പേനകള്‍... അങ്ങനെയങ്ങനെ നിരവധി സാധനങ്ങളുണ്ട് അല്‍ ജസീറ മ്യൂസിയത്തില്‍. അവിടെയുള്ള ഓരോ വസ്തുവും അല്‍ ജസീറ ചാനലിന്റെ വളര്‍ച്ചയില്‍ വഹിച്ച പങ്ക് ചെറുതല്ലായിരുന്നു.
സമി മുഹിയുദ്ദീന്‍ മുഹമ്മദ് അല്‍ ഹാജിനെ പോലെ തടവറയില്‍ നീണ്ടകാലം കിടക്കേണ്ടി വന്നവര്‍, പത്രപ്രവര്‍ത്തനത്തിന് വേണ്ടി ജീവന്‍ വെടിയേണ്ടി വന്ന അത്‌വാര്‍ ബഹ്ജതിനെയും താരിഖ് അയ്യൂബിനേയും പോലുള്ളവര്‍, ഉസാമ ബിന്‍ ലാദനെ ഇന്റര്‍വ്യൂ ചെയ്തതിന്റെ പേരില്‍ ജയിലിലടക്കപ്പെട്ട തയ്‌സീര്‍ അല്ലൂനിയെ പോലുള്ളവര്‍, അല്‍ ജസീറയുടെ പത്രപ്രവര്‍ത്തകര്‍ സഞ്ചരിച്ച വാഹനം ഓടിച്ചതുകൊണ്ടു മാത്രം കൊല്ലപ്പെട്ട ഡ്രൈവര്‍ റഷീദ് വാലിയെ പോലുള്ളവര്‍... ഇങ്ങനെ എത്രയോ പേര്‍ തങ്ങളുടെ ജീവനും യുവത്വവും നല്കിയാണ് അല്‍ ജസീറയെന്ന ലോകപ്രശസ്തമായ ചാനല്‍ കെട്ടിപ്പൊക്കിയത്.



അല്‍ ജസീറയുടെ ചരിത്രം

അറേബ്യന്‍ ഉപദ്വീപ് എന്ന അര്‍ഥം കുറിക്കുന്ന അറബി പദമാണ് അല്‍ ജസീറ എന്നത്. 1996 നവംബര്‍ ഒന്നിനാണ് പ്രതിദിനം ആറ് മണിക്കൂര്‍ നേരമുള്ള പ്രക്ഷേപണത്തോടെ അല്‍ ജസീറ ആരംഭിച്ചത്. 1998ല്‍ ഇറാഖില്‍ നടത്തിയ ഓപറേഷന്‍ ഡെസേര്‍ട്ട് ഫോക്‌സ് ആണ് അല്‍ ജസീറയെ മാധ്യമ ലോകത്ത് ശ്രദ്ധേയമാക്കിയത്. അമേരിക്കയും ബ്രിട്ടണും ചേര്‍ന്ന് ഇറാഖില്‍ നടത്തിയ കിരാതമായ ബോംബാക്രമണത്തിന്റെ ദൃശ്യങ്ങള്‍ പകര്‍ത്താന്‍ ലോകത്ത് ഒരേയൊരു ചാനലിന്റെ റിപ്പോര്‍ട്ടര്‍മാരും ക്യാമറാമാന്മാരും മാത്രമാണ് ഉണ്ടായിരുന്നത്- അല്‍ ജസീറ മാത്രം. ലോകത്തെ മുഴുവന്‍ മാധ്യമങ്ങളും ഓപറേഷന്‍ ഡെസേര്‍ട്ട് ഫോക്‌സിന്റെ ദൃശ്യങ്ങള്‍ പുറത്തുവിട്ടത് അല്‍ ജസീറയുടെ പകര്‍പ്പുകള്‍ കടമെടുത്തായിരുന്നു. അല്‍ ജസീറയുടെ ലോഗോയോടു കൂടിയ ദൃശ്യങ്ങള്‍ ലോകം മുഴുവന്‍ പ്രക്ഷേപണം ചെയ്യപ്പെട്ടതോടെ ആളുകളുടെ ശ്രദ്ധയില്‍ ചാനലെത്തി. പുതിയ ചാനലിനെ കുറിച്ച് ലോകം അറിഞ്ഞ ത് അങ്ങനെയായിരുന്നു.
1999ല്‍ മുഴുസമയ വാര്‍ത്താ ചാനാലായ അല്‍ ജസീറ തൊട്ടടുത്ത വര്‍ഷം ഫലസ്തീനിലെ രണ്ടാം ഇന്‍തിഫാദ ലോകത്തിനു മുമ്പില്‍ കാണിച്ചുകൊടുത്തു. ലോകത്തെ ഞെട്ടിച്ച് അഫ്ഗാനിസ്ഥാന്‍ മലമടക്കുകളില്‍ കഴിഞ്ഞിരുന്ന ഉസാമാ ബിന്‍ ലാദിന്റെ ടേപ്പുകള്‍ പുറത്തുവിട്ടത് 2001 ഒക്‌ടോബറിലായിരുന്നു. 2001ലെ കാബൂള്‍ ആക്രമണത്തിന്റെ ദൃശ്യങ്ങള്‍ സംപ്രേഷണം ചെയ്യാനും അല്‍ ജസീറയ്ക്ക് കഴിഞ്ഞു. കാബൂള്‍ ആക്രമണം പോലുള്ള ഏറെ ദുഷ്‌ക്കരമായ യുദ്ധത്തില്‍ അല്‍ ജസീറയ്ക്ക് മാത്രമായിരുന്നു യുദ്ധമുഖത്ത് റിപ്പോര്‍ട്ടര്‍മാരും ക്യാമറാമാന്‍മാരും ഉണ്ടായിരുന്നത്.
2003ല്‍ ബഗ്ദാദ് ഓഫിസിനു നേരെ നടന്ന ആക്രമണമാണ് റിപ്പോര്‍ട്ടര്‍ താരിഖ് അയ്യൂബിന്റെ ജീവനെടുത്തത്.  1996ല്‍ നിന്നും 2012ലേക്ക് എത്തുമ്പോഴേക്കും വന്‍ കുതിച്ചു ചാട്ടമാണ് ചാനല്‍ നടത്തിയത്. അറബി ചാനല്‍ മാത്രമായി പ്രവര്‍ത്തനം തുടങ്ങിയ അല്‍ ജസീറയ്ക്ക് നെറ്റ്, സ്‌പോര്‍ട്‌സ് ചാനല്‍, ലൈവ് ചാനല്‍, ചില്‍ഡ്രന്‍സ് ചാനല്‍, അല്‍ ജസീറ ഇന്റര്‍നാഷണല്‍, ഡോക്യുമെന്ററി, ട്രെയിനിംഗ് ആന്റ് ഡവലപ്‌മെന്റ് സെന്റര്‍ തുടങ്ങി നിരവധി ചുവടുവെയ്പ്പുകള്‍ നടത്താന്‍ സാധിച്ചു.

അഭിപ്രായവും എതിരഭിപ്രായവും

സ്വന്തം അഭിപ്രായങ്ങള്‍ക്ക് മാത്രമല്ല, എതിരഭിപ്രായമങ്ങള്‍ക്കും അല്‍ ജസീറ ഏറെ വിലകല്‍പ്പിക്കുന്നുണ്ട്. അവരുടെ ആപ്തവാക്യം തന്നെ അതാണ് സൂചിപ്പിക്കുന്നത്: ഠവല ഛുശിശീി മിറ വേല ീവേലൃ ീുശിശീി.  അഭിപ്രായങ്ങളും എതിരഭിപ്രായങ്ങളും തുറന്ന് രേഖപ്പെടുത്താന്‍ അല്‍ ജസീറയ്ക്ക് വില നല്‍കേണ്ടി വന്നത് അത്‌വാര്‍ ബഹ്ജതിന്റേയും താരീഖ് അയ്യൂബിനേയും പോലുള്ള പത്രപ്രവര്‍ത്തരുടെ ജീവനായിരുന്നു; തയ്‌സീര്‍ അല്ലൂനിയേയും സമി മുഹിയുദ്ദീന്‍ മുഹമ്മദ് അല്‍ ഹാജിനേയും പോലുള്ളവരുടെ യുവത്വമായിരുന്നു.

അത്‌വാര്‍ ബഹ്ജത്



2003ലെ ഇറാഖ് യുദ്ധത്തില്‍ ടെലിവിഷന്‍ പ്രേക്ഷകര്‍ക്ക് പരിചിതമായിരുന്ന മുഖമായിരുന്നു അത്‌വാര്‍ ബഹ്ജതിന്റേത്. ഒരു വാര്‍ത്ത ശേഖരിച്ചുകൊണ്ടിരിക്കെ 2006 ഫെബ്രുവരിയിലായിരുന്നു അത്‌വാര്‍ ബഹ്ജത് കൊല്ലപ്പെട്ടത്. കേവലം 30 വയസ്സായിരുന്നു കൊല്ലപ്പെടുമ്പോള്‍ ഈ ഇറാഖി പത്രപ്രവര്‍ത്തകയുടെ പ്രായം. അത്‌വാര്‍ ബഹ്ജതും ക്യാമറാമാനും അടങ്ങുന്ന നാലംഗ സംഘത്തെ വളഞ്ഞ ജനക്കൂട്ടം അത്‌വാറിനെ പിടിച്ചുകൊണ്ടുപോയി കൊലപ്പെടുത്തുകയായിരുന്നു.


താരീഖ് അയ്യൂബ്



അത്‌വാര്‍ കൊല്ലപ്പെടുന്നതിന് മൂന്ന് വര്‍ഷം മുമ്പ്, 2003 ഏപ്രിലിലാണ് താരീഖ് അയ്യൂബ് കൊല്ലപ്പെട്ടത്. ബഗ്ദാദില്‍ അമേരിക്ക നടത്തിയ ബോംബാക്രമണമാണ് താരീഖിനെ ഇല്ലാതാക്കിയത്. 2003 ഏപ്രില്‍ എട്ടിന് തന്റെ രണ്ടാം ക്യാമറാ യൂണിറ്റിനോടൊപ്പം അമേരിക്കയും ഇറാഖും തമ്മിലുള്ള യുദ്ധം അല്‍ ജസീറയുടെ ബഗ്ദാദ് ഓഫിസിനു മുകളില്‍ നിന്നും പകര്‍ത്തിക്കൊണ്ടിരിക്കെയാണ് രാവിലെ ഏഴേമുക്കാലോടെ അമേരിക്കന്‍ വിമാനം ഓഫിസിനു നേരെ തിരിഞ്ഞ് ആക്രമണം നടത്തിയത്. 1968ല്‍ കുവൈത്തില്‍ പിറന്ന താരീഖ് അയ്യൂബ് കോഴിക്കോട് സര്‍വ്വകലാശാലയില്‍ നിന്നാണ് ഇംഗ്ലീഷില്‍ ബിരുദാനന്തര ബിരുദം കരസ്ഥമാക്കിയത്.

സമി മുഹിയുദ്ദീന്‍ മുഹമ്മദ് അല്‍ ഹാജ്



സുഡാനിയായ സമി അഫ്ഗാനിസ്ഥാനിലെ സംഭവ വികാസങ്ങള്‍ പകര്‍ത്തിക്കൊണ്ടിരിക്കെയാണ് 2001 ഡിസംബര്‍ 15ന് പാകിസ്താന്‍ പട്ടാളത്തിന്റെ പിടിയിലകപ്പെട്ടത്. തുടര്‍ന്ന് അദ്ദേഹത്തെ ഗ്വാണ്ടനാമോ തടവറയില്‍ അടക്കപ്പെടുകയായിരുന്നു. ആറര വര്‍ഷക്കാലമാണ് സമി ഗ്വണ്ടനാമോയില്‍ കഴിച്ചു കൂട്ടിയത്. യാതൊരു കുറ്റവും ആരോപിക്കപ്പെടാതെ 2008 മെയ് ഒന്നിന് സമി ജയില്‍ മോചിതനായി. സമിയെ കുറിച്ച് പ്രിസണര്‍ 345 എന്ന പേരില്‍ അഹമ്മദ് ഇബ്രാഹിം ഒരു ഡോക്യുമെന്ററി ചെയ്തിട്ടുണ്ട്.

തയ്‌സീര്‍ അല്ലൂനി



2001 സെപ്തംബര്‍ 11ന് അമേരിക്കയിലെ വേള്‍ഡ് ട്രേഡ് സെന്റര്‍ ആക്രമിക്കപ്പെട്ടതോടെ ലോകം ശ്രദ്ധിച്ച ഉസാമാ ബിന്‍ ലാദനുമായി അഭിമുഖം നടത്തി ശ്രദ്ധേയനായ പത്രപ്രവര്‍ത്തകനാണ് തയ്‌സീര്‍ അല്ലൂനി. ലോക വ്യാപാര കേന്ദ്രത്തിന് നേരെ ആക്രമണം നടന്ന് ഒരു മാസത്തിനകം തന്നെ തയ്‌സീറിന്  ഉസാമയുമായി അഭിമുഖം നടത്താന്‍ സാധിച്ചു. 2001 ഒക്‌ടോബര്‍ 11നാണ് തയ്‌സീര്‍ അല്ലൂനി ഉസാമയുമായി കൂടിക്കാഴ്ച നടത്തിയത്. സിറിയയില്‍ ജനിച്ച അല്ലൂനി സ്‌പെയിന്‍ പൗരത്വം സ്വീകരിക്കുകയായിരുന്നു.  2004ലെ മാഡ്രിഡ് ട്രെയിന്‍ ബോംബാക്രമണത്തെ തുടര്‍ന്ന് അല്ലൂനിക്കു നേരെ കുറ്റം ചുമത്തപ്പെടുകയും ഏഴ് വര്‍ഷം തടവിന് വിധിക്കപ്പെടുകയും ചെയ്തു. 2006ല്‍ ആരോഗ്യസ്ഥിതി വഷളായതിനെ തുടര്‍ന്ന് ജയില്‍ മോചിതനായെങ്കിലും വീട്ടുതടങ്കലില്‍ അടക്കപ്പെട്ടു. തുടര്‍ന്ന് 2012 മാര്‍ച്ചിലാണ് തയ്‌സീര്‍ അല്ലൂനിയുടെ ശിക്ഷാ കാലാവധി അവസാനിച്ചത്. വീട്ടുതടങ്കലില്‍ നിന്നും മോചിതനായ തയ്‌സീര്‍ അല്ലൂനി ഇപ്പോള്‍ ദോഹയിലാണ് കഴിയുന്നത്.







അല്‍ ജസീറ ചാനലില്‍ ഇന്ത്യക്കാര്‍ ഉള്‍പ്പെടെ 52 രാജ്യങ്ങളിലുള്ള രണ്ടായിരത്തോളം പേര്‍ ജോലി ചെയ്യുന്നുണ്ട്. മുസ്‌ലിംകള്‍ക്കു പുറമേ കൃസ്ത്യാനികളും ഹിന്ദുക്കളും ഉള്‍പ്പെടെയുള്ള മലയാളികള്‍ ഈ ചാനലിലെ ജീവനക്കാരാണെന്ന് പറഞ്ഞാല്‍ അത്ഭുതം തോന്നിയേക്കും. അല്‍ ജസീറയുടെ പ്രശസ്തയായ ഒരു വാര്‍ത്താ വായനാക്കാരി മലയാളിയാണ്- ദിവ്യാ ഗോപാലന്‍.

ചിത്രങ്ങള്‍: ഷാഹുല്‍ ഹമീദ്


Saturday, August 19, 2017

മരുഭൂമി കണ്ടുതുടങ്ങുമ്പോള്‍


മുമ്പില്‍ കടല്‍പോലെ മരുഭൂമി.
എത്രകണ്ടാലും കൊതി തീരാത്ത കടലിന് ഇളംനീലയും കടുംനീലയുമൊക്കെ നിറം. ലോകമുണ്ടായി ഇത്രയും കാലമായിട്ടും മനുഷ്യര്‍ക്ക് കൂട്ടിയൊരുക്കാന്‍ കഴിയാത്ത പോലുള്ള നീലയുടെ വിവിധ വകഭേദങ്ങള്‍....
കണ്ണെത്താ ദൂരത്തോളം പരന്നു കിടക്കുന്ന മരുഭൂമിക്ക് എന്തുനിറം? മഞ്ഞ, മഞ്ഞയുടെ വിവിധ വകഭേദങ്ങള്‍, ചാരനിറം, ഇന്നുവരേയും മനുഷ്യര്‍ കണ്ടെത്തിയിട്ടില്ലാത്ത വിവിധ നിറങ്ങള്‍...
കടലും മരുഭൂമിയും ഒരുപോലെ. എത്ര കണ്ടിട്ടും മതിവരാത്ത അനുഭൂതി......
കടല്‍ കണ്ടാസ്വദിക്കുന്നവന് അത് ആഹ്ലാദം പകരും. കടലില്‍ പെട്ട് രക്ഷയില്ലാതെ ഉഴലുന്നവനോ?
മരുഭൂമി കാണാന്‍ പോകുന്നവന് അതൊരു സാഹസികതയുടെ സന്തോഷമാണ്. മരുഭൂമിയില്‍ ദിക്കറിയാതെ പെട്ടുഴലുന്നവന് പിന്നെ ജീവിതം കണ്ടെത്താനായെന്ന് വരില്ല.
കടലില്‍ വെള്ളം കുടിച്ച് മരിക്കാം. മരുഭൂമിയില്‍ ശരീരത്തിലെ വെള്ളം വാര്‍ന്നു തീര്‍ന്ന് മരിക്കാം. കടല്‍ കൊടുക്കുന്നത് മരുഭൂമി തിരിച്ചെടുക്കുന്നു. കടല്‍ സൗന്ദര്യത്തിന്റെ അഗാധതയുണ്ട് മരുഭൂമിക്കും. അപ്പോള്‍ ഇവര്‍ക്കു തമ്മില്‍ ബന്ധമുണ്ടോ? ഉണ്ടാവണം. അറേബ്യന്‍ ഗള്‍ഫിലെങ്കിലും കടലും മരുഭൂമിയും സഹോദരങ്ങളായിരിക്കണം.
ക്ഷയിച്ചു പോയ കടല്‍ തറവാടായിരിക്കുമോ മരുഭൂമി... ചിലപ്പോള്‍ അങ്ങനെയാവാം. എത്ര ക്ഷയിച്ചാലും മരുക്കുന്നുകളുടെ വേരുകളോടാത്ത അഗാധതയില്‍ നിധിയൊളിപ്പിച്ച ഭൂതമാണ് മരുഭൂമി. കടലും അങ്ങനെ തന്നെ. നിധിയുടെ ശേഖരം ഒളിപ്പിച്ചു വെച്ച മരുഭൂ സഹോദരി.

***** ***** ***** ***** ***** ***** ***** ***** ***** ***** *****

മുമ്പില്‍ വിശാലമായ മരുഭൂമിയാണ്. ആദ്യം കണ്ടപ്പോള്‍ പരന്നുകിടക്കുകയാണെന്ന് ഭൂമിയെന്ന് മരുപ്രദേശം തെറ്റിദ്ധരിപ്പിച്ചു. അകത്തേക്കകത്തേക്ക് പോകുന്തോറും സന്ദേഹത്തിന്റെ വലിയൊരു മലയാണ് മുമ്പില്‍ പ്രത്യക്ഷപ്പെട്ടത്. കാറ്റടിച്ച് കുന്നുകൂട്ടിയ മണല്‍. ഓരോ മണല്‍ തരിയുമെടുത്ത് ആരോ പൊന്നിന്‍ നിറം ചാര്‍ത്തിക്കൊടുത്തിട്ടുണ്ട്. കൈയ്യിലെടുത്താല്‍ കൊതിപ്പിക്കുന്ന നേര്‍മ. ചീറിപ്പായുന്ന വാഹനത്തിന് പിറകില്‍ മണല്‍ തെറിച്ചു വീഴുന്നുണ്ട്. ഓരോ കുന്നിനപ്പുറവും മറ്റൊരു മണല്‍ കുന്ന്. അതിസാഹസികരും പ്രഗത്ഭരുമായ ഡ്രൈവര്‍മാര്‍ക്കു മാത്രം വാഹനം ഓടിച്ചു കയറ്റാന്‍ കഴിയുന്ന മരുക്കുന്ന്. ശരിയായ പരിശീലനം കിട്ടിയില്ലെങ്കില്‍ വാഹനം പൂഴിയില്‍ പൂണ്ടുപോകും. കുത്തനെ കയറ്റിയും ഇറക്കിയും ഓരോ മരുക്കുന്നും കടന്നുപോകുമ്പോള്‍ അതിനപ്പുറത്ത് മറ്റൊരു മണല്‍ കൂന.
ശ്രദ്ധിച്ച് വാഹനമോടിച്ചില്ലെങ്കില്‍ രണ്ട് മണല്‍ കൂനകള്‍ക്കിടയിലെ ചതിക്കുഴികളില്‍ പെട്ടുപോകാന്‍ സാധ്യതയുണ്ട്. ചതിക്കുഴിയില്‍ ഇറങ്ങിപ്പോയാല്‍ പിന്നെ വാഹനം രക്ഷപ്പെടുത്തിയെടുക്കാന്‍ കുറച്ച് പ്രയാസപ്പെടേണ്ടി വന്നേക്കും. ചിലപ്പോള്‍ വാഹനത്തിലിരിക്കുന്നവര്‍ക്ക് പരുക്കേല്‍ക്കുകയും ചെയ്യും.
ഗള്‍ഫിലെത്തുന്നതുവരെ കടലും മരുഭൂമിയും തൊട്ടുകിടക്കുമെന്ന് അറിഞ്ഞിരുന്നതേയില്ല. മരുഭുമിക്ക് കടലും കടലിന് മരുഭൂമിയും അലര്‍ജിയാണെന്ന് നിനച്ചിരുന്നത്. പക്ഷേ, വിമാനം ഗള്‍ഫിന്റെ മേലാപ്പിലെത്തിയപ്പോഴേ തിരിച്ചറിഞ്ഞു, ഇവിടെ മരുഭൂമിയോട് കടല്‍ കിന്നാരം പറയുന്നുണ്ട്!!
കടലാഴങ്ങളുടെ അഗാധത മരുഭൂമിക്കുമുണ്ട്. കടല്‍ തിരയുടെ നിമ്‌നോന്നതികള്‍ മരുക്കുന്നുകള്‍ സൃഷ്ടിക്കുന്നുണ്ട്.
അറിയുമോ? ലോകത്ത് രണ്ടേരണ്ട് സ്ഥലത്ത് മാത്രമേ മരുക്കുന്നുകള്‍ നേരെ കടലിലേക്ക് ചേരുന്നുള്ളു. അതിലൊന്ന് ഖത്തറിലാണ്. അങ്ങനെ കടലും മരുഭൂമിയുടെ കുന്നുകളും ചെന്നുചേരുന്നിടത്താണ് ഇപ്പോള്‍ നില്‍ക്കുന്നതെന്ന് ആലോചിച്ചപ്പോള്‍ വല്ലാത്ത അഭിമാനം തോന്നി. ലോകത്ത് എത്രപേര്‍ക്ക് ലഭിക്കും ഇത്തരമൊരു ഭാഗ്യം!
അംഗീകാരം എന്ന ചിത്രത്തില്‍ ബിച്ചു തിരുമലയുടെ രചനയ്ക്ക് എ ടി ഉമ്മര്‍ സംഗീതം നല്കി യേശുദാസ് ആലപിച്ച ഒരു ഗാനമുണ്ട്: 'നീലജലാശയത്തില്‍' എന്നു തുടങ്ങുന്ന ഗാനം. പാട്ടിലെ വരിയിലേതു പോലെ കടലില്‍ വെള്ളം മനോഹരമായ നീലയിലായിരുന്നു. കടലിനപ്പുറം, ദൂരെ സഊദി അറേബ്യ കാണാം. മൊബൈലില്‍ ഇടക്കിടെ മാറി വരുന്ന റേഞ്ചില്‍ ഖത്തറിനോടൊപ്പം സഊദിയും ദുബൈയുമുണ്ട്.
ദോഹയില്‍ നിന്നും വക്‌റയും കടന്ന് ഉംസഈദില്‍ നിന്നാണ് മരുഭൂമിയിലേക്ക് കയറിപ്പോയത്. കുറ്റിച്ചെടികളും ഉറച്ച മണലുമുള്ള ആദ്യത്തെ കുറച്ചു ഭാഗം കഴിഞ്ഞപ്പോള്‍ തന്നെ മരുഭൂമി തനിസ്വരൂപം കാണിച്ചു തുടങ്ങിയിരുന്നു. ചുട്ടുപൊള്ളുന്ന സൂര്യന്‍ ആകാശത്ത്. സൂര്യനോട് മത്സരിക്കാന്‍ കടല വറുക്കാനുള്ള ചൂടുമായി മരുഭൂമി താഴെ. വഴി തെറ്റിക്കാനും പേടിപ്പിക്കാനും മണല്‍ കുന്നുകള്‍ മുമ്പില്‍. മരുഭൂമിയിലെ ചതിക്കുഴികളെ കുറിച്ചും മണല്‍ക്കുന്നുകളെ കുറിച്ചും കൃത്യമായ ധാരണയില്ലാതെയാണ് പോകുന്നതെങ്കില്‍, ഉറപ്പ് ചതിക്കപ്പെടും.
ദിക്കും ദിശയുമറിയാതെ വേവലാതിപ്പെടുമ്പോഴാണ് ആടുജീവിതങ്ങളുടെ കഷ്ടപ്പാടുകള്‍ മനസ്സിലാവുക. മരുഭൂമിയില്‍ ആളുകള്‍ ഏറെ പോകുന്ന വഴികളില്‍ പാമ്പുണ്ടാവില്ല. പക്ഷേ, മരുഭൂമിയുടെ അകത്തേക്ക് പ്രവേശിക്കുന്തോറും പാമ്പിനെ കണ്ടുമുട്ടാനും സാധ്യതയുണ്ട്. ആടുജീവിതത്തില്‍ വലിയ ആടുകളെ തിന്നാനെത്തുന്ന പാമ്പുകളെ പോലുള്ളവ കണ്ടെത്തിയേക്കാം. പൂഴിയില്‍ പതിഞ്ഞ് കിടക്കുന്ന അവയെ തിരിച്ചറിയാന്‍ കഴിഞ്ഞെന്ന് വരില്ല.
പ്രാകൃത ദിനോസറുകളുടെ കാലംതെറ്റി പിറന്ന കുട്ടികളെ പോലെ ഓന്തുകളും ഉടുമ്പുകളും. മരുഭൂമിയുടെ നിറം ദേഹത്ത് പകര്‍ന്ന് തലയുയര്‍ത്തി നോക്കുന്ന അവയെയൊന്നും പെട്ടെന്ന് കണ്ടെത്താന്‍ കഴിഞ്ഞെന്ന് വരില്ല. വാഹനത്തിന്റെ ഇരമ്പല്‍ ശബ്ദം അവ പൂഴിയിലൂടെ കേള്‍ക്കുന്നുണ്ടാകുമോ? ഉണ്ടാകുമായിരിക്കും. അല്ലെങ്കില്‍ അവ വാഹനങ്ങള്‍ കാണുന്നുണ്ടാകണം. ദൂരെ വണ്ടിയോടുമ്പോള്‍ തന്നെ അവ സ്വന്തം കുഴികളിലേക്ക് ഓടി രക്ഷപ്പെടാന്‍ ശ്രമിക്കുന്നുണ്ട്.
കാണുമ്പോള്‍ തരിശാണെന്ന് തോന്നിക്കും. പക്ഷേ, എത്രതരം ജീവജാലങ്ങളാണ് മരുഭൂമിയിലും വസിക്കുന്നത്. കണ്ടാലല്ലാതെ കേട്ടാല്‍ അവ വിശ്വസിക്കാന്‍ തോന്നണമെന്നില്ല.
***** ***** ***** ***** ***** ***** ***** ***** ***** ***** *****

മരുഭൂമി പിറകില്‍ മറയുകയാണ്. കടല്‍ കാണാന്‍ പോയ കുട്ടിയുടെ അത്ഭുതം മുഖത്തു നിന്നും മാറിയിട്ടില്ല. മരുഭൂമി കണ്ടുതിരിക്കുമ്പോള്‍ പിന്നേയും പിന്നേയും തിരിഞ്ഞു നോക്കാന്‍ തോന്നി. കടല്‍ മാത്രമല്ല, മരുഭൂമിയും അത്ഭുതമാണ്. വിസ്മയത്തിന്റെ മഹാവിസ്‌ഫോടനങ്ങള്‍ അകത്തും പുറത്തും കാത്തുവെക്കുന്ന മഹാത്ഭുതം.

Followers

About Me

My photo
thalassery, muslim/ kerala, India